PASALTHA KHUANGCHERA PUK LUH THU

Author : Apuia Tochhawng

Ailawng khaw chhak lam atanga thla lo chhuak chu seki tia a ni tawh a, Ailawng khaw naupang pawnto thawm chu thler tinah hriat tur a awm a, luhkapui tlangsanga paho titi laih laih te, lenglen ar khuang ri thliai thliai thawm te chuan Ailawng khua chu a fan vel a.

Ailawng khaw nula hmeltha, unau sal sarih kara hmeichhe awmchhun, an khawnbawl upa fanu Thangtei te inah chuan dan pangngaiin chumi zan chuan Ailawng khaw tlangvalho an buk leh luih tawh a, nghapui suar ân meuha phulraw chhuat tliang hun maia bawk zun zun lah bo lo. Thangtei chuan a bane den chih sa chu vawkchaw belah a chhung lut a, dawl chan sa chuan a khahchih zui zat a. Vawkchaw hawlhna chuan a hawlh rawk rawk a, hmui a kaih chhunzawm leh ta a.

Val Upa Thangchhunga chuan, “Vawiin ka ramvak chu lungpher lui kamah sairil ka la e ka tia, vanneih asiamin sakuh ka kap teh hlauh a, aikam ka man bawk a, chhungtlai zet chu ka man awm e,” a ti a.
Hauchhunga chuan, “Khulai puk khu sawi leh tih a tam ta riau mai, hmanni-ah kan thirdengpa nen kan va ramvak a, puk kawtah khuan chhun chaw kan fak a, ka tirilah hian min tham er er reng mai. Puithuna thil hi ka awih ngai lo a, mahse puk chhung thim mup mai ka va en a, chuta ka thil hmuh chuan ka hmulthi a tiding sung sung mai a ni. Khatia ka va hawi phei kha hmannia sakei seh hlum Aikhuma kha a lo ding reng mai a, kan thirdengpa ka hmuh a, ani phei chu a thidang zui nghal a, a lo harh leh chuan a ranga arangin kan haw nal nal mai a ni. Kan thirdengpa phei saw chu lu kawlh rawtin a nat saw, kan puithiamin daibawlin a thawi a, mahse a la tha chhuak thei lo a nih ber hi,” a lo ti ve a.

An pasaltha Ralchhunga chuan, “In sawi takah chuan hmanni sakei sual Aikhuma sehtu ngei mai kan hual tumin khulai puk bul khu ngawi zawn a ni a, Patheua nen kan tangdun a, puk chhung atangin thawm mak deuh mai hi a lo chhuak a, rul lian pui su thawm ngei niin kan hria a, kan hanngaithla chiang deuh a, rul su thawm ngei mai a ni. Tleng ri hruah hruah thawm kan hria a, kei pawh mi tham ur ur thei a, Patheua phei chu a awm a nuam lo hle tih ka hria a, a za sek mai. Pa thinphut nei lo ve ve kan ni-in ka hria a, mahse min tham dan a na tlat,” a ti ve a.

Thangtei chuan meiling sem kual dan dan pahin, “Chulam ringawt in sawi a, zan kan mu thei lo mai dawn alawm le,” nui her her chungin a han ti a, a ni tak e maw ti-in an thlawhhma chungchang chu an sawi zui ta daih a.

Ailawng thlang lama awm puk nelawm loh zet mai chuan Ailawng khaw titi a siam tam hle mai.Puk bul bul vela ngaw chu chhun pachangah pawh thim rum rum khawpin a un a, ni sat lai ber pawhin a chhun tlangzo lo a, thingte chu Chhura rual rual an ding khung mai a, hrui lian pui pui malpui tia tia a inherh ngen ngun mai bawk a, keiha hling, ramsamkhuih leh sechal hling a la tam em em bawk a, chu ngaw ringawt pawh chu huai nei awma mawi a ni a, tumpangchal leh sele a la awm a, nghalchang leh nghalrual hnu a awm nuk mai bawk a, chu puk atang chuan tui tam tawk tak hi a rawn luang chhuak hum hum mai a, chu lui chuan a thlanga lungpher lui chu a zuk fin a, mahse puk atanga tui lo chhuahna hnar awm reng reng chu an hre thei lo.

Tlai khat chu tlangval pahnih hi hmanhmawh baklengin an lo tlan haw a, “Saphaiin Satkunga a dawlh,” tih thu an rawn thlen a, Val Upa Thangchhunga chuan thil awmzia a lo zawt vel a. Tlangval upa zawk hmulphurh chhe tak chuan, “Puk dinglama awm zaihri thing ding kha kan kit a, a ler lamchu ramtheihai kungah a va in vaw kai a, naupang lawmah tiin theihai chu lawh kan duh a, Kunga nen hian kan zawh phei zai zai a, ramtheihai hmin tuar chu iptepui khat dawninkan lo a, kan hmanhmawh loh avangin theihai kungah chuan thlifim dawn pahin vaibel kan han zu khawmuang leh rih a. Kan let leh chu saphai puka tleng lut chu kan hmu a, a puar viau mai a, Satkunga kan rilru-ah a lo lang rual thawt aniang chu kan han au rual thawt a, mahse chhanna reng reng a awm lo. Thei reh takin a reh vawng vawng mai a ni. Kan kalsan laia a lo dinna hmun chu chiang takin kan han en a, hnim a pe sel sul mai a, a iptepui leh a diar kan hmu a, a pawnven pawh kan hmu bawk a,” a ti a.

Thangchhunga chuan chek tlawk tlawk pahin, “An tlangval neihchhun a ni si a, a va pamhmai em!! Amah chauh hnathawk thei a ni si ale(h)” a ti vawng vawng a.

Satkunga chu an khaw tlangval tlawmngai leh fel tak a nih avangin an khawngaih em em a, a nu leh pa pitar putar mai an ni tawh a, Satkunga chu an eibel ber a nih avangin ani ber a thih chuan an ei bel a keh tihna a ni a, khawtlangin an lainat em em mai a.

Lalpa Sailianpuia chuan, “Saphai chu chah chhuak ila kan that thei anih hlauh zawngin ka seki lainawt hian ka ai anga, tupawh saphai beihnaa thi an awm a nih chuan ka selâ hian ka thisen ang,” tiin thu a chhuah a.

Khawtlang mipui an thinur tlang bawk a, thah an tumruh hle mai. Kel an chah a, a ni khatna-ah chuan a rawn chhuak duh lo reng reng a, a ni hnihna-ah pawh chuti tho. A ni thumna-ah pawh a la reh vawng vawng a, hmun dang a pan tawh a ni ang an ti a, an beidawng lek lek tawh a, a tukah chuan a rawn chhuak ta zul zul mai a, a lian kher maia, a lu lawk chin pawh ui pum tia a ni ang. Khuangchera chuan, “Silai nei zawngin kah rawn vak ila, a la thi lo anih chuan feiin kan chhun rawn vak mai dawn nia,” a ti a.

Puk atang chuan a tleng chhuak kim tawh a, kel chu a pan a, kel chu a hmaa be be thin kha a ngawi hmak a, a aikaih a niang chu che lo chang lo chuan a ding khawng reng a, dawlh a tum mek lai chuan Khuangchera chuan a lu-ah tak mai chuan a kap phirsi leuh mai a, thuntling tih hriat reng reng mai chuan an inruan ulh ulh mai a, chulai ram chu silaikhu-in a bawh zo ta a.

Saphai chu a lo thi chiang ngang mai a, diriam takin an sat sawk sawk a. An lal Sailianpuia chuan a lo tiam tawh ang ngeiin a seki lainawt chuan a ai ta a ni.

Chuta tang chuan sawi a tam leh zual a. Rulpui a la awm tih te, rulfepnei a awm tih te chu an sawi nuai nuai mai a, a bul velah chuan naupang leh hmeichhia, dawihzep deuh chu kal ngam bar pawh an awm lo a.Val Upa Thangchhunga chuan, “Puk khuan hlet a nei angem le?” a ti a, a nei lo ang, nei nise saphai kha a hlet lamah a chhuak ang chu an lo ti a.Puk chuan hlet a neih leh neih loh chu an inrinsiak huai huai a.

Thla arkaiden zan a ni a, Thangtei rimtu an tam leh pek hle mai. Chumi zan chuan pukin hlet a neih leh neih loh mawlh mai chu an sawi a, Suakphunga leh Chawngkunga chu an inhnial bing ta a.

Suakphunga chuan, “Chawngkung nang ang thu haw lam leh kal lam hre lo khan min hnial lo mai teh, nang vanlung meihawl rapkeha thi mai mai tur i puten an tlanchhuak chauh che a nih kha le,
”Chawngkunga chuan, “E!! Suaka kan retheihna hmusit zawnga min chungtlak fo mai le, engmah i pawi ka sawi lo asin,”
Suakphunga chuan, “Chungtlak ang, kumtin maia mi zem kotlanga dak reng in nih hi,” a ti leh a.
“Suaka, kan thlawhhma-in a zir ve ngai lo a, kan thatchhiat vang ngawr ngawr a ni bik lo asin, duhtawk teh ang, ka tlawm e”
Suakphunga chuan, “Min la chhang ngam ka ti, nang hmeithai fapa hmawng hnuaia mi ve mai mai, min chhang duh hlek lo mai rawh, khawnge kan hlap teh ang che,” tih pah chuan rapchunga thingfak chu lain Chawngkunga chu a tin ta ur mai a.

Thangtei chuan, “U Suak, i va zak lo ve, U Chawnga hian a ngaihdan a sawi ve a ni mai a, chu chu tinge i huat? Tianga buaina i siam dawn a nih chuan kan inchhung hi rawn rap tawh lo la ka duh, ka pa phei chuan hria se a beng duh ang che,” a ti ta a.Val Upa chuan tlangvalho hnenah chuan, “I haw teh ang u kan boruakin a zir lo ve,” a ti a.

Zawlbuk an thlen chuan mei an tithim sauh sauh a, Suakphunga chu an sawisa hrep mai a. Suakphunga te chhungkua hi an hausa a, dar hmingthang tak an nei a, kumtin buh kham an thar ziah a, a chapovin thian bulfuk pawh a nei thei lo a, an hausakna a chapopui hle a ni.

Chumi zan chuan Thangtei muhil thei lo chu a let a let a, Chawngkunga zaidamzia leh a dawhtheihzia te kha a ngaisang a, a khawngaih bawk a, a ngaizawng ru ta riau mai a ni.

Pukin hlet a neih leh neih loh inhnial nana tlangvalte tualthu a chhiat phah a hriat chuan Khuangchera chuan , “Ka fiah dawn a ni,” a ti a, a nupui Thanchhumi chuan, “Tih sa loh loh; i thih phah reu reu ange” a lo ti hluk a.

Khuangchera tawngkam chuan khawchhung a deng chhuak thuai a, an lal upa min Tlangkhuma chuan, “E khai Khuanga hi kan khaw daingul leh phaw a ni a, chuti maia thi tur chuan ka la phal love,” a ti a.

An thenawm khawvengte chuan lut lo turin an ti a, mahse Khuangchera tum chu an sawhsawn sak thei chuang lo. Milunglian a ni miau a.

Khuangchera chuan mau roin meichher pasarih a siam a, chumi ni tukthuan eikhamah chuan puk lam chu a pan thla ta a, a liam tur chu Thanchhumi chuan tap zawih zawihin aum a, lut lul suh a ti ngawih ngawih a. Mi thahnem fe chuanKhuangchera chu an zui bawk a.

Khuangchera chuan meichher a chhi a, pukah chuan a lut ta a.Thehhmeh ang vawng vawngin a reh a, puk atang chuan bak tam lutuk mai chu an rawn thlawk chhuak a, an val upa Thangkima chuan, “Kan pasaltha kan chan ta,” a ti chuai raih a.

Ni a vanlaizawl a, Khuangchera lah chu a la reh vawng vawng mai si a, a thih an ring deuh vek a, chu puk chu an râp a ni. Khua a tlai hret hret a, Khuangchera lo chhuah leh beisei deuh reuh, beisei ngam tak tak si lovin an awm a, tlangval pakhat chuan, “A ruang hlawm tura luh chu ka ngam lo,” a ti a.

Lo sul haw hunah chuan an piah lama au thawm an hria a, Khuangchera rawl ngei a ni tih an hriat chuan an pan phei hum hum a, ani chu chau tih hriat takin puk hlet kawngka-ah chuan a lo thu kun lap a.
Zawhna a tam ngei mai, “Enge i hmuh..rulfepnei chu a awm tak tak em? Rulpui chu i hmu em?” tih te chu an zawt nuai nuai a, mahse Khuangchera chuan, “A thim hle mai, meichher chhit theih a ni si lo a, a khawharthlak mai chauh a ni,” a ti duh chauh a.

In an thlen chuan Khuangchera chu a khua a sik zui a, a tawngvai bual bual reng a, thlanfimin a bual a, chumi zan chuan a na buai hle mai a, tuivawtin an leih reng a, an puithiam chuan daibawlin a thawi a..thenawm khawvengten an tlaivar pui a.

Thla hnih zet lu kawlh rawta a na chu a chhe kawk kawk mai. An lalpa Sailianpuia pawhin a rawn kan a, chutiang chuan a damlo chuan khawtlang a nghawr a..a damloh natem avang chuan engemaw hmuh a nei ngeiin an ring a. Puk chu an tih leh zual sauh a ni.

Puithuna atthlakin a la tuam laia he puk a lutchhuak ngam hi mi namai lo a nih zia a tilang chiang hle awm e.

Khuangchera a luh hnu kum za sawmnga velah Bombay Youth Adventure ten oxygen, headlight, hruizen bagul vuah te, doctor nen lam an rawn thawk a, hemi ni hi kum 1985 Febuary ni 12, dar 2:20PM ah an lutchhuak a, a sei zawng hi 119 metres a ni.

Hemi hma kum 1975 Mizoram UT kan nih hlimah Pu Darthawmchhuaka Nagaland state-a Agriculture Superintendent chuan Ailawng YMA chu phungbawmah rawn sawmin Petromax nen Torchlight nen luhchhuah an tum a, mahse thui pawh an kal hmain an petromax mantle a tla hlawk a, an torchlight bulb a keh hmak a, an let leh ringawt a. Khuangchera hnu-ah chuan Bombay Youth Adventure ten an rawn luhchhuak ta a ni.

Advertisements
Aside | This entry was posted in Thu Ngaihnawm, Zoram History and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s