SAMI PASALTHATE SAVAWM BEIH DAN by Andy K Zarzoliana

  • Sakhaw nei ngah hnam
  • Savawm pathiana be thin.
  • Savawm thah dan.
  • Thing hlauhawm
Sami hnam ten savawm hi pathian angin an be țhin tih hi khawvel hriat a ni a, chu chuan savawm an tihhlum dan tactic dangdai tak chu a khuhbo hial reng a ni. Khawvel hnamtin chitinte hian thil engkim mai hi, kan ram leh hnam dinhmun mil tawk zelin tihdan phung kan nei țheuh a; Siamtu hian mihringte hnenah finna leh remhriatna dangdai tak tak min pe a. Chung zingah chuan Sami hnam hovin savawm an tihhlum dan chanchin hi a dangdaiin a finthlak ngiang mai a, tlemin han chhuizau deuh ila a țha awm e.

Sami hnam hi Europe khawmual luahtu mihring zingah chuan a mawl rei ber pawl an ni awm e. Biak pathian lah a mak a makin an ngah a, thingbul, lung bul mai duhtawk lovin, tuna kan tarlan tur savawm pawh pathian angin an be tlat mai a ni. An pathian ngahzia chu, Greek ho ai mahin pathian an lo ngah mai awm mang nge, tih hial tur an lo ni ve a, sakhuana la urhsun tak hnam an nih ve avangin an hun tamzawk chu pathian biak nan an hmang ral thin a ni ber mai.

Pathian sawi takah chuan, Mongolia thlah zingah khian “hnim buk ” pathian atana biate chanchin ka chhiar thin tawh a. Tin, Burma ram chhunga Shan hnam pakhat “Yin” hnam, ni khata darkar 24 kuhva țhial ho khian; pangang chikhat pathianah an be mauh mai bawk a, tin, Burma rama Kayah hnam peng chikhat chuan Buddhist sakhuaa an luh hmain uifawm (praying mantis) an be ve tlat bawk.

Sami hnam hian sakhuana lamah chuan; tlachawp pathian atan ram hnuaia “thli tleh lo ngawithuap” te hi an lobe ve thin a ni. Chu bakah thingbul lungbul te hian thlarau an neih an rin tlat avangin “Animistic” lungtum lian pui pui leh thingbul lian tak takte an be thin bawk.An pi leh pute chhui dan in, “All Living Creatures Have At least Two Souls” thil siam zawng zawng hian a ni lo berah thlarau pahnih an neih an ring a, thlarau pakhatna chu mihring taksaa bet tlat niin an hria. Chu thlarau chuan taksa a tichia a, eirawngte a bawl a, thute a sawi thei niin an ring a. Thlarau pahnihna chu taksa atanga vak chhuak thei. A țul phei chuan zualko a kal, khaw vengtu, ral hial do theiah an ngai bawk a ni. An ngaihdan pakhat leh chu, ramsa thenkhat te hi chu mihring tlukpuia ngaiin zah thiamhle turin an inzirtir ve bawk. Hindu sakhuaa ramsa an hmuh dan nen a inhrul hle ang. Savawm hi thah thiang loa han ngai a, thlarau dang lam tak mihringte khawih let thei neiah an ngai a ni. Savawm thenkhatte phei hi chu khua lehtui veng him tlattu niin an ring bawk. Chutiang savawm thlarau chuan thingkung te, hnim te, theirah te hi a chawmin a enkawl a nih an ring a. Tin, Triremes emaw Horagalles tia an koh kawlphe leh Țek Pathian an la nei cheu bawk. Chu chuan chung lam van zau tak khi a enkawl leh a sawngbawlah an ngai a. Ramsate chunga thuneitu ramhuai lal Laib Olmai an la nei zui. He ramhuai lal Laib Olmai hnenah hian zing leh tlai tin an inhlan thin a, an sa pel an hlawh tlin theihna turin a hmaah kunin thu an chham thin.

Dawithiam pitar ramhuai lal nu, mihringte ti na leh ti dam thei an la nei leh zel bawk. A bik takin tualthahna inrunna tea lo thlen hian, a thia te thlarau kha dawithiam pitar hnenah an thawi thin a, kawthlerah meipui an chhep a, Drum an vua a “thluk” zia rang tam vak lo hian hla an sa a; an invui liam thin. Hei lo pathian dang neuh neuh sawmthum chuang erh awrh an la nei a. Chung zingah chuan “Thor-man ” an tih a hming hmasa Atja, “The God Of Thunder ” hi a lar pawl a ni leh a. tun hnuah Norway “khua-pa (khuanu pasal) tiin history-ah a lar zui ta nghe nghe bawk.

Kum 1700 – 1800 khan, Russia Orthodox leh Catholic ho kut hnuai an Kristian sakhuaah an inlet deuh vek a. Heng hun lai hian piantharna lam aiin tur luihna leh thamna avanga lo Kristian tate an ni deuh vek. Kohhran pa ho tam tak, zu man bat avanga leiba aia sazuk pachal an hlan hun lai a ni awm e. Pastor kal sual ho leh sawrkar thuneitute a ruka an tan tlan hun lai a ni bawk.Sami ho hi an pian hmang leh nih phung reng reng pawh andanglam bik hle a. An mit a pawng a, an lu a balin an sam athur a, an khup a tuah deuh vek bawk. An dar a kum deuh hluau a, an kut țang a tawi deuh zel bawk. Tin, an zai thiamlo hle a, an rim chhe deuh vek mai a ni.

Sami hnam hi an chenna ramte a ropui tlukin an khawsak dan a la hnufual hle a. USA a, Indian ho leh Malaysia a Asli ho ang maiin khawpui nun hi an la ngaina tak tak thei lo a ni ber mai. Tam tak chuan an hmaite an phih fai a, an sam te an khuih hnum a, khawpui chhung lamahte an rawn inkar lut nual bawk nachungin, an living standard a civilize thei tak tak tlat lo. Sami ho hi ram (4) ah an cheng a. Norway hmar lam a tangin Sweden chhim lam an hrut phei a. Russia ram chhak lam panga Kola thliarkar chanve lawih hrut pheiin, Finland ram chhim atanga chhak lam thleng ram an luah duai mai a ni. Lui dung leh vang, tlangdung phei, thliarkar, tuipui inpawhna, tlangpang, khamah te buk an khuar deuh ber a. Zirchiannaa a landanin, Norway-ramah mi 35,000 vel, Sweden-ramah 3,000 vel, Finland-ah 1,000 vel leh, Russia-ah 2,000 vel awm anga chhut a ni.An tawng hman hi, “Finno-Ugric ” tia koh a ni a, an alfabet pawh China alfabet ai chuan spell a awl hmel deuh, Finnish, Estonian, Livonian, Votic heng ho tawng chawhpawlh inkara lo piang a ni awm e.

Tun hma atanga an eizawnna ber chu, Sangha man, thlai chin leh sazuk vulh a ni deuh ber a, leileh nan bawnghal aiah sazuk an hmang thin a, sa kah leh thang kam an uar hle bawk.

Sami hnam ten pathian tam tak an biak zingah savawm hi a tel ve mauh mai a. Chu chu hmakhawsang ata tawh an thlahtute atanga an in rochun a ni a; mahse, savawm an bia kan tih mek laiin savawm thahdan tactic dangdai tak hretu an ni ve hlauh thung. An chenna ram hmun țhenkhatah chuan thli a tleh reng mai bakah vur asur nasa țhin a, -40°temperaturelaia a vawh chang pawh a awm țhin. Khawvawt laka an in tuam lum nan sahmul leh saphaw an hmang fo a. An ranvulhte sa-in a rawn beih chang chuan huaisen takin an beilet chat thin a. A bikin savawm hi kut zala thah thiang lova an ngaih avangin thanga a awh chang chuan tihlum kher lovin an chhuah zalen leh mai thin. Mahse, Sami pasaltha țhenkhat chuan tûr nei chi theirah hmangin an tihlum ve fo mai. An thah chhan sawi dawn chuan thawnthu sei tak sawi a ngai ngei ang.

An chenna chheh vela tualțo thingrah stone fruit (drupe) antih chu savawm tihhlumna hmanrua atan an hmang țangkai hle a. Stone fruit hi khawvela theirah hlauhawm bera an chhal thin, Manchineel (poison guava) , North America chhim lama tualţo thingrah ang tiat chauhva lian a ni a. A mu /chi chu lungtê ang tak niin, kutzungpui tia awrh a lian a ni. Mahse, chu stone fruit mu chuan tûr (toxin) Amatoxin a pai tlat mai a. Chu chu savawmin a ei fove thin a; mahse, a thihpui ngai lem lo a ni. Savawmin a ei chuan vawilehkhatah tûrin hna a thawk nghal mai ngai lo va. An thisen a lum a, nasa taka a taksa a chet vel erawh chuan, chu tûr chuan savawm taksaah hna a rawn thawk a, chu chuan, an lu a ti hai a, nikhua hre lovin an awm mai thin a ni. Mahse, chutiang ni lova, savawmin tibuaitu nei lova tha taka a awm erawh chuan atan damdawi tha tak a ni tlat thung. Mihring tan pawh he ‘stone fruit’ mu hi a hlauhawm a, khawhmuh fiah lo, lu nâ, hriatna buai leh ni khaw hre lo thleng pawhin a awm theih a ni.

Sami pasalthate chuan chuti ang theirah chu ruahtuiin a chiah țawih hun an chhinchhiah a, ruahtui a rawn hul hun chuan savawm pel turin an chhuak thin a. Savawm an hmuh chuan an chhaih kawlh te te a, a thin tih-ur nan leh savawm chu a thisen a lo lum vat theih nan an chhaih vel thin a, savawm thisen a lo lum takah chuan a taksaa tûr awm khan hna a rawn thawk nghal thuai a. Nikhaw hre lova savawm a tluk hnu emaw, mihring bei let hlei thei tawhlova a awm hnu chuan, chu hun chu, pasalthate tan savawm tihhlum nana hun tha leh duhthusam a lo ni a, savawm kawlh leh sual tak tak pawh awlsam takin an that mai tawh thin a ni. A thihchhan ber chu lung natna (heart failer) ti pawhin sawi ila a sual tam awm lo ve.

Heti anga hriatna dangdai tak hmanga sapel thinte hi, Samihnam chauh an ni lo va, Mongolian ho pawh khian hmakhawsang atang tawhin hetiang tactic hmang hian savawm țihbaiawm pui pui an lo tukdai fo tawh thin a ni.

Tin, tihdan dang pakhat lehah chuan, khuai an lak reng rengin a bâl chu țha takin an dah thin a, chu Khuai-bâl leh tûr chikhat, Arsenic-Metalloid an tih chu an chawhpawlh a, savawm chet tlatna ramhnuai khawi maw laiah an hnuchhiah a, chu chu savawmin a lo hmuh chuan a ei a, reilo teah chu tûr chuan che thei lovin a siam a, harsa lo takin savawm chu an that mai thin a ni.

Stone fruit chauh ni lo, Aquilegia (columbine) ang deuha tûr(toxin) pai hi theirah zingah a awm nual a, a tûr hnathawh dan erawh pakhat leh pakhat a inang vek lo thung. Thei țhenkhat, Manchineel ‘beach apple’ emaw, ‘poison guava’ an tih chu, North America chhim lam leh, Central America, Caribbean leh South America Hmarlam hmun thenkhatah hmuhtur a awm nual a, organic compound chi khat Phorbol a pai tel avangin a hlauhawm em em a, a kung țangro halna meikhu hi luh ringawt pawh thihpuina tham a tling hial a. A hnai chu tûr chak tak a nih avangin sapel miten an thal leh fei hmawrah te an tat thin a ni.

Indonesia a thliarkar pakhat Sumatra a khawsaho leh Tanzania rama hnam mawl țhenkhatte pawhin heti ang remhriatna hmang hian savawm hlauhawm tak tak an lo tihlum fo tawh thin a ni.

Author : Andy K Zarzoliana

Advertisements

About Mizo Archive

I'm the one who collect the best writings of Mizos
Aside | This entry was posted in Thu Ngaihnawm, True Story and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s