Karen

  • Thisen cancer chunga Pathian neitu chu.
  • Thluak chhe vek chunga chibai buktu.
Doctor ka zir zawh veleh Damdawiin pakhatah Internship tiin Paediatric (naupang) Department- ah ka awm nghal a. Zir zo hlim hlawt ka ni bawk a, a thu (theory) chuan ka hre êm êm a, amaherawhchu, a taka damlo enkawl chu ka la zei vak lo. Intern-ni awm reng ka ni.

Ka damlo enkawl hmasak ber, tun thlenga ka la theihnghilhtheih loh chu a hming Karen-i a ni a. Ani chu North California damdawi in te tak tê atanga an rawn refer a ni. An rawn refer chhan ber pawh a thisen a tlem êm êm a, a chau hma bawk thin. Amah ka hmuh hmasak ber pawn’ mipangngai lo tak a ni tih ka ring nghal a. Ka hmel leh ka kawrchung var avangin a ka bulah chuan a zâm chuang lo. A rilrua awm apiang a rawn sawi chhuak zung zung a. A natna chanchin ka zawh lai chuan Intern mai ka ni tih a ni chuan a hria a ni tih min hriattir a tum hle a. Kum 14 mi, nun nuam ti ve tak a ni.

Vanduaithlak takin a thisen kan test sakna result chu duhthusam a ni lo. Thisen cancer chikhat vang deuh mai, thisen cancer damdawi pangangaia enkawl ve theih loh chi a lo ni hlauh mai a. Kan chhût danah chuan kumkhat aia rei a dam a rinawm loh a ni.

Thisen cancer damdawi chemotherapy chu kan pe tan ta a. A damdawi chu a hneh lo hle a, hneh lo hle mahse a intipachang êm êm a, a awm dan chu a sawi thin. A tawng chaltlai lova, hrehawm a tih dan chu inthlahrung takin mi a hriattir thin. A thisen zâm chu vih fuh theih loh châng kan neih pawhin tha takin a dawh mai a, a sawisel ngai lo. Vawikhata kan han vih fuh phei chuan a lawm avangin lawmthu te min hrilh zawk thin.

Vanneihthlak takin a damdawi chu thla 3 a lak hnuah a rawn tha leh tan ta a, a thisen ah chuan a natna chu kan hmu zo tawh lo a. Mahse a damdawi chu lak a ngaih reng tho avangin kan inhmu ngun a, thianah kan insiam a, kan hlim thin khawp mai.

A natna kan hmuhchhuah atanga kum 1 hnuah a thisen cancer chu a rawn inlar tan leh ta a. A natna ang chi hi chu tihdam hlen harsa chi a ni reng a, a lo lan chhuah leh chuan a hmasa ang bawkin a bul atangin damdawi pek that leh vek an ngai thin.

Hemi tuma an lo kal pawh hian damdawi chu kan lo pe leh a, a hmasa ang bawkin reilo te hnuah a hrik kan hmu leh ta lo.

Ka thawhna ber a nih tak avangin inkawmna hun kan nei tam a, fiamthu a duhin min ti hlim zawk zamah thin.

In lamah thla tam an inenkawl hnuah kan hospital ah bawk chuan an rawn luhpui leh ta a. An rawn luh kartawp hi ka hnathawhna hospital ka thlak hun a ni nghe² a. Karen-i nat dan chu tunhma kha a ang ta hauh lo. A cancer chuan a thluak atanga a thisen zunzam thlengin a fan chhuak tawh. Inzai emaw inhem ai chuan nuam taka hahdamtir chu kan pu te ngaihdan a ni ta.

Ka duty chhungin karen-i chuan min boralsan mai ang tih ka hlau a, ani lah a chau tual² mai si. . .a thawk dan te ka’n bih chiang a, a thawk dan a pawnlâng êm êm mai si. A hnuk chu a lo chat tep tawh a ni. Ka duhthusamah chuan zing ni chhuak hmu leh hman hram se ka ti hle.

Hnathawh tur dang a tam avangin ka chhuak a, reilo te chawlin ka room ah ka thu a, chutihlai tak chuan nurse pakhat hi hmanhmawh takin a rawn lut a. Karen-i a ni ngei ang tiin ka tlanphei thuai a.

Ka va thlen chuan nurse chuan min lo bia a, “Karen-i’n a be duh che,” a lo ti a. Nurse chu a â ta emaw ka ti hial hman. .a chhan chu maw, karen-i nikhaw hre tawh lo chuan engtin nge min biak theih ang ka ti rilru a. Kan thiam bâk, kan theih bakah kan zir bâk leh kan hmuh bâk ah thilmak a thei a ni tih hi ngaihtuah nachang ka lo hre miah lo a lo ni.

A room ah chuan ah chuan ka va lut a, mak tak maiin Karen-i chu harh tha pangngaiin a khum chungah chuan a lo thu chhuak a. A bulah chuan dingin a kut chu ka vawnsak a, a ni chuan, “Pathianin min ko ta, ka kal tawh dawn a ni,” rawn ti chhuak chungin a nu leh pa leh kei, room a awm zawng² chu chibai min bûk ta vek a. Ni theiin ka hre lo, CT-Scan ah khan a thluak pawh a chhe vek tawh tih Chiang takin kan hmu si a, engtin nge hetiang hian a la awm theih? mak tak a ni.

Min chibai vek hnuah Karen-i chu mut a tum ta a. A mu fel zet zawt ta emaw kan tih hnuah a rawn tho leh a, ka kut chu nghet takin a rawn vuan a, Pathian chu kan zingah hian a awm asin. In lo hmu ve em? In hre ve em? a rawn ti a. Kei chu hlauvin ka lo khur ru deuh hlek a. Chutiang boruak chu engtik lai mahin ka la tawng ngailo a ni. CT-SCAN result mawlh mai kha ka mitthla ah chuan a cham a, sawi tur ka tlachham chiang kher mai!! A hnu lawkah Karen-i chu a chatthla ta.


Author : Duhzuala Da Wizie Grag’g

(source : chicken soup 4 the soul)
Advertisements
Aside | This entry was posted in Thu Ngaihnawm, True Story and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s