‘SUPER’ AWMZIA HRE LO MIZOTE

Mizote hi thil ngaihtuah chiang mang hlei loa thil tih ve tawp ching tak, mahni nihna aia inhmu sang ve tlat, mahni theih chin haidera mi tih dan thika tih ve tum tlat țhin kan ni.

MIZORAM SUPER MODEL!!
Model kan han thlang ve dawn dek dek a, ‘Super Model’ kan han ti nghal ngawt a! Veng leh mahni khua ațanga an nula nalh leh chhuanvawr pawh ni lo, zaktheilo zual deuh leh tlema bawl theih deuh chiah inlan ngamna hmun kha ‘SUPER MODEL’ hming kan han puttir a nia…. a zakthlak deuh lo maw?!?!

Ram dang pawhin miss te an thlang ve fo, an ti-SUPER MISS ve duai duai lo. Anni, hmelțha zawk leh nalh zawk, fing zawkte pawhin SUPER an tih ngam loh laia keini tribal nula kephah hlai awmkhawm, ‘SUPER MODEL’ hming lo puttir kha a zahthlak.

Hnampui zawkte hian a hming an lo hria ang a, ‘SUPER MODEL meuh ni thei chu a va nalhin a va hmelțha àwm ve..’ tiin en turin an lo kal ang a, tribal nula chawn sek leh bing lin len, dulkiar hir hiar, thau chhe ngah zet, chawn leh mawngtam inhnaih te te, hnungzang sei zet zet, kawngfek awm mumal loa gas bur ang maia intiat thla putte hi an rawn hmu ang tih a hlauhawm.

MIZORAM SUPER LEAGUE!!
Basketball kan han khel ve a, kan tuipuina lah a la rei lo. A league angin kan han ti ve țan dek dek a, ‘SUPER LEAGUE’ kan han ti leh nghal ngawt a! Hui ha!!

Asian tlangval bing tit tet ho inelna, mumal taka dunk pha pawh awm mang lohna (foreigner tlem te chu an awm ve ang), chu pawh season reilote bak lakalpui loh, khawvel hriat thama lar pawh awm miah lohna league hi eng vanga ‘SUPER LEAGUE’ ti ve ngawt nge an nih aw?? A khawi laiah hian nge maw SUPER a nih le..??

I THLIR ZAU ANG U…

Hnam fing hmasa leh changkang zawk, sport leh kawng engkima kan aia chungnung zawkte tih dan khu en teh ang u. Football League-a kan en hnem ber English Football League khu kum 1888 daih tawh khan English Football League 1st Division tiin an lo kalpui țan tawh a, League ropui tak ni mah se kum 1992-a a hming an thlak khan ‘ENGLISH SUPER LEAGUE’ an ti chuang lo a, ‘English Premier League’ an ti mai a, khawvelin a ngaihnep phah chuang lo.

Khawvela club țha ber pahnih, Real Madrid leh Barcelona awmna pawh hi eng super league mah a ni lo a, LA LIGA a ni satliah tawp mai.Khawvela league țha ber bera champion club-te intawhkhawmna, an intihsiakna league hi ‘SUPER’ tih a àwm tawh viau laiin an la ti-SUPER chuang lo a, ‘Champions League’ an la ti ta fo nia!

Champions League-a champion leh Europa League-a champion hian chak zawk an zawng leh a, chuta chak zawk zawk chu Europe awptu anga ngaih niin, chuta an inelna hmingah chuan ‘EUROPEAN SUPERCUP’ an ti ngam ta țawk a, hei zet hi chuan ‘SUPER’ tih hi a phu tawh viauin a lang.

Heti khawpa ‘SUPER’ tia koh tur an uluk lai leh a nazawnga an hman ngam loh laia keini tribal mi tlem te awmnaah SUPER kan lo uar viau hi chu a changkang viau lo! Heti hrim hrim chuan super tuikawhnain tui kan kawt ang a, super chemin lo kan vat ang a, super model-i te hian super èm hian super mai te, super behlawi te hi kan phur mai mai anga ti nia.. Super hi ti thlazen lo teh ang u, super tia vuahtlak kan la neih ve hma hi chuan.

THUBELH :-

Group danga ka post comment-tute aţangin Super Trio, ISL tih vel te an rawn sawilang a, hei hi sawi zuihlek ka châk bawk.

Super Trio chu ţhianho pathum band din kha a ni ve mai a, a hming chu anmahni thu thu a nia, a huamzau lem lo bawk a, anmahni 3 chauh telna a ni bawk a, sawi zui vak leh a hnam anga buaipuitlak ni lemin ka hre lo a, ka sawi zui lo ang; amaherawhchu, ‘SUPER TRIO’ tia vuahtlak an ni em tih erawh rilruah a awm tho mai.

Indian Super League a awm a, kan hre vek; China khian League thar an buaipui a, Chinese Super League an ti bawk! He ram pahnihte hi football-a ram ropui lo ve ve an ni a, an ram football league pawh ram Football League-ah chuan ropui lo pawl tak an ni ang (China-ah chuan sum tam avangin player lar an lut nual, an league erawh a ropui chuang lo). Engati nge League ropui lo ber ber hian SUPER tia invuah an duh tlat? An ropui loh avangin mite ngaihsan leh ngaihven atan a hming tal an tiROPUI a, an ti-SUPER ta vel ni.

Heti vel hi kan dinhmun a ni a, phu lo leh phak lo lutuk chunga SUPER hming lo puttir tum ve sek ţhin hi chu a zahthlak; thil zau zawk thlirmite leh ngaihtuah peihte nuih kan tiza tam mai mai dawn niin a lang. Amateur level-a mahni leh mahni ‘SUPER’ tia lo inkoh hi chu a hnam ang pawha inbawlna chu a ni deuh lo maw?

(Comment tam tak chhanlet nan ka’n edit belh lawk ang e. “Mizoramah chuan ‘SUPER’ an ni mai alawm,” te in han ti thla rawk a, Mizoramah chuan ‘SUPER’ an ni pha em tih pawh in la ngaihtuah tel lo cheu em ni aw ka ti!

‘SUPER’ chu chungnung bik, midangte aia ţha bik leh filawr bik sawina a ni a, ‘Mizoram Super Model’ a nih chuan Mizorama model awm zinga chungnung bikte thlannaah pawh lo ngai ta ila (in hnialna ang zulzuiin aw..), model zinga ‘SUPER’ thlanna a ni meuh em?

AIH!

80’s velah Miss Mizoram te chu an lo thlang tawh ţhin a, Mizoram huapa Model thlanna tak chu 2008 (?) kha a hmasa ber a ni hial ang. Chu model thlanna hmasa ber hmingah chuan ‘MIZORAM SUPER MODEL’ maw?? Nuih a tiza tlat..

Mizoramah hian model nei ve nual ta ila, veng tin aţang emaw, khaw tin aţang emaw an model-te chu inelin, kan Mizoram MODEL-te rau rau aţang chuan a ţha bik, a chungnung bik thlanna awm leh ni ta se, chumi hmingah chuan ‘MIZORAM SUPER MODEL’ ti ta ni ila, kan model-te zing aţanga SUPER thlanna a ni thei ang a, a zia deuh pawh a la awm. Chu pawh keini hnam bil chauhin hria ila, hnamdang hriat lohah a rûk deuhin a hming khi sawi ila a la ţha hial àwm e!

Chutih laia model thlanna vawikhat kan buatsaih dék dék a, ‘SUPER MODEL’ han tih nghal rikngawt mai chu, Thangkura Drama-a Churchuha’n zawhna zawh ţan nan, “A zawhna pasarihna atan chuan…” a rawn tih nghal rikngawt te nen pawh khan a dik loh dan a thuhmun thei hial àwm e a!)

Author : Sailo Khawma   &nbsp

Advertisements

About Mizo Archive

I'm the one who collect the best writings of Mizos
Aside | This entry was posted in Fifth Column, Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s