CHASING YOU —- Sangtei Tlaichhun

  • Mizo love story lungchhiatthlak.
  • Natna inthup kara hmangaihna chu.
  • Hmangaihna a par vul zo ta lo.

Ka star chu ka melh zeuh zeuh a,tiril khur chungin ka ko ve tawp …awi ka zak!

"Jose"

A rawn hawi, ka aw chu a hrechiang alawm, kan class kawngka bulah ka thiante nen kan ding a, Jose chu tukverh bulah a awm thung. A chezia leh nui hmel te chu ka thlir ning thei lo.

"Min ko em ni?" a ti.

"Kan bulah hian lo ding ve la" ngam leh ngam lovin ka ti thei hram a. A lo kal ve mai bawk.

'Tawn changin sawi tur ka vai leh si'…tih hla ang deuhin han indin hnaih takah chuan sawi tur a awm reng reng lo. Sixteen feeling chu hei hi a lo ni…

Chuti nitin ta chu kan innel tial tial a, fiamthu a duh in a bula awm a nuam takzet.

Volleyball a thiam em em, Basketball ah pawh zahpuiawm lo ve tawk tak a la ni cheu. Football erawh a thiam lo. Chêr lam pawh ni lovin, cher ve tak a ni, inchei inhmeh tawk velin asang thlarh a, a nuimawi a, mi hlim thei tak a ni bawk.

"Hello, Jose a awm em?"

Ka aw chu a khur zawih zawih mai, Maths tuition kan kal kan bang fel awrh tih ah chuan ruah asur chiam vangin ka thiante in ah kan lut a , ka star chu phone a biak kan relthlu a nih leh pek hi!

"Aw awm e, enge ni ta?"

"Jose ka lo be lawk thei angem?"

"Chaw kan ei mek a…"

"E a nih chu…nakinah ni mai aw"

Phone chu ka dah nghal hmak, Jose a Nu a nih ka ring nutling aw a ni. Zah luat vangin ka lum pup pup thei. Mobile a la awm lo! Landline pawh khawpui ah lo chuan ala awm lo niin ka hria.

Sunday a ni. Ka thiannu nen lehkha kan zir a, an in ah kan pahnih chauhin kan awm. Kan thiamlo dun em em bawk. Jose chu hmuh ka chak, a chanchin hi kan sawi bang thei lo. Kan inrawt phur chawhnu her ah chuan Jose te veng lama len kan rel thlu ta. Kan inchei sauh sauh a, nalh inti fe in Jose te veng lam chu kan pan, veng inkar a hlat bakah ruah asur duh em em bawk si, pawnfen kan feng tight nen, kan zak deuh bawk , aw…he tleirawllai nun hi a va hahthlak in ava thawventhlak thin tak…

Kan thleng ta.

Enge kan tih tak ang? Kan ding deuh reng a. Mahse enge lo thleng leh hi? Mitthi vui tur an ni tlat ! Jose te in bul mai kawng kual laiah chuan mipui an lo lang ta thrup thrup mai, kuang an zawn chiang! Jose te in a luh chu kan ngam teuh mai si lo. Thiannu nen chuan chak lutukin kan kal let leh hlawk hlawk a, kawngkawi a nih vangin mitthi vui tur chu kan lo hmu har si a le, kan intawk thut a ni ber, kan zak a, kan nui nasa bawk.

Garage kan hmu ta hlauh, Gypsy var alo ding. Gypsy sir deuh, birûkna tur tak tak awm si lo ah chuan dingin kan nui char char, kan pawnfen a chhing si, tight bawk si, kan thru hlei thei lo, kan din chuan mitthi vui kal nguah nguah chuan min hmu chiang zual dawn bawk si, a hrehawmin ava chet laih thei si tak em

Mitthi vui pawh chu an kal liam fel ta niin kan hria a, tri tawkin kan chhuak dek dek, tumah kan hmu ta lo e, thlamuang fe hian kan nui chhuak hawk hawk, mahse le…a hnung deuh ah chuan mitthi vui hnukhawi lam an lo lang leh ta, kan chhuak laklawh tawh si, garage a tlanluh leh chu a zahthlak tawh, lai em em in kan kal a, ngam leh ngam lova hnunglam ka hawi zeuh chuan kan Sir te pahnih ka va hmuh lehnghal! Hetih lai tak hi chuan thih daih kan duh hial zawk in ka hria! (Hemi ni atang hian phone a ka biak turte leh min biak tum reng reng te chu, ka nu leh pa in an biak hmasak loh chuan tumah direct in ka be thei ta lo, landline chauh la awm miau hek )

Kawng peng kan hmuh hmasak ber ah chuan kan peng ta vat a, Star te hmuh chak over lutuk that lohzia te pawh zir chhuak ta hialin ka inhria e….hehe.

Step zim fahran kan zawh lai chuan ruah arawn sur leh, nihliap lian lo tak chu kan inzawn, ruah lah chu a tam tial tial mai si, kan huh deuh vek tawh. Mi dawr hulhliap zau deuh laiah chuan kan chawl ta ringawt, ruah chauh ni lovin thli a thaw tel bawk, chu sunday tlai chu tlai nuam danglam tak a ni, tui lo khawthla pur pur chu nihliapin kan dawh a, kan nui vak vak, tui kan intheh, kan thiandun chuan kan hlim tak zet a ni. Jose chu hmu ta lo mah ila, naktukah ka hmu dawn tih ka hre tlat, rawllai d zuna han uai veng veng hi chu nuam ve deuh mai ania, Jose-a ngaia lunglen loh hi ka hlau tawh zawk!

Amah nen chuan school huana Neem thing hnuaia thut te hi anuam bik, Neem rah kha tak mai in sehkeh siak te, arah bawr tup mai chhiar dun te, Eucalyptus rah tla chhar a rem mawi te, trul vaklo chung pawh a canteen a kal te, School huan thutthleng sang a thut a, ke then lauh lauh chunga titi te, a fiamthu mak tak tak a lo nuih vak vak te kha a va nuam thin tak…

Vawiin hian Jose chuan school arawn kal lo. Ka lungphu hi a chawl a ni ringawt! A tello hian nikhat hi a lo va rei em! A tukah pawh a rawn kal chuang lo. Chawlhkar khat heti em a rei ka tih hi ala awm lo. School naupang tamtak zi nuaih nuaih te chuan min ti harh zo lo va, mipui an tam poh leh ka khawhar a zual zawk si.

Class ka luh chuan tlar hmasa ber kil ah alo thu a, beisei si beisei ngam si lovin nitin hun ka chhiar thin, ka zawng reng a, a awm miah lohna hmunah pawh ka zawng ru hram hram thin, tun zet chu ka mit vai a ni ta lo.

"Engatinge school i kal loh char char a?" Jose ka hmuh veleh chuan ka ti nghal,

"Ka damlo"

"A ni maw..?" ka ti let hu.

"Min rawn kan ka lo ring a"

"Ka zak alawm," ka ti.

"Chhas te damlo an kan zak ngai mi..?"

Ka phu nasa lutuk..!

"Eng maw isawi..?!" ka ti vak a, ka taksa pum hi a sa chhuak vek. Ka lum pup pup mai. Ka kut chu a rawn vuan, midang class chhunga lo awm ve ho chu ka melh zak zak a, min ngaihven hmel an pu vaklo bawk nen ka kut chu ka la sawn duh bik ta lo.

"Mawite, ka bialnu ni ta che"

"Jose…" ka ti ringawt.

"Min duh em..? min chhang la" ka mit ah tak a en reng mai si.
"Min duh tak tak a mi?!" Ka ti hnuhnawh vel.

"Ka hmuh hmasak ber ni atang khan ka duh che, ka ti tak tak" a ti sap a. Ngawi renga kan in en vang vang hnu chuan,

"I va sawi har si ve"

"Eng hun hi nge sawi hun tih ka nghah chhung hian hun hi a liam zel a"
Ngawi rengin ka en, a aw a thian kharh kharh a,

"Mawh, min chhang la" ngen ngawl takin min en a,

"Aw, kei pawhin ka duh che "
tiin ka chhang ta. Khawvel hi anuam veng veng a, engkim mai hi an mawi a ni.

School ban veleh chuan kan inzui leh nghal chat, nidang a kan inzui ai khan a nawm dan adang lehzual ta.

"I kut ka lo vuan" a ti, a kut min rawn bantu chu ka lo vuan chat a, ka hlimzia leh bialpa neih feeling nawmzia hi….ka sawithiam lo.

"Ti nge i dam loh a..?"

"Kan khuaah ka haw a, kawng a chhia a"

"Ti nge ****hi kan khua i tih ziah thin a!?"

"Ka sei lenna hmun ania"

"E he…a ni maw!?"

"Kum 12 ka nih thleng kan awm alawm, a aia khaw nuam tih hi ka nei bik miah lo asin" a ti a, ka lo nuih sen sen,

"Min la hruai ve la"

"Aw, l duh phawt chuan"

"Mahse kawng that hunah" ka tia, a nui hawk hawk a.

"Chuan Zankhuain ke in kan kal a, ruah asur nasa si, ramhnuai ah riahna a awm bawk si lo, In kan thlen chuan ka khua asik nghal char char "

"Awi,ka va khawngaih che. In khuaah chuan i damlo char char a ni maw…?"

"Aw…ni deuh ber mai"

"Phone in min rawn hrilh ve tur a nia"

"Hey…"a ti, min rawn en. Ka lo en let ha a,

"Enge?"

"Kan khuaah phone a awm lo"

Kan nui dun ringawt.

A nui mawi tak chu hmuh a ninawm loh va, a mitmeng damlohna vanga chuai deuh hlek lah ka hmuh hmaih hek lo.

Dam takin school a rawn kal leh alawm. Hei ka bulah a awm a, kan school step chho leh thui tak hi, Jose nena kal chuan a thui lova, a chho hek lo. Step kan zawh chhuah chiah hian a hrehawm a intran zawk thin, a ni veilamah apeng a, kei ding lamah.

Jose chuan school a rawn kal lo leh zeuh thin a, ka ngai vawng vawng thin. A hrisel lo ta tlat mai.

Tûk tin Lalremsanga'n school kal turin min sawm ziah a, kan tual zawn alo thlen hian "Mawite" a tih ngei ngei thin avangin kapi hian alo sawi khalh a, ka chhungte hi an nui dar dar thin. Min chhaihfiam fo lehnghal. Jose hian a hria ang tih ka hlau thei em em bawk. Lalremsanga nen tuk tin school kan kal rual ziah bawk si, Jose aiin a hmeltha, a smart zawk a, a pian ala nalh zawk cheu. Jose aiin min care thiam lehnghal, hnar dan mawi hrerual ka la nih loh bakah, Jose-a ah hian ka luangliam lutuk a, Lalremsanga'n min beisei deuh chu engteh ual ah ka ngai rih lo a ni ber mai. Mahse tun thleng hian Lalremsanga biak hi chu nuam ka ti. Nupui fanau a neih hnu thleng pawh hian a aw ngaihnobei tak, tuktina min au ziah thintu kha, ka theihnghilh ngai reng reng lo.

School chawlh a lo hnai ta. Jose nen kan inthenna ni a lo hnai ve zel bawk, ka huphurhin ka hlimlo takzet a ni.

"Jose ,tinge iva hlim lo ve?"

"Kan in hmu thei tawh dawn lo, mahse engtia rei nge ka hre lo"

"Aih…a ni thei lo" awmze nei lo zet chuan ka ti chiam a,

"Naktukah ka pa nen Delhi ah kan kal dawn"

"Enge in tih dawn…?"

"Ka hrilh thei rih lo che…"

"Hmm..m..phai lamah min awmsan i tum ti raw…?" ka tum nghal bur a.

"Aih tum lo"

"Anih chuan school khatah kan lut leh thei a lawm…"

"Ni e…"

"I zêp a ni, in khuaah school kal i tum niin ka hria" ka ti tralh a,

"Mai thei" a ti ta, ka ngui nghal rawih thei.

"Ti nge hetah In in nei tho sia, thingtlang a awm chu a nuam iti zawk a mi?"

"Nang awm ve phei la chuan nuam ka ti zual ngei ang" a ti a, a nui lui chiang mai.

"Chuti chu ka lo zui ve mai ang che" kan nui dun a, mahse a hah hmel riau hian ka hria.

"I dam lo ti raw…?" ka ti ta ringawt a, thudang sawipui ka tum vang pawh a ni chuang lo,

"Dam e, ka tha alawm"

Step chu kan zawh chhuak a, inthen a lo trul leh ta, mahse nidang ang a ni thei lo, naktukah kan inhmu dawn lo tih kan chiang dun a, kan hma hun sawi turin kum 16 ve ve chauh kan ni.
A liam hma chu ka thlir, vawihnih alo hawilet a, ka mittui tling pap chu a hmuh phak loh ka beisei.

School luh a lo hun leh ta, chhungte thu hnial ngai lem lo ka nih bakah chhas neih thunawi vel vangin hostel a awm a ngai. School dangah, new comer ka ni dawn lehnghal. Jose chu ka phone thin a, mahse phone chu a ring ral ziah, tuman min chhang ngai lo! beidawn ka duh a, ka beidawng phal si lo. An In ah ka kal ta ringawt, Jose hmu lo leh a chanchin hre miah lova hostel luh chu ka ngaingam thei lo.

"Jose-a te in a ni em..?"

Hre sa rengin ka zawt a ni. Kawngka chu zim te a inhawngin nula senior lam deuh tawh hi arawn dâk a, luh duh mah ila a rem tih hmel loh viauin ka hria.

"Aw ni e…enge ni?"

"In ah a awm em?"

"Awm lo"

Zawhna dang zawh leh chu ka huphurh kher mai, mahse zawh ka duh si, sawitur ka ngah lutuk tlat.

"Khawnge a awm…?enge a tih?"

"Kan khuaah a awm…"

Engatinge an khuaah hian a kal fo le! Hetah hian heti khawpa in nuam hi an nei tho a, nuam a ti lo em ni? Nge min ngai ve miahlo…!
An khuaah hian ngaihzawng a nei zawk em ni..?!! Thil tam tak ka ngaihtuah nghal zung zung a, ka ipik zual.

"Ti nge phone hi in chhan ngai loh? ka phone thin a.."

Ka zahtheihlohna zawng zawng sawmkhawmin ka zawt. Beidawng lutuk a haw ka duh bik si lo.

"Kan phone a chhia a"

"Aw…a nih tak chu"

Kawngka zimte inhawng atanga ka hmuh theih tlemte ringawtah pawh an inchhung changkan zia chu ka hre thei, a pawnlam chauh pawh hian eng ang taka hausa nge an nih tih hi a tilang chiang hle, phone chhe siamna neilo tur hmel an pu lova, bill pe thei lo lah an nih a rinawm loh bawk. Kha zo zai phone ka tum thin te kha ka inchhir ta hial mai.

"Engtik nge a lo haw ang?" Ka ti leh talh a.

"Ka hre lo.."

"Hmuh ka duh a ni" ka ti mawl tawp, min khawngaih hmel te pawh a pu ve deuhin ka hria.

"Tak tak in tunah chuan Delhi ah a awm" a tih chuan ka phu zawk a,

"Delhi an zin kha an la cham char char tihna mi..?!"

"A zin tih i hria a maw!" a lo ti let hu, mak tih hmel fe hian a mengphawk.

"Aw…"

Zawhna dang zawt leh tura ka an zuau lai chuan inchhung lam atang chuan,

"Bawihi i va rei ve, kan tlai dawn" tih ri ka hria.

"A nih phawt aw, hei kal chhuah kan tum a" a ti a, ka chhanna pawh nghak lovin kawngka chu a khar zui daih, hrilhhai takin ka kal sawn ta, tah vak vak ka va châk tak em.

Jose, i va fair lo ve.
…..,,,,

Lunglen theih dan zawng zawng a ka lunglen hnu chuan hostel pawh nuam ka ti ve viau tawh,

"Tawn leh ka nuam ngei e aw, Rawllai ka di te kha"

tih hla pawh thiante nen nui uar uar chungin kan sa ho thei tawh. Jose vanga mumal neilo tawpa ka rilru kal ding thin pawh adai tran viau e. Mahse biak pawh theihna tur remchang hi englaipawh in ka melh thin. Lalnunthara'n min ngaihven viau tih pawh ka hre thawi. Nikhat chu kan hostela afel deuh ho chu insu turin an thlang, ka tel ve teh mial, a thlun chhuak ang maiin kan thawvengin nuam kan ti ngei mai. Kan haw lam chuan traffic jam in min dang ta reng a, motor chi hrang hrang chu a ding tlar pût, khua a thim lek lek tawh tihah te chuan night bus ho din naah kan la tang, mahse a pawi lo….!

Kan hmazawn hla lutuk lo a Car chhunga ka hmuh chu Jose-a ni tlatin ka hria. Thinlung mu hnu leh lunglen ava kaitho hneh tak em, ka khur nghal zawih zawih , ka thinlung bo tawh hnu kha he Car ah hian a awm a ni! Ka auh dawn chuan ka zak deuh si, bak ah Sir ten min hau ka hlau. Ka en reng a, ka insumtheihna zawng zawng sawm khawma ka insum chung pawhin ka hneh lo, ka au ta tho! Car tukverh chu Darthlalang thim deuh hlek a nih vangin ka hmu chiang thei si lo, ka aw pawh chu hre awmin a awm lo, kan tlanpel. Ka hlimna zawng zawng hi an thlawkbo zo ta duak a, ka lung hi aleng a ni.
—-

"Hey…lo ding teh"

Lalnunthara aw a ni.

"Hey ka ni lo…" A nui a.

"Mawite…"

"Eih…enge?"

"Ka duh che tih i hria, i haider reng dawn nge, ngaihzawng neih i duh lo hrim hrim?" Lalnunthara chuan a ti ta, ka en kiau a,

"Ni e…mahse"

"Mahse chu enge…?"

"Tu emaw ni ka theihnghilh theih loh a awm.."

"Theihnghilh turin ka phut kher lo che" a ti.

"I thik leh si ang, chutin tingawt suh"

"Niminpiah atang khan i danglam tih ka hria…"

"Amah ang deuh ka hmu a"

"A ni maw? Khawiah?"

"Car ah…"

"E he..i bia em!?"

"Ka ko a, a hre thei lova"

"Amah a ni lo aniang…ni se chu a hmu ve mai thei che sin…"

"Ni e…"

"Mahse i nungchang thlak kher lo la…hehe"

"Ka ngai em a ni"

Chu zawng chu kan sawi hman, study room pan na step remlo takah Sir te hmuh hlau tak chungin kan inbe zawk ngam chauh a.
………….

"Hei hi em ni Bawiha i thiannu chu?"

Ka hawi aa nasa mai a, Lalnunthara chuan min sawm tlat vangin visiting room ah ka zui lut ve ngawt a, visiting day a ni. Kan zalen ve deuh hlek.

"Aw…Mawitei a nih hi" a ti a,

Kan thu ta poh a, a nu te an lo thleng tih pawh hre lova ka zui ve ringawt chu ka inthiam lo kher mai. A nu chuan,

"In test naah i ti tha em ?" tiin min zawt.

Jose chuan car kawngka a lo hawng dawn mek a, min hmulo leh ka aw a hre lo pawh kha ka thinrim tawk a tling a ni. Car bul chu ka pan ruak ruak a,

"Jose…" ka ti vak.

"E he…nang maw?"

"Aw…"

Car chhung chu ka melh a, Jose-a nu leh pa ni ngei tur hi an lo thu, ka zak peih tawh lo,

"Engatinge min rawn biak miah loh?"

Ka mittui chu a tling pap, Jose-a chu a dawldangin a cher zual em em a, asang sawtin puitling hmel a pu deuh bawk, damlo hmel ni maiin ka hmu a ni. Car ah chuan a lut a, muangchanga min rawn en in a trawng tawh dawnlo emaw ka tih hnu ah chuan,

"Mawite , min theihnghilh rawh" tih chiah a sawi, en pawh min en lovin Car kawngka chu a khar a, an tlan liam ta daih!

A mak ka ti!

Hrilhhai zetin ka ding ta, ava mak ve, enge a chungah thleng! Engatinge kha tia min tih…!

Hetiang zozai mittui hi ka lo nei em ni? Ka insum thei lo zah pawh ka dawn zo lo. Ka dinna ngaiah chuan ka ding reng a, kal sawn turin ka ke chuan chakna a nei rih lo. Chu ka dinna hmunah chuan ka bula tuihawk lo luang ang mai chuan luangral vek thei ni ila aw !

Kalsan ka ni a, duh loh leh paihthlak ka ni ta.

In ka thlen chuan khua a thim tep tawh, ka thawmhnaw inbel chu a huh satliah mai ni lovin a far hian a far tluk tluk thei, Inchhung a lut ngam lovin kawngka bulah ka ding a, ka tahna vanga ka mit senrum te chu an hmuh ka duh lo. Ka nu chuan min hau dawn tih ka hre bawk si.

"Anu, au mami hi pawnah a awm…"

kan unau a naupang ber Tetei chu alo dak dêk dêk a, mak tih hmel deuhin min en reng lehnghal.

"Anu, u mami hi a huh vek ania" a ti leh.

"Damkawr lehnghal engvangin nge ruah i do a?"
Ka nu chuan ati, kawngka ah chuan arawn dâk vat reng a,

"Naktukah hostel i lut dawn, tuna ruah rawn do haw hi enge a awmzia? Eng ang pawhin na leh mah la, hostel ah i lut chiang khawp ang" a ti leh chiam a, ka chhang lo. Ka thinlung chu a rum, ka nâ vawng vawng.

"Enge i nu chu a au vak vak a?" Ka pa aw chu ka hria a.

"Lalthangmawii hi maw le…"

"Enge thil awmzia? Khatia pawna ding reng lo khan lo lut ta che…" Ka pa chuan a rawn ti bawk.

"Dam dawn chauh a ruah te do reng reng, a awm in a awm lo lutuk, eng maw taxi atanga i chhuah chhan kha?" Ka nu chuan a ti leh, ka chhang chuang lo. Ka pa chu ka en a, ka inthiam lo em em ringawt.

"I tap em ni…?" tiin Ka pa chuan min en kuau a,

"Aw…"

"Lo lut phawt la, in ti hul la, kan sawi tha leh dawn nia…"

Ka lut ta.

"A engamah hma in i hau chiam a, eng thil nge a tawn tih zawh hmasak phawt tur a nia, a trahna a mit bui luk te kha i hmu lovem ni…?" ka pa in a tih ri chu bathroom atangin ka hre thei. Ka nu lakah chuan ka inthiamlo zual.

"A bialpa anih ka ring…taxi atangin a au a"

"Chuan a chhuksan che a maw…?"

"Aw, ka dang hman lo"

"Enge maw tak zawng a thleng a nih chu…"

Rei tawk fang bathroom ah chuan ka awm a, a vawt bawk nen awm reng theih a ni si lo, ka chhuak ta nge nge a.

"Bawihi, lo kal teh"

Ka inbual zo chu min lo ko nghal. Tîm zetin dawhkan bulah chuan ka thu a, ka nu lungawilo hmel chu ka hmulo der tlat thung.

"Joseph-a chu tu maw…?"

ka pa chuan a ti nghal, thu peh hel chi vak a ni lova, kanu chuan alo hrilh tih ka hrethiam ve mai.

" Ka thianpa…"

"I bialpa maw?"

"Aw…"

Ka pa chu a thaw halh a,

"A rei tawh em?"

"Kum 1"

"Engvangin maw i rawn trah haw a…?"

Ka ngawi reng a, ka rilru a hrehawm a ni. Engvangin nge min biak duh loh? Ka theihnghilh aduh zawk maw…?

"In inthen em ni..?"

"Rei tak kan inhmu tawh lo, min be duh lo, a chhan ka hre lo"

"Ngaihzawng nei turin ila naupang lutuk…"

Ka nu chuan alo ti hmak, a la lungawi lo hle mai. Ka ngawi rauh rauh a, Joseph-a hi tawng lo ila ngaihzawng ka la neilo mai thei…mahse ka tawng miau si…

"I lakah mawi lo takin a awm em..? Ka pa chuan a ti leh a.

"Aih, ka pa, ka kut vuan tur pawhin min dil hmasa thin"

ka mitthlaah a lo lang nghal, zahawm takin ka bulah a awm a, zahawm takin a bulah min awmtir bawk thin.

"Ruihhlo a khawih em…?"

" Khawih lo "

"Chutia a biak duh loh che chuan ngaihzawng dang anei tawh ava ni mai awm ve"

"A ni mahna…"

ka thin chu a phu zawih zawih a, ka na vawng vawng bawk.

"Tleirawl inhmel duh te hi chu thil awm ve ania, theihnghilh tum la, zirlai inih hi hrereng zawk la a tha ang"

"Ka tum ange…"

Hostel ah chuan ka lut leh ta. Theihnghilh tum poh leh hriatreng a awl, theihnghilh tum loh lahin beisei asang zel bawk si. Kumsul pawh a herliam ta. Ka duhtaka nghak hian engtia rei nge maw ka awm dawn le?!
——-

Kum a lo thar leh a, school season pawh a tawp kan khar dawn ta reng mai.

"Zanin chu ka lo leng ang aw"

Lalnunthara chuan zawi te in a rawn ti sur sur, exam kan zo, hostel atangin kan chhuak dawn mek a ni.

"A…lo leng rih suh" ban zet hian ka ti a,

"I sual ve ngawt mai.."

"Ni e…"

"Jose chu a lo leng angem?"

Pangai tak hian min zawt mai a,a hre vek tawh tho. Ka lu ka thing, nuih ka tum zet na a ka nui thei lo.

In ka thleng chu hostel atanga hawng e ti lovin phurna leh hlimna reng ka nei lo. Ka nu leh pa chu an inbe ru deuh sar sar reng a, ka chungchang an sawi ni tlat hian ka hre lehnghal, Jose-a hming ni awm tak an lamrik te chu ka hre deuh. Jose nen a kan chungchang kan sawi atang khan thla 8 aliam tawh, tun ataka an han tharthawh na chhan tur ka hre si lo, ka ngaihruatna mai mai niin ka hria.

"Jose-a nu leh pa te an lo leng dawn a…Mami"

chaw ei lai chuan ka pa chuan a ti ta mai, ka tho kang uaih a, zak deuh tak chungin ka thu leh, a hming ringawt pawh hian min va ti danglam hneh thin tak em!

"Ti nge..? A nu leh pa pawh ka hre hleinem"

"In exam lai khan an rawn zawng che a,hostel atanga i chhuah veleh lo len an duh thu an sawi a"

"A va mak" ka ti ringawt, mak ka ti tak tak!

Ka nu leh pa hmel chu ka en a, mak ti hmel pawh an pu chuang si lo, chaw pawh ei mumal lovin ka puar ta ringawt.

Jose chu a lo kal ve angem?

Ka thin a phu nghal dawt dawt a, lawm tur nge lawm loh tur tih pawh ka hrethiam lo, engmah ka zawhbelh ngam si lo. Car a ka hmuhte kha an ni angem..? Mahse arei tawh em a, an hmel kha ka hrechiang bawk si lo. Jose ka tawn ni atang khan tumah dang hi ka ngaihsak hman lo va, ka hmuchiang thei tawh hek lo.

Thleng ka sil mek lai chuan kawngka kik ri alo awm ta, ka thin chu tla mai awm khawpa mawiin a phu rang, a insêp dawrh dawrh a ni ber mai. Ka va hmu pha lo na a an lo lut chu ka bengkhawn kar a. Sitting room lamah an thu, hmuh ka chak rualin ka hreh si.

An ti ti luam hlawm a, an sawi tak hre chiah lo mah ila ngaih a tha mawlh lo a ni.

"Mami, i lo kal hman tawh em?"

"Aw…ka pa"

Ka tha te chu a khur, Jose hmu dawn ni a ka inhriat vangin ka zam em em bawk.
Patling pakhat leh nutling pahnih an ni. Ka ding zum reng a, thil diklo lianpui a awm tih ka hrethiam tlat.

"Enge…ka pa?"

"Hei hi chhiar turin kan duh che a"

tih pahin nu pakhat zawk chuan card arawn phawrh, ka kut khur der der ah chuan a hmehbel chawt chawt a,

"Jose-a ziah a ni ti raw?"

"Aw.."

"Engatinge min pek…?"

"I ta tur ania…"

"Khawiahnge Jose-a chu?"

ka zawh hreh ber, ka zawh duh ber ni bawk si chu ka zawt ta a. Tuman min chhang lo.

"Card kha Valentine's day khan pek che a duh a, mahse in exam lai ania, hostel ah i awm bawk si a"

Karhnih liam ta kha Valentines day chu a ni. Ka sa pup pup.

"Khawiah nge amah hi..?"

A reh thiap!

"Ka room ah ka kal dawn…"

Tuman min chhang chuang lo. Hrilhhai takin ka kal ta a.
Envelope mawi tak a ni, valentines day puala siam tih ahriat bawk…Jose chuan min lo la theihnghilh lo a nih hi..! Engvangin nge amah theihnghilh tur khan min tih bik..! A fair lo, envelope chu ka hawng a, pin te tak te (love) lem chuang a lo tla, ka phu deuh zawk. Chhiar lova pawhthler vek mai ka duh, enge inziak tih hi hriat loh ka duh zawk, mahse hriat ka mamawh. Ka hlauthawng. Hei le….

Mawite,
I kut vuan leh thei ni ila, i hmaah thingthi a, i mita en chungin he thu hi hrilh che ka duh,
"Ka hmangaih che".
Joseph

Ka room atang chuan ka tlanchhuak nghal rawk rawk a, an lo la thu thrap, nu pahnih, Jose-a nu leh a Ni anih ka ring; an trap ni tlatin ka hria,

"Khawiahnge Joseph-a chu a awm?" tah aw truau hian ka zawt a,

Chhanna a awm mai chuang lo,

"A thi a ni ti raw…?"

A la reh thriap, rei fe hnu ah chuan

"Lung cancer ania..kar khat liam ta khan.."

a pa chuan a ti ban chat, a sawi zawh hma chuan,

"A thi tawh a maw!?" ka lo tihzawm.

Ka hawi â deuh ruai a, min chhanna tur chu ka hre duh lo! Nu pahnih te chu an tap bawk. Hriatthiam ka duh loh chu ka hrethiam ta. In atang chuan ka tlanchhuak nghal. Zanriah ei hun lai a pel hret tawh, mahse kawngpuiah chuan veivak an la tam hle, mi chi hrang leh hnathawh in ang lo mi tam tak insulpel zut zut karah chuan ka pan lam pawh ngaihtuah lovin ka kal mawp mawp a, hmalam panin ka kal zel ringawt mai a ni.

"Mi aa pa, Lung cancer in natna na tak i tuar a! …ka lakah i lo zep vel a maw ?! Ka zawng thin che, nitinin… ka ngaidam ngai lovang che, ka hua che a ni"

Ka chau em em a, chu khawpui eng pe un chuan ka lusun hi min hriatpui lovin a ngawi muah mai si.

A thlân ah ka kal teh ang. Mahse ka hre si lo an phumna hmun, ni lo ka kal dawn lo, Lalhminglian, heti em hian min ti rethei ang maw…! Min ngai ve miahlo a ni ti raw? Ka tello in natna nasa tak i tuar tur chu, eng tin nge i ngawih theih zawk, min mamawh lo ang maiin i awm a, min tlanbosan a, i in thukru a, i tello va hun leh ni ka hman ral takte kha natna hlirin asin ka hman ve tho, a fair lo ka ti.

Hmuchiang mang lova kawtthler thui tak ka kal pelh hnu chuan ka ding chawt a, step thui tak inphah chhuk ruih chu ka thlir vawng vawng, helai hmun hi a ni Jose-a nen kut invuana kan dinna hmun kha! Step ah chuan ka thru hnawk a, engtia rei nge ka thut tih pawh ka hre ta lo. Ka thahrui zawng zawng hian min kiansan ta ang mai hian ka chak lo a ni.

Ka chakna ber, ka beiseina eng, beidawn lai ber pawh a ka beisei thin chu lak bovin a awm ta. Damchhung atan ka hmu leh tawh dawn si lo…

Ka tap.

"Bawihi, In ah haw tawh ang, hei zanlai a pel tawh ania"

"Aw le….Ka pa"


Author : Sangtei Tlaichhun

24 July 2016
Advertisements
Aside | This entry was posted in Fiction, Thu Ngaihnawm and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s