Chu Luikam ah chuan

Ka ngaihtuah rei hmanlo, side pe thei ang ber a ka tlan chung chuan ka ri chawrh a, bike nen chuan ka leng lawp a, kham sang taka tla vawn vawn ang mai hi niin ka inhria. Chutah ka mit sulh a, nikhaw hre lovin ka awm zui ta a.
Thla a engin khua a thiang tha kher mai, arsi te chu mawi takin an pe un mai a. Han hawi thuak pawh hian siruk leh chho hreivung hi chu mit sir hian a hmu nghal deuh nalh zel mai. Lunglen la na mi tan phei chuan lunglen vawng vawng na tham chu a ni ve reng a ni.

Chutia rilru ka kawm melh melh lai chuan room atangin ka nu chuan min rawn ko lauh lauh a, kei chuan,"Enge nita ka nu?" tih pah chuan khumah chuan ka thu a. 'A, hei i ni Siamtei kha a zual deuh e an tia, Falkawn damdawiin a hnai ber bawk a, indah luh mai an tum a nih chu, dar 7 a ri awrh chauh bawk a, va kal ve mai ta che, tihtur pawimawh lutuk i neih lemloh chuan', min rawn ti a. Ka ni te hi Aibawk khuaa awm an ni a, Falkawn damdawiin chu a remchang hnaivai ber a ni. Kei chuan,"Awle, thianpa Lca kan sawm chhin ang e" ka lo ti a.

Diktak chuan ka chhuak chak lemlo khawp mai, a hma zanah kan veng ami damlo kan men tlaivarpui bawk nen. Chutah ka thianpa lah veng dangah chaw a lo ei chu niin, a lo la haw hman bawk silo. A, thian inngai tak ni mah ila, fanau nei ve duah tawh leh kei tlangval a kara a ka kua nazawngin 'u Rin' tia an koh sup sup tawh, tlangval si-ek kai tawh chu inkawm reng chu a har ve bawk alawm, ka dem lutuk love. Fanu Sawmtei, kum 13 mi vel a neih lah chuan min nel em em a, 'Pa Rin' tiin min ko mai thin…….. Kal rih loh mai ka duh thut thut a, mahse kalloh ringawt chu ka inthiam chiah bawk silo.

Zawlkhawpui veng kil tawp lam atang chuan ka han inkhalh chhuak tan ve ta dat dat a. Vawiin hi may 6, 2016, ka birthday a ni a. Piancham lawmna zanriah tui tak kan ei zo chiah bawk. Vawiin ni angah kher kher ka ni chuan min boralsan ang tih ka hlau hliah hliah mai. Ka kalna tur hla em em a ni lo bawk a, ka thleng har lutuk turah ka inngai lo.

Sikulpuikawn ka thleng phei a, muang mar tawk a tlan zelin, Ngaizel, Saikhamakawn. Melthum ka thleng phei ta, a reh phei ta raih mai. Chutah keimahah nuam tih lohna riau hian min tham er er a. Tinge mawni le, thla tih vel lah naupanlai atanga sawithaih ngailoh ka nih avangin ka hlau ngai lem lo bawk si. Tlan zel nuam tih lohna riau ka nei a, chutih rual chuan kal ngei tura min turtu a nasa zawk bawk si. Awm tinuamlo turin sarthli lah chu a thaw vuk vuk reng mai bawk si, motor veivak hmuh tur an awmlo tluk a ni.

Chutah zun chhuakin min tur avangin zung turin bike ka park fel te te a, meizial chu thli a thawt nasat em avangin tan kai a harsa khawp mai. Ka han hip vang vang a, chutah a hma-a khua thiang tha em em si kha kawl a rawn phe a, ruahsur tur a rawn intham ta tlat mai. Khawpui te a rawn rik tak dur dur avangin hmanhmawh takin kal zai ka rel leh ta a.

Chuta ka han tlan tan leh dawn chiah chuan alawm thil mak lutuk mai, ka mit la nghal zaktu ka va hmuh tak ni. Thli hi nasa zet hian a rawn thaw vuk vuk a, a rawn ri phei hum hum a, ralkhatah keimah min tawk tur zawng a rawn tlan, motor ni ve awm tak, motor pianhmang ni chiah silo, MST bus tiat vel, vai truck ang maia lang de chuai mai, eng em em mai, chak zeta rawn tlan phei chu a ni. A mak lehzualna em em chu hetianga kawng kawiah pawh kawng kual awmlo tawp ang mai a ngil taka a rawn tlan tlat mai chu a ni. A tlan dan chu boruak lawng hma lam pana ngil taka a thlawk ang mai hi a ni. A changin lei rap a,a changa boruaka rawn thlawk hi a ang ber mai. Makti takin hma lam pana tlan ve zel chung chuan ka thlir reng a,kan intawh dawn hnaih chuan kan en leh a, chhe heiiiii…hei zet chu ka mumangah takngial pawh ka la hmu ngai hauh lo,danglam mawi ropui tak anih rualin tihbaiawmna riau a nei tlat a ni. Ka ngaihtuah rei hmanlo, side thei ang ber a ka tlan chung chuan ka ri chawrh a, bike nen chuan ka leng lawp a, kham sang taka tla vawn vawn ang mai hi niin ka inhria. Chutah ka mit sulh a, nikhaw hre lovin ka awm zui ta a.

Nikhua ka hriat tantirh riai ruaia ka hriat hmasak ber chu ka lu na tluk tluk chu a ni. Ka han meng a, a thim mup mai bawk si nen, ka han tho chhuak tur chu ka chesawn thei ta hlek lo mai le…. accident ka tawk a ni tih ka hrechhuak leh tan ta a. Ka han ngaihtuah chiang a, kha thil kha tihpalh ni lovin tihluih, aw..tihluih a ni chiang lutuk!!! Ka thin a rim kher mai, min ngaihsak zui hauh lo leh nghal. Ka tho chhuak theilo chu zangthalin ka han mu leh a, ka han maimitchhing leh vang vang a, chutah zawitea tawng ri ka hre ta tlat mai!

Tawng ri ka hriatna lam a hawi phei tura ka mit ka han meng chiah chu, eheu leh!!!!!! Khawiah nge ka awm!!! A hma-a aimitthlawn ang hlauh a thim vek si kha a lo eng ta ut mai le. Ka mumang a nih ringin ka han insik chhin a, a la na ve tho bawk si. Mahse chumi achin chu mumang ram a cheng ang deuh ruaiin, fiah taka thil hre si in ka awm zui ta a ni.

Taka, ka kal chhan ber ka ni kha enge a an tak zel ang le tia ka ngaihtuah lai chuan,'I ni chu a tha e, ngaihtuah duh suh" tia rawn tawng an awm avang chuan ka phu chiang kher mai, phawk hru chung leh tim tak chunga ka han hawi phei chu le, mak tak a ni,hlauhthawnnaa khat kha ka thla muang nghal siai siai mai. Nula nula fai sar, inkhaithli leh hmeltha, thianghlim zet mai chuan min lo nuih sen sen a nih chu, a bulah chuan tlangval ngilneih hmel zet hi lo dingin min lo nuih var var bawk a.

Mak tih em avang chuan mengphawk, chilthli tla lek lek hian ka lo en dun ngar ngar a, tawng zai pawh ka rel lo. Chu nula chu ka hmuh hnu a ang ka ti em em a. Ka han ngaihtuah let a, Dawrpui pheiah ka thianpa Dika phone dawr a ka luh laia phone lei tur lo enkual mek nula, ka vei zui tak em em mai, ka mumang lam thleng a ka hmuh zui, ka zahzum leh dawihzep luat vanga a chanchin ka hriat zui tak loh nen khan inanna riau an nei a, mahse tuna nula ka hmuh hi chu a tawi hret zawkin ka hria, a biang vei lamah khuavang chhinchhiah a neilo bawk.

Khatia phone a en dan dan lai khan kei chuan mit tla lek lekin ka lo en a, a hmeltha em bawk a ni. A hmel zaidamna-a khat, pawisawi lo hmel hliah hliah, make up a mawi tawk chauh a hmang ve, a thawmhnaw lah man to vak hmel ni si lovin a faiin a inhmeh em em mai bawk si a, mahse milian tak chhungkua atanga lo seilian anih a rinawm em em thung si,

Ka lo thlek ngawih ngawih laia a rawn hawichhuak chu kan mit leh mit a intawng ta sak mai le, mipa zawk mah ni ila ka hamhaih chiang lutuk, ka ṭek chhuai in ka hria . Ani lah a lai chhia tih hriat rengin a sen ap ap mai bawk. Kan mit kan la sawn ve ve nachungin ka hriat loh karin ka lo thlir leh vung vung a. Chutah ani pawn min rawn melh ve leh chiah chu a nuam hi ka va ti tehreng em, min rawn nuih saih zui bawk kha chu engtikah mah ka theihnghilh thei tawh ngai lovang.

Tihtur ka la ngah avangin dawr atang chuan ka chhuak hmasa a, mahse ka tihtur tul ka tih lai pawh chuan rilru reng ka pe thei lo, kha nula hmeltha lutuk leh a nui hmel kha ka mitthla-ah a cham tlat, hmangaihna nge vei zuina satliah niang le tiin ka ngaihtuah nasa mai a, tun thleng hian ka la theihnghilh thei lo chu a ni si. Phu ve pha dawn lo nia inngaih tlatna leh ka mawl dawihzep luatna avangin hmuh leh tih ni reng ka nei thei ta si lo. Ngam leh ngam lova chhui zui duh mah ila ka zirna chhunzawma phai lam a chhuk leh a lo ngai zui ta mai anih kha.

Chutia kum engemawzat liam ta thil thleng ka lo ngaihtuah veng veng lai chuan aw han thian kharh ri chuan min ti harh zawk a.

"Lokal rawh le, Lydia ka nia," Lydia… an va han inang tak em…. Chutah ngaihtuah mang miah lo chuan ka han tho chhuak hlawl mai a. E he, ka na zawng zawng kha a reh vek, mak tak a ni..!!! Mahse mahse..,khawnge ka awm?Engtin nge????? Zawhna hlir…chutih lai chuan Lydia chu a rawn kalpuipa lam chu hawiin, "Min lo va kalsan la, muangchangin kan lokal ve ange," a ti a. Chutia a kal liam tak hnu chuan Lydia chuan a lam pana kal tur chuan min han hui zeuh a. Kei chu phurna namenlo in min man a, a lam pan chuan zauthau zetin ka pen phei hlawk hlawk a.

Kan kal tan dawn chauh tih chuan thil mak ti mai ang,a dang ka va hmu ta. In var mawi, ropui leh thianghlim em em mai chu… A design ang chu ka la hmu ngai reng reng lo. . Chutah gate kan thleng chu mak dangdai fahran hian a rawn inhawng tial tial a,ka hau mai hian ka lo thlir a. Chutah Lydia chuan, "Lut ang le" a ti ta a. Hetiang hmun ropui lutuk a lut tur chuan ka zam nasa mai,diktak chuan ka khur ru der der mai a ni. Ka awmdan chu a hrethiam a ni tehchek ang chu, "Zam mah ta che tlangval, nakinah phei chuan cham hlen hial i duh ang" a la ti ta deuh deuh a.

Gate kan han lut chiah chu e, eng hian nge sawifiah zo ang le,a nawm dan te, mawizia te, a, ka sawithiam ngang lo, mite anga tawngkam thiam a, a mawi leh nalh zia han sawichhuah thiam hi ka van chak tak e aw, ka sawi thiam dan chuan an in leh compound te chu a cartoon raih tih hi a ni mai….

Ka hlim em em mai a, ka thla hi a muang siai siai nghal tawp mai hi a ni helai hmun ka thleng ve ringawt vannei ka intih lehzualna chu. Chutah kawtthler leh compound chhung a mi ka hmuh te chuan chuan mak ti hmel pu hauh lovin, hlim hmel tak hian min lo nuih sang hlawm bawk si.

A mak tulh2 mai, ka mi tawh apiang mai chuan hlim hmel takin chibai buk nan an lu min lo buk khum zauh zel lehnghal. An nelawm em em a, mikhual e tilo chuan ka tlangnelin ka ngampa sarh mai a ni.

"Kal ang le" a rawn tih takah chuan,"Khawiah?" Ka lo ti hu a. " Hruai tur chein min ti alawm, min zui phawt mai rawh," a ti ringawt a.

Lal in niawm maia mawi, nalh leh dangdai kawngkhar chu a tawlhsawn riai2 a, inchhung lam atang chuan thil rimtui em em hi a lo nam chhuak chak2 bawk. Inchhung chu tim angreng tak hian ka han lut ve a, tim lohna chi pawh a lo ni love. A inchhung engkim mai chu a famkim thlap ti mai teh ang. Mahse ka la hmuh ngailoh hlir bungrua leh thildangte chu a ni tlat. Zamna leh huphurhna keimahah a lo awm lehnghal. A tu tak chuan hetiang hmun ropui leh nuam,thinlung dam vawng vawng theihna hmunah chuan min ko chu ni maw aw…ka ti rilru vang vang a,..

Chutah Lydia chuan ," Ka u, kan lo thleng e,i inpeih em?" tiin room lehlam ami chu a han au lang lang a. "Ka lo nghak reng tawh che u asin, lo luh tir ta che" tiin room chhung lam ami chuan a rawn chhawn lauh lauh a, aw chuan ngaihno a bei kher mai. Chutah kawngkhar chu a tawlh hawng riai riai a, Lydia chuan,"Lut rawh le" tih pah chuan a han nui sak a,ka pen luh rual chuan kawngkhar chu a inkhar leh ta a.

Ka va helhhawlh nasa tak em. Chu pindan mawi lutuk leh thianghlim lutuk chuan min tizam rum rum mai. Tlem ka han pen leh chuan ka hma lawk a nula feet 5'5 vela sang,pian nalh leh vun nalh zet mai,a sam a kawng thleng dawn a sei hi lehlam hawiin a lo ding zan mai le. Mahse min lo be bawk silo,a lo hawilet bawk silo chu ka hawihai reng mai a.
Chutah le,aw mawi tliang leh no nalh zet hian, "Thu ta che Rina" min lo ti mai chu ka va han phu chiang em, ka hamhaih zo leh ta vek mai. Chhan ka han tum chu ka kha chih tlat, ka tawng chhuak hleithei lo.

Ka hmingin min ko maw….engtin nge a hriat!!! A aw mawi zia te kha aw.
"Thu hahdam rawh" min han tih leh chuan ka lo la ding reng tih ka hrechhuak chiah a. Chutah muangchang hian thutthleng thut hahdam zetah chuan ka thu riai2 a. Ka pangngai leh deuh tawh avangin, "Tinge hetah min koh,eng ti turin, engtin nge ka hming i hriat" ka han ti bah nuaih a. Chutah ka lam hawi chuan muangchangin a lo inher a, a hmel ka han hmu chu, Lalpa leh……!!!

Ka phu nasa lutuk, ka meng bial kawk kawk a. Ka mitvai em ni zawk le?!! Kha nula, ka thinlai luahtu, ka zawn rùk reng ţhin, a chanchin ka hriat zui tak loh, a hmel leh a pian pawh ka duhthusam, vawikhat tawnna-ah hmangaihna a piang thei anih ngai chuan ka vawikhat hmuhna-a ka hmangaih nghal ngei mai khan min lo nuih sàng anih chu… Ka hlim nghal veng veng a, boruakah te chuan kàng deuh delh delh ni mai hian ka inhre hial a. Chutih rual erawh chuan ka kha a chih tlat, ka tawng chhuak thei tlat lo. Ţhianpa Lca, mi zei hàrh mai kha chuan min hmu se pa lo min ti teh ang chu. Ni e, kan intawnna hmun hi a dangdai bawk em a ni.
"Chibai le," a rawn tih chuan ka la ringhlel cheu a. Mahse ka hriatchhuah meuh chuan rang lutuk hian a kut chu ka dawm chut a. Ka va han thlah leh hreh tak em. Mawilo nilo se chu ka liak nghal hlup hlup duh ngei ang.

Chutah tlem a ka pangngai deuh hnu chuan, "Engtin nge hetah?" Ka han ti mawl tawp ringawt a. Ani chuan nui sen sen chung hian, "Ka la hrilh vek ang che," a ti a.

DORKI

Ka bulah chuan a rawn ţhu ve a, a rimtui chèk chèk ngei mai. A mak ka ti lutuk leh ka hamhaih lutuk chu ka buai zo va, ţawng leh nachang reng reng ka hre lo. "Ka mumang nilo se aw," ka ti rilru vawng vawng ringawt mai a ni. "Rin, mak i ti viau ang tih chu ka hria alawm, keimah ngei pawh khan rawn hruai thei che ka nia, mahse barakhaih che hi ka chak ve reng reng bawk a, min la hre ve tiraw? Ka hming chu Dorki a ni e," a ti ta a. "Hre ve a!? Ka theihnghilh ngai reng reng hleinem che," han tih nghal bawrh bawrh mai hi ka duh rum rum a. 'Dorki' a van mawi tak em…" Hre dawn lawm ni, min la hre ve zawk a ni maw?" Ka han ti lèt a. A hlim hmel kher mai. "Tehreng mai, ka theihnghilh ngai miah lo che," a han tilèt khauh mai chu keima hnena sawi a nilo emaw ka ti rum rum hial a, ka va han hlim tak em.

Chutah le, "Hawh teh, huanah i leng ang hmiang, i hriat ngailoh leh hmuh ngailoh, mak i tih em em tur te tam tak a awm asin. Kan la sawi chhunzawm zel dawn nia," a ti a.
Kawngkhar hnung lam atang chuan kan chhuak a, engkim mai chu han thlir ila, mi a ti phùrin mi a tiharh sawng sawng thei a ni.

HUAN MAWI
Phul hmun nuam em em mai hmunah hian kan kal phei a, chutah dinglamah kan kawi a, gate mawi zet mai, pangpar mawi tak takin a zàm hnan chùk mai hmun hi kan thleng ta a. Gate chu a han nam hawng a, pangpar rimtui chi tinreng rim hi a lo chhuak ram ram a, hnar a verh hle mai. A chhung kan han lut chiah chu le, chutiang em em a hmun mawi chu ka mumangah pawh ka la hmu ngailo. Theirah chitinreng, ka la hriat ngai miah loh te chu a lo rah tiar tuar mai a. Pangparte lah chu rawng chitinreng, eng rawng nge pawh ka la hriat ngailoh a par chuai mai bawk. Nun hi a hlim veng veng mai a, intipà ber leh sek ber pawn mawi an ti dawn tih ka sawi ngam sak.

Chutah huan piah zawkah min han luhpui leh chu, ka beisei loh deuhin ramsa chi hrang hrang hi an lo tualchai siau siau mai a ni. Naupangte lah chung sa chungah te chuan an chuang a, hlim takin an nui awr awr a. Mak ka tih em em pakhat chu Sakei leh sakhi niawm tak tak te an tualchai hova, nuam tih hmel taka an infiam ho chu a ni. Intihnat tum hmel reng reng an awm lova, Sakeibaknei te chu an mitmengah pawh an nunnem tih hi a hriat hliah hliah mai a ni. Keipawhin hlauhna reng reng ka neilo.

Ţhutna atan a puan ken thianghlim tak mai chu chhawl chungah chuan a han phah a, chutah chuan insi rialin tudangmah ngai lovin kan ţhu hle hle a.

Chutah kei chuan, "Khawi hmun nge ni reng reng le kan awmna hi?" ka han tih chuan, "Ka han sawi chhunzawm ange aw kan sawi lai kha," a ti ta daih a.

Mipa zawk ka nia, ka sawi hmasak a ngai a ka hriat avang chuan ka chanchin, amah ka phulo nia ka inhriat avanga ka bawhzui tak loh dan te, han chhui zuina tur engmah a hnutchhiah si loh dan te, chuti chunga amah hmu leh chak em em a ka hun ka hman ţhin thute. Chutah zirna lam avanga phai lam pan a ka liam tak thu te nen lam ka han hrilh a. A laka ka rilru puthmang zawng zawng zep pawh nei lova ka hrilh kelh avang chuan a hlim hmel kher mai. Nui sen sen chung hian min rawn nek talh talh a.

Chutihlai tak chuan thli niawm tak hi chunglam atang hian a rawn thaw huau huau a. Ka han hawi chhoh chuan le, "Ehe…" tih pahin ka ding chhuak zawk a. A mak hi ka ti lutuk. Sakawr var thianghlim leh mawi em em mai a lo thlawk anih chu. Chu ai maha mak ka la tih zawk a la awm cheu. Chu sakawr var chunga chuang chu tudang ni lovin ka ţhianpa Lca, ka chhuah dawn a sawm ka tum, lo chhuak bo ngei mai kha a lo ni. Hlim hmel tak hian min lo nuih a, ngunhnàm hriam hmel tak hi a keng a, hnehtu a ni tih a hmelah hian a hriat ngawih ngawih mai a ni. Ka han au dawn a, an thlawk liam ta nghal a. Mak ka tih em avang chuan chechang lo hian ka lo la ding reng a.

Chutah Dorki chuan, "Fairy tiin kan ko mai ţhin," a han tih chuan ka harh deuh zawk a. Ni e, kha sakawr khan kan naupan laia Fairy tales comics kan en a, kan chhiar ţhin kha min ti hrechhuak chiang hle mai. "Thil hi a van mak em em," ka han ti ringawt a. Dorki chuan mitmeng nguai deuh hlek hian, "I ţhianpa kha chu a chàm hlen tawh dawn asin. Nang erawh i kir leh a ngai si," a ti chuai raih a. "Enge chu chu a awmzia?" ka han tih chuan engmah sawi lo chuan a heh a pet fan fan a. A hmelah chuan thil engemaw inthup a awm a ni tih ka hrethei a. Engmah a sawiloh avang chuan kan ngawi dun vang vang a.

Chutah aw a han thian kharh a. "Ka chanchin lo ngaithla ve thung rawh aw," a han ti te te a. Zah hun a ni tawh lo tih hria in, "Khatia kan inhmuh hnu khan ka thinlung hian ka hmangaih che tih hi a pawm nghal thlap a, hèltu neuh neuh te chu nei ve ţhin mah ila, ka hmuh hma che khan hmangaih hi ka la tawng ngailo. Ka zirlaiah chauh hian ka rilru ka pe tawp thin."

"Ka rilru-ah i cham reng a, engtin nge ka hmuh leh theih ang che ti hian ka buai ţhin. Mahse vawikhat chu bazarah i kal liam ţep tihin ka hmu hlauh mai che a, ka ţhiannu chu ko nghalin ani chuan a hriat ţhin thu che leh class 12-ah classmate in nih thin thu a sawi a, ka lawm kher mai. Mahse i awmna veng leh i chanchin dang a hriat loh thu a min chhàng leh chuan min tihnual deuh rawih a, mahse ka ţhiannu chuan i chanchin chu ngaihvensak zui min tiam avang chuan ka lawm kher mai."

"I chanchin ka hriat leh chhun chu zirna avanga phai lamah i liam ta kha a ni leh tawp a. Keipawh MBA zir zawm tum ka ni a, ka nu leh pa-in N.Delhi lam-a zir turin min ti na a, i awmna lampang Andra Pradesh-ah kal turin ka rilru ka lo siam ve tawp a, ka chhungte pawn min hnial lem lo. I awmna hmun tak hre lo mah ila, nangmah nen kan inhnaih deuh beiseiin Hyderabad hmunah zir turin ka nau Lydia-i, rawn hruaitu che nen khan kan rawn liam thla ve tawp mai a ni. Hmangaihna hi chu a mak tiraw?" tih pah chuan a han nui sak a. Ka thinlung hi a va han him tehreng em. Ani pawh chu a hlim em avang chuan a hmel te chu a nung sar mai a ni.

"Ngawi teh, thil pakhat i en leh lawk ang hmiang," a han ti a. Tlem a tlang pawng deuh, khaw thlirna (view) ţha fahranah hian hian min kai phei a, kan thlen dawn chuan thawm rapthlak tak tak hi a lo awm a, ka hmulthi a ding sung sung thei hial a ni.

HNUCHHAWN RAM

Khua kan han chuan chu le, kan awmna hmun nuam leh mawi em em sir maiah chuan hmun rapthlak zet mai kan hmu ta. Han en mai pawh chuan a nelawmloh ngawih ngawih a. Sakeibaknei hahum ruah ruah chu a rapthlak ngei mai.

Chung sakeibaknei te chu pathum an ni a, an lian hlawm kher mai. An sir mai aţang chuan eng ramsa nge tih pawh hriatloh, sakeibaknei aia tè deuh hret hi anni aia thawm mak zawk chhuahin rapthlak elkhen mai hian a rawn hram hum hum mai chu le, rapthlak tak hi a ni ringawt.

Sakei rual chuan beihrawn an tum tih hriat tak hian an pan hnai a. Mahse chu sakawlh hmel zet chu zam lo tih hriat zet hian a inhrosa a. Chumi pah chuan a dawk chhuak phei nghal zawk a. Sakei pakhat chu a hrawkah sehin a phawi kang vaw vaw mai a ni. Leiah pawh nghat chuan lo chuan a kutin a beng a, a thing vir nawk nawk a, leiah a han paih thlawrh a. Chumi zawh chuan pakhat chu a han phín phei lehnghal a. Chupawh a che hman lo chiang kher mai, kàr lovah a pet darh phung mai a,an che hman lo chiang kher mai.

Sakei pakhat dang leh chuan ngamloh an tawng a ni tih hriat tak hian meikhupin a tlanchhia, mahse chu sakawlh chuan chhuah mai mai a lo tum awzawng lo mai. Chak zet hian a um nghal a, sakei meuh pawh umpha chawpchilhin a han beng tlu, a han vawrhvir tak tak mai chu a hmuhnawmin a rapthlak chiang ngei mai.Sakei pathum zet a tihhlum chhung hi a reilo tehlam lutuk a, mak ka ti ngei mai. Hetiang reng reng a ramsa kawlh, chak, che rang leh rapthlak hi ka la hmu ngai lo. Chutah kan lam a rawn hawi chu a ka aţang chuan thisen a far chhuak nguai nguai a, min rawn melh chu a va rapthlak chiang em. Thlahrang, ramhuai hmel hi ka la hmu lo na a, ramhuai hmel chiah chiah a pu niin ka hria, chutah min nuihsuk ang hian ka zuk hmu lehnghal phei chu ka thauvah min man a, ka ràp lutuk hi ka maimitchhing ringawt mai a ni.

Ka han men leh chuan chu sakawlh chu a lo awm tawh lova, mahse Dorki chuan, "Khu, en leh teh," a han tih chuan chulai hmun sir maiah chuan mi bawrchhawr zet pakhat hian amah ang tiat vel pakhat hi a lo vaw thlu a. A hnek chawrh chawrh a, chutah a chhir zui nghek nghek a, a sawisakpa chu a che tawh eih lo. A luruh te chu a keh a, a thluak te chu a rawn per chuai a. Chutihlai chuan mi pahnih hian ruang chu an rawn hnuksawn a.

Ani erawh chuan a la duhtawk reng reng lo. An kut atang chuan ruang chu va chhuhsakin a bawhbet a, chu mitthi ruang chu a mit a tuamsak sauh sauh a, a hmaiah chuan chintawk awm lek lo hian a han hnek leh tak tak mai a nih kha. A hmai te chu a pèr zo vek tawh a. A rapthlak ka ti lutuk hi ka thaw te chu a chham lek lek a, Dorki pawh chu a lo chek tlawk tlawk mai a ni. Chutiang reng reng a thinrim leh sawisakna rapthlak chu ka la hmu ngai lovin, a ngaihtuah pawh ka la ngaihtuah chhin ngai lo.

Ka en thei tawh hlawl lo chu, "Hawh, kalsawn ang," ka ti ta nge nge a. Dorki chuan, "A rapthlak takzet asin, Pathian hnuchhawn ram anih kha, meidil phei chu a rapthlak dan tur chu," a han tizui a. Ka han ngaihtuah chiang a, Pathianin min la hnuchhawn lo chu ka lawm em em mai ani.

CHU LUIKAM-AH CHUAN
Ka la pangngai lo a niang, ka luak te chu a chhuak hlui mai a. Dorki chuan, "Lokal rawh, khulai a lui tui khu zuk dai ang hmiang, i harh sawng sawng mai ang," a ti a. Muangchangin kan inzui thla bek bek a.
Lui kan zuk thlen chu le, a lo mawi ngang mai, a dam dup mai bawk si. Hmuhnawm tham khawpin a inpharh nalh a. Kerek thleng kan han dai chu Dorki sawi ang tak takin ka hahdam sawng sawng mai a ni.

A hma a ka rilru hrehawmna zawng zawng te theihnghilhin ka hlim leh ta em em mai a. Dorki lam ka han hawi chu min hmangaih tih hriat zet hian min lo melh vawng vawng a, a va han nuam tehreng em. Chutah ka va pawm thut a, ani pawh chuan thlahlel tak hian min lo kuah let ve nghalin kan bul mai a lungpui chungah chuan ka pawm chhova. CHU LUIKAM-AH ngei chuan hmangaihna chu kan chen dun a. Hmangaihna lipuiah chuan pil dun vawng vawngin kan làng chhuak leh a, chu hmangaihna tui chu kan hak bawrh bawrh a, kan chhek per chhuai chhuai a, kan leng but but a, a chang chuan kan tla dun a, kan inham chhuak zo lo lek lek ţhin, a tawpah chuan chu hmangaihna tuipui chu dai kai a lungchim taka infawpin, thianghlim tak siin hmangaihna chu kan chen dun ta a ni.

Ka beisei phak loh leh ka tawn phak tur pawh a ka ngaih loh, hriat phak loh ram ril a ka tawn, ka hmangaih ngawih ngawih nen chuan hmangaihna chu kan chen dun ve ta si a. Aw….khatih lai khan kan bulah midang lo kal se chu ka hlim lutuk kha,' a à ta a ni maw…' min ti ngeiin ka ring. Ka bulah kawmthlangpa emaw, kawmchhakpa pawh ni rawh se, tupawh nise e, ka lo chibai lawp lawpin ania ka rin ni. Chu chuan ka hlimzia chu a tifiah ber awm e.

KA LO NGHAK RENG ANG CHE >
Chutia hmangaihna par kan han tlan dun chu kan hlim em avang chuan engtia rei nge hun kan hman tih pawh ka hrethiam tawh lo, hriat ngai pawh ka ti hek lo. Mahse ka ngaihtuah chhuah thut erawh chu hei hi a ni. Ni eng ka hmu miah lova, mahse khua erawh a ngai rengin a awm, a thim hauh silo tih hi. Mak tihna leh zawhna hlirin ka khat leh ta.

He hmun hi hre lo mah ila, ka khawvel chenna ţhin kha chu a ni hauh lo tih ka ngaihtuah thiam tawh. Chuti nise, he khawvel dang hi Vanram em ni??? A ni thei lovang, vantirhkoh te pawh ka hmu silo, ka mi hmuh zawng zawng nen danglamna tehchiam kan awm lo, an thianghlim a, hmangaihna in an khat tih bak chu.
A nih Paradise an tih hi a ni thei mai angem le??? Ka zawt khawp ang. Amah Dorki leh a nau an awm ngawt chhan te, tin, keipawh…..

Zawhna zawh tum a Dorki lam ka hawi phei nak chuan a mittui a hru zauh lai ka hmu ta tlat mai. Ka lam hawiin ka han kuai her a. "Dorki, tinge i ţah, tihsual ka nei em ni?" ka han ti a. "Nei love,ka hlimna i ni asin. I kal a hun ţep ta, ka chelh thei silo tur che hian min tilungngai a ni," a han ti a.
"Enge ka kal bo a ngaihna? Dik tak chuan min ring lo nge, zep i nei tih pawh ka hria, hei hi eng hmun nge anih min hrilh rawh?" ka ti chang ta fal mai a. Dorki chu hmel nunnem leh zaidam, inthlahrun hmel deuh hian ka lam a lo hawi a. "Rin, min hrethiam hram rawh aw, hei chu sawi a rem lo a ni," a ti a. Ka lungawi lem lo tih a hriat chuan tîm dai hian min rawn kuah a. Ka mitah tak a rawn en a, ka han melh let ve chu a zahawm thar hi ka ti ta em em a, ka thinrimna pawh chu a dai siai siai in ka hria.

"A nih engtin nge in unauvin hetah in awm theih?" ka ti leh a. Ani chuan,"Ka chanchin kha ka han sawi zawm ange aw, chutah chuan i zawhna chhanna chu i hmu ngei ang," a ti ta a.

"A tawi zawngin ka hrilh ang che. Khatia Hyderabad lama zirna ka zawm chhung khan nangmah hmuh hlauh beiseiin ka mit ka len reng ţhin a, mahse hmuh tih ni reng i awm thei silo. Vawikhat chu holiday kan hman laiin vijayawada ah christian meet a awm dawn tih hria in chhim turin ka nau nen kan lokal ve a. Chutah chuan alawm ka hmuh tak chiah che," a han ti a. Ni e, N.E student aiawhin guitar ka perh ve ngei kha mawle. Ni dawn tak, khatih lai khan fb-a inzawnchhuah pawh tum ila phone ţha la chhuak miau hek lo, black&white chiah a la awm a, chu pawh mi hausa bakin an nei zo ngailo kha ania.

"Khatiang mipui tam lutuk karah rawn biak ngaihna che kha a awm silo, meeting tawp veleh khan ka melh ruai ruai che a, i bo zui ta hmak bawk si," a tih chhunzawm leh a. Aw…kan lo va intawng teuh tak em… Vijayawada atang te chuan kan awmna Nidumolu chu km 50 bak a ni tawh der silo.

"Tichuan lunghnur takin kan thlenna hotel lamah kan kir ta a. Zawn leh dan tur che hre chuang hek lovi, tin i rilru ka hre miah bawk si lova. Chuvang chuan a tukah Machilipatnam te zuk tlawh ve phawt ila, hostel lamah haw leh ta mai ila kan ti ta a," tia a sawi lai chuan makti ru angreng tak hian ka lo en a. Ni e, Vijayawada leh Machilipatnam inkarah kan hostel a awm a, an rawn tlan tlang ngei dawn a ni.

Nghakhlel deuhin, "Sawi zel teh," ka lo ti a. Ani chuan, "Chutah chuan alawm i zawhna chhànna chu a awm ni," tih pah a hmel ngui deuh nghiaiin, "Machili thlen hma km 15 vel a la nihin kan chuanna bus brake a fail ta a, khata thi zingah khan kan unauvin kan tel ve a ni," a han ti sap a. Eheu leh!!! Thlarau maw ka lo kawm a, hmangaihna ka chenpui…mahse tisa pangngai tho a la pu si, eng nge maw a awmzia ni neih nuaih le? Mahse ka hlau chuang hauh silo, ka rilru chu thlamuanna thovin a ni a la khah ni. A sawi takah chuan hriat chhuah zawk ka nei. Kan hostel atangin bus accident na kha hnaite a ni. Keini pawh kan va tlan phei ve a, mahse hrui an lo pawt a, an ram mi leh sa kan nih loh vang pawh ni fahmiang, ruang te min hmuh tir ve phallo a nih kha. "Ekhai aw, tah khan i lo tel ve reng maw!! Ruang min entir phal se chu ka hrethei mai tur che asin mawle," ka ti vawng vawng a. Chuti taka kei engmah ni hleilo, min hmangaih a, min zawng ru a, chung min hmangaihna avanga nunna chàn a ni lehzel tih kan hriat chuan ka hmangaihna a zual sawt mai, kan inpawm vawng vawng mai a ni.

"Rin, i kal a hun dawn, kan hun neih a zo ta, ka van ngai dawn che em," tih pah chuan ka awmah rawn bei chawtin a mittui a sur zung zung a. Chutah le, thli a rawn thaw phei huau huau a, Dorki bahsam mawi tak chu a chhem leng siau siau va. Thli chu a thaw na telh telh a. Chutah ral khatah chuan hmana helai min hruai thlengtu, vanneihna min petu, tunah ka tan chuan motor anchhedawng ni ta, min hruai hawtu tur chu a rawn vir phei vut vut a, a rawn de phei leh ta chuai mai le. Kar lovah kan bulah chuan a lo ding fel ta der.
.
"Ka kal dawn lo," tih pahin Dorki chu ka pawm bet tlat a. "Rin, i kal ngei a ngai, vanah kan inhmu leh dawn nia aw," a tih lai chuan hmel hmuh theih si loh hian min rawn pawt ţhen phawk a. Chu motor ang tak chhungah chuan min nam lut ta a. Kan che ţan tihah chuan Dorki sam lèng siau siau va lo tlan pheiin, "Rin…ka lo nghak reng ang che," a rawn ti vawn vawn a. A aw chu a zawi tial tialin a thàmral ta. Kan thlawk phei deuh fua fua in ka hria a, chu chu ka hriat tàwpna a ni ta.

TLAITLA ENGMAWI-AH
Ka han harh leh meuh chuan granite a siam thlàn mawi tak chungah hian ka lo ţhu reng mai chu mak ka ti kher mai. Ka han hawi kual vel a, ka awmna chu thlanmual a lo ni a. Ka bul chiah thlanah chuan nula la naupang tak hian thlàn a lo tifai mek a.

Ka aw ka thian kharh chu a phu chiang ngei mai. Chutah ka lam a rawn hawi mak tih hmel zet hian min melh tlawk tlawk a,a tlu dawn ta mai a. Kei chu nula awmna-ah chuan ka zuang phei zawk a, a tlu tur chu ka dawm hman hram a ni. A bul a tui lo awm chu tlem ka in tir a, a chhipah ka leih hnu chuan a rawn harh chiang ta a.

A hmel chu ka han enchiang a, ka hriat fo hnu a ni tlat. Mahse a khur nasa mai a, min hlauh hmel riauvin ka hre bawk si. "Bawihi, engtizia nge ni ta?" ka han tih chuan khur hlawk hlawk chung chuan, "Tunge i nih?" min han ti a. Kei chuan, "Mami, Rina ka nia," ka han tih chuan mak tih hmel zet hian, "Pa Rin, engtin nge a nih theih?….Sawmtei…" a han ti chhàng ţiau va. Ka hrechhuak ta… Engtin nge a nih theih zawk!!! Ka ţhianpa Lca fanu kha maw!! Ka hmuh hnuhnun khan tleirawl pawh la ni pha mang lo kha ania, tunah chuan nula!! ??? Mahse a hmel erawh a paih vak lem loh avang chuan amah a ni tih erawh ka hre thei si a ni. Tin, min koh dan atang pawn amah Sawmtei a ni tih a chiang bawk si.

"Mate, a van mak ngai ve. Enge i tih reng reng a?" ka han tih chuan ngaihngam lo aw zet hian,"Ka pa thlan ka tifai a," a ti ta mai. "Engtin a?" ka han ti tuar a. Min chhang lo chuan thlàn lung a hming inziak chu a kawk a. Lca hming ngei mai chu a lo inziak thlap mai le. Mak ka ti lutuk hi ka chek tlawk tlawk a. "Pa Rin, i bo tuk chiahah khan accident in a boral ve a ni," a ti ta le. Chhe hei…a hma lawk a ka awmdan kha ka hrechhuak ta uar uar mai le. "Ka bo maw?" ka han tih chuan, "Aw, Kum 10 a liam tawh, kha, a hma-a i lo ţhutna thlàn lung ziak kha han chhiar teh," a han tih chuan pèn phei hretin thlàn lung chu ka han chhiar ta a….

LALRINLIANA KUM 35
THIH NI: 6.5.2016
Lalpa hnenah a chawl ta……

tih hi a lo inziak kiau mai le!!! Keima thlàn ngei mai chu…Ka lu chu a hai mup mup a, ka tlùk loh nan ka thlàn lung ngeiah chuan ka indawm ding hram a. Sawmtei chu lo kal vatin min rawn chelh bawk a. Ka hahdam deuh hnu chuan, "A nih tun hi eng hun nge, eng kum nge?" ti a ka zawh chuan, "2026, may ni 6,"a ti ta le!!! Ka bo ni, ka thih ni ang a ka thlàn lung a an ziah, ka birthday ni bawk, chu nî ngei chu lo niin.

Chutihlai chuan ka thil tawn te kha ka rilruah a rawn lang thar uar uar a. Mak ka tih em em lai chuan lunglenna in min rawn tuam veng veng a. Chu tlaitla engmawi tak hnuaiah chuan khawhar takin Dorki nena kan lendunna niawm a ka rin lamah chuan ka mit lenin ka hawi ruai ruai a.

Theih zawng nise kha khawvelah ngei khan hawikir leh map tawh lovin ka kir vang vang ngei ang.
"Ka lo nghak reng ang che," a ti lai hmel chu ka mitthla in a chhui nawn a. Ka maimitchhing a, lungleng em em in, "Dorki, Dorki," tiin ka phun sap sap a..

Advertisements
Aside | This entry was posted in Fiction, Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s