NAUPANG SIH-HUAIIN A MAN CHU.

  • Naupang ranhuaiin a man.
  • Kohhran upa fa naupang man.
  • Sihhuai hnena inthawi.
  • Ramhuai be thei.
Mizoram chhimtawp thlanglam tuna Bangladesh-a Tangkalang khuaah sawn kan Mizo hnahthlak zinga hnam pakhat Bawm ho an awm a, chung zinga chhungkaw pakhat chuan vanduaina maktak mai an tawk ta hlauh maia, an ni chhungkua hi Kristian niin an pa ber phei chu Kohhran Upa an ni nghe nghe a, fapa naupang duhawm tak mai an nei a, zan khat chu, chu naupang fel tawh tak, sava veh rual vel tur chu, a zan mu lai a țe thawt a, chuta chin chu a țawng leh ngai ta reng reng lo mai a. A nu leh pa te chuan an mangan pui em em mai a, a dam theihna turin theihtawp an chhuah hnu pawh chuan engmah a ang thei si lo.

He khua ah hian a thla a ngam thei lo a niang tiin an khua atanga hmun hla deuh takah chuan an pem pui ta a, that lam a pan theih chuan loh avangin Palewah hmunah doctor thiam an pan ta a, khawsikpui thluaka lut a nih an ring a, an ti dam thei chuang si lova, an neih zawng zawng bakah midang tanpuina thawhkhawm nen Bangladesh a Chandragoona Hospital an panpui leh a, Doctor thiam ten uluk taka an en pawhin a chhan an hre thei chuang si lova, rilru lam doctorte pawhin a tihngaihna an hre tawh lova. Beidawng in an lo haw leh a, an khaw hlui Tangkalang-ah chuan ramhuai be thei an tih a awm lai tak a nih avangin an pan ta chawt mai a ni. (Kristian chhungkua, an pa pawhkohhran upa kan tih tawh kha!)

An fapa damna tur a nih phawt chuan tiin chu ramhuai be thei pa chu an rawn ve ta rawih mai a, he ramhuai be thei pa hian khaw en chhung zawng chuan a thil tihtheihna chu a hmang thei lova, ni tlak atanga a chhuah leh hma zawngin a tih tur ang a tih a ngai thin a ni. Ni a tlak a, khua a thim chuan a tih dan pangngai angin thleng chungah buhfai a dah a, a chungah chuan duli tlang a dah leh a, eng engemaw a chhampual hnu chuan heti hian a sawi ta a;

“He khua Kangtalang a in awm lai hian lui hnar lamah khian lo in nei a. In thlam pawh kawngpui atanga pen phei hla vak lovah a awm a. In thlam thlang zawnah chiah sih a awm a, thal tui kang lai chuan tlan atan pawh in hmang a. In fapa pawh hi in lovah chuan in hruai ve reng reng thin a. Chu sih huai chuan in fapa thlarau hi neih beh tlat dan a ngaihtuah ta a. Remchang zawngin a kalnaah a zui fo thin a. Vawi engemawzat chu a hlawhchham a, a tawpa tawpah chuan remchang a hmu thei ta a, hetiang hian a lo awm ta a nih hi, a pawi hle mai”

“In fapa hian, khi lai chhak deuh kawngpui bulah khian ni chhuah hlimin sava a veh a, chu a sava vehnaah chuan thilhlauhawm a awm ang tih rin ngaihna hre lovin sih huai thangah chuan a awk ta a ni. Sephung kaw hluiah thil tle ser ser mawi em em mai a hmu a, kalsan mai lovin a en ta reng a, a hnuah chuan a chhar ta nge nge a, chu thil chu sihhuai thang kam a lo ni si a; chu thil a lak atang chuan sihhuai thangkamah chuan a awk ta a, chuta țang chuan sihhuai chuan a duh hun hunah a thlarau chu a laksak tawh mai dawn a ni” a ti ta a.

Ramhuai be thei pa sawi angin, chuti ang deuh chiah chuan mipa naupang chuan, a thiante bulah chuan a thil chhar chu a iptea a ah hnuah a bo leh daih niin a lo sawi bawk a ni.

Ramhuai be theitu chuan a sawi zel a;”In hmuh ang hian a tawng thei tawh si lova, a thlarau leh a ngaihtuahna chawpin Sihhuaiin a kawl tawh a, a nunna pawh a duh hun hunah a laksak thei a ni. Zanin la la hian ardum kengin han dawr ta ila, a la tihlungawi theih mahna; amaherawh chu, muangchang chi a ni lo, thil awmdan ka sawi lang vek tawh si a, naktuk zan pawh a tlai lutuk tawh ang”a lo ti a.

Tichuan, a zan a zan chuan kal tur chuan an in siam ta rum rum mai a.

Chulai sih leh lo hlui awmna hria, patling pathum chuan ar-dum an keng a, an pa ber pawh chu an hruai tel bawk a. Mahse, an chhuah hnu chuan amah hruaitute ho chuan ramhuai be theia chu fiah an tum ta a, lo hluia thlam awmna pengah chuan peng lovin an kaltlang pui ta daih mai a. Pengțhuam awmna atang meter 50 vel lai an kal tawh ang tih ah, chu ramhuai be thei pa chuan, “Helai chu a ni em em tawh lo, let thla leh ang” a ti a; thlam peng a ni tih pawh hriat mang tawh loh khawpa hmun pik an va thlen chuan, chulai ram vawi khat mah rap ngai lo ramhuai be theipa chuan, mak tak maiin, “Helai zawn hi a ni thlam awmna chu” a ti a, a kawk dik ta chat mai a ni.

Thlam hlui an va thlen chuan “Helai hi an thlam chu a ni a, khulai lawkah khuan sih chu a awm” a ti ta zel a. Thui vak lo an zu kal chuan Sih chu an zu hmu ta ngei mai. Chupa chuan thut pawh thu khawmuang lovin a chhampual vel a. Tichuan, an ar-dum ken chu a talh a, sih-ah chuan ar thisenchu a far kual a, sih huai chu a be ta a. A chang chuan, ti ti pangngai ni awm tak sawia inbia ni awm tak hian a tawng a, a chang leh inhnial ni awm takin a țawng bawrh bawrh a.

A chang chuan, a nui leh ang hawk hawk thin a, ramhuai be thei pa țawng chiah chu an hre thei a, lehlama a lo chhangtu sih huai țawng erawh an hre ve thei lo thung.Nakinah chuan, chupa chuan, “Khaile, i duh zawng kan pe tawh che a, lawm takin i la a, kan duh leh kan rawn kal chhan i thil ken kha thlah tawh rawh le” a ti ta a; a sawi zo chiah tih chuan “Khatin ti suh, khatin ti suh, engatinge khatia kan thil pek i lak vek hnuah khatia i tih leh si? I sual hle mai” a ti ta hlut mai a. Tichuan, hmanhmawh takin an inak sawk sawk a, in lam panin an hawng ta hlawk hlawk mai a.

An hawn kawngah chuan thil awmzia chu an zawt ta a, “Kha sihhuai khan rawlthar thlarau kha a keng a, a thlah phal si lova, thlah tura kan tur khan a hum na sauh va, a thi hman țhelh niin ka hria. Chuvang chuan a nih kha kan vau ve deuh ni. Khatihlai khan ina awm rawlthar kha a thi hman țhelhin ka ring” a ti ta a.

In an zu thlen chuan a sawi ang ngeiin Sihhuai man naupang chu thawkkhat lai kha chuan a thi hman emaw tih hial turin a awm niin an sawi a, in an rawn thlen hma hretin a rawn che leh thei chauh niin an sawi bawk a ni.

Chu ramhuai be thei pa chuan ti hian a sawi ta a, “A thil duh ber kan pe a, a la a. Khati chunga a la chhuah duh lo lui reng a nih chuan ama tan khan thil hlauhawm a awm ve a. Thawina thisen a dawn tawh hnua luhlul taka a khawsa zuizel a nih ngat chuan, a aia lal zawk ten rorelna hmaah thiamloh an chantir ang a, sawisak te pawh a la tawk ve ngei ngei ang. Ui hle mahse chhuah loh theih loh hun a la nei dawn tho tho a, lo tihlum ta nise a chung a pik hle dawn a ni. Chu hun a thlen hma chuan a la kawl reng ta ve ang, in naua thla kha a ui em a tin nih kha.

Keiin ka zawl ve hi chu ramhuai țha chi, Tlang-huai lal a ni a. Ramhuaiah pawh Tlang-huai hi an tam ber a, thil pawh an tithei ber. Ramhuai dangte pawhin an hlauin an zah em em a, an thu an awih lo ngam ngai lo. Sih huai rau rauvah pawh Hnahthial sih huai te hi an michhe ber a, an hmel pawh a chhia-in a tet pawh an te ber a, thil ho mai maiah pawh mihring tihnat hi an hreh lova, an huatthu lah a chhe narawh!! ramtuileilova mi sawisakte hi hrehna an nei lo maini lovin an nuam tih zawng a ni a. An vir em em a, miin an hmuh laia thil an ei a an pek ve loh phei chuan an thinrim em em nghal zel a ni,” a ti.

Chu pa chuan, naupang chu țha chhuak leh turah a ngai a, mahse a thil tawrh chu a namen lo em mai a, mi pangngai tak chu a pha tawh lo mai thei a ni a ti. Naupangte chhungkua chu an khaw lamah chuan an haw thla leh ta a,an haw thlak hnu chuan an chanchin kan hre zui ta lo a ni, a ti.

He chanchin a tawi fel et mai a, a tawi ngaihtuahin a ngaihnawm dangdai ka ti reuh em a, a ziaktu hi ka hriatsualloh chuan R. Kapzinga niin ka hria. A thiltawn chanchin a ziahna “Khawhring leh Sai Ramah” tih bu atanga lak a ni.

Author : Andy K Zarzoliana

Advertisements
Aside | This entry was posted in Thu Ngaihnawm, True Story and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s