US COMMANDO NAVY SEAL TEAM SIX MEMBER THI RUANGIN AMERICA RAM A THLENG TA

Yemen rama hel Navy seal ten an bei.
US sipai an thi
( Pasaltha ram chhuak hmuahin an lo hmuak)

President Donald Trump chuan Commander-in-Chief a nihna angin, White House a luah hnu ni 5-ah Yemen rama al-Qeada tawm buk luah chhuahaan thil pawimawhte man sak turin thupek a chhuah angin, US Commando tha Navy SEAL Team Six hoten al-Qeada te hi an va bei ta ngei a, mahse, American Commando 1 thih phahin, hliam 3 lai an awm bawk (An beih dan kimchang hi MSR ah post tawh a ni e-CT). Navy’s SEAL Team Six te hi Osama bin Laden thattu Commando te kha an ni.

Navy SEAL Commando thi hi Chief Petty Officer William Ryan Owens (36) niin, Peoria, Illinois khawchhuak a ni. Sunday zing dar 2am khan al-Qeada te nen an inkahchilhnaah a thi. American commando te hian Yemen rama al Qaeda hotupa ber Abdulramf al Dhabad chu thah an tum a, an thah zinga hmeichhe 14 te pawh al-Qeada fighter an ni tih, Pentagon thupuangtu Capt. Jeff Davis chuan a sawi. Willian Ryan Owens ruang hi US ah phurh thlen niin, Nilaini khan Dover Air Force Base, Delaware hmunah ropui taka lo hmuah a ni.

Inrinni tlai lama President Trump an Special Operation nei tura thupek a ziak hnan dawn khan, White House ah a Advisers- Jared Kushner, Steve K.Bannon, National Security Adviser Gen. Mike T.Flynn, Chairman of Joint Chiefs of Staff Gen. Joseph F.Dunford Jr., leh Vice President Mike Pence leh Defense Secy Gen. Jim Mattis te pawh an awm a ni.

US Commando ten in luh chhuah tuma an kal lai chuan, an bul hnaia hmeichhe lo awmte chuan ralthuam chuhin an lo kap let ta thut si a, Commando te pawh tawlh letin Helicopter raltuthei chu anmahni pui tura kovin, chung lam atangin building te an rawn kap zui hlauhva, chuti ni lo sela chuan US Commando te hi an che chhe zawkin a rinawm. Minute 50 dawn nasa takin al-Qaida fighter te nen an inkap zui a, an beisei loh deuhvin nasa taka beihletna an va hmachhawn a ni ber.

Al-Qeada fighters te hian schools, clinic leh in thenkhatah tawm kuk siamin, naupang leh hmeichhiate chu inphen (cover) nan an hman vangin Navy’s SEAL Commando Team Six te hi an duh angin an che tha theilo tih a ni. He President Trump a thupek “nunna leh thihna” inkarah hian Commando 1 bakah mi 3 hliamin, Marine Corps ta MV-22 Osprey thlawhna US$ maktaduai 75 man lawih (Aizawl-LungleiWorld Bank kawngpui siamna man zet) chu, tlang chhengchhe kara a tumna lamah chesual deuhvin, a thlawk chhuak theilo chu bomb chhiat zui a ni bawk.

He thil thleng hi The Washington Post chanchinbu chuan ziak hmasa berin, New York Times te pawhin an ziak bawk.

Yakla villag hi Central Yemen hmuna awm niin, al-Qeada inkulhna hmun pui pakhat niin an sawi. Obama Admin te pawhin beih tumin an lo zir fo tawh a, mahse, al-Qaida hote vawk lal lenna leh khuaibu tawn darh ang deuh ni theia hria in, an lo bei duh thin lo a ni. Tun tuma an beih pawhin thla en loh zan an thlang a ni.

Hetianga US chet dan hi Yemen Foreign Minister Abdul Malik al-Mehklafi chuan a demthu sawiin, “Dan pela tualthahna leh pawisawilo nunna lakna a ni” tiin, Twitter ah a rawn ziak a ni.

2014 kum Dec thla khan US Commandote hian Yemen ah tho American photo journalist rukbo chhanchhuah tumin an bei a, mahse, rubotu al-Qaida leh photo journalistte chu kahhlum niin, a hlawhtling ta lo kha a nia. Tun tuma an va che leh hi a vawi 2na a ni. Yemen ah hian US Special Operations adivers an tih mi 125 an awm tin a, mahse, US in a thawhpui ber President Adbu Rabbhu Mansour Hadi chu a chenna in atanga um chhuah a nih tak avangin, US pawhin a ruka a dah Spl Operation team te chu a ko haw ta a ni.

Author : Ct Lalrinawma
2nd Feb. 2017

COMMENT
Lalrempuia Rpa Chhakchhuak
Râl beih rêng rêngin thih huamin an kal țhîn a, pakhat an thî hi a mak lo, chêt fuh loh chuan thi vek thei an ni. US tân tlâwm thlâk leh mualphothlâka puh chî a ni lo. A bei tû zâwk an nî a, thi tam fê zâwk mah se an thiltum bera an hlawhtlin chuan chû chu hnehna a ni. An inhloh nual lo țhîn hian US chungnun zia a tilang țhîn, Sipai thî erawh a uihawm khawp mai, lehlama thîte pawh an tam tham sî a, an chhûngte tân chuan a na vê tho dâwn tih hriat a țha. 1999 Kargil war-ah khân Pakistan sipai aiin India sipai an thi tam fê zâwk, chutihrualin, India chu chiang takin an chak sî a ni. A chhan chu India kha an tumah an hlawhtling miau a, a indo dân kalhmangah sipai pawh hek zâwk tûr an ni rêng a.

Tomy Hnamte
navy seal in chhuan ve emem hi ka hmu nep tlat toh, hman deuha afghanistan a al-qaeda an va beihna documentary ka en ah te khan an mawl man an tuar hrep a nih kha maw.

Shinoda Mizo Ngurte
lndian para commando te chuan khawvel ah poh nuclear power nei pha Pakistan ram chhungah lut in surgical strike an nei a hel 50 chuang anthat a him pialh in an rawn let leh thei nia in ngaihsan us navy seal te chu vawi 2 operation yeamen ram a an neih hnubah pawh an la faile zel chu nia lndian para chu nise nep in ti leh awm fk ff ru

Ct Lalrinawma
Helho va thah ringawt kha ni lovin, an computers, thump drives, cellphones etc va chhuh sak a, an terrorist networking dan chhui zui theih tura hna thawh a ngai alom. Chubakah Central Yemen lai niin, ramri bul hnai a ni lo deuhva.

Vanlalruatliana Renthlei
An va beihte hi an nep viauin in ring a niang. Yemen ram hi a rura hrep. India surgical strike hi a turu a, mahse an va chetna hi khawvel torrorist beih harsa zingah chhiar chi an ni em aw.


Advertisements
Aside | This entry was posted in World News and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s