Thianpa Vala nen by R Zonuna Rl

VALA PHAWT
Vala hi han hmelhriat ve phawt ula. Mi zawng zawngin Vala tiin kan ko vek a, a hming dik tak hre lo an tam mai. Tet naklaiin sa a nei lo lehnghal a, pate ve tak a ni. Zuruih changa tah vak lah a hrat ve phian leh ta nghal a! Mahse huaisen zet mai a ni thung. UPC a ni a, fiam erawh a haw lo. Khawikipah pawh kan inzui a ni ber mai. Kei ka lian deuh theng thung si a, kan inhmeh vak lo. Ani nen hian kan inkawp nasa a, kan thil tawn dun tlem ka’n tarlang ang e.
—————.
ARH HAK HAK
Ram lam nuam timi kan ni a, sa lah kan la thei dun. Vawikhat chu kan la tleirawl deuh laiin dai hnaiah Airgun nen Hmawng rah tlan sava kan chang a. A kakpuiah kan thu dun vang mai a. A hnuai chu zawl nuam tha angreng tak hi a ni a. Kan thatchhe dun khawp a, a tla chhar hian kan chhuk sek peih ngai lo. Chawhma kan kap a, chawfak pahin a tla kan chhar a. Kan kap chawhnu leh thak a, haw pahin kan zawng leh thin. Kan thatchhiat aleiah kan hawn tam loh phah fo reng a ni

Hemi tum pawh hian chhunlai, sava reh lai chuan, “Chhuk tawh i la, ka ril pawh a tam tawh,” ka ti a. Ka ti zo chiah chu chhak lam atang hian engemaw hi a rawn ri thla rawk rawk a. .22 miniature ka keng tel thova, sakhi a nih ringin ka lo inring hle mai a. Mahse sakhi a ni lo nasa mai. Tlangval pakhat hian nula pakhat hi a rawn kai thla a. Nula chu a tang kal dat dat mai a! Kan thutna atanga lang chiang lai ber kherah chuan an thu ta a. An tawng ri chu kan hre naa an sawi tak erawh kan hre thei lo. Anmahni pawh kan hre reng a. A mipa zawk chu ‘Luaithli’ tiin an ko thin. A naupan laiin a tahbelh thin a ni awm e. Mahse a ngam deuh lo chuan an ko mai mai ngai lo; a haw lutuk..Rei vak lo an thut hnu chuan an infawp ta vel a. Nula phal vak lo chung kha a hnute a khawihsak bawk a. Ngawi rengin kan en ran mai a, sava lo lut pawh kan kap ngam tawh lo. Chutah mipa chu a inphelh ta. Kekawrte nen chauh a awm a. A kekawrte lah chu a tlang elastic a rul deuh a niang, a arh lehnghal a. A hmeichhia zawk tih a tumdan chu inzawh buai kan ngai lo dun. Nula chuan a duh si lova, a puan chu a phelhsak thei mai a, a dang kha chu a thei lo a ni. A bawh bet a, nula bawp lah chu a kual reuh phian lehnghal.

An tang dun ngang mai a. A mipa a han tan deuh tak tak khan a kekawrte tlang chu a arh deuh hak hak ta thin a. A tan poh leh a arh nasa kha a ni mai a. A arh ka ti naa a parh emaw ni zawk ni? Chu tak mai chu kan nuih hi a za mangkheng a ni mai! Nui ri ngam si lo chuan kan kun ngat ngat mai a. Vala phei chu a ngo si a, a sen vek tawh. Mipa chuan a mawng khan a han nawr deuh thin a, a rawn arh leh hak hak zel a!.Insum a van har tak em!! Enthlak boruak ringawt pawh nuihzatthlak a nih nak laiin nui rik ngam loh kha tawrh a har a ni. Vala insum nasa lutuk chuan a ipte hruite kha a kaah te a hnawh vel a; a hnapte a dawk thul. Chu chu ka tan nuih tiza zualtu a ni zel si a. Keia pawh chuan chilthlite kha ka thlauh ve ta duah duah a! Ka chilthli thlauh chuan a ni nuih a tiza zual ve zel bawk a.

A mipa zawk tan leh tan loh chu a kekawrte tlang a arh nasat leh sat loh atang khan a hriat vek a. Chutah a han tang tak tak mai chuh… arh tha hak hak tak mai hi a nia. A parh hian a rawn parh hawk hawk a ni ber e!.Tichuan le, Vala insum nasa lutuk chu a hmai sen kha a rawn duk deuh a, tin, zun a cheh ta mai a nih chu!! A zung ta tluah tluah mai a! A zun dir thla chuan leia hnahthel ro chu a deng ri thla ta tluar tluar mai a. A ri chu hai rual ni heklo le, insual mek emawni te pawh chu an va’n tho rang tak em! Chunglam pawh rawn en lo chuan an thawmhnaw an la sawk sawk a, baklengin an tlan chhe ta a nih kha.

An liam hnua duhtawka nuih kha a va han hahdamthlak sawng sawng tak! Kan chhuk a, chawhnu lamah chuan ka lawn thei tawh lo; ka zawi vek tawh. Kan haw ve ta mai a ni. Kekawrte tlang arh hak hak hmuh chu a manhla ngei mai.
——————–.

SAVAWM INKARAH
Kan tlangval tak tak hnu chuan Vala nen chuan kan inkawp fo thei tawh lo. Ram lam ka ti ve hman lutuk tawh lova, a chang chang a ni mai. Ani chu a ramvak reng a, a sa kah sa erawh ka ei ve ziah tho. Chutih chhung chuan kei chu 15kg vel laiin ka lian hman a. Vala chu tlemin a sang ve deuh tih loh chu a ngai reng a ni..Tum khat chu len den kan tum a. Zingah kalin Vala chuan silai a keng a, keiin len ka ak a. Thui fe kan kal tawh tih chuan chuan kawng chhak thingkungah hian Savawm hi a lo awm nual nual mai a. Vala chuan, “Ka’n kap ang e. Kawngah tak a rawn tla dawn a, chhar a nuam ting a ni mai,” a ti a. A tin vang vang a, a kap chu silai a puak lova, a ri khet chauh a. Silai puak chuang si lo khan Savawm chu a rawn tla ta tho mai bawk si; kawngah tak lehnghal! Kan lam panin a rawn kal chho ta!.Vala chuan, “Tawlh kir rawh, rawn hnai deuh se ka lo kap mai ang,” a ti a. Ka kir chhova. Thui ka tlan hma chuan ka chhakah chuan a rawn ri thla buan buan a, kawngah chuan Savawm dang a rawn chhuak leh hlawl mai a! Kawngah chuan a rawn chhuk ta mai bawk si. Vala kha ka thlang deuhah awm turah ka ngai a, silai a kap puak har ka ti khawp a.

Chhak lama Savawm chu a rawn chhukthla ngut ngut bawk si. Vala kha a silai mu a tan avangin ka hnung chiahah a rawn tlan ve tih hre hek lo i. Ka tlan let leh chuan ka hnung chiaha ani lo awm chu ka’n palzut thla ta a nih kha. A ri no chawk mai reng a. A che tawh lo reng reng. Ka’n hawi kual a, Savawm chuan min lo karcheh tawh lo hlauh a. Chhak lam atanga lo chhuk zawk chauh kha ka hmu ta a. Ka mangang chuan kawngsira mau ro chu chemin kan khawng ri ta tak tak a, ka au chel chul bawk a. Savawm chu kawngthlangah a liam ve mai bawk a.

Vala chu kawngah chuan a let hlawm reng mai a, nikhua a hre lo reng reng. Ka kai harh zo si lova, kawrah tui ka zuk thal a. A lute ka leih huh a, awmzia a nei si lo. A tawpah a ka chhunga ka leih lut ta ringawt mai a, a lo tha viau mai. Tui chu a hak bawrh bawrh a, a rawn thu ta liau mai a. Ka lawm teh asin aw….Weight pui nilo chu inring ren rawn lo chuan insut mai mai chi a lo ni lo tawp. Len pawh deng lo chuan kan haw leh ta ringawt a.
——————

.”FIAMTHU, FIAMTHU…”
Ka tleirawl ngaihzawng hmasa ber a ni miau a, ka zah ngei mai. A pa lah kan veng pa zahawm ber pawl a ni. An chhungkua an zahawm hrim hrim. Inngaizawng e tilo chuan kan inhmu hreh thei ngang mai kha a ni a!.Tlai khat chu khawlaiah hreh chungin kan intawk a. Kan intawh lai chuan zawite hian, “Zanah rawn leng ula,” a ti sap a. “Aw,” ka tih chuan kan inpel fel vek tawh!

Zanah chuan Vala nen chuan kan thawkchhuak ta a. Huphurh tak leh chak tak si chuan kan kal ve tak sauh sauh a. An in kan va thleng a. An in hi kan la lut ngai lo ve ve a. A chhung eng uar si khan thawm pakhatmah a awm lova, an reh thap mai a. Kawngka leh tukverh zawng zawng kharin parda an zar phui vek bawk si. A lut hmasa tur chu sawi lohkawngka kik tur takngial pawh kan inhmu ta lo mai a! Varanda-ah chuan kan inhrilhru sek mai!

Vala chuan, “An reh e mai, chhung inkhawm an nei a ni lo maw?” a ti a. Ventilation atanga enthlak phawt kan tum ta a lawm le. An kawngkapui chungah chuan ventilation a awm a. Vala chu ka kokichhuan a, ka han kal hnai chu a lu chuan kawngkapui a pel awrh chauh ta mai a. An kawngkapui chu a sang chi a ni. Thawm dim a ngai bawk si a, a buaithlak hrep mai..Vala chuan, “Ka pheikhawk kha phelh rawh, i koki ah hian ka’n ding ang e,” a rawn ti sar sar a. A pheikhawk dinglam chu ka phelh a, ka keng a. Veilam ka phelh leh dawn lai tak chuan an uipa lian chuan hnung lam atangin min rawn bauh phut mai a! Tit sa nak laiin! Ka phu nasa lutuk chu hma lamah ka pai phei a, kangkapui chu ka va su ta a! Vala rihna nen ka su na viau mai a.

An kawngkapui chu a lo danglam bik a, pawnlam atanga nam hawn chi hi a lo ni a. Kawngka chu ka su hawng rawp a, Vala chal a ri bawp a, inchhungah chuan kan inkokichhuan lut ta rup mai a ni! Thih daih ka van chak tak! Ka lum pup a, ka bing mup mup mai.

Chutia kan lut rup mai chu ka bialnu pa chu a rawn ding hluai mai lehnghal a! Kan barakhaih hi a ni ringawt mai! Ngawi rengin an lo thu khawm mai mai lo niin. Ka kokia thuvang chung chung chuan Vala chuan, “Fiamthu, fiamthu, fiamthu,” a’n ti mawlh mawlh ngawt a! Sawi tur a vang em bawk a ni. Keia zak leh hamhaih lutuk chuan Vala chhuk tumte kha ka lo vuan bet tlat mai a ni awm e. Ka pheikhawk ken chu ka en ka en ringawt a! Vala zak lutuk lah chuan ka sam chu a tham na hle mai bawk a.

Mahse ka bialnu chu a lo fing hrep mai a. Nui vak vak chungin, “Awi, in van uang tak, lo leng ru, lo leng ru,” a ti chul a. An lo fel em em mai a, tha tak chuan kan leng ta a. Kei ve chu kan len chhung zawng khan ka pangngai thei pek lo. Ka ti tluan chhuak a ni ber e..Kha second nga lek kha rei lo hle mahse ziah tur a tam a ni.Ka kaitawi mai mai a nih khi.
_______________.
End of part 1
————
FAK-PUTA
Vawikhat chu kan khaw thenawmah football tournament aawm dawn a, kan veng chu kan inbuatsaih ve nasa mai a. Kei chu kan veng team captain ni thinin goal ka veng deuh tut thin a. Ka thiam em em lo naa ka chhuah zat hi chu ka save ve ziah a!! Thianpa Vala hi a te na vang vangin kan defence tha hmingthang a ni.

Pasarih field-a khel tur kan ni a, mi sawm kan practice a. Pasarih field a khel tur chuan kan tawk lenlawn viau mai. Mahse kan kal hma chiah ni chuan kan khawlhkham ta hlawm a. Pakhat chu a damlo. Pakhat leh chu ram riah a ngai thut mai! Pakhat leh chu Contractor hnuaiah inhlawhna tha tak a hmu hlauh thung! Kan buai ta.

Kal dawn zanah Vala nen chuan player zawngin kan veng chhung kan fang chhuak a, a beidawnthlak a ni. Substitute nei miah lova kal kan hreh ve tumhrang si.

A tuk zing kan kal tur chuan kan veng tlangval, kan enhniam deuh hi kan hmu a. An kawtah meizial a lo zu khu tulh tulh a. Inkhel ngai miah lo a ni. A hming dik tak chu Fakzuala a ni.’Fak-puta’ ti hlirin kan sawi thin, a haw lo. A hmel enin nui put put thin hmel pawh a pu viau mai, Nula zawng zawng hlauh a ni. A chhan chu a aw ring tha deuh hian khawi hmunah pawh mi an nihna ang anga sawi thin a ni.

Entirnan – Nula hang deuh chu, ‘Nang kha, i va hang rel rawlve…pasal i hmu zo dawn em ni,? tih te;’Nang hi i tawi si, i hmelchhe si,’ tih te a hrat a. Nula nazawngin khawlaiah an tawk mai mai ngam ngai lo. Fakputa bulah hi chuan nula hi an ti dai vek mai!

Kei chuan, “Fakput, i bialnu hluite khuaah kan inkhel dawn a, kan indaih si lova, i hman chuan lo kal ve teh a. Kan thleng dun dawn nia,” ka ti a. Fakputa hi chuan min ngaisang ve deuh a. Ani chuan, “Aih, min khelhtir ve leh chuang lovang,” a ti a. Khel ve ngei tura kan intiam hnuah a insiam sawk sawk a, kan hruai ta a. Hneh deuh khelh hunah luhtir ve ngei kan tum ruh hle a.

Ka intiam angin ka bulah ka thlentir a, Vala pawh a thlen hran phah a. Kan thlen inte chu an hulhar khawp mai. Fapa tlangval pakhat leh nula pakhat an nei a, chu zawng chu an ni. An nula lah a hmelthain a fel em em lehnghal.

Chaw kan ei lai chuan Fakputa chuan, “Behlawi hi tu bai nge?” a ti a. Ka hlauthawng ru nghal. An nula chuan, “Keimah,” a lo ti var a. Fakputa pek chuan, “I van bai thiam lo em em, tui lo lutuk. Hung hla ula, Alu kha ka bulah hian han hung teh u,” a ti ta lung lung mai a! A nakah ka va kawm ru a. Ani lah chuan eu zuk pahin, “Enge, a nia lawm, a tui lo alawm…” a ti bui bui mai si a!

Kan thlenin pa leh an tlangval chu an nuih a za em em mai a. An pa ber chuan, “A ni ngawt mai, a tui lo alawm. Mami, i bai leh hunah tui deuhin bai tawh ang che aw,” tiin an hau fiam vel a. Lamtang hmu ta chu Fakputa pawh a hlim ngang mai.

An tlangval chuan Fakputa chu a lawm khawp mai a. Amah hi an khaw A Team striker chhuanvawr a ni a, ka hriat naran sa a ni. Zanah a len chhuahpui a. Engtin chiah nge an va awm ka hre lo naa, an leng kual viau a ni ngei ang. A tuk inkhel tura field kan va thleng chu nula hovin an lo ko sup sup mai! Khawi kil atang pawhin, “Fakput…. Fakput..” tih ri a ri chuah chuah mai! Thingpui khilai tu pawh a ngah mai.

Kan han inkhel ta a. Fakputa chu field sirah, inkhelh thuam famkim nen a lo au lung lung thin a. A aw a ring tha si a, an nui dur dur mai thin. Kan thlen inte pawh an nu ber tih lo chuan kan inkhel chu min en ziah a.Kan khelhpui apiangte chu kan hneh tawk em em zel mai a, kan chak hram chauh zel a. Fakputa chuan luhna hun a nei ta reng reng lova. Tlaiah thlen in nu tuilum sain a inbual ve ziah si a. A thin a rim deuh tun tawh a.

Chutiang reng reng chuan final kan thleng ta hial a, Fakputa a la khel chuang lo! Min vau deuh reng tawh mai a. Khaw chhung mi zawng zawng lahin a substitute nih dan phung an hre vek tawh a! Chu pawh ama sawi darh bawk.
Final ni chuan kan mang a tiang ta zawk mah a! Kan inhneh tawk leh pek em em mai. Si khat ve ve kan inpe tawh a. 2nd half tan dawnah luh luih a tum chu kan indang a, kan inthlem nasa mai a. Mipui lahin an hre vek bawk a.Chutah le hun tawp minute sawm vel ala awm tih chuan lehlam pawl pahnih chuan ball an rawn um fal ta mai a. Mala chauh a awm si a, one-two in an rawn cut mai dawn si. Chutia kan mangan laia tanpui vartu hnai chu Fakputa chu a ni ta tlat!

Field sir rin kar to chung chuan, ring em em mai hian, “Tu emaw tal kha lo chhuak teh u, thlen inte pawh an zahawm lutuk tawhhh…,” a rawn ti ta nih chu. Chulai kan khawvel zimtea mihring zawng zawng chu kan nuih a za a ni. Mala nuihza lutuk chu ball chuh pawh tum lovin a nui thingthi hnawk mai a. Lehlam striker, kan thlen in tlangval ngei mai chuan nui vak vak chungin ball a rawn khalh phei bawk a!

Chutah, kan referee nuihza lutuk khan a whistle hmuam chu a phuh ri ta hlauh mai a nih chu! Whistle a hmuam sa vei a nih kha! Nui chungin an han complaint nak nak naa whistle kha a ri miau si a, an pet goal loh phah ta a ni. Field sira mipui lah an nui tak hluah hluah a!

Lo theih ta hek lo le, kan zinga pakhat chu tlawmngaiin a awl ta tawp mai a! Fakputa chu a lut ve ta a. Mipuiin an tan em em mai a, an haw haw hluah hluah reng mai! Fakputa khelh dan nuihzatthlak chu a sawia sawi chi a ni lova, a hmuha hmuh chi a ni. Vawikhat a tlan laklawh break thei tawh lovin an goal keeper a su silawng thelh tih chauh kan sawi ang e.

A tawpah chuan 1 – 2 in kan chak ta lo nge nge a. Mahse tumah kan rilru a na lo. A khaw mipuite chuan hemi tum tournament aia hlu leh hlimawm an la tawn loh thu an sawisup sup mai. Fakputa pawh a hlim a, kan lungawi tlang a nie.Hemi tuma kan thlen in nula hi tuna ka..
___________.

PAWTARA’ MIN TI
Hei pawh kan lui kal bawk. Vala nen hian tihdan thin pakhat kan nei ve a. Kan ramvak haw leh kal lamah mi thil phurh leh putte a remchan ang angin kan chhawk lawp lawp thin. Kan uang viau zel bawk a.

Pitar pakhat hian emin Thingfanghma/Hnuhnun hel tlem hi vawkchaw tur tiin daihnai huan ami a lo phur a. Pum te reuh tete 10 vel chauh phurin a kal chhat chhat a. Kan umpha chu Vala chuan engkhaw sawi set set lovin a em chu a’n phawi lawp mai a, hnam chu lain a phur nghal a. Kei pawh chuan eng sawi chuang lovin pitar chu ka’n paw nawlh mai a. A tirah chuan puak chu a duh lova, min nem a, a tal deuh a. Mahse kan inchak hleih si a, a beidawng thuai. Tha te te chuan ka paw ta a. Pitar pawh chu a ti ti ta zat zat a. Ka uang chuan ka tlanpui thul, a nui ar ar a.

Khawchhung thlen dawn chuan chhuk a tum leh a, kei lahin ka phal der si lova; an in thleng zakin kan thlah ta a. Lawmthute min hrilh luam a. Inah a lut mai a.

A tuk tuk lehah chuan Vala a lo kal a, “Nimin piaha i pitar puak kha a la tho miah lo a nia,” a rawn ti!! Ka hriat ve miah hmain khawchhung chu a lo khat der tawh lo niin! Artui leh bawnghnute nen kan va kan ve a, ka zak ngei mai. Kan tlawmngaih leh uan luatah kan tiramtuileilo tep mai lo niin! Mahse a hnu deuh chuan a tha ve leh mai a.

A pawi ta ber zawk chu heta tang hian ‘Pawtara’ min tih phah kha a ni. Potter ni mang silo, Pawtar nih chu a nuam zan lo. Mizote lah hi hming lem kan nei hma ropui si! Ka bialnu nen lah kan inthen phah tep lehnghal!

Kan zak viau naa pitar puak tih loh midang puih erawh kan sim phah lem lo.

Advertisements

About Mizo Archive

I'm the one who collect the best writings of Mizos
Aside | This entry was posted in Thu Ngaihnawm and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s