THUDIK LEH THUTAK SAWI ANG AW By Lalrozara

Ka FB Wall ah “ Mizoram sorkar Idol Gujarat State “ post ka siam a. Ka post chu FB Group dang leh Whatsa pp Group lamah an lo suan darh a. FB lamah chuan Comments tam tak nen kan discuss a. Ka telve lohna Whatsapp Group lamah erawh post thu kalphung bo thakin, a post-tu keimah Khehpuam thua sawichhiatna comment thenkhat a awm a. Hetiang zawnga sawichhiatna hi Tawngka, FB leh Whatapps lamah a ri zing bawk a, ka ngawi rei tawhin thil kalphung sawifiah ve a tha zawkin ka hria. FB ka Wall atang bawkin kan chhang ang e, FB group, Whatapps group lama lo copy paste leh thei awm se ka lawm ngawt ang, chanchinbu lam pawhin min lo chhuah uar nasa bawka, a tuartu lam side sawifiahna hi an chhuah ve duh ka beisei bawk a ni.

India Medicine (Damdawi) ka motor hmanga phurh a ni, ka motor an man zan hian phone in min rawn hrilh a, “ Engatinge Driver a ruiin mi a su em ni “ tiin ka zawt let a, ka motorin damdawi an phur tih min hrilh a. An manna hmunah kei pawh ka tlan nghal a, ka motor chu man tel lo hram turin ka ngen a. Police Inspector Lalropianga chuan “ Motor kan man tel zel, ni hnih/ ni thum hnuah I motor chu I rawn la chhuak mai dawn nia “ a ti a, ka hawsan ta a ni.

A hnu ni hnih lekah Police Officer pakhat leh Bhavan hotu pakhatin, “ Home Minister in a ni pawh man tel rawh u “ a ti che a nia, “ Anticipatory Bail dil mai rawh “ min ti a. Kei chuan “ Min man telna tur chhan ka hre lo, ka dil duh lo, “ ka ti a. Ka motor hman tir leh midang an man telte pawhin Police hnenah ka tel loh dan leh engmah ka hriatpui loh dan sawiin, Motor kan hman sak mai a ni, tiin an hrilh hlawm.

Chuti chung chuan Police Station ah min ko a, min man chu a lo ni der a (Official leh mi Lal te man an harsat tehlul nen). Motor neitu hla taka awm an man tel vawikhatna a nih ka ring, Police Station ah engmah pawh min zawt lo. Inspector Lalropianga hian khami zan khan zurui chunga Police vau angin min lo sawi daih bawk a, a mantu Police te vauna tawngkam ka chhakchhuak lo chiang hle. ( An lo man tawhte kha an zawtfiah theih ang ) Thi leh thau pawlhin hriselna in a tawrh khawp in Congress MP(Lok Sabha) Official Candidate tling tura ka campaign haw deuhchiah lai a ni a, ka chau em em tih Party a ka thawhpuite pawhin an hrechiang viau, ka taksa na leh sahal lutuk chhawk nan ka thawhpui pakhat Zu inpuiah ka sawm hial. Pu C.L Ruala pawh a chau a, result puan hma hian Delhi ah hahchawl ang kan ti dun a, ticket pawh flight thuhmun kan la ve ve a, kan thlawh dun hma ni chuan kei chu min man ta a ni.

Police Station ah hian thut pawh ka thu peih lo, In lama ka nau hnena thil awmzia ka hrilh chu, a nin ka Statement a tan a ziak a, min chhiar tira a tha e tiin ka sign a, ka Statement leh an lo man tawh ten ka hriatpui loh thu an sawi khan awmzia a nei lo a niang e, Court ah min hruai a, Jail a nawr luh ka ni ta a ni.
Inspector Lalropianga hi hemi hnu lawka Police ho in Methamphetamine an man sa Office atanga lo zawrh chhuah tir chiam a, Zemabawk lama a hnuaia thawk Police pali damdawi lo kheh tir chiamtu chanchinbu lamah pawh lang kha a ni. ( Hemi hnu hian a Ukil hman Chamber-ah kan intawng hlauh a, tawngka dengkhawng takin “ I lo dawthei hle mai “ ka ti a, dawtin phatna a la zawng lehnghal a) A thubuai ah khan Home Minister Pu Lalzirliana leh Police hotu lian lam atangin an chhan bawk a, Anticipatory Bail a la a, Jail a lut lo a ni (Vanglaini ah pawh a lan vek kha)

Ka Motor atanga damdawi mum an man kha Recoset-PS a ni, a neitu ngeiin a siamtu Company atanga a Drug Licencehmanga a chah thu leh Invoice a awm thu a sawi chung pawhin Police chuan Motor neitu thlengin min man tlang vek tho ta a nih chu. Police te hian an manna “Seizure memo” lehkha ah Suspected pseudoephedrine tiin an ziak a, an sawinaah erawh Pseudoephedrine kan man an ti daih thung , an ziah ang hian damdawi rinhleh kan man tih ve mai awm tak a ni. News lam leh mipui pawhin kan lo pawmve ringawt a, News lam pawhin an puanga, an ziaka a diklonasa hle.

Tichuan, ka Motor a phurh damdawi chu Police ten anmahni Forensic Laboratory ngeiah an finfiah a, result-ah “ Pseudoephedrinea tel ( It contains Pseudoephedrine) ” tih a hmuchhuak. Company Pack, damdawi an funna sarang zawng zawng ah Damdawi hming Recoset-PS, contents- Cetrizine Hydrocloride leh Pseudoephedrine bawlhlo chawhpawlh a ni tih a lang sa. India ram khawilai Laboratory ah pawh test se, Science Formula C10, H15, ON-HCI IUPAC (S,S)-2 = Pseudoephedrine hming an vuah hi a chhuak lo ang. Ceterizine emaw Pseudoephedrine ti pawhin a chhuak chuang lo ang, bawlhlo chawhpawlh tawh a ni. Damdawi a bawlhlo telh hming pakhat hi damdawi hming atan an vuah ngai lo.

DAN LEH HRAI- kan fiah tlan nan –

UN Convention on illicit Drugs trafficking thurel chuan ram hrang hrang in Control Substances an puan tur list a siam a, India sorkar pawhin chumi list ang chuan, ND & PS Section 9A ah Central sorkar kutah Controlled Substance puan theihna a pe a, ND & PS definition ( vii) pawhin “ The Central Govt may declare Controlled substances “ tih ziak angin, Ministry of Finance (Department of Revenue) chuan Notification No 1296 (E) Gazette of India, Extraordinary Part II, section 3, Dated 28th December, 1999 chuan Controlled Substance List a puan zingah Pseudoephedrine hi a puang tel ta a ni.

Drugs & Substances te hi Concurrent List an ni a, State sorkarin dan siama Controlled Substances a lo puan chhawn nawn emaw, damdawi leh substances a duh duh a lo puan ve theihna a ziak lang tel lova, Narcotic Control Bureau (NCB) emaw Supreme Court in a lo her danglam theihna Provision pawh a lang lo, “ The Central Gov’t may “ tih a ni.

Mizoram leh hmun dangah pawh, Excise & Narcotic leh Police ten Damdawi @ Khehpuam an tih chu an han man a, ND & PS Act. Section 9A bawhchhia tiin an han charges ta ngawt a. ND & PS Section 9A hi Central sorkar hnena Controlled Substances puang thei tura thuneihna pekna chauh a ni, mimal tuma lo bawhchhiat theih a ni lo. Licence phalna nei lova Pseudoephedrinekawl leh phurh hi Controlled Substance a nihna vang chauha man leh hrem theih a ni.

India ram chhunga Pseudoephedrine telhna ( medicine ) damdawi siam 440 chuang awm mek hi Central sorkar puan Controlled substances list hian a huam tel lo a, UN Convention list pawhin a huam tel lo. Huam tel nise damdawi siamtu Company te hian pseudoephedrine telna damdawi an siam mai mai thei lovang a, India mipui 125 crore zet hi hritlang leh khawsik lam hawi damlohna kawngah kan buai nasa thei viau ngei ang. Chuvang chuan Damdawi atana pseudoephedrine pawlh hi chu Controlled Substances ah puan tel a harsa viau ang.

Damdawi hrang hrang 440 chuang hming hrang hrang vuahte hi pseudoephedrin tiin an man a, ND & PS chhungah senglut an han tum viau thin, Forensic Sciences hmangin an han test a pseudoephedrine nihna Identity Science Formula kha a chhuak thei si lo va, a hlang/a fir test nise formula a chhuak ang. Entirnan-Tui-Thingpuife- Chini- Bawnghnute chawhpawlh hi Thingpui a ni, Thingpui chu test se Science formula atangin Chini formula ringawt a rawn chhuak hauh lovang. Hei hi India ram khawi Court ah pawh damdawi Khehpuam dinhmun a ni a, ND & PS chhunga khunga hremna chelek theih a ni lo. Licence nei lova damdawi hmanga sumdawng leh lo phurte, Branded tidanglama lo khawih chingpen te erawh Dan in a hrem thin.

Mizoram Police te chuan an Forensic test report hmu reng chung chuan an thil man chu enge a nihna an sawifiah duhlo a, “Suspected Pseudoephedrine tam deuh man sak an ni, ND & PS Act 9A hmangin Pseudoephedrinehi Controlledsubstances a puan a ni, Myanmar rama an hralh tur a ni, chuvang chuan ND & PS 25A hmanga hrem theih an ni”, tiin Chargesheet ah chuan an ziak a. Documents an man tel Drugs Wholesale Licence, Consignment documents, Damdawi neitu Bank Account bakah a nu leh pa Bank Account an man sak tel te nen ND & PS Judge hnenah an thehlut ta a ni. Khami zana ka motor in a lo phurh damdawi kha S.Laldini of Mission Veng, Zoliansangi of Bungkawn Vengthar, Lalrinsangi of Ramhlun ‘N’ ten lei tuma an indawr lai a Police man a ni a. Heng hmeichhe pathum hi Police ho chuan “ Lei tum chauh an ni “ tiin Jail atangin an discharge thuai a, an ni hian khawnge hralh an tum tih chu Police ten zawhfiah mai awm tak a ni, an ni thu leh hla chargesheet ah ziahlan a awm lo, Inspr Lalropianga leh a Police team Zemabawk lama damdawi khehtute nen Organisation khat an ni ti ila kan fiah mai awm e.

Kei kha Case I/O hian Pu Zara inhnamhnawihna hi ka hmulo, charges ngaihna ka hrelo, Case atang hian discharges ka duh a ti chung chungin, an hotu lian leh chumite chungathuneitu ten min hmer tela min hrem an duh tlat si avangin “ A Motor illegal drugs phurh nan a hman tir, mi sawm chuang fuihpawrhna – IPC section – 117 “ hmangin min han charge a, ND & PS 25A hmanga hrem tur a ni, min ti tel bawk. IPC – 117 daiha min charges na hian Ukil ho a ti nui nasa hle. Ni e, min puh mualpho tumin Jail ka luh hnu ah, ka chhungte tithlabarin ni tlak tawhhnu, zanthimah kan in chhung leh ka Godown thlengin Pseudoephedrine awm ngei nia ngaiin Police ten an lo check chiam a, Sorkar hian Police hmang in beihpui a thlak a, Special Investigation Team hial an din a. Mahse, min charges na tur an hmuzo ngang si lo a, IPC lam nen an tang pawlh ta nuaih mai a ni, Police Officer tam tak chuan zahthlak an tih thu min hrilh a, pawi an ti tak tak pawhin ka hria. A bul chu Sorkar bakah Congress Party chhunga hotu thenkhat thuneihna ruihchilhte pawi hi ka lo khawih nasa em a ni. Chulai Politics tenawm chu Congress member/Workers rilru tha tam tak min lainat ngawih ngawihtute hian an hmupha lo, Workers mahni hmasial leh verther tam tak karah an tan hmuh fiah a harsa ang, ka la sawi lang lo bawka ka dem lem lo e, ( Mipui min nawr dan a zirin helai hi chu hun dangah, a sei duh em mai )

Case trial chho turin Judge Pu K.L Liana’n chargesheet leh documents te an endik a, ND & PS Act mai duhtawk lovin Drugs & Cosmetic Act lam khawihtu, Drugs Licence pe theitu Drugs Controller of Mizoram pawh Court chhungah punin Drugs Licence leh damdawi te a endik tir a. ( Pu K.L Liana hi a fimkhur em vang leh Dan hmanga rorelna dik a duh em vanga Drugs Controller hi pun a ni ngei ang) Ka motor hmanga phurh damdawite chu Drugs Licence in a huam chhung vek, Damdawi quality tha leh India Companyrintlak siam,a ni tih a finfiah a. Dan bawhchhiatna lai zawngtu Procecutor lamin tanchhan tur an hmu lo, Dan kaihhnawih nilo an mahni rilru atanga object na thunawi te te chu an sawi.

Kan Ukil thiam tak Pu Laltanpuia Hmar pawhin Pseudoephedrine telh damdawi Hatric-3, Coscold, Actifed, Claritin-D te phawrhin, heng pawh hi pseudoephedrine telh a ni, Damdawi dawr tinah an kawl teuh in man ve dawn em? Danin Pseudoephedrinea tih loh leh Forensic test report in Pseudoephedrine a tih loh hi, he Court hmaah hian Pseudoephedrine a ni tih finfiah rawh u, tiin Prosecutor lam a challenge a, an chhang thei lo. Kan thubuai hi Ukil dang pawhin Court Room khat tlatin an ngaithla a, an lo nui leh hak thin.

Judge Pu K.L Liana’n “ Zu pawh Licence hmangin Truck trip in a lo lut a, in lo man em ? Damdawi leina Drugs Licence pek a ni a, a leia lo man sak leh si tur em ni ? Court hmanga Dan bawhchhiatna ka hmu lo, damdawi neitu hian eng Dan mah bawhchhiatna a nei lo, he thu hi ngaihtuah zel ngaihna a awm lo a, damdawi mante pawh a neitu hnenah Court hian a pe kir leh nghal e, ti in kan thubuai rapthlak tak chu a tawp ta ni. Court in Police man sa a pek kir tirna hian thil awmzia chu a hrilhfiah awm e. Mahse, Damdawi an man zawng zawng 15 packs atang khan 2 packs a kimlo ta tlat, Malkhana in-charge Police Officer hnen atangin a kimloh dan receipt ziah tir a ni. Damdawi manto vak lo, rit tak pawh a chingpena a bo theih chuan Heroin, Methamphetamine,Cocaine, Opium, Ganza mante phei chu an ngaihtuah awm hlein ka hria.

Keini thubuai Court Judgement hi nikum daih tawh a chinfel a ni ( Memo No 325 ND & PS Dated Aizawl the 22nd September, 2015 ) Mi thenkhat in thubuai la neia min ngai te pawh an la awmin ka hria.
Thubuai nei thenkhat chuan Jail luh hrehin Anticipatory Bail an la a, a tawpah thiamchanna chiangkuang lo tak nen an fihlim hram a. Thlahualna programme, Parthi awrhin Tawlhlohpuan kan bat a, luangpuam mittui nen, mite min tawngtaipuina vanga Pathian hnathawh a ni, kan chhungkua tawngtaipui kan ngai kan ti thin, Kei leh ka tawrhpui thiante erawh chuan tul kan ti ve ta lemlo a, thil hrechiang si lova kan sawi peih hlawm em avanga sawifiah ve lo tul ta a ni.

Vantlang huat, Ram hmelma tih tawngkam hi kan hmang thlazen hlawm bawk a, Vantlang huat emaw ram leh hnamhmelma ni tur chuan a tuartu mihring/mipui an awm thinin ka hria, hei hi hmanlai atanga Mizo nuna vantlang duhloh leh huat kalhmang a ni. A nih Khehpuam an tih chu Mizo Thalaite zingah addict a, damloh puia tuara thihpui sawiturhria ka la hrelo. A hria chuan min hrilh se ka lawm ngawt ang.

Pseudoephedrine@ Khehpuam an tih chu Meth siam nan an hmanga hei hian Mizo Thalaite min run an ti a. Excise Deptt phei chuan kum 2001 khan Meth kan man tan tawh an ti a. Meth in kum 15 zet Mizoram min run tawh chhung hian tunge Meth rui leh addicted ? Hospital leh Home lamah Meth addict enkawl an awm tawh em ? hei hi vawiinthlenga ka zawhna tuma min chhan theih si loh a ni. Meth rui hi hmuh erawh kan tum nasa viau, rilru leh thluak lama harsatna neia khawlaia thawmhnaw phelh ruak pawh Meth a rui kan ti, St.Pauls School ah Meth Lollipop a awm etc, Tleirawl tha chak Zurui insual pawh Meth an rui tiin kan sawi vak zel. Kum 2014 daih tawh khan Chanchinbu thenkhat leh ZONET TV discussion ah Meth addicted 25 an awm mek tawh tiin an ziak a, an sawi bawk a, “kum hnih khatah Meth ngai chu an ha a bal a, an hmel a ti chhe vek a, an lang chhuak sup mai ang ” an ti a, an lang chhuak hlawm tawh em aw, mahni inchhungah leh thenawmah hetiang sawitur hria kan awm em ? Heroin, Proxyvon a lo chhuah tirh kha chuan addicted leh thihpui kan hre viau zel a sin maw le. Thutak zawk hi ruihhlo kan dona kawnga kan ralthuam hman tur niin ka hria. Heng thleng hian ka sawilang duh, a hua chuan lo haw mai rawh se, ka zira ka chiang tawkin ka hria.

State dang chuan an Thalaite chhiatpui an hria, Punjab leh Mumbai chuan Heroin, Cocaine addicted an tam, Manipur leh Naga pawhin Heroin, Proxivon addict an buaipui nasa hle. Arunachal chuan Zu leh Opium an buaipui nasa. Mizorama hian Zu/ Ruihhlo/ Drugs kan thalai ten enge an chhiatpui nasat pawh hi kan lo la hrelo palh ang e. Ruihhlo an mana an hal thin, a man zat market rate pawisa an ziak tam thei hle. India sorkarin halral a phal loh Heroin, Cocaine, Opium etc thlengin kan halral a, heng hi Central sorkar lama thuneitute hnena thawn zawk tur a ni tih hriat a tha. Sorkar Factory ah a lut anga tichuan natna khirh hrang hrang Cancer, rilru leh thluak natna veite tana damdawi pawimawhah an rawn siam chhuak leh thin, kan lo hal chiam chiam hi uihawm tak a ni, man hnu put chhuak thup nan kan halral em ni zawk aw ?

Ruihhlo, Tobacco leh Zu hi kan do tur a ni, tlawmngaia do inti viau hian eirukna leh eizawn nan, intihlar nana hmang thlengin a awm theih. A senchi Zu hi damreina kan ti, kan thlah zalen a, a nghawng zet chu natak a ni, sawi tam a ngai lo e. A fakna hla satuten nakinah kan la inthiam mai ang kan la ti thei cheu, nakin thlen hma hun paltlang hi ava huphurhawm em aw. Zu avang hian Ruihhlo a tlemin, a tam phah thei em tih thlenga zirchian a tul. MLTP Act hnuaiah NGOs ten Sorkar khap, Vantlang leh Khawtlang huat tiin kan do nasa hle, veng keltila hmeithai Zu zuar thlengin kan dimdawih lo hle, MLPC Act ah erawh kan ngawi leh daih a, Kohhran duhloh chiah a ni ta a ni.

Phailamah chuan PM, Minister, CM, MLA leh Officer tam takin thubuai an nei a, Jail lut pawh an tam hle, Mizoram chuan CM, Minister leh Officer ten thubuai an neihin Jail an lut ve thei lo, a chhan zawng zawng mipuiin an hria. Ka Motor hman tir ten Pseudoephedrine ni miah lo, India Dan phal damdawi an phur a, damdawi neitu pawhin “ Ka ta a ni, ka chah luh a ni ” a ti mai. Thudik sawi ngam hi midik nundan tur reng a ni.

Thubuai kan neih kawngah tute mah tanpuina kan dil lo, Police lam I/O leh Officer, Judge kan hmu hmasa lo, thamna chengkhat pawh kan hmang lo, tuma puihna mah kan dil bawk lo. Accused puh nihna angin Dan lekkawhna leh Dan rorelna kalphung fair takin kan hmachhawn a, “ Dikna in a hneh thin “ tih ziak angin thiamchantirna Judgement pek kan ni. Chumi phena pawi zawk chu Sorkar, Dan lekkawhtu Police te chetdan a dik lo a, India Dan leh Hrai nasa takin an bawhchhe zawk a, khua leh tui dikin kan tuar ta hrep a. Tin, Congress Party chhung lairila Politic tenawm inzep thlengin ka hmu fiah tawk bawk a.

Heti chung hian Mi thenkhat chuan Dan bawhchhia a, Vantlang duhloh damdawi ruihhlo lam tawlhru angin min la sawi duh cheu bawk a, chung mihringte chuan hei hi lo chhiar hmasa phawt teh se.

Advertisements
Aside | This entry was posted in Fifth Column and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s