INLARNA LAR LO

Aw chuan min rawn bia a, “Ngai teh, vana Vantirhkoh pasarih aiin leia Dumka pariat an tam zawk,” tiin..

A INTAN DAN.
Ka mutna tiau vut chu ka dap kual a, mak tak maiin rangkachak ka dap chhuak hlawl mai. A dang a la awm beiseiin tiau vut chu ka hai kual zel a, rangkachak tlang, kutzunglai tia vel tur mum pel mai te, a tlawn deuh hlek chi te chu ka dap fuh zel a. Ka hlim nui chu tu man an hmu lo..Ka bul velah chuan nula no nalh tak tak, tisa chãkna timuthlu lo tàwk vela thawmhnaw inbel mumal lo an vei sup sup bawk a. Khawi lai tuipui kam emaw berah ka awm a ni.

Ka bag chhungah rangkachak te chu ka dah khawm zel a, ka hmu tam tawlh tawlh a, ka bul vela mal mum te pawh chuan min rawn nuih ver ver mai. Chhar ve emaw, zawn ve emaw an tum hauh lo chu mak ka ti thung.
.’Heng hausakna nen hian i bula khaw lo nun hman ka duh a ni’ tia a àwm bawr kawr rawn nek na ber ka kuah thuak thuak lai chuan namen loin ka beng chu piai a ni a. Ka kuah foul hman ta lo.
“Tho vat rawh, hei i thiante pawh an hman leh dawn tawh ang. Mu reng zel ringawt mai.” ti bawrh bawrh chungin ka nu chu a lo ang leh buan buan tawh a.
“A… A thuhrimin inkaih thawh that ve mai awm, beng rawn herh vak zel,” tia phun nung nung chungin ka tho chhuak a. Tak a, vawiin hi inrinni, pay day tih chu ka rilruah a rawn lang zawk bawk a.

SAWMA PAKHAT LEH KEINI.
Chaw kan ei kham chuan ka insiam sawk sawk a. Pu Ringate in sakna lam panin zan lam mumang hre reng chungin ka kal ta a.

Kal pahin ‘Hlawh lak ni a nih vang a ni maw, ka mumangah rangkachak leh nula te kha ka hmuh.’ Ka ti rilru neuh neuh a.
Kar tluana cement chawh, brick thiar eng eng emaw kan thawh tawhna Pu Ringa te in sakna ka thlen chuan mi dang chu an lo kim deuh thap tawh a. Ka mumang that lutuk zarah ka tlai ber a nih hmel.

Keini thianho inhlawh hian ‘tunkar hlawh chuan chu chu kalei ang a, sawma pakhat ka pe ang a’ hi kan ti ve ziah a. Sawma pakhat pawimawhna leh kohhrana thilpek pek tampawimawhzia te a sawi uar lo ber nih kan hlau thin, hlawh lak hma chuan!!

Hlawh kan lakmeuh chuan sawma pariat vel hi Rangvamual lamah a liam a, sawma pakhat hi kuhva ilo manah, a dang pakhat hichu hnathawh chhunga zu man ba rulhnaah a ral leh diak thin.

DREAM COME TRUE.
Zan lama ka mumang kha ka hre reng a, eng inlarna emaw tak a ni lo ang tih ka ring lo. A rukin ka phur a, ka hlim a, ka nui a ni. Eng nge lo thleng dawn erawh ka hre rih lo. Mal mum leh sumin min bawm dawn tlata hriatna chuan hna thawh pawh min tiphur a ni ber e.

Pu Ringa chuan kan hna tur a sem leh diat diat a..
“Nangni pathumin thlang lama lei khu lo paih fai ula, chuan rawra hi ipah in lo thun bawk dawn nia. Zoa, nang chu hetah lo kal teh.” Min rawn ko fãl a. Ka phur zual telh telh mai. Pu Ringa hi pa thinchhe ve deuh mai, hnathawh lama taima tak, awm mai mai hmu thei miah lo leh thatchhe deuh chu beng duh mai zel a ni nghe nghe.
“Kawngpui bula balu dahah hian zawhte-in ek an lo phum thin a, lo chhar khawm teh a.”

Phur takin balu-a zawhte ek inphum chu ka zawng a, ka haichhuak a. Polythene ah ka dah zel a. Ka zai pah rat rat bawk.
Balu-a inphum zawhte ek chu kutzunglai tiat te, a aia te leh lian deuh te, tlema sei deuh bakah kel ek ang deuha mum te ka phawrh zel a. Ka la hmu thei em em zui.

Kawng bula maia an dah a ni a, kawngah chuan nula bazar kal tur an rawn kal fo a, min rawn en a, min rawn nuih leh sãih thin. Ka thil chhar chu min rawn chharpui miah lo. Het! Ka mumang!!

RANGKACHAK LEH ZAWHTE EK.
Mumang hrilhfiahna bu chhiar a ngai lo va, Josepha rãwn angai hek lo. “Tiau vutah rangkachak, kutzunglai tia te, a mum deuh te bakah a sei deuh te.. A bul velah nula, ka rangkachak chhar chu min chharpui lo..’ Ka mumang chu a rawn lang indawt zut mai. Hai rual a ni ta lo.

Tah tur nge nuih tur ka hre lo. Mak tak maiin zawhte ek chuka hmu rangkachak ta vùk mai. Zawhte ek leh rangkachak hlut zawng te chu ka rilruin ka teh a, ka nui char char a, ri chhuak loin. Ka insum thei ta ngang lo, keimah chauha thu chung chuan ka nui chhuak hawk mai. Balu bêng tak meuhin keimahin ka nui a, Ka nui reh thei mai lo lehnghal.

Chutia tih tak zeta ka nuih lai chuan ka hnungah pu Ringa aawm tih reng reng ka hre lo. Ka beng kawrawng chhin phui mup khawpa nain ka beng a herh a,’ hnathawh chawla nuihvur vur hi ka huat zawng tak! Thawk vat rawh’ tih pahin a aia nain ka beng chu a herh leh a.

A TAWP TA.


Author : Lal Zoenga

Advertisements
Aside | This entry was posted in Fiction, Thu Ngaihnawm and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s