KA DA LEH VAT DAWN

  • Camping chhuak val a chesual nasa.
  • Thlarau tello hlim lamna
Gospel camping luh leh hnatlan nikhua apiang a, ‘nang va kal rawh’ an tih hi chhungtin hian in kawl ve vek in ka ring, kei pawh chutiang an tih te zing a mi chu ka nia(chhungkaw chhehchhawl ka ti mai). Tumkhat chu kan veng ah Gospel camping anlo siam leh lawm le, chhungten min tir lut leh dawn tho nia ka hriat avang in thlarau lam tuihalna nei em em lo mah ila camping tur chuan ka han in buatsaih ve a, ka inbuatsaih han tih hian eng dang vak nilo in țhahnem ngai em em in ka rui tlek tlek mai a, chu chu ka inbuatsaih ve dan a nia, inbuatsaih dan dang vak hre hek lo le ( avan țhing lo ti ngawt suh, i nih ve ziah reng kha aw). Chhungte’n min han hau deuh mahse ‘ camping chhuah hun a testemony tur alawm’ kan han ti sam et a, an ngawi ral ve leh mai mai zel a.

Tichuan le camping chu ka han lut ta alawm; hrehawm ka tih ber chu țawngțai kha ania țawngțai tur ka hrelo lutuk kha a hahthlak. Counsellor ho hriat a țawngțai anga ka lang duh in pariat(8) hmun zawi tete a ka sawi vel chu sawi lo mai ang: a sei dawn tlat.

A tawp hma ni ah chuan ‘zahna kawn’ an siam a, midang an zah em vanga an mangan lai a, ka zak ve theilo ka mangan si zia pawh bawhkan mai ang aw.

Camp chhuah ni ah chuan mittui nen hnap tui nen hlawhtling inti em em in ka chhuak ve a, zan inkhawmban ah chuan sunday a hak tur ka kamis var thianghlim em em mai chu ka nawt hlarh hlarh a, ka nawh pah chuan țhahnem ngai em em a ka ruih lai te ka hak hun ah chuan tuemaw hmuh ah ka han lam ang a, min ențha ngam chiah silo; min en duh tur si leh a lai tur vel ka han suangtuah phei chuan thlarau thianghlim hnathawh ni miah silo in ka hlim a, ka nui vur vur mai a. Uluk em em a ka thawmhnaw ka nawh hlarh hlarh lai chuan kan țhianpa a lo tei lut hlawl mai. Zu a rawn keng a, kan in a in mi rawn dil a, kei camp chhuak hlim thlarau changsang inti ber mai hian ka phal mai mai lo..a la na kher asin le.

Ka chhungte an chhuah vek avang leh lenkhawmna lam a kal ka duh vang chuan ka țhiana chu in lo nghak tur in ka ti a, a aw ve mai bawk a, ngaihțhat loh na nei miah lo in lenkhawmna lam ah chuan ka kalsan ta a. Lenkhawmna lam a kan in tel tual dan chu sawi lang rih lo ang.

Sunday alo thleng ta ka va han phur tehlul êm.. chaw pawh ka ei puar meuh lo..ka kham vat a, ka kamis var em em chu enchiang hleilo in ka ha sawk sawk a. Ka in thun zaih mai a, ka mit ah chuan ka va han țha ber mai ve le…leonardo te pawh ka in tehkhin rum rum mai. Tichuan inkhawm tur in ka kal ta a, Biak in ka thlen chuan an lo lam mup mup tawh mai.. muang chang lo in lamtual lam ah ka su phei ve ta nghawng nghawng mai a. Ka han lam chu lehhh ka thlen nachin zel a mipui țhu te chu an nui leh sawng țhin. Ka biangnoi țhutna zawn ka lam thlen chuan ka va mitsir zauh a, ani chu hmai hup in a kun deuh rai a…hmmm ka dream ang chiah a ni. Nuthlawi hlim rui ka buaipui chu a thik a, bakah a lai a ni ; min en țha ngam lo tlat. Chu chuan min ti phur leh zual a, a aia uar leh zual in ka han chheih kual vel a, mipui chu an nui leh dur dur țhin.

Chutah ka hnunga lam chuan min kheuh leh zauh țhin a, mihlim an nih ka ring a ka induh khum ve tlat; ka hawi let duh lo, ka biangnoi hmuh a lamdan style hrang hrang a ka in show lai a. Chutah vawihnih vawithum min kheuh tak ah chuan ka han vir let zawk a, kan tual upa hi a lo nia, ka kamis hnung ah thil in ziak a awm thu min hrilh. Chuan, pawn ah ka chhuak tur ka kal te chu ka thlen chin apiang ah chuan an lo nui țhaw hlawm a. Toilet ka va thlen chuan ka in phelh sawk sawk a, ka kamis var mawi em em mai chu tihbawrhbanin a lo awm ni in. Ka kawr hnung ah chuan marker dum ngei mai chuan hawrawp pui in’KA DA LEH VAT DAWN’ tih hi a lo in ziak teh reng a nih kha.

Chumi ka hmu chu zun ka cheh țhawt thei…mipui nuih dur dur chhante ka biangnoi min hmuh vang a a lai inhup emaw ka lo tih vel te ka ngaihtuah thui ngam lo; ka bing mum mum mai. Biakin a luh leh chu a hnai lo teh e…kawr phel in ka tlan haw duai duai mai a! A titu hi ka hria; ka hre chiang nizana kan in a lo leng ka țhianpa kha a ni.

Ka va han thinrim emm ; meidil a tlak theih nan ka han țawngțai piap mai a nih kha…kan mihringa chu theihtawp a nasa leh tlem belh a sawisak ka va han chak tak.

Advertisements

About Mizo Archive

I'm the one who collect the best writings of Mizos
Aside | This entry was posted in Fiction, Thu Ngaihnawm and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s