NAGALAND JCC LEH SORKAR INREM TA

Nagaland-a tualchhung roreltute thlanna tur chungchanga bandh huaihawttu, Joint Coordination Committee leh state sawrkar chu an inrem ta.

He buaina chin fel a nih theih nan hian Nagaland Baptist Churches Council chu inrawlhin, inremna thuthlung a ziahpui a, he thuthlung ziahnaah hian state CM, TR Zeliang pawh a awm a ni. State Home Minister, Y Patton-a’n sawrkar aiawhin a hming a ziak a, JCC aiawhin an Convener. Supu Jamir leh General Secretary, Rev. Dr. Zelhou Keyho-a’n hming an ziak bawk a ni. An inremna angin JCC hian ni 5 awh tur bandh an lo huaihawt chu an titawp nghal a, fel fai leh ralmuang taka an inthlan theih nan sawrkar hnungzuiin tan an la ve ang.

Tuna an inrem dan chuan vawiina inthlan tur hi thulh phawt a ni ang a, thla hnih hnuah inthlan hi buatsaih a ni dawn a ni. JCC Gen Secy, Rev Keyho chuan thuchhuah hran siamin, sawrkar nena an inrem theih chhan chu Pathian vang niin a sawi a, kohhran hruaitute’n Pathian tirhin inremna thuthlung an ziahpui niin a sawi. Nagaland-ah hian mihring nuai 20 zinga za zelah 90 chu Kristian an nia, Baptist Kohhran-a lawi hi za zela 80 vel nia ngaih an ni bawk a, Kohhran hi sawrkar leh tualchhung thiltih-ah kawng tam takah a pawimawh hle a ni.

Nagaland-a tualchhung roreltute thlanna turah hmeichhiate tan seat za zela 33 hauh tum a nih avangin pawl hrang hrangte hi an lungawi lova, khawpuia roreltu, Municipal leh Town Council 32-ah naktuk, February ni 1-ah inthlan tur a ni a, henga hmun ruak hmun thuma thena hmun khat, hmeichhiate tana hauh tumna hi pawl hrang hrangin an duh loh thu an aupui hnuah, state Cabinet chuan ‘he inthlan hi ruahman tawh anga kal tlangpui ni se’ a ti a, hei hi duh lovin pawl hrang hrang hi an nuar ta a ni.

Hetianga an buai tak avang hian invauna leh hnam atanga inhnawhchhuah te a thleng a, inthlan chuh tuma hming pe tawh, mi 140 vel an inhnukdawk leh bawk a, Nagaland tribal roreltute chuan, hmeichhiate tana seat hauh hian an hnam dan a kalh bakah ram danpui Article 371A, Nagaland duhsak bikna leh an hnam dan humhalh theihna chu a bawhchhia niin an hre bawk a ni.

Nagaland-ah hian kum 1963-a state an nih atang khan MLA, hmeichhia an la nei ngai lova, 1977-ah khan MP atan Pi Rano M Shaiza chu thlan a lo ni tawh a ni.

Author : Saihmingliana Sailo
1st Feb, 2017

Advertisements
Aside | This entry was posted in National News and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s