Forensic Files: Bagging a Killer (Mizo version)

  • Tualthahna sulhnu chhuina.

Hmeichhe naupang kum 9 a upa Valiree Jackson-i chu an In Spokane, Washington atangin hnuhma chhuizui tur awm lovin a bo a. Thenawm khawveng zawng zawng deuh thawh chuan khawiah nge a awm ang tihin an In bulhnai ruam, ngaw leh tlangah te chuan an zawng mup mup a. Hmuh a ni lo. Mahse, a bo dan mak tak mai chhuichhuah nan chuan van boruak mel 10,000 a hla a awm Hnuchhuina Hmanrua pakhat hmangin an chhuichhuak thei ta a ni.

Spokane, Washington hi khaw lun ve tak a ni a. A khaw laili lai tak hi North west tia hriat a ni. Chhungkaw tam tak khawsak tum te chuan chu North West chhak lam mel eng emaw zah a hla awm Spokane ruamah awmhmun khuarin an inbengbel hlawm a. Zirna In a thaiin sualna a tlem a. Chu mai bakah chhungtin te chu an ngaih angam bik a ni.

He khuaah hian Brad Jackson-a, motor lian (Truck) khalh thin, leh a fanu Valiree-i te pawh he khuaah hian khawsain Brad-a nu leh pa te nen In an in luah tawm a ni. Brad-a hi Valiree kawl phalna neitu bik a ni. Achhan chu Valiree nu Ros e Anne Pleasant-i chu mak tak maiin kum 7 liamta khan a lo khuangcherbo tawh a. He n hi ruihtheihthila harsatna nei a ni bawk.

October 1999 khan Valiree chuan kum 9 a pumhlum ve chauh a. Naupang thiam thei tak Mc Donald Elementary School a pawl li zilai a ni a. A school kalna hi an In atanga thui lo te a awm a ni nghe nghe. An zirtirtu pakhat Shelly Egeland-in a chanchin a sawi dan chuan Valiree chu naupang harhvang tha tak mai tupawhin lo tibuaiin lo inhaupui thin mahse chutiang chu duh ve ngai lo leh inremna siam duh mi a ni. Naupang duhawm tak intihbuaina a tel ngai lo mi nihin a sawi bawk.

October ni 18, 1999 thawhtan zing chu he thil diklo rapthlak tak a thlen hma zawng chuan tuk dang school kal ni ang bawkin a lo herchhuak leh a. Police lam chuan mi pakhat hnen atangin mangang taka tanpui dilna phone call an dawng a. Police lam phone chhangtu (Dispatcher) chuan "Eng pawi hai nge thleng ta?" tia a han zawh chuan "Ka fanu ka hmu hauh lo mai" tihin a lo chhang a. "Kum eng zat mi nge le?" tihin a zawt chhunzawm a. Aw lawi leh mangan hmel taka "Kum 9" tih chu chhanna a ni. Dispatcher bawk chuan,"Vawiin school a kai na nge?" tihin a han zawt leh ta a. "Kal lo. School kal turin kan inpeih deuh chiah tihin pawn lamah infiam turin a chhuak a. Kan in peih hma vang a ni ang. Ka zawng hmu ta miah lo mai" tihin a lo chhang a. A awka atang chuan a mang ang a ni tih a hriat theih bawk. "I fanu chu vung ngo a ni em?" "Aw ni e. A sam pawh a sen deuh hlek" tih chu an inbiakna a ni.

Brad-a sawi dan chuan Valiree-i chu an uite nen an In hnung lamah an infiam a. Hetihlai hian ani chu inhnuai lamah awmin thawmhnaw a su a ni. A hnu deuhah Valiree school kai turin an motor dahna kawngka lam atanga In a chhuahsan thawm a hre leh a. Chu chu Dar 08.32 nihin a sawi bawk. A hnu a Brad-a pawn va chhuak chuan an kawngkapui bula kailawnah school ipte lo let reng mai chu a hmu ta a. A fanu hming lam chungin a zawngkual a. Brad-a sawi leh dan chuan Police te a call hmain theih tawpin a zawng a, an thenawm In-ah te pawh a zawng ruai a ni. Police a call laiin a fanu thawmhnaw hak rawng an han zawh chuan a ni chuan Jeans kekawr pawl a pang sira a pawl duma inrin thla leh mawza senduk a bun a. Coat sendang pangpar lem chuang a hak thu a sawi bawk a ni. He inbiakna (Phone Call) hian Police mai ni lovin thenawm inngaihsak tak tak te pawh mibo zawnna kawngah a puih hle mai.

Valiree zirtirtu Shelly Egeland-i chuan interviewna ah ti hian a sawi a. "Zing dar 9 velah ka haw a. Ka pasal nu chuan tlai lam dar 5 velah phone a min lo bia-in hmeichhe naupang samsen theng mai bo thu min lo hrilh a. Valiree a ni tih chu ka hre nghal pang mai a ni. An In lam panin ka tlan thuai a. Valiree pa Brad-a chu tualzawl ah ka va hmu a. Ka va pan hnai a, ka kuah a. Ti rawh i zawng hmu ang ka ti a." tihin Valiree bo thuin a thawn thu a sawi a. Dik tak chuan Police ten naupang bo report tam tak hi chu an mahni Inah an va hmuh lo a ni pawhin an thenawm te Inah lo infiamin am va hmu tlangpui thin. An bo atanga 45 minutes emaw dar kar khat chhung emaw velah hi chuan hmuhchhuah an ni chawk a. Mahse chu hmeichhia naupang erawh an In-ah emaw thenawmte In-ah emaw hmuh tur a awm hauh lo mai.

Valiree-i pi chuan TV ah a tunu him taka a haw leh theih nan ngenna a siam a. "Tu pawh ni rawh, ka tunu labo tu khan Khawngaih takin him taka a lo haw leh theih nan i zahngaihna kan dil e. Valiree i la hria em? Zantin kan inkuahin Bawihte, kan in fawp thin a ni kha. Khang te kha la pek leh che kan duh a sin " tihin.

Chutianga mibo zawn hna an kalpui lai mek chuan thenawm te chuan Police hote chu biain hnuchhuina tana tangkai tur thu an lo thlen ve mawlh mawlh bawk a. Thenkhat chuan, "Kha hmeichhe naupang rukbo thuah khan in tana tangkai thei tur thu hriat ka neih a ni. Karkhat liamta mai khan kawrchung pawl ha, feet 6 leh inchi 2 a sang …… ka hmu a" ti velin an lo sawi ve mek bawk a. Vanduaithlak takin chung thurawlhruk zozai an dawn te chuan awmzia fumfe a neih lo. Nu leh pa te chuan thil tihbaiawm takin an veng reh tak chu a run mek nihin an hria a. Nu leh pa te chu hlauhnain an khat a. An fa te mahni chauha school kal pawh an remti ta lo hial a. An chhungkuaah chutiang thil chu a thlen ve an duh lo a ni.

Ni tam a liam ta. Mahse hmeichhe naupang kum 9 mi Valiree Jackson chungchang erawh hriattur a awm hawh si lo. Bo zawnna chu dawr, Car tukverhah te leh internet lamah te pholan a ni a. Chanchinbu leh TV lam te pawh chuan tualchhung mi te chu eng thil pawh rinhlelhawm a awm phawt chuan hriattir vat turin an ngen a.

Nu leh pa te pawh chuan chutiang rual lek naupang han bo ta mai chu tu emaw khawtlang nena in hnimhnai vak lovin school naupangte a veh bik a ni ang tihin ngaihthat lohna lian tak an nei a. He thilthlengah hian tu tih hriat lovin a rubo a ni ang ti chu thil awm thei pakhat a ni. Mahse Jackson chhungkua a buaina thleng tawhte vang erawh thildang daih a kawk thung a. Kan sawi tawh ang khan Valiree-i nu kha kum 1992 atang khan mibo anga chhinchhiah a ni. Police te ngaihdanah chuan "A nu in emaw tu emaw anu remruatna-in Valiiree-i kha an la bo a ni mai law'ng maw?" ti chu zawhna lian tak a ni. Mahse miten Valiree-i nu an hmuh hnuhnun ber chu kum 7 liam ta, kum 1992, daih khan a ni tawh si. Rosa Anne Pleasant-i unaupa John Stone-a chuan he Valiree bo changchangah hian a farnu Rose Anne Pmeasant-i khan inhnamhnawihna a neih a ring hauh lo. A rinhlelh ber chu Valiree-i pa Brad a ni tlat. Pawisa hlawh leh hmuh theih nan nawhchizawrhna ah a hralh nihin a ring a ni. A fanu hmuhlet leh theih nana lawman pek tur pawisa a tuak a nga. An ngaihdan chuan pawisa tam tawk a khawn ngah hnuin pawisa chu a hlan an ring a. Chu a chhapah Brad-a kha damdawi ngai mi a lo ni bawk nen, eng ber nge thudik tih lah an hre theih mai si lo.

Detective te chuan Brad Jackson-a te In ah chuan hnu han chhuidawn theih tur thil a awm em tihin an han dap ta a. Valiree-i rooma a lukhamah chuan thisen tharlam tak an hmu a. Brad Jackson a sawi dan chuan Valiree-i khan a bo hma zan khan a hnar a ti thi a. Police te pawh chuan Doctor-in Valiree tana a chawh Anti depressant a tana hman, Paxil damdawi, an hmu bawk a. Chu naupang hlim theih tak chuan Counselling a dawng a ni tih pawh an hrechhuak leh ta zel a. A chhan pawh a pa bialnu leh amah inkar boruak rip leh hahthlak lutuk vang nihin a lang. Valiree-i pa Brad jackson -a bialnu Danette Schroeder-i leh Valiree-i te kha inhau chamchi leh insual deuh reng thin an ni a. Chutiang boruak karah chuan Valiree-i khan Therapy lak a mamawh a ni tihin Danette-i khan Brad-a hnenah a lo rawt tawh bawk. Chu ta tang chuan Anti-Depressant damdawi chu pek/chawh a lo ni ta a ni.

Forensic Scientist te chuan Valiree rooma a khumah chuan thil dang hmuh an la neih leh ta cheu mai. Chu an thil hmuh chu hmul/sam sen pahnih a ni. Chu hmul/sam an hmuh chu serh-hmul a ni tih an finfiah ta bawk a. A landan chuan Brad Jackson-a serhhmul nen a in ang hle bawk. Mahse serhhmul te chu pindan pakhat atangin pindan dangah mawza bun laia a kai atangin a insawn ve thei tho a. Chutiang a ni chuan chu an thil chhar chu awmze neilo a ni anga; ani lo vek pawhin chutah chuan inkhuaikhemna a thleng a ni tih a kawk theih bawk.

Police te pawh chuan Brad Jackson-an nu leh pa dang te ang lo takin Valiree bo ni a a thawmhnaw hak te kimchang taka a sawi vek thei chu mak an ti hle a. Valiree thawmhnaw hak te chu kimchang takin a hre kilkel vek a ni. A mawza senduk bun te nen lamin a sawi thei tlat. Valiree-i khan hnarthi chang a neih ngei mai. Mahse, inchhunga finfiahna awm te atang chuan Brad-a thusawi te chu a dik a ni ti finfiah theihna a awm si lo. Chu mai a la ni lo, Police te chuan lukham chunga thisen kai tih bak inchhungah chuan finfiahna dang an hmu si lo. Hnarthi ti reh nana hman ang chi towel emaw toilet paper ang chi tak ngial pawh an hmu lo a ni.

Police te chuan Dap phalna (Search Warrant) hmangin Brad-a Pick-Up Truck leh motor te chu Finfiahna (Evidence) zawngin an han dap ta a. Mahse Police te chuan chung motor pahnih te atang chuan engmah hmuh an neih si lo. Valiree bo atanga karhnih ral hnu chuan Spokane Valley-a chengte chuan mawmbati chhi engin dam taka Valiree lo kir leh theih nan tawngthaina hun an hmang a. Heti lai hian mi tlem te chauhin Valiree-i pa chu rinhlelh (suspect) a ni tih an hria. Mahse mak tak maiin Police te chuan Brad Jackson-a chu an umzuiin an chhui reng bik ta tlat lo mai. E nge a chhan ni ta ang?. A chhan chu umzui reng a ngaih lo vang a ni.

Police ten finfiahna zawnga Brad-a Truck leh Car te an enfiah lai khan motor chhungah thil hnutchhiah an nei a. Chu an thil hnutchhiah chu khawl pakhat Global Positioning system, GPS ti a kan sawi thin hi a ni. Kan chenna khawvel chung lam Mel 10,000 hla-ah khian GPS 28 ten kan khawvel hi an kal hual reng a. Chung GPS te chuan Atomic Clock-in hun dik tak a lo chhinchhiah thlap thlap te chu Eng zung/Radio zung hmangin lei lamah an lo thawnlet leh thin a. Signal te chuan kal hlat lam in ang lo theuh an neih avangin hun hran theuhin khawvel pawh an thleng a. Computer Receiver chuan chung hriattirna (Information) te chu feet 30 bial chhunga awmna hmun (Exact Position) dik takah a lo chantir thei a. GPS receiver khan chu hmun chu a lo chhinchhiah a nga. Hmun pakhat atanga hmun dang a kal sawn chuan a dar kar inthlauhna leh chu hmunah chuan dar kar eng zat chiah nge hman a ni ti kha a lo hre thei dawn a ni. Chuti chuan motor awmna chin chu Police ten an lo thlithlai reng theih tawh dawn a ni.

Brad Jackson-a motor-a GPS Transmitter te dah ruk an ni hnu chuan Detective Dave Madsen-a, Spokane County, Sheriff's Dept. a mi chuan ruahmanna hlauthawnawm deuh mai a siam ta. Tichuan, Detective Madsen-a chuan amah (Brad-a) ngeiin a fanu chu a thah a ni tih a rinhlelh thuin a han hmachhawn ta a. Detective Madsen chuan chu tia ham luh tawp chuan harsatna a siam thei ang ti pawh a hre lo. Mahse Valiree-i bona atangin kar khat lai a liam tawh hnu pawh a Valiree-i chu hmuh a la ni lo va. A vanneih hlauh takin ti thuah Brad-a kha hetianga hmachhawn ta hi a ni. Kar khat lai liam hnu pawha hmuh a ni lo avangin phumbo hial a ni a ring zawk tawh mah a ni. Detective Madsen chuan, "Ih e, i fanu kha i that a ni tih kan hria. Khawiah emaw i phum bo tih pawh kan hria a. I phumna kha duhthusam-in a thuk lo avangin ramsa ten a ruang chu an la rawn hmuchhuakin a ruh te pawh an la rawn phawrh a nga. Chumi hunah chuan kan la hmuchhuak dawn tho tho" tihin a han vehthlem ta a. "Ka la chhuichhuak dawn che a. Chu hun chu eng tikah nge tih i hre lo. Jailah ka la khung dawn chiang che a ni" tihin a han vau zui a. Detective Madsen-an a chhui reng ang bawkin tunah chuan Satellites te paw'n an chhuizui reng tawh dawn a ni.

Chu Detective tawktarh a Brad-a inbarhluh nan chuan hun rei a mamawh lo hle mai. GPS chuan Brad-an mel 60 laia hla, hmun fianrial tak thingkihna hmunah a in khalchhuak a ni tih a rawn lailang ta chiah mai le. Chutah chuan minute 44 lai a awm a ni tih pawh a lang bawk. Hemi hnu ni li-na ni ah chuan Brad-a chu an In atanga minute nga a hla Vicari Road a hmun finrial dangah a in khalchhuak leh a. Chumi hmun pan chuan Dar 2 Minute 28 leh Second 28 ah a chhuak a. Chuta tanga a kalsawn leh hun chu Dar 2 minute 44 leh Second 10 ah chiah chiah a ni. Chu hmunah chuan Minute 15 dawn a tap tihna a ni chu.

Chu lai hmun atang chuan Brad-a chuan mel 60 a hla-ah a inkhalh chhuak leh a ni tih GPS chuan a lailang leh ta a. A hma a thingkihna hmunah khan a chawl leh ta chiah bawk. He a kalna kawngah hian hmun pharh duai te, lo neihna hmun leh ramngaw chhah pui pui te a awm a ni.

Police ten Vicari Road an thlen chuan uisathiam (Cadaver Dogs @ Police te uifing K-9 emaw K9 ti a kan hriat, police emaw dan kengkawhtu te puih tura a bik taka zirtir ui) chuan thlan pawnlawi taka lo in laihna lam chu a pan ding nghal ta chat mai a. Chu thlan chu a lo ruak ta tlat mai. Plastic bag pahnih leh thil them ban sei tak eng i lo bel nana hman chi (Duck Tape/Adhesive tape) a sam sen lo bet nuaih bak hmu tur a awm lo. Chumi hnu chuan Police te chuan thingkihna hmun, Mel 60 a hla, chu an pan leh ta. Chu hmun an thlen chuan Cadaver Dogs te chuan lei laih hlim tharlam tak an hmuchhuak leh ta. An han belhchian chuan thlan a lo ni a. Vicari Road a an hmuh hmasak ai khan a lo thuk zawk bawk. Chu thlan ah chuan kum 9 mi Valiree Jacson-i ruang chu bawkkhup zawnga lo awmin an hmu ta a ni. A tawpah chuan Police ten vanneihna beisei chunga an thil tih chuan awmzia a rawn nei ta. Police te chuan Brad-a chu a tualthah thupbo nan Valiree-i a phumna hmasa aia thuk zawka phum tha leh tur khawpin an lo ti hlauthawng reng hi a lo ni a.

Valiree-i ruang ni ngei a hriat hmu a ni thu Valiree putea John Stone-an a lo hriat chuan ti hian a sawi a," Leiah ka tlusawp nuaih a. Engmah ka hre ta lo. Ka ban leh ke tepawhim engmah an hre tawh lo. Nunna ka nei tawh lo. Ngaihtuahna fumfe ka nei lo va. Ka hriatna pawh a thi a ni. Aw.. a va na tak em! " tihin.
Hnuchhuitu (Investigator) te chuan tunah chuan Forensic Evidence tam tham zet mai an neih ta. Brad-a te choka a tam tham zet mai an hmu tak ang Plasti Bag chhunga Valiree-i thisen sulhnu lo awm bawk te; thlana Duck Tape an hmuh, Brad-a inhnuai a mi nena in ang chiah mai te; Brad-a ke hniak leh a motor ke hniak thlan bula an hmu te chuan Brad-a chu Valiree phumna hmun nen a suihzawm ta. Mahse, police te chuan harsatna an nei ta tlat. Police te chuan Brad-a ngei chu he tualthahna thlentirtu chu a ni tih an finfiah a la ngai ta cheu mai. Police te chuan thlana an hmuh Plastic Bag chu United States Secret Service hnenah endik turin an thawn ta.

United States Secret Service te chuan chu thil thawnte chu tih dan hmang tha chungchuang pakhat Vacuum Metal Deposition hmangin an han enfiah ta a. He Technique hian tui puh tlang theih lohna Plastic ang chi a kutze thla sin ber pawh a hmu thei a ni. Police te thil thawn (evidence ) chu bawmah an han dah a. Rangkachak leh Zinc (Rangva chi khat) sin te te tepawh an han dah tel bawk a. Chumi an dahna bawm chu boruak awm lo thawthangin an han siam leh ta a. Chung metal te chu an han tisa ta vak a boruak hu ah changin kutze thlaah te chuan bet ta a ni. Chu endikna chu a hlawhtling ta. Secret Service te chuan Plastic bag chhung lamah leh Duck Tape-ah te chuan kutze thla (finger print) an hmu ta a. Chung kutze thla te chu Brad Jackson-a kutze thla te an ni.

Medical Doctor-in Valiree-i ruang zaia endiakna (Autopsy) atang chuan hmeichhiat mipatna lam hawi a khawih a ni lo tih finfiah a ni a. Mahse, Valiree-i hmai leh hnar velah te chuan vuakna hnuhma hmuh a ni a. Chu chuan zawhna khirh zet mai, " Eng tin nge Valiree-i kha thah a ni?" ti chu a chhangin a lo sawifiah ta. Sawi tawh ang khan Valiree-i lukhamah khan hmun hnihah thisen in valh raih mai hmuh a ni a. A awmzia chu tu emaw a hnar atanga thisen chhuak mek chu lukham hmanga a hmaiah hup beh a ni ti a finfiah a ni. Tunah chuan Police-te chuan Brad-an Valiree-i a thah dan chu an hre ta. Mahse, eng vanga Valiree-i kha that nge?; Enge a thah chhan? ti erawh khingtute (Prosecution) tiluhaitu a la ni ta fo. Chu mai bakah Prosecution lam chuan rorelnaa thubuai neite thiam leh thiam loh ngaihtuahtu pawl (Jury) te chu pa in fa te a that theih a ni tih chu an hmin a la ngai ta cheu mai.

"Eng vanga he tualthahna hi lo thleng nge a ni?" ti zawhna chhan mai theih lo chu GPS bawk hian a lo lailang leh ta. Valiree-i bo atanga kum khat dawn thlengin Brad Jackson-a tualthah thubuai chu ngaituah a la ni a. Kan sawi tawh ang khan GPS Tracking system khan Police te kha Valiree-i thlan a hruaithleng a. Prosecution lam chuan tunah chuan Valiree thahnaa thil thleng dan kimchang chu an chhuidawn thiam ta. Prosecution te chuan Brad Jackson-a khan Valiree-i kha lukham hmanga thawthei lo va siamin a up hlum nihin an ring a. Chuti chuan Police ten lukhama thisen an hmuh kha a lo kai ta a ni. Jackson-a chuan Valiree-i lu tuam nan Plastic Bag leh Duck-tape te chu choka tangin a va la a. A chhan chu Valiree-i lu tuam/fun a ni chuan Valiree hnar atang thisen far thla tur te kha a lo dang theih dawn a ni. Tichuan, Brad-a chuan Valiree-i lu chu plastic bag-a funin duck tape khan a char phui a ni an ring a. Chumi zawh chuan a fanu thi ta chu thawmhnaw a hak tir a. Chutia thawhnaw a haktir vang tak khan Valiree khan eng ang thawmhnaw te nge a hak ti kha a hrechiang em em a, a mawza bun rawng nen lam a hria a ni kha. Chutia thawmhnaw a haktir zawh chuan a ruang chu a motor ah hlangin in a tanga minute 5 leka hla Vicari Road lamah chuan a phur phei ta a. Chu hmun chu a ram vahna lama a lo hriat tawh hnu a ni. Mahse thlan kha a hmain a lo lai lawk tawh nge ni a a thah hnuin a lai chauh tih erawh a hriatchian a ni lo. Chutia a fanu ruang a phum bo hnu chuan In lamah let lehin Police te phone in a fanu bo thu chu a report ta nihin Prosecution lam chuan an ring a ni.

Kar eng emaw zah a liam leh hnu chuan Jackson-a chu dar kar khat vela tlan thlen phak thingkihna hmun finrial taka a in khalh chhuak leh ta. He mi tum hi chuan GPS hmanga enthlithlai a ni tawh a. Chulai hmun a thlen hnu chuan minute 44 lai a va khawhral a. A hma aia thuk zawkin thlan a lai ni ngei a rin a ni.

Ni li hnuah chuan Jacksona chu Vicari Road a ruanga phumna lamah khan a kal leh ta a. Ruang chu la chhuakin dar kar khat a hla thingkihna hmun lamah khan a phur phei leh ta a. Chutah chuan a hma aia thuk zawk thlanah a phum tha leh ta a ni. Mahse, eng vanga Jackso-na khan amah fa ngei kha that nge a ni tak ang?. Mak tak maiin GPS chuan chu chhanna chu a rawn pe leh ta. Jacksona khan kal nawn fona In pakhat a nei a. Chu In chu a bialnu hlui Dennet Schroeder-i chenna a ni. Inthen tawh mahse Brad-a chuan a la umzui zel a. He nu hi a la vei tak zet nihin a lang. He nu a veina nasa tak vang chuan a fanu nunna aia pawhin an inlaichinna chu dinhmun pawimawh zawkah a dah tir a. Detective te ngaihdan chuan Valiree-i kha Dannet-i hnaiha a awm duh dawn lo tih Brad-a khan a hria a nih an ring a. Tichuan Dennet-i chu a duh zawk miau avangin a fanu Valiree-i kha a dahthat a ngai ta nihin an ring a ni.

Brad Jacksonan man a ni hnu a a thil tih hmasak ber chu a tanna jail atangin Dennet-i chu phone-in inneihpuiah a sawm a ni. Mahse, Dennet-i chuan a kawngkhar kalhna tala chu a thlak ta hmak a. A chhan awm-ang chu kan hrethiam mai ang chu maw.

Prosecutor Jack Driscoll-a chuan he tualthahna case hi mimal takin a buaipui ta a. A ngaih dan chuan he pa hian a fa te chu a humin an tan venghimtu a ni zawk tur a ni. Mahse, a ni hi chuan rawng takin a fa chu a that a. Bawkkhup zawngin a phum leh nghal. "Chu chuan ka pawi a sawi a ni" tihin he Case hi a buaipui a ngaih thu a sawi hial a ni.

Brad Jacksona tualthah thubuai chu Court ah ngaihtuah a ni ta. Thubuai ngaihtuahnaah chuan Brad-a chuan thlanlaih leh Valiree phuma an puhna chu a pha hauh lo. Mahse, Valiree thih chhan kha accident vang nihin a tang tlat thung. Valiree-i kha Paxil Overdose a thi in a hmu thu a sawi a. Amah chu mawhphurtuah an puh a hlauh avangin a talbuai a. Chuvangin a ruang kha phum bo ta mai ni angin a insawi a. Mahse, Forensic Scientist te chuan Valiree-i thisen zama Paxil awm kha thihpuina khawp a tling lo tih an nemnghet/finfiah a.

Brad Jackson-a chu rawng taka mi thah thuah thiamlo chantir a ni ta. Kum 56 chhung tang tura hremna pek a ni a. Valiree-i putea John Stone chuan,"Death Penalty a hmachhawn ka lo ring a. Mahse, an pe si lo. Ka ngaihdan chuan tu pawh ni se naupang thattu chuan Death Penalty a hmachhawn ngei tur a ni a. Chutiang mi chu an nunna laksak ve tur a ni" a ti hial a. Detective chuan "Jail atangin a lo chhuah tawh lo ka beisei e. Rosa Anne awmna pawh sawi nghal law law se ka ti hle mai" tihin hremna an pekhnuin a lo sawi ve bawk.

Mi tam tak chuan Brad Jackson-a khan Valiree-i nu, Rose Anne Pleasant-i, pawh kha a that a ni an ring a. Mahse Police te chuan a that ngei a ni tih finfiahna an nei lo. Anne-i unaupa John Stone-an a sawi dan chuan Rose Anne-i nena an inbiak hnuhnun bera Anne-i sawi dan chuan Brad-a kha thi hlauin a hlau a. A nunna chu hlauhawmah a awm thu a hrilh nihin a sawi bawk. Khang hun lai khan Brad-a khan Cement leh Building Foundation lam panga hna a thawh lai a ni a. John Stone-a chuan Anne-i kha Brad-an hna a lo thawh tawhna khawilai Foundation ah emaw chuan phum a ni ngei a ring a ni.

Mc Donald Elementary School naupangte chuan Valiree-i hriat reng nan thing an phun a. Chutah chuan hrisel leh nghet taka la nungin a la thang ta zel a; la dam ni se la chuan Valiree-i pawh kha a ni ve ngei ang le.


Author : Bruce Kibby

Advertisements
Aside | This entry was posted in Thu Ngaihnawm, True Story and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s