The Man-Eater of Jowlagiri (mizo version) by Hlimtea Tlau

    Kenneth Anderson leh Sakei huai.

Zan thla eng ruih hnuaia ram ngaw, luipui phai ruam leh tlang sang tak takte mawizia hi ram vak mite chuan kan hre theuh awm e. Ram ngaw chhungah thung chuan thing lian leh sang tak tak te, hnah hlai puipui thliin a chhem zawnga che vel sua sua chu hlim thla mak tak hmuha hmuh lah a awl, hetiang hmunah hian mihring seh ching, sakeite leh ramsa chi hrang hrang an cheng khawm thin a. Jowlagiri ngawpui chu han en mai chuan a muanawmin a nawm hmel hle a, amaherawhchu he ngawpuiah hian ramsa hlauhawm tin reng an kim hial awm e. Sa pel ruk ching thian pathumte chuan sakhi emaw, sazuk emaw, kah ngei tumin sih bulah chuan khaw nghah thim an tum a. An innghahna hmun hi sih tui awmna a nih avangin sakhi leh sazuk tui hal chuan an pan lo thei lo a, chu hun chu anni thian za ho chuan an lo chang ta ran mai a ni.

A tlai chho zel a, thlapui pawh van lai zawlah a eng kulh tawh a. Ramvachal pathumte chuan nghakhlel takin an thut hmunah thawm ngaithlain an la thu ran a. Chutihlai chuan vawi leh khatah an piah lawk, vei lam atang chuan hnim hnah tawn ri sun sun thawm leh ramsa eng emaw nguk ri hruih thawm ni awm tak hi an hria a. Eng tak chu ni ang maw ? Sanghal a ni ngei ang. A fuh dawn e, a sa a tui mai bakah sum chang thei a ni. Sapeltu (poacher = dan phalloha sa,etc., pel ruk ching) pathumte chuan ngawi rengin an lo chang ran a. Mahse, ramsa chuan a hmel a rawn lan duh tlat lo mai.

Muniappa, an zinga silai kap thiam ber chuan ngawi renga thut tlawk tlawk mai chu a ning ngang a ni ang, thawm lo chhuahna lam chu rin kah a tum ta mai a. A silai cheng chu a kau ri khak a, hlimthla che vel zinga a dum lian deuh ber mai chu tin zawnin, a kap puak ta dur a. Ramsa pakhat chu hnim buk kar atang chuan a rawn zuang chhuak zawk a, huk leh rum hum hum chungin, hmun him lamah inthiar fihlim a tum niin a lang. Thil pakhat chiang tak chu: sanghal aw zawng a ni lo, sakei a ni, sakei! Sapeltu pathumte chu hman hmawh bak lengin khaw lam panin an tlan haw nghal thuai a, an ngaih a tha lo ngang mai. Zing khua a lo var chuan an sa kah chu an va bel chiang a. Vanneih thlak takin, sakei pa valai tak chu a lo thal reng mai a, silai mu chuan a thinah tak a verh hi a lo ni a. Muniappa leh a thiante pahnih chu an hawi sang ngei mai, sakei pa, an kah hlum chanchin lo chu khaw chhungah titi dang a leng lo.

Tlai khua a lo thim chhoh leh meuh chuan khawtlang boruak chu a dang ta zar mai. Keipuiin thinrim taka a kawppui a zawng thawm chu khaw chhung atang pawhin awlsam takin a hriat theih a, hai rual a ni lo. Sakei chi thlah hun lai a ni a, he keipui hur hian a hma deuh lawk khan, hun rei tak a zawn hnuah, vanneihthlak takin kawppui a tawng ta hlauh mai a. Hlim leh lawm taka a len vel lai chuan vanduaina namai lo takin tlak buakin, a kawppui chu a mit hmuhlai ngeiin, rawng taka tihhlum a ni ta mai si a. Tuar thiam a tum lo, dar leh lam sah thlak ang maiin a tuar na a, phuba lak tumin a rawn inhrosa kuk kuk ta mai a ni.
Kar hnih thum a ral hnuah pawh chuan keipui chuan kian san mai a tum lo. Dai velah chuan a hahumin a ngur chhur chhur reng a. Pawn khaw chhuak ngam pawh an awm meuh lo.

Jack Leonard, tlangval tha za rual lek, silai kah lama hming chher tawh chu hmanhmawh takin khaw mipuite chuan an chah nghal chuk chuk a, ni riat niah lo thlengin keipui chanchin chu chipchiar takin an hrilh nghal zung zung a. Keipui chu hmun tinah kal kualin a hniak hnute chu a hnut chhiah zel zul a. Tlai dar nga velah chuan a vanneihna en chhin tumin, Jack chuan fimkhur taka biru chungin keipui hur, a kawppui chan ta, thinrim em em chu hma chhawn tumin, chan a rilruk a. A vanneiha siamin kawng sira fanghmir bu lian tak chu inphen nana hmangin a biru ta khiau mai a ni.

A tlai chho zel a, tlai dar 6.15 a nih meuh chuan khua pawh a thim chho tan a. Chutihlai chuan, thawkleh khatah, a ding lam sir piah deuha hnim buk tawn ri chu a hre ta a, lungte rah lum thawmin a rawn zui nghal a. Leonard chuan uluk em em hian a vel chu a en kual reng a, hmuh hmaih neih a tum lo khawp mai. Mahse, thawm a hriat bak chu engmah hmuh a nei lo. Hun chu a liam zel a. Tichuan, a awmna lam pana thil engemaw chak taka lo tlan chu a hmu ta a, a lo hnai zel a, keipui ngei a ni. Rang lutukin a rifle chu a dar vei lama chhuangin a tin zawn nghal chat a, a tawmna atang chuan theih tawpa dak chhuakin, chak taka keipui lo tlan chu a awm zawnah tak tinin a silai chu rang takin a hmet puak nghal thuai a.
Keipui chu zuang zawk chungin a huk dum dum a, ngawpui lamah chuan a inthiar fihlim nghal a. Leonard chu a lungawi lo ngei mai. A awm bawrah kap fuh loin, a ke hma lam darah a kap fuh a lo ni a. Thisen chu hmun tinah a baw darh nuaih a. Khua a tlai deuh tawh bawka a tuk lama chhui zuiah tiin Leonard chuan a tin san ta a. He lai vel ram hi a chhuk chhoin a chhengchhe em em a, luite a awm thliah thliah bawk a, hnim hling nei chi leh thing buk chhir chher a tam a vang hian hnu chhui chu buaithlak tak a ni, a tawpah chuan a beidawn san ta hial reng a.

SAKEI A CHE TA

Thla hnih thum a liam leh meuh chuan, keipui pawh chuan a chetna bial sawnin, Jowlagiri khua atanga mel sarih zet a hla, Sulekunta, thing tlang khaw chengkerh tak, ram ngaw kara awm, biakzin miten an tlawh pawh ve zauh zauh thin khuaah chuan a inlar leh tan ta a. Selekunta khaw daiah chuan Temple te fel ren rawn tak hi a awm a. Temple atang chuan nupa tuak khat leh an fapa neih chhun, tleirawl tha za rual vel tur hi an lo chhuak a. Anni pathum pawh hi sakhaw serh leh sang thila he khuaa kal hi an ni a, an khaw lam pana haw leh turin Sulekunta khua chu an chhuah san chiah nghe nghe a ni.

Sulekunta khua atanga mel chanve awrh an kal tih velah chuan an fapa tleirawl chuan kawng sira thei rah vel chu banin a hnufual deuh hlek a. A nu leh pa, a hma pen sawm vel leka kalte chuan hniam chher chhawr taka ramsa ngur thawm an hre ta thut mai a, na tuar chiau vawn vawn riin a chhun zawm nghal zat bawk a. An han hawi kir meuh chuan an thil hmuh chuan a barakhaih ngei mai. An fapa mal neih chhun chu sakei lian tak mai hian seha pu vu vu chungin a lo sawt pui thauh thauh mai a. Nupa tuak te chuan an fapa duhtak chhan chhuak turin tih theih engmah an nei lo, an aw rawl tawpa au mai loh chu. Sakei lah chuan ngawpui lam panin a tlanpui zel a, hnuk chat tur aw rawl tih hriat tak, chau takin an fapa chu a rawn rum leh nghat nghat a, thawm dang hriat tur a awm zui ta lo.

He thil thlen atang hian hmun hrang hrang, Jowlagiri chhim leh hmar, chhak leh thlang, ran tlatna hmun mel sawm thum panga chuang bial vel zetah chuan sapui huai kut tuara thi chu an indawt chho zut ta mai a ni. He sakei sual hian mi sawm panga zet a seh hlum tawh a, an zingah hian hmeichhia pathum an tel a, an zinga pakhat phei hi chuan pasal a nei fel awrh chauh a ni. Thil thleng rapthlak tak takte avang hian mipui an ralti em em a, an manganzia leh tanpui an ngaihzia chu Hasur khaw chhiah khawntu chuan a rawn zualko ta hial reng a ni.

Chhiah khawntuin ka hnena a sawi chu zawmin, sakei sualin mihring a tihhlumna hmasa ber khua chu ka pan ding nghal nalh a. Sakei sual chanchin intihre tak takten an sawi chu uluk taka ngaithlain, zeldin thu bawl leh a tak chu theih tawpin thliar hran ka tum a. Sakei pa a ni lo tih a chiang a. Keipui, tun hma deuha a kawppui an thahsak kha a ni tih ka hre thuai a. Tichuan, keipui sul hnu ka tawng mahna tiin, Sulekunta khaw lam panin, Jowlagiri chu ka chhuahsan leh ta a ni.

TAWKTARH DIKLO

He lai velah hian tun hnaiah sakei kut tuara thi an awm lo a, keipui hnu hma awm chhunte pawh chu a hlui tawhin, ran rual hniakhnuin a hliah khuh nasa tawh hle a, hei vang hian mel sawm thum dawna hla, Gundalam khua chu ka pan leh ta zawk a. Ran rual tlatna velah chuan Bukte khawr chawpa khawsak ka rilruk a, a chhan tak pawh, ran rual vengtu pasarih zet chu helai velah hian sakei sual hian a lo tihlum tawh a ni.

Tawktarh atan lawi tuai thau tha tak tak pathum zet chu an lo dah sa diam a, hmun rem chang leh khan deuh tura ka ngaihah chuan ka thlung ta nghauh nghauh a. Lawi pakhat chu Gundala lui leh Sige Halla lui inpawhna bul, remchang tak maiah chuan ka thlung thuai a, a pahnihna erawhchu Anchetty khaw kawng, khan tha laiah ka thlung thung a. Helai rama mi chengte leh ransa hoin an tlan ber lui bulah ka lawi pathumna chu ka thlung ve leh ta a ni.
Tawktarh pathum chu uluk taka vilin, .405 Winchester Rifle nen, keipui hnu thar lam hmuh beiseiin hmun tin ram tin ka fang kual a, he lai ram ngaw phei hi chu ka fang chip chiar khawp mai. Sapui lung fing kan pel a nih chuan vawi leh khata tawn mai hi beisei rual a ni lo.

Chutianga ni hnih zet hun ka hman ral hnuah chuan Sapui hnu tharlam deuh chu Gundalam lui kam, lei nem laiah chuan ka hmu ta mial a. A hnu hma atanga a lan dan chuan, zan reiah luite a rawn kan a, tawktarh atana lawi ka thlun chu ding meuhin a thlir hnuah a kal san leh tih chu a chiang khawp mai. Lawi chu a tin hmawr pawha khawih loin, Anchetty khaw lu lama tlang chu a pan leh ta zawk a. Lung thil hmun a thleng chho a, hnu chhui chhun zawm chu tih rual a ni ta lo.

A tuk thum tukah pawh chuan ka hna ngai chu ka la chhunzawm zel a. Inbual harh tura buk lam ka pan lai chuan Anchetty khaw VCP hoin, mi eng emaw zat chuan tukin zing maia keipuiin mi pakhat a seh leh thu min hrilh tumin an lo kal hi a lo ni a. Sakeiin a seh hlum tak hi a vanduai khawp mai, zanah ran rual a ven laiin thawm danglam tak hi a hria a, khawvar ve leh eng thawm nge ni tia, hriat chian tuma a kal chu a lo let leh ta reng reng lo mai a. Chu chu a chanchin an hriat hnuhnung ber chu a ni. A unaupa leh a fate chu an ngaih a tha lo hle a, thil awm dan hriat chian tumin an chhuak a, mut bu darh neih nuaih leh keipui hnu an hmuh meuh chuan ngaihdan an nei nghal a, amaherawhchu, tumahin an sawi chhuak lo. Thil awm dan an hriat chuan Anchetty khaw lam an pan nghal a, tichuan, an khaw hotu, VCP hoa inpun khawmin, thil awm dan zawng zawng ka hnena rawn thlen turin an lo thawk chhuak hi a lo ni a.

Rang taka inbualin, ka inhnawh puar zung zung a, chhiat tawhna hmun lam panin kan chhuak leh nghal a. Hnu hma atanga a lan dan chuan ran rual vengtu hian thawm engmah a chhuah hman lo tih a chiang a. Sapui hnu chhui zui ka’n tum ngial pawhin a buaithlakin a khirh khawp mai. He lai vel ram hi lung thil hmun a nih mai bakah a pik em em a, hmanrua engmah keng lo chung pawhin vah vel chu namai lo tak a ni. Hetiang tulpik kara a sa seh nena kal vel chu keipui tan pawh thil awlai tak zawng a ni hauh lo ang. Chet a lakna atanga feet zathum vela ding, theipui kung hnuaiah chuan a chawl hlek a, tuk thuan kil a tum pawh a ni mai thei, a sa seh chu a nghat zawk a, thawm dang a hriat vang nge tuk thuan kil mai lo in ngawpui ril lam chu a pan leh ta zawk a.

Theipui kung atang hi chuan hnu chhui a hau tak tawh lem lo, a chhan chu, keipui hian a nghawngah sehin a pu tih a hriat a, thisen hmuntina far zeih zuih chu hmuh a awl tawh a ni. Thui pawh kan chhui leh hma chuan hling kara kawr them chu kan hmu leh a. Piah lawka luiteah chuan keipui hniak mai bakah, a sa seh a hnuhna hnuhma chu a langsar hle a ni.

Hetianga a huhoa kan inzui dur dur chuan hlawhtlin chu beisei chi rual a ni dawn lo a. Tichuan, thawm beng chheng siam lo tura hrilhin, keimah chauha hnu chhui chu chhunzawm ka rel ta a. Hmasawn chak a har ngei mai. Fim khur tak chungin hma lam chu ka pan zel a, tun ang hun hi fimkhur ngaih hunlai ber a ni. Ngawi rengin min lo chang dawn nge, eng tiangin nge chet a rawn lak ang, a hnai viau nge…. engmah sawi lawk theih a ni lo, rin dan mai lo chu. Lui kama hnim zingah chuan lungpui pakhat hi a ding luah mai a, bihruk nan emaw, tu emaw lo chan nan chuan duhthusam a ni. Lungpui bulah chuan thil eng emaw phe zauh ka hmu a, enchian tumin, fimkhur leh zualin hma lam ka pan zel a. Lungpui nghenga thil eng emaw awm chu chiang vak loin ka hmu nghal thuai a. Ka han belhchian chuan sapui kut tuara thi ta, ran rual vengtu ruang ngei a ni tih chu a chiang khawp mai.

Keipui chuan a pum ruak tak a hnawh khat tawh tih a hriat hle a, ruang chanve zet chu a ei tawh a. Tunah tak hi chuan a sa seh bul hnaiah hian a awm lo tih ka chiang a. Ka hnung zuitute zinga thenkhat chu sawmin, a rem changlai ber turah, sapui channa tur buatsaih nghal kan tum a. Zan riah kil turin he sakei sual hi a lo let leh ngei ngei dawn a, chu tak chu rem changah ka lo hmang ve dawn a ni.

Harsatna pakhat kan nei nghal a, chu chu thing lian deuh, thangte dawhna tur a awm lo chu a ni. Duh thlan tur pahnih chiah a awm. Pakhatna chu, lui kam leh lam hmun rem chang, ruang lan theihna atanga chan a ni a. Pahnihna chu, ruang chhak lawk, pen sawm ve a hla, lung bang, awm chen vel a sang chu tan hmun a hman a ni. Pakhatna chu ka hnawl nghal a, pahnihna pawh hian duhthu chu a sam lem lo khawp mai, chetsual pawh a hlauhawm khawp ang. Mahse, lui dung chu thui tak a hmuh theih dawn a. Duhthlan tur dang nei miau hek lo, lung bang chu belbul ka tum ta a ni.



Thawm dim tak chung chuan ka tawmna tur chu kan siam tha sauh sauh a. Hnim buk leh hling la khawmin, sakei ka channa hmun tur chu kan thuam zo thuai a. A remchang dawn hlein ka hria, awlsam tak chuan min hmu mai lo tawp ang. Ka mamawh dawna ka hriat avangin kawl-phe-khawn-var, tui um leh pawnpui ka pai sa bawk a, a fuh khawp mai. Ka thiante chuan a tuka lo let leh turin min hawsan a, kei pawhin ka bihrukna hmunah chuan uluk leh fimkhur taka thuin, sakei sual chu ka chang ta khiau mai a ni.

Tui leh chhangin ka inhnawh puar a. Ni sa rum rut leh khaw lum uap churh hnuaia che lo chang lo a sakei sual chan hi namai lo ve tak chu a ni. Ka awmna atang chuan kawrte kam tawn tawn chu uluk takin ka thlir kual pah reng a. Mulukawlh inlar an awm leh awm loh hian thil thui tak a hril a. Tun tumah hi chuan, ruang hi chung lam atangin a lang thei lo a, hei vang hian mulukawlh pawh hmuh tur an awm lo reng reng. Tlai dar nga velah chuan choak pakhatin ruang chu a rawn hmu fuh a, a hnu rei loteah a kawppuiin a rawn fin ve leh bawk a. Mihring ruang han ei mai chu an inthlahrung nge maw ni dawn, choak nupa chu an ti ru riau mai. Khua a tlai chho zel a, ni pawh khaw thlang lamah a liam dawn ta. Choak nupa pawh chuan a tuk lama ruai chu chhunzawmah tiin tin zai an rel ve ta bawk a.

Ramar pa chuan zan a intan dawn ta tih puang niawm takin a rawn khuang al al a, thlang deuh atang Arawn pawhin a lo ‘amen’ pui nghal zat bawk a. Chutiang thawm ka hriat chuan ka thla a muang huai mai, a chhan chu, thil danglam deuh emaw, hlauhawm emaw a lo thlen dawnin ral vengtu tha tak, Arawn hian rang takin ralkhelthawm a chhuah thin tih ka hriat chian em vang a ni. Sakei sual pawh hi a lo hnai a nih phawt chuan, ral vengtu, Arawn hian min hriattir dawn a ni. Zan chu a intan ta. Tun hun hi sakei sual lo chhuah hun tur a ni a, a ril a tam tawh hle dawn a ni. Uluk leh fimkhur takin, sakei sual lo let hun tur chu ka nghak ran a, hmuh hmaih leh hmuh sual neih a thiang lo a, thawm neih a chi hek lo. Engmah hmuh tur a awm lo a, a reh ruih mai, Arawnin a riahna tur thing zar bela a thla zap thlawk ri tih mai lo chu.

Khaw thim atanga rei lote hnuah chuan vanneihthlak takin thla a lo chhuak a, luikam vel chu ka hmu leh thei ta bawk a. Chhun lam sava thawm a reh a, zan lama chaw zawng chi an rawn inlar ve thung a. Zan chu a rei chho zel a, thawm hriat tur pawh a tlem chho zel a. A tawpah phei chuan khauchher thawm tak ngial pawh hriat tur a awm tawh lo, thlan mual ang maiin a reh ta tlawk tlawk mai a ni.

Ruang awmna lam chu uluk takin ka thlir reng a, sakei ei bang, mitthi lu chu ka awmna hmun atangin a lang thei lo hlauh chu vanneihthlak ka ti ang reng khawp mai. A chhan chu, sakei sualin a hmai vel chu a seh thler dei duai a, a chuar ten tun bawk nen, hmuh hrehawm tak a ni.

Vawilehkhatah zan reh vung vung karah chuan ralvengtu, Arawn chuan ralkhel dar a rawn tiri a, ralkhel thawm dang dangin a rawn zui nghal zat bawk a. Thawm lo chhuahna chu ka awmna atanga mel chanve vel niin ka hria. Sakhi tial chi pawhin thlabar tih hriat takin thawm a rawn chhuah a. Biakbairawk pawh chuan fiah leh thiang takin, ‘inring rawh’ ti niawm takin a rawn hram a. Ral vengtu, ka thiante chuan engemaw hmuh an nei tih a chiang a, an hna an tlin ngei mai. Sakei sual a lo hnai tih chu hai rual a ni ta lo.

Ralkhel thawm pawh chu a zawi chho tial tial a. Chuti a nih chuan, sakei sual chu an hmuh phakah a awm tawh lo a, ruang awmna lam panin a lo hnai zel tih chu ka chiang hle a ni.

Kawrte ding lam chu uluk leh zualin ka en kual reng a, engtiklai pawhin sakei sual hi a lo lang thut thei tih hriain, ka inring ngei mai. Mahse, engmah hmuh tur a awm lo. Ka sana ka han en a, darkar chanve vel chu a liam leh tawh, Thla engah chuan ka sana chu chiang takin ka hmu thei a, minute 45 a ral leh a. A mak hle mai, sakei sual chu rawn inlan a hun tawh hle a ni. Mel chanve chu minute sawmli panga chhung chuan a thleng hman tur a ni.

Hlauhawm lo thleng tur hriatna mak tak mai ka nei ta a. Hetiang thil hlauhawm thleng tur hriatna hi kan nei vekin ka ring a, tun hma pawhin vawi eng emaw zat, he hriatna avang hian India, Burma leh Africa rama ngawpui tam taka ka ram vah velnaah thihna ka lo pumpelh tawh a. Tun tumah pawh hian hlauhawm lo thleng tur chu chiang takin ka hria a ni. Rinhlelh rual a ni lo. He hmunah hian ka awm tih theih tawpa thup tuma kan beihna chu engmah lo a chang ta. Zan khaw tlaivar dawn dawn, dar kar tam tak, che lo chang lo a ka beihna chuan awmzia a nei ta lo. Chu mai pawh chu a ni lo, ka sakei sual chan ngei chuan tunah hian min veh them them a, eng hunah pawh min zuan thut thei a ni tih chu ka chiang khawp mai.

Hetiang ang hun raltiah hian rang tak leh fim taka ngaihtuahna hman a ngai a, chu chu thil awlsam lah a ni hek lo. Tunah pawh hian ka hlau hle tih chu ka zep hauh lo. Ka hmul thi a ding nghal sung sung a, ka thlan a tla nghal bawk a. Ka sa chan chu kawrte lamah a awm lo tih ka hria a, ka hnuai lam, a lo kalna tur nia ka lo rin lawkna lamah a awm lo tih pawh ka hria. Ka awmna atang hla vak lo, hnim buk kara biruin, ka che vel chu min lo thlir reng a ni ngei ang. Ka din hmun hlauhawmzia chu ka hre chiang ta ngei mai. Tan hmun atan a lung bang awm che vel ka hman chuan ka khaw hawi a dal a, thingthi chuan ka hmu thei mai thei. Mahse, silai chelek a harsa dawn a ni.

Hetiang thil hi a thleng thei a ni tih ngaihtuahna chang ka hre lo chu ka rilruin anchhia ka inlawh mawlh mawlh a. Ka ngaihtuah kim loh avangin tunah hian din hmun hlauhawm takah ka ding a ni. Mit khap kar lek ka inngaihtuah buai lai chuan, ka chhak lawk atangin lung thil a lo tawlh tla ham ham a, eng vanga lung thil chu lo tawlh thla nge a ni tih chu ka hre chiang ngei mai. Sakei sual chuan min zuan tluk tawp tumin a ke chheh a siam rem a, bawk khup du chunga insang marin, min rawn zuan dawn a ni. A chiang lutuk.

Muangchan a hun tawh lo. Darkar tam tak che lo chang loa ka awm avangin ka ke te chu a mu chuah chuah a, thingthi ti tih chungin ka rifle .405 chu a cheng kauin, ka lek kang nghal vat a. Tlemin ka ding mar deuh a, ka tan chhan lung bang, awm chen vela sangah chuan ka silai chu nghatin sakei awmna lam chu ka hmu thei ta a. A rapthlak ngei mai. Ka awmna atanga pen nga vel leka hnaiah, keipui chu min zuan mai tumin a lo bawk phek vung a. Kan han inhmu phut chu mak tiin kan meng phar dun nasa hlein ka hria. Sakei sual chu rapthlak takin a rum hum hum a, min rawn zuan nghal mai dawn niin a lang. Inngaihtuahna hun a awm tawh lo. A che hmasa zawk zawk a ni mai. Rang lutukin ka rifle chu ka darah ka nawr nghet a. Ka hmet puak nghal dur a, chutih rual chuan sakei sual pawh chuan rapthlak taka rum hum hum chungin min rawn zuan ve nghal a. Sakei sual rum hum thawm leh ka rifle puak ri chu a ringin a rapthlak ngei mai, kum tam tak liam hnuah pawh he thil thleng ka ngaihtuah chhuah chang ni hian, hlauin ka hmul thi a la ding fo thin a, mang lama ka hmuhte hian hlaua khurin ka harh hlawl a, thlan chhiain min lo bual huh vek thin.

Lung bangin min hliah deuh a, chu chu ka vanneihna a ni. Sakei sual chuan min rawn zuan nghal a, tlemin ka kun hman hlauh bakah, silai muin a deng fuh nge ni, a tum angin a zuang thei bik lo a, ka silai hmawr erawh chu a ke hnung lam chuan a rawn pal a, hum nghet zo hek lo, thlang lamah a leng thla lawp mai a, a kawm lei deng zawng, a kua van lam hawiin, ruang awmna bul lawkah chuan a leng thla nawlh a. Rifle-in lei a thlen hmain sakei sual chu a tla thum dup a, vawi hnih zet a inbin leh a, a rum pawh a rum tawh lo, kawrhte chep zet chu a tum aia hmaah a thleng thla a.

Thil thlen dan chu a rang em a, ngaihtuahna hman zui dan tur pawh ka hre meuh lo. Ka hriat chhuah hmasak ber chu hmanrua ka nei lo a, kut lawngin ka awm tih hi a ni. Sakei sual chu min rawn beih tumin a lo let leh ang em tih chu ka rilruah a lo lang nghal a. Rifle la tura ruang awmna lam pan lah chu a hlauhawm lutuk. Hliam tuarin kawrte kam leh lam, hnim buk karah a tawm pawh a ni thei, chet lak dan tur chu ka hre lo a. Thih leh thih tiin silai awmna lam pan chuan, a biling a balangin ka tlan a. Sakei sual chuan rum chunga min rawn beih ngei ka ring a. Mahse, ka hlauh ang chuan engmah a thleng lo. Rifle chu chharin, a hmaa ka tan hmun lung bang panin, bak lengin ka phe leh nghal a. Mit khap kar lek a ni nain, rei ka ti tak zet a ni.

Ka silai chu ka en chiang thuai a, ka vannei ngei mai, chhia engmah a awm lo, a tlakna lamah a kawm a insawh khem deuh tih mai lo chu. Rang takin mupui dang ka thun leh nghal zat a. Sakei sual kha ka kap fuh nge fuh lo pawh ka hre lo, khatiang khawpa hnaiah ka thelh a nih chuan a nuihzat thlak loh khawp ang le. Lung bang bul, ka dinna sirah chuan thil engemaw tak hian ka mit a la riau mai a. Ka chhar a, a la lum deuh vat vat a, ka’n enchian chuan sakei beng a ni tih chu a chiang reng. Thisen a kai meuh lo tih ka hmuh chuan lungawi lo tak ka ni. Kha tih laia ka rilru put hmang kha, hmun sawma thena hmun khat pawh ka sawi thiam lo. Hmai si dawnin kan inhma chhawn a, silai kap thiam leh kap thang inti tak hian, hliam tak ngial pawh hliam loin ka thelh a nih chu. Ani chuan a bengah hliam chhe te tuarin, ni hnih thum hnuah a dam leh mai dawn. Amaherawhchu, ka chet dan nuihzatthlak loh tak avang hian ruang kalsan tawh, a kuang bang zut nawn tura let leh that lohzia chu a zir chhuak ve ngei ang.

Thil tha lo tak pakhat chu, he thil thleng avang hian a fing phakar leh zual dawn a, chu vang tak chuan a hlauhawm leh zual dawn tihna a ni. Mihring a seh hlumte chu tukthuan atan emaw, zan riah atan emaw, a theih tawpin a ei nghal ang a, a kalsan tawh dawn a ni. A ril a tam leh hunah a sa seh ruang awmna pan tawh loin mi dang seh tur a zawng tawh dawn a. Tun hma zawng aiin mihring a seh ngun tawh dawn. A bial pawh a zauh ngei ngei dawn tih ka ngaihtuah chuan anchhia ka inlawh mawlh mawlh a. Beisei ngam si lo, beisei ru deuh chungin, ‘a lo let leh mahna’ tiin ka inralring ve reng a. Khua a lo var chuan he hmuna min hruaitute kha an lo thleng ve leh a. Thingpui sa ver vawr leh chhang tharlam taka inhnawh puarin, vaihlo ru khak mai chu vai belah ka’n beng a, chawlh hah dam pahin ka zu ta veng veng a, ka hahdam huaiin ka hre nghe nghe. Ka lung zawng a awi thei mawlh lo. Mahse, tlema tlemah ka thi thelh a, hlauhawm thleng tur hriat lawkna chhawr tangkai lo ila chuan sakei sual khan tukthuanah min hmang ngei awm si a tia ngaihtuahin, ka inhnem ta vel mai mai a. Ka lungawi loh rual rualin ka lawm ru ta phian a.

Sakei lumna chu kan pan a, thisen far hmuh tur a awm ring lo chung chuan ka mit ka len ru ve reng a, ka rin ang ngeiin thisen far hmuh tur reng a awm lo. Hmai chhan titiha kan han in hmu phut kha kan phu nasa dun bawk a, kan tum kan hlah ve ve a ni ber mai. Ani chuan engtin mah min hliam lo a, kei chuan a beng ka kah hek sak kha maw, tiin, ka che tha zawkah ka ngai a. Anchetty khuaa ka hlawhchham dan han sawi vel chu ka chak lo ngiang mai, chu tah, Gundalam-ah sawi a ngai leh ang a, zah khua a sei dawn lutuk. Anchetty khaw mipuiten min lo thlamuanpui ve em em laia kut benga ka hma chhawn tur chu ngaihtuahin ka zak ngawih ngawih a, tlan bo daih te ka duh rum rum hial a ni.

Gundalam khuaah chuan ni sawm dang ka cham leh a, ka cham chhung zawng chuan tawktarh atana ka hman, lawi pa tuai pathum chu ka thlung kual ngun ngang mai, beiseina chhete bak ka nei lo a, ‘vanneih thil thuah a to mial mahna’ an tih ang deuh kha a ni awm e. Sakei sual hnu hma thar hmuh tumin ka nileng thak thak reng a. He lai ram bial vel chu ka luh chhuah ngun hle a ni. Chhun lamah chuan pawl hrang hrangah inthenin, sakei hnu hma thar hmuh tumin pa ho chu an feh chhuak thin a, mahse, kan hah thlawn a ang khawp mai. Zan lamah chuan tui tlan tur awmna hmun hrang hrangah ka insuan kual reng a, ramsa tui halin an tlan duh awm deuha ka ngaih chu hmaih ka nei lo reng reng, tuitai putna hmun leh sih pawh ka fang chipchiar em em a. Theih tawp kan chhuah chung pawhin sakei sual hnu hma engmah hmuh tur a awm lo. Mi dang tumah a seh thawm hriat a la ni lo bawk. Thil pakhat ka rilruah a lo lang hlawl mai a, sakei sual hian he lai ram hi a him tawk lo tih a hria a, hmun him zawk, a chanchin la hre lote chenna lamah a inthiar fihlim a ni ngei ngei ang.

Ni sawm pakhat zet kan vah vaih hnu chuan Gundalam chu chhuahsanin, Anchetty khua atang Denkanikota khaw lam panin ka chhuak leh ta nge nge a. Heta tang hian Hosur khua ka pan leh a, ka thian, chhiahkhawntu hnenah kalin ka thil tawn chu chipchiar takin ka hrilh fai vek a. Ani chuan sakei sualin thawm a rawn neih veleha hrilh nghal min tiam a, tih tur dang ka nei tawh lo. Helai ram vela cheng mipuite himna chu ka mawhphurhnaah ka ngai nghet tlat a, Bangalore lama haw pawh ka chak loh phah hial a ni.


Thla nga a liam leh meuh chuan, ka thian, chhiah khawntu hnen atangin lehkha thawn vawi thum ka dawng hman a. Coimbatore District huam chhunga Cauvery luipui ral hla deuh takah mihring seh ching a inlar tih te, chu ai maha hla zawk, Mysore State huam chhunga sakeiin mi a seh chanchinte a rawn tarlang a. A lehkha hnuhnung bera a rawn sawi phei chu a hla tak a ni.

Boruak muanawm taka a kal zel lai chuan ka hlauh ang ngeiin, a tawp a tawpah chuan chanchin tha lo ka dawng ta nge nge a, rei a awh loh hram ka beisei. Kan sakei sual chu Gundalama khuaah lo lang lehin, amah vanga thi chu pariat lai an ni tawh a. Lehkha thawn ka dawn hnu lawkah chuan Sulekunta khaw puithiam, upa ve tawh tak, Temple-a cheng chu a rawn seh leh ta mai a. A huangtau sawt dan hi pui tak a ni. Hetianga ngampa taka a khawsa chho zel tur hi rang taka tihtawp a nih loh chuan nunna tam tak hloh a ni dawn tih chu a chiang reng. Hmanhmawh taka Sulekunta khua pan turin min rawn ngen leh ta a.
An sawmna hmanhmawh tak mai chu a tul lem lo niin ka ngai. A chhan chu, he sakei sual bei leh tur hian ka inkau reng a, a rukin ka inpuahchah reng a, sawmna ka dawn atanga darkar hnih pawh a ral hmain Jowlagiri pan tur motor-ah chuan ka thu fel than tawh a ni.

Vanneihthlak takin, kan chuanna motor-ah chuan, Sulekunta khaw puithiam chunga thil thleng, mit ngeia hmutu chu a chuang ve a, chipchiar takin thil thlen dan chu min hrilh a.

Patling rual khat hian sakhaw serh leh sang thilah Sulekunta khaw daia Temple tlawh tumin an kal a, Temple an thleng tep tihah chuan, aw hniam leh thum taka sakei ngur thawm an hre thut mai a, an piah lawka bungpui kung bula sakei lian tak zuang zawk chu an hmu bawk a. Sa himna zawngin, a rang a rangin Temple-ah chuan an tlan lut thuai a. Temple ruak huai mai leh luahtu awm lo an han hmuh chuan mak an ti ngei mai. An han hawi kual deuh a, an thil hmuh chuan a barakhaih hlawm hle a ni. Bungpui kung chu an hma chiahah a ding luah a, hlau chung chung chuan thisen chhuahna hmun, bung kung chu an hnaih hret hret a. Piah deuh lawka puithiam putar ruang, thisen nena inchiah nuai mai chu an va hmu ta hlawm a. A landan chuan, sakei hian Temple-ah puithiam chu luh chilhin a hnuk chhuak a, zan riah atan hman a tum a, a awm ti tha lai pawh tlem a zawng chu a ei hman a, chutihlai tak chuan biakzin rual khat hian an phawk ta niin a lang.

Uluk taka a thu sawi ka ngaihthlak hnu chuan sakei chu an hmu chiang em, a beng a hek em, tih leh zawhna dang dang ka zawt a. Khatih hunlai khan hlauh luatah an chiai nasa lutuk a, sakei pianzia pawh chiang takin an sawi thei lo a ni awm e.
Ka hnung zuitu mi pathumte nen chuan hmanhmawh takin Sulekunta khaw lam panin kan kal zel a, tlang kawng chhuk chho bum boh tak, kal harsa khawpa raw tamna hmuna kan inzui diah diah chu sakei sual khan min hmu a ngem tia ngaihtuah chung zelin hma lam kan pan zel a. Thil dang lam deuh hriat tur leh hmuh tur kan tawng lo. ‘Marawhchu, piah deuh a sai rual tlan thawm kan hria a, khual zin then khat chu sai ho hian an umin an tibuai fo thin a, sai sual chet dan ngaihnawm tak tak sawi tur pawh a tam khawp mai, mahse chu zawng, kan thupui ber a ni lo.

Khua a tlai chho zel a, riahna tur buk mumal kan khawr hman loh avangin Temple-ah ngei mai chuan riah kan tum ta a, tum dang ang chu ni se helai hmunah kher hi chuan kan riak hauh lo ang. Mahse, duh thlang thei din hmunah kan ding lo a, zan thim hnuaia kal ai chuan, meipui chhep hluah ila a him zawkin kan ring tlat a ni. Ka silai mu chu uluk taka thunin, inring tak chungin ka thiante chu ka veng a. Rang takin anni chuan thing tum an la khawm zung zung a, mei an tuah alh nghal a, mei eng hi taksa lum nan mai ni loin, ramsa hlauhawm laka min vengtu tha tak a ni a. Thla a lan loh avangin meipui chu a tangkai dan a thuah hnih hle nghe nghe a ni. Hetiang kara sakei sual pel chu a hlauhawm rual rualin hlawhtlin a beiseiawm lo a. Rei lote hnuah chuan kan meipui chheh chu a alh ta hluah hluah a, meiin a en phak bak erawh chu thim chhah tak a ni thung. Thim chhah karah chuan kan ramsa sual chu khawiah emaw a awm ngei dawn a. Kan piah deuha sakhi hawk dar dar thawm leh sazuk hram thawm chuan hlauhawm a hnai lem lo tih a entir a, ngaih pawh a ngam ta deuh.

Zanlai atang chuan pawl hnihah insiamin, darkar thum dana ral ven inchhawkah kan ti a. Ngaih that lohna turin engmah a thleng lo nain, fimkhur luat a awm lo kan ti a ni. Tin, kan piah deuh hleka sai rual lakah pawh kan inven a ngai a, an thawm lah chu a lo hnai deuh deuh niin a lang. Zing khawvar hma, dar hnih velah chuan sakhi pakhat hian ralkhel thawm a rawn chhuh a, mahse, thawm hriat tur a awm chhun zawm loh takah chuan, keite vak velin a thawng harh a nih ka ring a. Zing dar thumah chuan ka thuihhruai pahnihte chu ral veng turin ka kai tho a, ka chau deuh nge ni ka muhil nghal bawrh bawrh a. Zing ni chhuak chibai buk nana ram arpa khuang chuan min kai tho thuai a, han mut belh leh deuh sak chu chakawm tak a ni.

Thingpui sa ver vawr leh chaw tharlam tak kan ina kan han ei meuh chuan kan harh sawng sawng a. Bungpui dinna, puithiam putar ruang an hmuhna hmun chu chik takin ka fang kual a. Chhun lamah mulukawlh rualin, zan lamah chinghne ko ham rualin puithiam putar ruang chu a dit fai hneh ngang mai. Ruh filh theu thua tih mai loh chu hmuh tur dang a awm lo. Puithiam putar hian he Temple hi kum sawm li chuang zet a lo enkawl tawh tih chu ka hre chhuak zawk a, ka lainat hnu hnawh hle a ni.

Darkar khat zet zawt chu sakei hnu hmuh tumin kan tei kual a, hnu hma thar hmuh tur a awm lo a, rei deuh tawha hnu hma erawh kan hmu thung. A hniak hnu hlui atang ringawt chuan hmana sakei sual, hmai si dawna ka tawn kha a nih leh nih loh ka fiah thei mai lo a. Zing dar kua a lo nih meuh chuan, mel sawm hnih pathum zeta hla, Gundalam khaw panin kan chhuak leh der tawh a, kan tha a tha tlang bawk a, tlai dar nga velah chuan Gundalam khua chu kan lut hman der a ni.

Ka innghah fel veleh sakei sual chanchin chu hriat chian tumin tual chhung mite chu thu eng eng emaw ka zawt kual a. Ran rual vengtu pakhat, sakei sual nen kan intawn tum a, tawktarh a tana ka hman, lawi pa tuai buaipuitu khan, a hriat ang ang chu chichiar takin min hrilh zung zung a. A thianpa, ran rual vengtu ve bawk nen chuan an ran rualte chu uluk takin an kilkawi a, a thianpa chu inthiar turin a kal a. Tichuan, keipui lian zet mai, beng leh lam bul chuan zahngaihna tel miah loin a lo khuai nuai ta a ni. Chu pa chu vawi khat chiah a te chhuak a, a hrawkah nghet taka a seh avang chuan thawm dang chhuah zui loin a thi nghal a ni awm e.

Hriat ka hlauh ruk tak, hriat chian ka duh em em bawk si chu ka hre ta. Tu dang a ni lo, ka hmelma hlun ngei kha a ni tih chu ka chiang a, a tawpah chuan a lo let leh ta nge nge a nih chu, ka lo rin ang ngeiin. Tun hma zawng aiin a fing phakar tawh a, chu pawh keimah vang. He sakei sual hian lawi emaw, bawng emaw a bei ngai lo a, lawi tuai tawktarh hmanga thlem chhuah tum chuan awmzia a nei lo a, hun khawh ralna mai a ni. Tun hma ang deuha kan intawng leh te a nih ngawt loh chuan ka hmelma pa chan hi a tha zawk a. Tichuan, inpawmchilh huamin, hnu hma thar hmuh beisei tak chungin ka hnu chhui chu ka chhun zawm nghal char char a. Sakei sual hniak hnu chu hmun tam takah ka hmu a, a bik takin Gundalam luipui kam velah chuan hmuh tur a tam zual a. Thla nga liam taah khan kap fuh ni ila chuan, mi panga zet hian nunna an chan dawn lo a ni tih chu ka ngaihtuah a, tlawm taktein ka tlawm a ni. Phuba zawng ka la dawn khawp mai.

Ni thum ni, chhun lai hawl velah chuan Jowlagiri, mel sawmthum zet a hla atangin zualko an lo thleng hlawl mai a. Jowlagiri khuaa Forest Bangalow vengtu, a ruang chanve zet sakei sualin a ei thu an an rawn thlen a. Nimin maia thleng a ni nghe nghe.
Sakei sual chuan Gundalam emaw, Sekuntala khua emaw, a rawn pan leh ka beisei ru ran a. A chhan chu, hmelma pa hian mihring a seh zan bak chu a awmna ngaiah a awm duh tawh lo a, hmun dangah a inthiarfihlim nghal hmak zel a ni. Ka hnung zuitute leh zualkote nen Jowlagiri khaw lam pan chuan hmanhmawh takin kan chhuak nghal a. Zualko kalte hian mel sawmthum panga zet chawlh lai lawk awm loin an lo tlan thleng thak a. Anmahni chauha kir leh aichuan, kan ruala let leh chu an duh zawk a. An hah khawp ang le.

Tlai ni tlak dawn ruaiah, Sulekunta khaw dai fema Temple chu kan thleng leh a, khua a thim takah chuan, a hmaa kan tih dan ngai bawkin ral ven hna chu kan thawk leh a, a hma aiin kan tam tawh a, patling sawm pahnih rual zet kan ni a, thla pawh a muang deuh zawk.

Leng len hun vel atang chuan piah deuh, mel chanve vela sakhi leh ramsa thenkhat chuan a khat tawkin ralkhel thawm an rawn chhuah zauh zauh reng a, keipuiin a kawppui tur zawnga rawl a chhuah ri pawh hriat tur a awm a. A hnu rei vak loah chuan, kan bul hnai lawkah sakei thawm chu kan hre leh ta mai a. Tui taka mut chu a beiseiawm dawn lo tih chu a chiang leh ta. Keipui hian kan meipui chheh chu a rawn hmu a, mihring kan awm ngei a ni tih hriain, zan riah tui tak hmuh beiseiin a lo kal hnai zel ni ngeiin a lang. Kawppui tur zawnga awrawl chhuah reng chungin Temple chu vawi hnih a hel kual a, a ngur leh chhur chhur thin.


Ka vanneih chuan tun hun hi hun tha a ni dawn tlata hriatna ka nei a. Tichuan, sakei pa hram ang chiahin Sakei sual kohna chu vawi hnih ka chhang ta a. Chhanna pawh kan hre rang khawp mai. Fimkhur taka ka tih loh chuan kan zavai atan a hlauhawm dawn a. Ka hnungzuitute chu ring tak taka tawng turin ka hrilh a. Sakei sual ril tam leh kawppui mamawh em em chu, khawvar kan nghah chhuahpui theih hram ka beisei, thing tuah tur lah chu kan nei tlem tawh ang reng viau leh nghal.

Khawvar hma deuhin vawi khat chu kawppui tur zawngin rawl a chhuah leh a. Lei lung a lang thei ta maw tihah chuan, rang takin Jowlagiri khaw lam hawiin ka chhuak nghal a, ka awmna atanga mel chanve velah chuan thakthing kung lian deuh tak a ding a, he lai hmun hi rawlthar pakhat, kum kal taa a sehna hmun kha a ni. Thakthing kung chu tan hmun siam nan a rem chang dawn hlein ka hria a, ka pan ding nghal nalh a ni.

Thing awmna chu him takin ka thleng a, feet sawm pahnih vela sangah chuan hmun rem tak, hahdam taka thutna tur a awm hlauh bawk a, kan hawi vel a, khaw thlir pawh a remkhawp mai. Ka hnuaia kawng chu thui tak a hmuh theih a. Ka inpeih ta ngei mai.

Muang changin, ka chuapa leng theih tawkin boruak chu ka’n hip lut raih raih a, sakei awrawl ang chiahin, keipui sual, ril tam leh hur chu ka ko leh ta a. Chhanna reng a awm lo. Ka ngaih chu a tha lo tan deuh a, khawvar rual khan hmun him lamah a lo inthiar fihlim daih pawh a ni thei. Temple velah khan a la biru anga, kan zinga tu emaw ber chu chhinchhiahin, pawna a lo chhuah hun a chang anga, tuk thuan tui tak a beisei pawh a ni mai thei bawk. A nih lo vek chuan, piah deuh lawkah a dang ro hnawn tumin tui hmun a pan a ni thei.

Sakei pa aw rawl hmang chuan keipui chu ka han ko nawn leh a. Chhanna hriattur a awm chuang lo. A tam thei ang ber boruak hip lutin ka ko leh a. A ringin, a fiah fai tha khawp mai. Ral atangin keimah ngei pawhin hria ila, sakei pa rawl ngei a ni ka tih ngei ka ring. Danglamna a awm lo. Ka kohna chu hlawhtlingin, chhanna ka hmu ta, Temple lam atangin. Ka awmna lam panin, kawppui thar tawn ngei tumin a lo hnai zel a. Rei lote hnuah chuan keipui chu ka han ko leh a, rang takin a rawn chhang leh nghal zat a. Ka awmna lam panin a lo hnai zel tih ka hriat chuan ka lawminka phur ngei mai.

Vawi hnih dang ka han ko leh a, a chhang ve ve. Pen zahnih vela hnai a lo thleng tawh a nih hmel. Ka rifle chu uluk taka lekin, thawm lo chhuahna lam chu ka en reng a. Second sawmthum ral hmain a lo thleng ngei ngei dawn tih ka hria, ka chhiar tan nghal a…. 1..2..3..4..5 ka chhiar chho zel a,..27 ka thlen rual chiah chuan ka hmelma hlun chu a ze ropui tak nen, ka hmaah ngei chuan a rawng lang hlawl mai a. Kawppui thar tawn ngei tumin a mit a len vel ruai bawk a. Ka awmna thing zar atang chuan a beng leh lam bul tut pawh chu ka hmu chiang ngei mai. Hai rual a ni lo. Hun kha leh chen thi leh thau pawlha ka lo zawn ka lo zawn, mang ang leh zak taka min siamtu chu ka zahngaihna hnuaiah a kun ve ta. Tun tumah hi chuan tih sual a thiang tawh lo hrim hrim.

Hma lam pana a kal zel tur tihdin nan, hniam leh thum takin ka ngur ta chhar chhar a. A ding nghal chawt a, chutih rual chuan makti leh hrilhhai takin chung lam chu a rawn en chho nghal ho a. Ka rifle pawh a puak nghal thuai a. A chiang ngei mai. A mit leh mit inkar, a chaldarah tak mai chuan, .405 ngen mu chuan a deng nghing lawih a, hma lama zuan tum niawm tak hian a lang a, chutah, mupui bawkin ka han nawn leh sak a, pen khat pawh a pen leh lo a, chal chang pawh a nei hek lo. Sakei phaw zawngho chuan a mu hnihna hi chu tul lo an ti viau ngei ang.

Jowlagiri Sakei huai, nun rawng leh tual thattu chu, tho leh tawh lo turin, mualpho taka a let hut mai ka han en chuan ka khawngaih lek lek a. Ka chet dan kha infiam mi tih atan a mawi lo deuh riau a hriain ka inthiam lo deuh hlek a. Mahse, nu nau pawi sawi lo nunna a lak dan te, puithiam putar a nghaisak dan ka ngaihtuah chhuak thuai a, ka inthiam lo lem lo.

Sawi tur a la tam khawp mai. Sakei huai che lo chang loa thal hual mai an han hmuh meuh chuan, patling sawm pakhat zet chu hlim leh lawmin a zuang zawk zawk mai a, an hmel hmuh a nuam ngei mai. A ke hnung leh hma chu phuar kawp ve vein, mel sarih zet a hla, Jowlagiri khua chu kan pan leh ta a ni. Sakei huai tihhlum a nih thu hi tumahin an la hriat loh avangin kawng lakah tumah hmuh tur an awm lo a. Khaw chhung kan lut a, sakei huai ruang an han hmu chu an lawm em em vek a, chanchin pawh a darh chak ngang mai. Hun kha leh chen mangang taka awmtirtu, an hmelma pa che lo chang loa a let bul mai chu deuh sawh leh hmusit takin an en a.

Piah deuhah chuan thingpui sa ver vawr ka in a, chaw ka han ei leh meuh chuan ka harh huai a. Tichuan, hun rei tak ka lo veh tawh, pawi sawi lo nunna tam tak latu ka tuk zal a, phuba ka laksak tih ngaihtuah rauh rauh chungin, lung muang takin in lam panin ka haw ta a ni.


Author : Hlimtea Tlau

12 Feb. 2017

Advertisements
Aside | This entry was posted in Thu Ngaihnawm, True Story and tagged , , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s