Kenneth Anderson’s GUMMALPUR KEITE HUAI

  • Keite huai danglam leh kenneth anderson.
  • Keite in mihring seh a chin chhan
  • Kenneth Anderson a chesual tep.

India rama keite leh sakeite inan lohna pakhat chu an chenna hmun boruak thlan chungchangah hian a ni. India ram hmun tinah keite hmuh tur a awm a, hma khawsang atang tun thlengin he ramah hian an cheng a. India rama sakei lo lan hma atang tawhin ram ngaw hmun hrang hrangah an lo khawsa tawh a ni.

Sakei pangai aia an tet deuh zawk avang hian sa peltute pawhin an zuam deuh zawk a, tin, an rawng hi a mawi em em a, keite te hi sakei pangai aiin an fimkhur lo zawk bawk nen, India rama keite te chu an rem chak hle reng a ni. Mihring seh hi an ching ngai meuh lo a, mihring seh ching keite te hian harsatna eng emaw tak an neih vang a ni tlangpui. An ha leh tin hriam tak chu an hmang thiam em em a, an zuan lah a zang nalai leng. Bihruk an thiam em em bawk.
Kan sawi tak ang hi a ni Gummalapur keite huai pawh. A fing phakar em em a, mihring sawm li leh pahnih zet a seh hlum tawh a, a chetna hmun thenkhatah chuan ramhuai nen inzawmna nei angin an sawi thin hial a, mel 250 bial chhungah a che tlangpui.
Keite chetna huam chhunga thingtlang khaw awmte chu an ralti em em a. Ni a tlak rual hi chuan chhung lam atangin an in chu an kalh tlat thin. Chu pawh chu duh tawk loin then khat chuan thingrem leh bungraw rem chang dang la khawmin kawngkhar chu chhung lam atangin an do bur a, a tuk zing ni chhuah fel hnuah chuan pawnah an chhuak leh ngam tawk thin. He tih hunlai hian laltin chhit tur nei lo an la tam a, khaw pawn lamah an chhuak ngam bawk si lo, an retheih dan a thuah hnih hle a ni.

He lai rama chengte tan chuan eitur zawn a buai thlak leh zual a, an harsatna chu hre ve ni awm takin keite huai lah chu a ngampa telh telh a. In chhe deuha cheng pakhat chu keite hian inchung atangin a luh chilh a, vangtlang mipui hriat lai ngeiin dai lamah a hnuk chhuak a, tanpui tuma pen chhuak ngam an awm lo. In chhung lama inkalh khumin keite thawm chu an ngaithla ngam tawk a ni awm e.

Vawikhat dang leh pawh keite hian bang thiatin a luh khung leh a. Mahse, a luhna bang pawp chu a te deuh a, a seh hlum tak, in neitu ruang chu a pu chhuak thei mai lo a. A thinrim chuan chu ina cheng mi pali, naupang pahnih leh an nu leh pate chu a seh hlum ta vek a, thim tham hnuaiah ram lam panin a inthiar fihlim leh nghal a. Tual chhung mite nun chu hlauhna hlirin a khat a. Chhunah pawh mahni chauha pawn chhuak ngam an awm lo a. Keite huai hian khaw enlaiin mi a seh ngai lo a, hmuh tur erawh chuan a inlar fo thin. Chuti chung pawh chuan chhun enlai pawh ni sela, khaw chhungah pawh chemte leh fei nen, a huhoin an chhuak ngam tawk a ni.

Gummalapur khua ka thlen laia khawtlang boruak chu kan sawi tak ang kha a ni. Keite huai sar bei tur hian District Megistrate, Jepson-a hnen atangin sawmna ka dawng a. Gummalapur khawtlang hruaitute chuan keite chanchin chu an hriat ang ang min hrilh thuai a. An manganzia leh beiseina an neih tawh loh dan te chu lungngai takin min hrilh a. Keite huai chu thlarau sual rawn tirh a nih thu te, khuaa cheng mihring zawng zawng a seh hlum zawh hma ngeia khaw danga pem an duh thu te chu lungchhe takin an sawi bawk a. An din hmun chiang taka han hriat chuan an lainatawm ka ti ngei mai.

Gummalapur khaw mite hnen atang chuan tanpuina ka hmu dawn lo tih chu ka chiang ang reng khawp mai. Min tanpui a nih chuan he keite huai hian rang takin a tihlum nghal mai dawn niin an ngai a. Tawng pawh an tawng ring ngam lo, an inbiak pawhin an phun ser ser ngam tawk a, keite huai beng hriata an tawng a nih vaih chuan rang takin thihnain a rawn nangching mai dawn a ni awm e.

Gummalapur khua ka thlen zan chuan thuthleng keng chhuakin khawlaiah ka thu a, hnung lam atanga min beih thut theih lohnan in pakhat, a bang feet sawm pahnih vela sang chu ka ngheng a. Thla en loh zan a ni nachungin boruak a thiang bawk a, keite huai chuan min rawn pan pawh ni se arsi eng hnuaiah chuan harsa lo takin ka hmu thei dawn a ni.

Tlai dar ruk a lo rik chuan tual chhung mite chu chhung lam atanga kawngka kalhin an reh diak tawh a, silai cheng kau sain tual laiah chuan ka thu ran mai a, pawnpui, khawl-phe-khawn-var, vaihlo thal char ka inchhawp a, ka sirah chuan thingpui bel leh tui leh chhang tlem ka dah bawk a, keite huai a lo lang mahna tiin ka thu ta veng veng a. Khua a lo thim zual zel a, ngaih a tha lo telh telh a. Arsi eng hnuaiah chuan thil hmuh chian a har telh telh bawk nen, ngaihngam taka awm chu har tak a ni.
Inring takin silai chu ka hum ran a, kawtthler reh tak chu uluk takin ka en kual reng a, a reh lutuk chu ka ngaih a tha lo hial zawk. Tun ang hunah hi chuan ram hnuaia awm chu a thlanawm zawk hle. Ram hnuaiah chuan ralvengtu, nungcha dang tam tak an awm a, thl danglam deuh a thleng dawn a nih phawt chuan awlsam takin ramsa thawm atangin ka hre thei dawn a. Khaw chhungah hi chuan nidang tumah rin tur ka nei ve lo a. In chhung lam atanga inkalh khumin, keite huaiin min seh huna na tuara ka te hun tur nghakin beng an chhi reng ni berin a lang.

Hun chu a kal muang duh ngei mai. Zan dar sarih chho velah chuan arse eng hnuaiah kawtthler vel chu chiang lo ruaiin a la hmuh theih a. Ka ngaihthat loh rukna chuan min kalsan a, tichuan, keite chu ka awmna lam pana a lo kal ngei theih nan thlem chhuah dan tur ka ngaihtuah a. A khat mawi tawin ka aw ka thian a, ka khuh leh thin a. Keite chuan ka thawm ri chu hriain min rawn pan se ka ti khawp mai.

Chhiartute zingah keite thlem chhuah tumin emaw, tum lo emaw pawha mahni leh mahni inbia a, tawng bul bul kan awm em. Kan awm a nih pawhin chhiar tham lek kan nih ka ring, mahni chauha phun bul bul thin chu kan en dan pawh a dang deuh a nih hi. Keimah leh keimah inbia a, ka tawng ri lung lung chu khaw mite hian an hriat ngei ka ring a, min ngaih dan tur pawh hriat a har lo khawp mai. Keite huai, fing leh phakar tak chang chunga darkar khat chuang mahni chauha titi han vawr chu thil awlai tak chu a ni lo, sawi tur avang duh ang reng khawp mai.

Zan dar kua a lo rik meuh chuan ka ning hle tawh a, kawtthler fanga kal kual chu a tha dawn riauin ka hre bawk a. A hnu lawkah chuan mahnia inbe mawlh mawlh chung chuan fimkhur takin kawtthler lam chu ka pan a, a khat tawkin ka hnung lam chu ka en leh zauh zauh thin a. Ka thil tih atthlakzia chu rei lote hnuah ka hre chhuak a, tawktarha tan ka inpho lang tihna a ni a, sir lam atang emaw, hnung lam atang emaw pawhin keite chuan engtiklai pawhin min rawn zuan thut thei tih chu ka hre chhuak a. Mahnia ka inbe mawlh mawlh chu ka tawp nghal hmiah bawk a. Him taka ka thutna hmun ka va thleng leh chu lawmin ka thaw huai mai.

Ka sana chu ka han bih leh thin a, tun ang em ema a kal muan hi ka la hre ngai lo. Zanlai a lo nih chuan, piah deuha ram ngaw lam atang chuan thlifim a lo thaw heuh heuh a, a vawt duh ngei mai. Ka pawnpui chuan ka intuam tha sauh sauh a, kaw chhung tihlum nan thingpui ka in tluk tluk mai a, zing dar hnih a lo rik meuh chuan ka mut chu a chhuak tan ta a. Thingpui leh chhang ka hmawm reng a, tui vawt chu inin, intihharh ka tum hram hram a, vawi sawm chuang zet chu ka thutna atang chuan tla lek lekin ka bu dawrh dawrh a. A hmaa ka tih dan ngai bawkin, mahniin ka inbe leh chiam chiam a, mut chhuak pawh a ziaawm duh ang reng phian mai.

Zing dar thum chho a lo nih chuan thli thaw chu a nsa zual sauh a, chhum dum a kal zut zut bawk a. Keite huai tan hun tha a lo inher chhuak dawn niin a lang. Zan lama arsi eng iar kha hmuh tur a awm tawh lo a, a thim dan chu namai lo tak a ni. Keite hian seh tumin min rawn veh pawh ni se, ka hmu thuai thei dawn lo a, ka din hmun chu duhawm lo tak a ni. Ka khawl-phe-khawn-var chu ka phawrh vat a, kawtthler chu ka chhun kual chiam a, dam ka la duh a nih chuan hetianga ka tih hi a ngai a.

Amaherawhchu, keite kahna hun tha ka hlauh tih chu ka chiang khawp mai. Khawl-phe-khawn-var hmanga hmuntin ka en kual vak vak chu a lo hmu ve ngei ang a, rang takin a inthiar fihlim mai dawn a ni. A inthiar fihlim lo pawh a ni thei a, ka vanneih viau chuan hun rem chang ka nei dawn a ni. Zing ni a lo chhuah meuh chuan ka duhthusam engmah puitling a awm lo a, zing boruak thiang tak hnuaia ni lum ai chu a nyam ngei mai.

Chaw hnu hera tual chhung mite zawhna eng eng emaw ka zawh hma chuan ka mu hil zawk a. An rin loh taka dama min hmu chu mak anti hlawm ngei mai, zan khua deuh thawin keimeh leh keimah ka inbiak thu ka sawi kha kan hria ang a, tual chhung mite pawhin ka tawng thawm kha an lo hre ve a, thlarau lam thil tihtheihna neiah min ngai hial a. Keite chungchang ka zawhna pawh tha takin min chhang zung zung tawh a. Keite chu he lai ram bial velah hian a vak kual deuh reng a, khaw pakhatah mi a seh a nih chuan, chu khua atanga khaw dang hla takah chet a la chhun zawm leh thin, khaw pakhatah a zawnin a che ngai lo.

Gummalapur khuaah hian chawlhkar thum chhung zet chu thawm a rawn nei tawh lo a, chuvang chuan, keite huai zawnga khaw hrang hranga kal kual loin, amah ngeiin min rawn pan hun chu he khua atang hian ka lo nghak dawn a ni. Ram hnuai leh ngawa ka kal lohna chhan dang pakhat chu chhun lamah keite hi hmuh turin a inlar ngai meuh lo, sakei sual, mihring seh ching nena an inanna tak pawh a ni awm e. An sawi dan chuan keite huai ke hma ding lamah hliam a nei a, a hniak hnu atanga a lan dan nen pawh a inmil viau a ni.

Chhun chaw ka ei kham hnu chuan zan lam a ka chet dan tur ruahmanna thar ka siam a, nizan ang em em a hrehawm chu a ni tawh lo ang. Bukte kan siam ang a, kawngka khar loin, a chhungah chuan mihring mu ang takin milem kan muttir bawk ang a. Chutihlai chuan kei chu buk chhung kil khatah ka lo biru dawn a ni. Keite huai lo luh laiin emaw, kan milem siam a beih lai takin emaw, in chhung lum nuam leh him tawk atang chuan ka lo kap tawh mai dawn a. Ka ruahmanna chu tha ka ti ngei mai.

Ka ruahmanna chu khawtlang hruaitute hnenah chuan ka sawi a, anni pawh chuan tha an ti hle a. Tun hma deuha keite huaiin chhungkaw pakhat luhchilha a mang thakna in chhe tak chu kan buatsaih nghal chuk chuk a. Kawngka chanve lek hawngin, buhpawl hmanga mihring ang tak kan siam chu a chhungah chuan kan thuttir a. Lukham nen, Jacket leh Sari ka inbeltir bawl a, hre law tan lo chuan a tak emaw tih mai tur a ni. In chhung dung chu patling hlam hnih erh awrh a ni a. Thingrem phen, hmun rem chang tak atangin hahdan takin ka lo chang dawn a ni. Keite chu kawngkaah a lo dak a nih phawt chuan ka thelh ka ring lo, a hnai set sawt bawk a. In chung tangin emaw, bang lam atangin rawn lut pawh ni sela, ngaih that lohna tur awmin ka hre lo. A tak a an leh zual theihna turin thenawm in hniha cheng hmeichhia leh naupangte chu thawm dim lutuk lo tur leh tawng ri deuh turin ka hrilh bawk a, keite huai chu thlem chhuah ngei kan tum tlat a ni.

Rei pawh a ral hmain tual chhung mi thenkhat chuan kan ruahmanna chu an sawisel ve leh thung a. Kan milem siam awmna in pan lova, in dang daih a beih an hlau a ni. Keite chuan in dang a bei a nih phawt chuan mit khap kar chhung lekin keite chetna in chu ka thleng dawn tih ka hrilh hnuah chuan an ngaih chu a tha ve leh mai bawk a.

Tlai dar ruk a lo rik chuan engkim mai chu ruahman angin a kal a, ka tawmna in tiam lohin in dang zawng zawng chu chhung lam atangin an inkalh khum leh tawh a, khua a lo thim a, zan hmasa lam ang bawkin arsite chu a lo eng leh iar a. Kan milem pawh chu pawn lam atang chuan hmuh a harsain ka ring lo. Thenawm in pahnih atang pawhin hmeichhe titi thawm chu a hriat theih a. Ruahmanna a la kal tluang zel niin a lang.
Hun chu muang changin a liam ve zel a. Thawk leh khatah, di leh hnim hnah hmanga siam in chung chu thil eng emaw ni hian a rawn hai ri bawrh bawrh niin ka hria, ka inring nghal at a. Chhuat laiah chuan a rawn tla thum dap a, rang takin bang kil lam pana a tlan chu ka hmu thei a, sazu a ni, hlauh tur a awm lo. Zing khawvar hnaih tawh lamah chuan thenawma hmeichhe titi thawm pawh hriat tur a awm tawh lo a, keite huai theihnghilhin, an mutchhuak chuan a ur thlu ngang a ni.

Vaibel ka zu a, ka thingpui pai ka in deuh reng bawk a, sazu thawm tih mai loh chu thawm dang hriat tur a awm lo. Sazu pahnih chu khawvar dawn thlengin an inum kual reng thung. Khua a lo var takah chuan hahdam takin ka mu hil nghal a. Ruahmanna tha zawk kan hriat loh avangin zan hmasa ang bawk khan ruahmanna kan siam leh a, a rei emaw rei lo emaw, eng tikah emaw chuan keite sual hi a rawn inlar ngei ngeiin ka ring tlat a. He tih hunlaia ka thil tawnte hi ka dam chhungin ka theih nghilh thei dawn lo tih chu tun hnuah hian ka chiang leh zual thin.

Tlai dar ruk a lo rik chuan ka tawmna ngaiah khan ka awm leh tawh a, zan hmasa ang deuh chiah kha a ni. Zanu pahnih in um kual vel thawm leh thenawm lawka hmeichhe titi thawm bak hriat tur a awm lo. Zanlai pelh hnu hreah chuan thli a lo thaw vuk vuk a, van boruak thiang kuk mai chu chhum dumin a khuh zo a, ka awmna in kawngka pawh chu ka hmu thei tawh lo. Thli chu a na telh telh bawk a, rei lo te hnuah chuan ruah sur ri chu ka hre ta a, ruah sur chu a tam telh telh a, ka rilru chuan, hetiang ruah sur hnuaiah hian keite chu a lo chhuak hauh lo ang, sakei chi leh kuang hi chuan ruah hi an ngaina lo tlangpui, ei tur zawnga lo chhuah chu a awihawm lo tlat, lung muang takin ka chawl hahdan thei dawn a nih hi ka ti rilru a.
Ruah sur hnuaiah chuan thenawm lawka titi thawm pawh chu hriat tur a awm tawh lo a. Kawngka awmna lam chu uluk takin ka la thlir reng tho a, milem kan siam chawp kha chu ka hmu thei tawh lo hrim hrim. Rim takin zan hnih ka meng tawh a, ka mut chhuak chu tawrh a har ngei mai. Engtiang chiaha rei nge ka muthilh ka hre lo, rei tawk fang chu a ni ngei ang. Ka harh rual chuan thil fel lo a awm tih chu ka hre nghal mai a. Hetiang hunah hian thil awm dan awlsam takin ka hre thei a, vawi tam tak hun khirh tak tak hnuaia ka lo khawsak tawh thin avangin ka hriatna mak tak chuan thil dik lo chu a hre nghal mai a ni.

Ruah sur chu a bang tawh a, van pawh a thiang leh tan tawh a, kawngka leh kan milem siam pawh chiang lutuk lo chuan ka hmu thei leh a. Ka enchian hnu deuh chuan thil danglam tak a thleng a ni tih chu ka hre thei ta a, chutihlai tak chuan keite kal bo tur ngur thawm ka hre leh nghal a. Keite chu a lo kal ngei a, milem kan siam pawh chu a hmu a, mihring emaw tiin, bawk vak chungin a rawn veh a, a bawk hniam em a, in chhung atang chuan hmuh theih mai pawh a ni lo. Keite chuan kan milem chu a bei tih a chiang a, mihring a nih lo tih a hriat khan thinrim takin a ngur chhar chhar a, chu thawm chu ka lo hriat kha a ni.

Hmanhmawh takin ka khawl-phe-khawn-var chu ka hmet eng a, pawn lamah chuan ka zuang chhuak var a, kan milem siam chu palin ka tlu thelh leh nghal. Hmuntin chu ka enkual zung zung a, ka beisei erawh hmuh tur a awm lo. Keite chu hmuh mai tur a la awm takin kawtthler lamah chuan fimkhur takin ka kal thla a, hmun kil kawm lai ka thlen dawn chuan fimkhur leh zual tak ka ni, engtiklai pawhin min rawn bei thut thei tih ka hre chiang a, fimkhur luat a awm thei lo. In chung te chu ka enkual zel bawk a.

Chutianga fimkhur taka ka kal lai chuan, he keite huai fin phakar dan chu ka ngaihtuah chhuak a, hriatna mak tak, ka muhil tui lai min tiharhtu bawk kha a ni. Ka khawl-phe-khawn-var eng tak a hmuh khan a tim deuh ang a, min rawn zuan ta lo a ni mai thei. Ka lung chu a awi lo ngei mai. Keite huai ngei chuan ka awmnaah min rawn pan a, thawm nei loin a bo pil leh hmiah chu a ni si a, Gummalapur khaw dung leh vang fangin keite huai ka zawn pawh chuan eng ual a ang thei lo. Eng vang kher kher nge maw ka lo muthilh, heng thil thlengte avang tak hian keite huai nun tihtawp ngei chu ka tum ruh zual ta sauh a ni.

Zing khua a lo var meuh chuan keite hnu chu hmuh a awl ngei mai. Thlang deuha kawrte chu rawn kanin, a lo chhuak chho a, a ke hma dinglam hniak hnu pawh chiang takin ka hmu thei ta a, hliam a tuar avangin a ke hnu dang zawng aiin a fiah lo a, a rap na ngam lo tih a chiang khawp mai.

He keite huai hian mihring a seh hmain hliam na tak a tuar a, chuta tang chuan mihring seh a ching tan ta niin ka ngai hmiah bawk. A hnu deuhah keite ke hliam hi chiang taka ka en chuan, mihring seh a chinna chhan ka ngaihdan kha a dik chiah lo tih pawh ka hre hnu hnawh leh a. Kum hmasa lama tuihri leng avangin mi tam tak an thi a, mitthite chu phum mumal loin, mulukawlh ei atan an paih thin a. Tichuan, he keite pawh hian awlsam takin mihring sa a lo tem a, a zawngchhang chho ta hle a ni. A ke hma ding lama hliam a tuar avang hian hna hram a thawk thei si lo a, khaw chhungahte lutin, inchhungah a luh chilh chho zel a, heng avangte hian a lo fing phakar telh telh a, ngampa takin a lo che ta a ni. Tawn hriat a ngah chho zel bawk nen, a tawpah chuan India ram keite zinga hlauhawm leh tih ber a lo ni ta hial a.

Keite finzia hi ka hriat belh ve zel bawk nen, keimah vangin hun eng emaw chen chu Gummalapur khuaah hian a rawn inlan tawh dawn lo tih chu a hriat theih a. Khaw danga chet lak tumin ka rilru chu ka siam fel thuai a, ngun taka ka ngaihtuah hnuah, mel sawm pariat zeta hla, Devarabetta khua chu ka thlang fel a. Keite huai hian he khuaa mi panga zet chu a lo seh tawh a, tukthuan leh zanriah inhnawh puar nan a lo hmang tawh thin a ni.

Hma takah chhun chaw ka fak a, Devarabetta khaw lam pan chuan ka chhuak nghal nal nal a. Tlang dung pahnih lai kaltlang a ngai a, ka zin kawng chu namai lo tak a ni. Tlang pahnih inkarah hian luite a luang a, chutah chuan sakei hnu hma thar lam tak ka hmu bawk a, sakei chuan lui mawng lam a zawh thla zel a, zing khawvar rual vela a hniak hnu a nih ngei ka ring. Ka hna ber a ni lo bawk a, sakei hnu chu ka chhui zui duh ta lo a, tlai dar nga velah Devarabetta khua chu ka thleng hman hram a. Khaw chhung ka luh chuan khaw mite chu in chhung lamah an lo inkhar hnan ve leh vek a, ka hmel an hmuh pawh chuan min biak tum pawh an awm lo. Devarabetta khua hi keite huai hian thla khat chuang zet a tlawh tawh lo a, eng hunah pawh a lo lang leh thei a ni tih ka hrilh thuai a.

Khaw thim a hnai tawh bawk nen, hmamhmawh takin buk/in bang sang deuh ka melh kual nghal zung zung a, Gummalapur khua ka thlen zana ka tih dan ang bawk khan ka insiam nghal zung zung a. Hnung lam atanga min lo beih thut loh nan hnim hling nei chi hrang hrang kan dah bawr luk a. Hnim hling nei la khawmtute chuan keite huai lo lan thut an hlau em em a, silai nen uluk takin ka zui zel nghe nghe a ni. Devarabetta khua hi Gummalapur lakah chuan khawte ve leh chhawng tak a ni a, ram ngaw nen pawh a inhnaih hle a, hei hi ka tan chuan vanneihna pakhat a ni ve bawk. Ramsa hel/hring ei chite zana an vak vel chu awlsam lehzualin ka hre thei dawn a ni.

Rang takin zan chu a thim a ni deuh ber mai, mahse, thla a seki vang mai a. Chutihlai chuan, kan piah lawk ram ngaw atang chuan a khat tawkin ramar a rawn khuang al al a, arawn pawhin thawm a rawh nei ve a. Thawm atang chuan boruak hlauhawm a awm lo tih chu awlsam takin ka hre thei a. Zan chu a reh telh telh a, arsi eng paw raih hnuaiah chuan kawtthler chu chiang lo ruaiin a hmuh theih a. Zan dar riat leh a chanveah chuan sakhi chi khat hian ralkhel thawm a rawn chhuah ta a, thawm dang pawhin a rawn zui nghal thuai a. Thil chiang tak mai chu, sa hel hei chi a lo hnai a, a thenawmte chu himna zawng turin sakhi hian a hriattir a ni. Keite nge ni ang, sapui. Tunah chuan a hriat mai thei loh, mahse, a pawi lo e, hlauhawm a hnai tih min rawn hriattir tho a lawm.

Ralkhel thawm pawh chu a reh leh tawh a, minute sawmpanga a liam leh hnu chuan thawm lo chhuahna hmun atang bawkin keipui thawm ka hre ta a, hniam ruihin vawi hnih a rum deuh chhur chhur a, thawm engmah hriat tur a awm leh ta lo. Kawppui tur zawng a ni lo a, ram hnuai lal riltam chaw zawng thawm a ni zawk. Ngaw chhunga cheng nungchate chu fimkhur turin an inchah a, zaninah hian an zinga pakhat chuan nunna a chan ngei dawn tih pawh an hre vek hial ang chu.

Hun chu a liam leh zel a, kawtthler thlang deuhah chuan thil eng emaw che ka hmu bawk a. Ka rifle cheng kau sa chu ka lek kang nghal uaih a, kawtthler laiah tak chuan kalin, thil che ka hmuhna lam chu fimkhur takin ka pan thla zel a. Keite huai kha a ni ang em, fimkhur lo takin kawtlaiah hian a vak vel ngam dawn em ni? Pen sawm thum vela ka hnaih tawh hnu pawh chuan fimkhur lo takin a la kal theuh theuh a, mak ka ti kher mai. Sa seh tur a veh niin a lang, khaw chhungah leh nghal, a awihawm lo hial zawk.

Chiang takin ka hmu thei tawh a, a lan dan chuan a cherin a sa pawh chu a pan hle. Pen sawm ka pen leh rual chuan ka rifle-a khawl-phe-khawn-var ka vuah chu ka hmet eng thut a. Eng chhuahna lam chu a rawn en a, muang changa mei vai chung chuan min rawn pan leh zel a. India ram hmuntinah enkawltu nei lo, khawlai ui, ui chuang a tam tih kan hre awm e. Ka lam pana lo kal pawh chu ‘ui chuang’ kan tih ang hi a ni a, a riltam chaw zawng vak vel nen kan intawng a ni.

Tun ang zan reha thian neih chu pawi ka ti lem lo bawk a, eng chu timitin, uicho chu ka awmna lamah chuan ka ko thuai a. Inthlahrung taka a mei chhe te chu vai reng chung chuan min rawn pan ve zel a, ka chhang pai chu ka pe nghal a. Arsi eng ruai hnuaiah chuan min thlek deuh vang vang hnuah lawm takin ka thil pek chu a ei zo thuai a. Hun rei tak chhung chaw a ei tawh lo tih chu a chiang reng. Chhang a ei zawh chuan ka ke chunga lu nghatin, ngaihngam takin a muhil leh nghal a. Zanlai a pelh hnu lawk chuan, ram ngaw tawntirh atangin chhimbuk hram ri, ngaihno bei lo zet chu a khat tawkin hriat tur a awm reng a. Hre ngai lo tan chuan hlauhawm a tling hial awm e.

Dar khat a ri a, dar hnih, dar thum a rik meuh chuan ka mit chu a chau tawh khawp mai, ka intiharh hram hram a, kawtthler tin mai chu ka enkual a, thawm danglam deuh hriat tumin ka beng ka chhi kar reng bawk a. Zanin zet chu ka vannei hlein ka hria, van boruak a thiang em em a, hmun tinah arsi a de chuah chuah bawk a. Boruak bawlhhlawhin a tuam vel khawpui ang a ni ve lo a, harsa lo takin kawtthler tin mai chu a hmuh theih a ni. Chutihlai tak chuan, ral khel thawm a lo ri a, Biakbairawk sava hi kan hre theuhin ka ring, ka piah lawk, dai hnaite atang chuan thlabar takin, ‘biak-bai-rawk’ tiin, rang tak takin a rawn hram a. A hram dan atang chuan a thlabar tih a hriat a, thil eng emaw ni tak a hmu a ni ngei ang, chuti ni lo se chuan kha tiang tak khan thawm a chhuah dawn lo. Ka ke chunga muang fahrana ui mu hil pawh chuan a tuang a rawn tithur nghal chhar chhar a, a lu chu a kan leh deuh a. Chutah, khawvelah hian rilru tihhah a ngai lo a, ngaih pawimawh tur engmah a awm lo e, ti niawm fahranin, a hma ang bawk chuan ngaih tha takin a muhil leh nghal diar diar a.

Hun rei pawh a liam leh hma chuan ‘ui chuang’ chu a rawn harh chiang ta ngei mai, a hma zawga a beng uai thlep kha tunah chuan a tung chho at tawh a, ka ke chunga mu chung chuan a khur zawih zawih a, chutah, bauh pawh bauh loin, dawih aw zetin a u a. Kan thlang lawka tui dah khawlna hmun chu a en niin ka hria, kei pawh chuan uluk takin ka en nghal ran mai a. Hun eng emaw chen chhung chu engmah hmuh ka nei lo, a hnu deuhah chuan kawtthler lam pana hlimthla ang tak che ka hmu ta a. Hmuh hmaih neih chu ka tum lo khawp mai, mit khap kar chhung lekin thil che chu ka hmu leh a, kan inkar pawh a hnai tawh ang reng khawp mai.
Ka zungpui vei lam chuan ka khawl-phe-khawn-var hmehna chu ka khawih nghal chat a. Tuibur hmuam da vel ka nghah leh hnu chuan, thawm nei lo leh intha zo takin, pen sawm hnih vela hla in chungah chuan a zuang chho zawk a, a che vel chu a zeiin a rang ngei mai. Helai hmuna in ding chhe tete te hi a inzawm deuh thliah thliah a. Hmun ualau tak atanga min rawn beih chu tum loin, in chungah chuan zuan kai zel a, ka hnung lam atanga min rawn beih a tum ngei niin ka ring a.

Rang taka dingin ka hnunga bang chu ka ngheng nghal vat a. Tuna ka dinnaah hi chuan keite tan rem chang a awm dawn lo a, dithlifarfemin min hliah bawk nen, a hma deuha ka thutna chung zawn chu silai chuan ka tin ran a, ka hmehen chu ka kut zungpui vei lam chuan ka khawih pah rauh rauh a, silai hmet puak nghal mai thei turin ka inpeih at reng a ni.

Rei pawh a rial hmain keite huai chuan thawm dim tak chung chuan, hnim hling nei kan dah chu a rawn thleng tih ka hria a. A tum ang chuan a che thei lo a ni ngei ang, thawm chu a reh leh hmiah a. Tunah chuan keite huai awmna dik tak ka hre tawh lo a, minute sawm panga chhung zet chu ngaih tha lo tak chung chuan ka ding reng a. Engtiklai pawhin, khawi hmun atang pawhin min rawn zuan thut thei tih ka chiang a, inring em em chung chuan ka hawi kual pah reng a. Chutiang thil a thleng lo hlauh chu Khuanu malsawmna ni ngeiin ka hria. Ka ke bula hlau hlum dawna bawk ‘khawlai ui’ kha tunah chuan kawtthler zaulaiah chhuakin, ka awmna in chu a bauh ta vak vak mai a. Ka hre chhuak ta.

Tlema tlemah ka thi lo chauh a ni. Second nga pawh a ral hman lo ang tihah chuan sir lam atangin keite huai chuan min rawn zuan ta chat mai a. Ka khawl-phe-khawn-var chu ka hmeh en rual rualin ka silai chu ka kawng zawn atangin ka hmet puak nghal thuai a. Keite ka ang sen huam mai chu ka silai mu engah chuan ka hmu hman. Min bawh tlu tawp mai a. Ka silai mu khan fuh chiang hle mah se, chung lam atanga min rawn zuan a ni bawk a ka tlu ta tho a ni. Rang takin ka tho nghal vat a, vawihnih ka hmet puak leh a, harsa tak chunga a ka a ang chap chap leh a mei a tiche tihmai lo chu che tur a awm ta lo. Ka thian chhar thar, ka nunna chhanhimtu pawh chuan phur takin keite huai, che thei tawh lo hrawkah chuan a ha chhia a ha chhiain a rawn seh ve nghal chat a.

Tichuan, Gummalapur keite huai, fing leh rawng zet chuan a chantur dik tak chu changin, thawm chhuah leh ngai tawh lo turin a tawpna a tawng ve ta nge nge a ni. A tuk zingah chuan keite vun chu ka lip mawlh mawlh a, a ke hma lamah silai kahna hliam a tuar nia ka lo rin chu, sakuh kahna hliam a lo ni zawk a, a ke zungtang inzawmna takah chuan sakuh pahnih a la awm nghe nghe. Hei vang hian keite huai hian a ke hma ding lam hian lei a rap tha ngam meuh lo a, a hniak hnu pawh hi hriat a awlsam phah hle nghe nghe a ni.

Ka thian chhar thar chu chaw pein ka bualfai a, a hmingah ‘Nipper’ ka phuah a. In lamah ka hruai hawng a, kha mi zana chhang them ka pe kha tun thlengin vawi te khatmah ka la inchhir ngai lo, ka thil pek chhete rulh nan chawp leh chilhin ka nunna a chhanhim tih kan hriat tawh kha.


Author : Hlimtea Tlau

16 Feb, 2017

Advertisements

About Mizo Archive

I'm the one who collect the best writings of Mizos
Aside | This entry was posted in Thu Ngaihnawm, True Story and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s