I LO HMU EM??

Author : Hc Lalrinzuali

Ka pa chuan min bêng sawk a, a kut chu a khur dur dur bawk a. Ka pa chu kohhran upa ani a, pa zaidam leh nelawm tak ani a avawikhat kut min thlâk na ani!.

Chhuata ka mittui far fap fap chu ka en reng a, “eng ang fako a fanu lepchiah nge ka lo neih che! Lalhruaitluanga drugs addict saw maw i fawr pui țhin?” ti chunga ka pa in min ben leh a tum chu ka nu chuan alo dang a, min zilh hlakhlak chungin room ah chuan min kailût a.

Nie.. Lalhruaitluangahi ka bialpa hmasa ber ani. Ka chhungte chuan kan inkawp chu haw hle mahse a âwm ani, ani chu ‘misual’ niin an hre si a! Ani khan amah ngaizawng turin min ngen lo a, “Ka thusawi hi pawm mai rawh.. i nun hi siamțhat pui che ka duh alawm” ti a ka ngen lai pawh a “i zahna leh hreawm na bak ka thlenlo ang, țhian angin inkâwm zawk ang” tia inthlahrung taka min hnial tu kha a ni.

A nun mal tak leh bawraw tak phên a thil inthup chu hriat ka duh a puih ka duh avang in ka titi pui fo a, kan inkâwm zing telh telh a a ruihhlo tih pawh a khât telh telh a.. Min hmangaih a ka thusawi a pawm tih ka hriat avang in ka ngaizawng a, heti hi kan thleng ta a nih hi.!

Kâr khat lai amah be lo leh pawn chhuaklo a ka awm hnu chuan ka nu nen Tv kan en a, ka pa erawh a awmlo. Kan kawngka kik karh karh chu “lo lut rawh” tiin ka lo chhâwn a, a rawn luh rual chuan ka nu ka melh nghal, “E.. Tluangte lo kal rawh” ka ti a, a vawikhat rawn lênna anih avang in mak ka ti hial a! Inthlahrung takin ka țhutna țhuthleng sei kil lehlam ah chuan a țhu a.

Ka nu chuan a be lo a, tûm bûr in Tv channel chu a hmet sawn sek a..Ka nu in min melh râm chunga “țhenawm ah ka kal dawn ania” atih chuan awmze thui tak a nei. Ka nu bulah khan “kațhen ang” tiin ka intiam a, chu chu ti hlawhtling turin min duh tih ka hria!

Tluangtea chu a rawn tawlh phei a, ka kut chu vuan in a nui a.. “i reh lutuk a ka rawn kal tawp, i țha em? thilthleng a awm ami?” ati a. A kut chu ka vuan tlat a, ka hrawk a min hnawh tlat avang chuan ka țawng theilo.. “i țap em ni? enge thil awmzia sawi rawh” tiin ka biang ah chuan a rawn dawm a, thâwk ka la tê te a “kan ințhen a ngai” tih zawng chu ka sawi theih a ni.

Kan ngawih dun vang vang hnu chuan a rawn nui chhuak hak a, makti takin ka en a.. min en miahlo chuan “ka na lo.. ka hre lâwk vek tawh alawm” a ti zâwi sap a, a kut erawh chuan țhuthleng chu a hmer ngat ngat thung a!
“a ni lo.. keichuan ka duhlo.. mahse ka chhungte hi” ka ti bah niai a. Ani chuan ka dâr lehlam lehlam ah chuan rawn vuan in chiang takin min en a… he thu hi a sawi a.. “an hmangaih che alawm, an thu awih rawh aw.. ka tello a nun hi i phû a ni. Kei chu misual ka ni a ka ni reng ang..” tiin.

Kawngka a a chhuak chu muttui kâr ațang chuan ka thlir reng a.. Ka mumang nise ka duh, ka țhen avang khan na leh hreawm angin a awm duhlo a mahse a na hle a ni tih ka hre si.
“Ruihhlo hi ka sim thei, ruihhlo zûn ai chuan i hmangaihna hian min hneh zâwk” ti țhin tu Tluangtea chuan ka hmangaihna tello in a kawng zawh lai chu zawh chhuak thei tak ang maw!!

Kar hnih a liam a, ka room kawngka kik dat dat chu ka chhanglo na a ka țhian țha ber Kimkimi chu a rawn lut tho a.. a mit chu a sen râm a, khuma ka mu lai chu min rawn kuah in a țap ta hlawp hlawp mai a, “ngatinge Kim?” ngaihțhalo tak chuan ka ti a, mittui tla pûr a rawn hawichhuak in “Tluangtea kha a boral..” a ti anih chu!
Ka tho phut a ka khur nghal zawih zawih a, “ani lo.. dawt i sawi, engvang in maw?” tiin ka phun a.
Kimkimi chuan ka kut chelh in “dawt a ni tlat lo a ni, drugs overdose an tia.. pawi ka ti lutuk.. ka va kalpui dawn che nia” a ti hliam hliam a.. kei chu ka ngawireng a, ka â mup a ka âwm chhung chuana ut ut rih erawh ka hria!

An inbul ah chuan mi chu an awm ve a, inchhung kan lut a ka țhiannu chuan ruang an mutna lamah chuan min kaiphei a, inchhunga awm te leh ruang kil tu te chu mi langsar leh mi ropui an awmlo. Zu ngawlvei tih hriat ngawih ngawih a pa hmai țawk deuh hlur leh a nu chêr chhe zet chuan a lu an lo tuai hliau hliau a.. a drugs lo tihpui țhin leh an ina zu in tur a leng lut țhin te chu a ruang kiltu te an ni.

Ka hmangaih chu amu dâng bai a, mak tih hmel taka min en tu te pawh chu ka zah zo lo.. ka kuah thlawp a “Tluangte, engatinge..?” tih bâk ka sawi theilo, chhuak êm em in ka țap hawm hawm a.

A na ka va ti em! Ka tello a nung zo lo leh hmagaihtu mamawh ngawih ngawih kha, kan chhungkaw zahawmna ka zah avangin ka kalsan a.. keimah vangin a thi a ni, ka tihtur ka hlenlo a..a taksa leh thlarau chhanchhuah ka tum țhin chu keimah ngeiin hremhmun ah ka nawrliam ta a nih hi!.
“Tluangte..min hua em ni? Lo tho teh, min chhang rawh..mawhh?” tiin ka sâwi nawk nawk a, ani erawh chuan min chhang lo, A che lo a min ngaihsak heklo.

Ka hmangaih an zalhna thlan chu ka thlir reng a, heihi chiang takin ka hria ani.. a rawn kir tawh ngai dawnlo ani tih hi.

THUBELH.
In veng, in khawtlang, in țhenawm ah te khan keini ‘mifel’ inti ten a ‘misual’ hming kan vuah sak ho te hi ilo hmu ve țhin em?
Ruihhlo ngawlvei, awmțha duhlo leh khawtlang tana mi hnawksak kan tih țhin tekha.. anni ngei kha ilo hmu ve țhin ang tiraw??

I kalpel a, i ten a, an zinga awm chu hmingchhiatna hial ah i ngai a ni thei e! Anni kha ‘damlo’ an ni a, an damdawi chu ‘hmangaihna’ ani.

“A unau a hmuh theih reng pawh hmangaihlo tu chuan, a hmuhtheih loh Pathian chu engtin nge a hmangaih theih ang le..?”

Advertisements
Aside | This entry was posted in Fiction, Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s