ZOLÛTI LEH PÛK HUÂI. by- Ruatfeli pa

  • Tuikhur huai nei chu.
  • Ramhuai chet dan ngeiawm.
  • Dengsuri’n ramhuai a zawl.

Déngsúrinu pûk hi Serchhip khawhlui(Sailo lal Bengkhuaia hunlaia an khua) tlâk lam hnuai lawka awm a ni a, a thlang lawkah chuan ‘Paihte tuikhur’ an tih chu a awm bawk a, Chutih lai chuan khaw dâi lawk a ni.

Bengkhuaia hunlai atang tawhin he pûk leh tuikhur hian an hming ngai hi an la pu ta ngar ngar a ni.

He pûk hi lian lo tak a ni a, lungpui lian deuhte’n an siam mai a ni a, pûk remlo tak a ni. Han han en thuak chuan pûk a ni tih pawh a hriat awm love; Mahse, he pûk te taktê hian ‘Huai’ nei niin an sawi thin a, a hnu zelah phei chuan Dêngsûrinu(Siklali) thlarau chuan he pûk hi chenchilh zui ta niin an ngai a, ‘Dêngsûrinu pûk’ tiin an sawi zui ta hial a ni. Kum 1871 hmalam tawhah khan he pûk hian Huai a nei tawh niin an sawi .

He pûk huai hi an khaw pasaltha Kâpvéla nupui Siklali chuan a zâwl ta tlat mai a. Kâpvela chuan dan tumin theihtawp chhuah mah se awmzia a neilova, lal hnenah te pawh a thlen hial a. Chu huai hnenah chuan vawi tam tak an inthawi a, Siklali thlarau chu an dil tlut tlut thin a, awmzia reng reng a awm thei chuang lova, khawtlang chuan an mangan pui tawh a ni.

Kapvela chu Pasaltha huaisen tak ni mah se a nupui awmdan chuan a tibuai ve hle mai a, an fanu neih chhun Dêngsûri chu nu tellova enkawl chu a zuam lo a ni.

Siklali chu a che bawraw telh telh a, theih tawpin a pasal Kâpvéla chuan dan tum thin mah sela dan hleih theih leh dan sén pawh a nilo a, an nih nih ni tur chuan a nupui chu a dah zalên ta zawk a. Siklali chu púkah chuan chhún zànin a kal ta tlut tlut a, a hnuah phei chuan a riahchilh ta nge nge a.

Pûkah chuan a awm ta chawt a, koh haw an tum pawhin a duh tlatlo mai si a, pûkah chuan chaw an pe ta ringawt mai thin a ni.

Tûkkhat chu Siklali pasal Kâpvêla chu inngaihtuah harh thut ni awm takin dawhthleng atang chuan a tho thut a, a kawlhnâm leh Silai chu a la lawk a, a nupui awmna pûk lam chu a pan ta ngut ngut mai a. Kâpvêla’n pûk a thlen thlak chuan a nupui chu chauh hmel takin lung bang ngheng chuan a lo muhil bawrh bawrh a.

A hmel chu a dawl dangin a chêr hle mai a, an chaw pêk thinte chu a ei mumal ngailo ang tih a rin hriat theih mai a. A mit chu a val kual ruih a, a mitkhurte chu a tla kûk tawh a, a samte chu a bawrchhawrin amah chu a balh hmel em em tawh mai a. Kâpvêla chuan a nupui pawh chu kài harh hmasa chuanglo chuan chu Pûk Hûai chu a Cho ta chiam chiam a. A tawng vak vak reng a, Silai te chu a kap puak leh dur dur thin. A kawlhnâm te chu vilik in, ring tak takin a au lung lung reng a. Bengchheng chitin siamin, a inhrosa a, a au vak vak hnuah pawh chuan a nupui chu chêt pawh a la che eih lova.

Kâpvela chuan a thinrimna chu a bun ruak ta deuh nge, a thiltih chu bansanin a nupui chu a ko ta lauh lauh zawk a. Mahse, a nupui chuan a chhang miahlo a..ring deuh zawkin a han ko nawn leh a. A nupui chuan a chhan tak mai siloh avang chuan Kapvela chuan ngaih thalo takin a nupui chu sawi harh a tum a, a nupui a han vuan chu a phu deuh zawk a, a nupui pangti chu a lo dai vawt thlur tawh mai a, Pasaltha ni mah se a tim ru deuh sung sung mai a ni.

A nupui chu a lo thi reng tawh a ni tih a hriat chuan midangte pun turin hmanhmawh takin khaw lamah a tlan kir ta nghal a.

Dêngsûrinu(Siklali) thih hnu atang chuan he pûk hi a hrâng nasa zual a, thawm maksak tak takte an hriat fo thin bakah he pûk hnuai lawka awm Paihte tuikhur chawi tura kalte chu a vawmtu hmuh tur awm silovin helai pûk atang hian lung thilin a vawm fo thin. Khaw mite chuan an hlau thei hle a, he tuikhur pawh hi rei tak an chawiloh phah hial a ni. Hun engemaw chen Paihte tuikhur chu tlàn lova an awm hnuah chuan an tlan leh ta tho a. A chhan pawh thalva êk char ah tak tak chuan an tlàn tello theilo a ni deuh ber a, tui a harsa em em thin a, an tuikhurte zingah chuan he Paihte tuikhur hi a hna tha ber a ni lawi si a ni.

Lal Bengkhuaia pasaltha ten an sal man, sap naupang Zolûti (Mary Winchester), a mantu Chawma’n a kawllai kha a ni a, Zolûti pawh khan he Paihte tuikhur hi a chawi ve nasa thin hle a ni.

Tukkhat chu Zolûti leh a thiante ho chu tui chawi turin Paihte tuikhur lam panin an inzui kawi thla dam dam a. An hlim tlangin an ri dar dar reng a. Dêngsûrinu pûk zawn an thlen chuan púk atang chuan lung thilin a rawn vawm leh ta ur ur mai a, chuveleh thil awmzia lo hre tawh Zoluti thiante chu baklengin an tlan chhe zo ta a. Zolûti chuan a lo hlau ve hauhlo mai a, púk lam chu a pan chho ta chhet chhet mai a, a han thlen chuan tumah a hmulova, pukah te chuan lûtin, ”Tunge rawn vawm?” tite in a au vak vak mai a. Mahse, thehmeh ang maiin a reh zui vawng vawng mai si a. He pûka Ramhuai chengte hian Zolûti chu an hlau hle a ni ang, hemi hnu atang hi chuan an reh zuita hmiah a, tumah an tihthaih zui leh ta ngailo a ni. Pathian hnathawh ni ngeiin a lang a ni.

Kum 2011 khàn Pu C.Kapthianga Aizawl Bethlehem veng chuan, ”He Dêngsûrinu pûk hi Mizorama Ramhuaite hnawhchhuah hmasak berna hmun a ni e.” tiin Bible society of India ah “Life member” a nih tir a ni. He Certificate ah hian,

‘Mary Winchester-in ramhuaite a hnawhchhuahna, Dêngsûrinu pûk, Serchhip “life” a ni’ tiin 9th.Jun.2011 khàn ziah luh a ni.


Retold by : Lra Stipe Miocic

Advertisements
Aside | This entry was posted in Thu Ngaihnawm, True Story, Zoram History and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s