CANCER VEI LEH AWMPUITUTE TAN ‘FREE CANTEEN’ HAWNGTU LEH MITTHI RUANG A THLAWN LIAU LIAUA PHUR ȚHINTU SIKH PA NGILNEI CHU

  • Sikh ho hi an hnampui chauh nilo, an mihringpuite laka an inpekzohna leh țanpui ngaite țanpui kawngah an hmingțha hle a, an ram zau tak Punjab-ah sawn rilțamin tumah an mu ngailo anti hial a ni..Sikh pachal ngilnei tak Sarbjeet Singh-a chuan kum engemawzat chhung a thlawnin ama motorin mitthi ruang a phur tawh a, cancer vei leh anmnahni awmpuitute tan man chawi lova thingpui leh chhang ei theihna ‘free canteen’ a siam bawk a, Shimla hospital țanpuina’n ‘blood donation camp’ a huaihawt țhin bawk a ni. A hloh chu hlepah chhiarin țhahnemngai takin he a mihringpuite chunga rawngbawlna ropui tak hi vawiin thlengin a la thawk ngat ngat a ni.

    Driver hlawh nei-a chhawr ho pawhin mitthi ruang an phur hreh êm êm hunlai leh sawrkar damdawi in-in ambulance an la kawl mumal loh lai hun ata tawh, dere pawh phut lovin damdawi in ațangin mitthi ruang an chhungte tan a lophursak țan tawh a, Shimla damdawi ina thisen indaihlohna nasa tak chu vei hlein țanpuinan kum 10 kalta ațang khân ‘blood donation camp’ a lo huaihawt țan tawha,a rawngbawlna huang zauh zelin kum 2 kalta ațang khân Shimla cancer hospitala cancer veiho leh anmahni awmpuitu rethei bakberh tak tak te’n man chawi lova a thlawn liau liaua an inhnawhpuarna tur thingpui dawr a hawng ráwih bawk a ni.

    Mahni hna țul pawh thawk țhațhum hman lova, midang țanpui reng renga a hmanhlel reng țhin avangin a țhenrual hote’n “Vela Bobby” tiin an ko țhin a, “Vela” tih hi Punjabi țawng a ni a, a awmzia chu “mi tlawngawl, hun awl ngah lutuk” tihna a ni awm e..”Shimla mite te chuan Vela Bobby tiin min ko țhina, ka nu pawhin chutiang chuan min ko. Ka haw lova, chutih ahnekin kan pathianin ka mihring puite chunga rawngbawlna hun nei thei tura ‘vela’-a min siam hi ka lawm tak meuh meuh zawk a ni” a ti.

    TBI in an kawmnaah a rawngbawlna zinkawng bulțan dan sawiin, “Kum 12 kalta ațang khân tualchhung Gurudwara-in ‘blood donation camp’ an huaihawtnaah ka inpe(volunteer)ve chawta, chuta țang chuan bul ka țan chho a ni. Hun kal zelah Gurudwara chuan blood donation camp chu zawi zawiin an tawp sana, mahse keima mimalin hma ka la chho ta ráwih a ni” “Shimla hi Himachal Pradesh capital anih angin, damdawi ina inentir turin state hmun hrâng hrâng ațangin an pankhawm ruih ruih renga, Shimla damdawi in pawimawh ber pahnih Indira Gandhi Medical College (IGMC) leh Kamala Nehru hospital te chuan thisen indaihlohna an tawk nasa thei hle. Chuvang chuan he blood donation camp hi ka kalpui hram hram a țul tih ka hrechiang êm êm a ni” a ti.
    .
    Chawlhni apiangin blood donation camp hi a buatsaih ziah țhina, khel lovin kum 11 chhung kalpui tawhin thisen unit 20,000 vel zet chu damdawi in tan a hmuhchhuah sak tawh a ni. State chhunga blood bank ho zawng zawngin a phone no an kawl deuh veka, rikrum thilah innghah na’n takan hmang chawt hlawm a ni ber..Kum 8 kalta ațang khân nikhata darkar 24 chhung inhawngin, a thlawnin ‘funeral van service’ a pechhuak bawka, zing, chhun, zan engtik hunah pawh mitthi an vuiliamna hmun tura phur turin a biak theihin a awm renga, chechhuak turin phûr takin a inpeih at reng a ni. Motor a kawl phawt chuan a la hnial chhin ngai lova, damdawi in mitthi dahnaa ruang hlawm loh țawih rimchhe chhe tawh hle pawh vuiliam turin a phur mai zel.
    .
    Tihian sawiin, “Khatih hunlai khan damdawi in-in mitthi phurhna tur motor a nei lova, damdawi in ațanga thlanmual chu a thui angreng hle a. Chuvang chuan, mitthi chhung rethei harsa ve tak tak te tan vuiliamna hmun phurh thlenna tur motor ngaihtuah chu thil hautak tak a ni. Tlai dar 5 a pelh hnu lek phei chuan ruang phurhna motor khawchhungah hman tur a awm tawh ngai lo. Chutiang teh nuai chu dinhmun anih avangin, khatih hunlai khan Guru Nanak Sewak Society mitthi phurhna motor ka khalh țhin lai tak a lo ni bawk nen, pui turin ka rilru ka siam fel ta ani. Tichuan, 2012 khán mipui thawhlawm kaltlangin keima pualin free a ka service na tur ‘van’ thar ka nei ve ta a, vawiin thlengin ruang 5,000 zenzawn chu ka lo phur ve tawh a ni. Hna țihbaiawm tak a ni a, ka thawhna lamah thil tam tak ka inzir chhuak a, a pawimawhzia ka hrechianga chu chuan thawk zel turin min tichakin ka rilru min siam tir sauh sauh a ni. Ka NGO, Almighty Blessings ka din hnua Pathianin ka kovah a nghah-ah ka ngai nghet hmiah a ni.” ati.
    .
    2014 kum khân a NGO hming Almighty Blessings chu banner-ah hmangin Shimla-a cancer hospital awmchhun kawtkaiah chuan damlo leh anmahni awmpuitute’n man chawi lova an ei-in na turin ‘free canteen’ a hawng zui bawka, damlo rethei bakberh ve tak tak te leh anmahni awmpuitu thlengin a thlawn liau liauin thingpui leh eitur a pechhuak țhin a ni..”State hmun hrang hrang ațangin leh thingtlang kilkhawr tak tak ațangtein he damdawi in hi an pan khawm ruih ruih țhina, mahse an inhnawhpuarna tur canteen pawh an neilo a ni. Țhenkhat chu an rethei lutuka, chaw chu sawiloh damdawi leina tur takngial pawh an neilo a, chuvang chuan engemaw tak tihsak ka duh ta a ni. Ka free canteen hawn hia tirah chuan damlo leh awmpuitu tan bikin a thlawnin thingpui leh biscuit kan pechhuak a, tunah erawh thingpui, biscuit, soup, daliya leh dal-chawal te nitin damlo leh awmpuitute kan hlui țhin tih lawm takin ka sawi thei a ni” a ti.
    .
    Kumin(2016) khân Shimla-a damdawi in lian ber KamalaNehru Hospital-ah pawh ‘free canteen’ dang a hawn belh leh bawka, cancer veite leh awmpuitute riahbuk tur sak saka la tum chêu a ni..Engtinnge heng zozai senso hi a phuhruk theih tih an zawhna chu, “Pheikhawk dawr chhete ka nei ve a, ka rawngbawlna min thlawp țha em emtu ka chhungte nen kan eikhawp chu kan buai bik lo” tiin a chhang a ni..
    .
    2015 kum khân Singh-a hnathawh chanchin hi mipakhatin facebook-ah a post a, darkar 24 chhung lekin likes nuai 2 lawih hmuin leh vawi 10,000 share a ni hman a ni.
    Advertisements
    Aside | This entry was posted in Thu Ngaihnawm and tagged , , . Bookmark the permalink.

    Leave a Reply

    Fill in your details below or click an icon to log in:

    WordPress.com Logo

    You are commenting using your WordPress.com account. Log Out / Change )

    Twitter picture

    You are commenting using your Twitter account. Log Out / Change )

    Facebook photo

    You are commenting using your Facebook account. Log Out / Change )

    Google+ photo

    You are commenting using your Google+ account. Log Out / Change )

    Connecting to %s