Facebook Chanchin. Compiled by: KC Lalruatdika

Khawvel pum huapa Social Network lian ber facebook dinchhuaktu Mark Elliot Zuckerberg-a hi May 14, 1984 khan White Plains, New York ah Juda chhungkua atang a lo piang a, naupangtê a nih atangin computer programming lamah a tui hle a, engemaw dinchhuah a, mi pakhat nih tum tlat mi a ni. Philips Exeter Academy-a lehkha a zirlaiin apa hnuaia thawkte’n awlsam taka an inbiakpawh theihna tur programme a siam a, a pate office hian an hmang tangkai hle. A pate tana software a siam hnu lawk hian game pakhat Risk a siam leh a, chumi hnuah music player Synapse a dekchhuak leh a, miin rimawi a ngaihthlak ngun deuh deuh he player hian a lo chhinchhiah a, a ngaithlatu mizia a chhut chhuak thei nghe nghe.

Microsoft leh America On Line (AOL) chuan leisak a, an hnuaia thawk nghal turin an sawm a. Mahse an sawmna chu hnawlin Harvard University a zawm ta zawk a ni. He University-a a kallai hian Zuckerberg-a hian facebook hi a tinung tan a, hei hi february 4, 2004 mai kha a ni. Facebook tih hming hi an school-a zirlaite leh staff te profile ziahna paper sheet hming a lakchhawn niin an sawi. A tir chuan The Facebook tih a ni a, mahse Kum 2005 khan a hming bula article “the” hi an paih.

Engkim chu tluang takin a kal purh purh bik hauh lo, facebook an siam hnu niruk chauh ah Harvard University-a a zirpui senior students Cameron Winklevoss, Tyler Winklevoss, Divya Narendra te’n an thian hova idea an neih chu facebook dinchhuah nan Zuckerberg a’n a hmang an rawn ti ve ta! An sawi dan chuan HarvardConnection.com chu facebook hian a entawn a an idea zawng zawng a hmang a ni an ti.

Mahse March 28, 2007 khan hmalakna mumal awm lovin an thubuai chu tihtawp a ni. An la duhtawk mai lo; an tanna ngaia tangin US District Court, Boston ah thubuai thar an siam leh a, July 25, 2007 khan thubuai sawina hun hmasaber hman a ni a, June 25, 2008 khan facebook chuan Dollar maktaduai 65 chawiin thubuai chu a titawp ta a ni. He case-ah hian ConnectU lam hian college-a a kallai a lehkha eng engemaw an phawrh nasa hle a, college alumni magazine-ah Zuckerberg-a chetdante an ziak chiam a, hei hi Zuckerberg-a’n hrethiam lovin thubuai a siam ve leh a, mahse college alumni magazine hi thiam chantir an ni.

Kum 2004 March thla khan Zuckerberg-a leh a roommate Dustin Moskovitz te tang dunin facebook chu an vawrh lar ta vak a. Stanford, Darthmouth, Columbia, New York University, Cornell, Brown, Yale, MIT, Boston University, Canada leh United States-a University-a zirlaite hman theihin an han dah chhin a, a hit kher mai. Heng University-ah te hian facebook account neilo an awm lo tih ngam a ni. Tichuan, September 2005 khan khawvelin a hmelhriat ve tak tak ta a. Mi tupawh kum 13 chin chunglamin an hman theih turin September 26, 2006 khan an tlangzarh. Chuti chung pawh chuan May 2011-a ConsumerReports.orgin a sawi danin kum 13 hnuai lam facebook hmangtu maktaduai 7.5 lai an tling. Kum 2011 March thlaa a report danin facebook hian nitin account 20000 chuang an delete thin. Heng account an delete sak hote chu kum 13 hnuai lam leh diklo taka hmangtute an ni.

Facebook hi a tirah chuan a changkang mai bik lo. Mark Zuckerberg leh a thian Eduardo Saverin (business aspects), Dustin Moskovitz (programmer), Andrew McCollum(graphic artist) leh Chirs Hughes te nen nasa taka an thawh hona a zarah, September 6, 2006 khan events, birthday reminder, profile changes te hi hman theihin an dah a. August 22, 2006 ah notes, tags leh programme dang an belh leh a, 2007 February 8 khan thiante hnenah man chawi a thilpek thawn theihna an siam belh leh. May 14, 2007 vek hian marketplace an tlangzarh a, May 24, 2007 tho khan facebook chhungkuaa programme chi dang deuh siam theina tur a din a, facebook platform an ti a, khawvela computer thiam tam takin an rawn bawh ta a, facebook chu chawp leh chilhin a hausak belh zel a, kar khat chhung lekin tlawhtu maktaduai a nei nghal ta der mai. July 2007 khan member te’n an duhzawng an post theihna tur Wall an siam leh a. November 6, 2007 khan social advertising system an tih mai Beacon chu a tlangzarh leh a, site dang daihah facebook chu en theihin a awm leh ta a, facebook a mahni thiante nen lei tur leh hralh tur a inhriatpawh theih a, a fuh leh pek kher mai. Tichuan, April 7, 2008 ah tuna chatting kan hman hi an siam. July 20, 2008 ah tho facebook beta hi an tlangzarh, link dan theihna hi June 13, 2009 ah dahin, email address @facebook.com hi November 15,2010 ah an tlangzarh.

Thlalak dahna pawh hia tirah chuan album khatah thlalak 60 chauh a dah theih a, May 2009 khan album khata thlalak 200 leng turin an siam tha. Google leh Yahoo lam pawhin Facebook hi Zuckerberg-a hnenah lei an dil a, mahse lei tura siam a nih loh thu-in a lochhang.

Social Media Today in a sawidanin 2010 April thla khan US mipui zaa 41.6% te khian facebook account an nei. May 2011-a a landan chuan US atang thla tin mi maktaduai 138.9 in an tlawh ziah bawk. Hnathawktu pawh mi 2000 chuang neiin Menlo Park, California, US ah tunah hian headquarters an nei. An headquarters hmasaber chu Palo Alto, California, US ah a ni. Facebook in a report dan chuan 2011 January thla khan facebook hmangtu hi maktaduai 600 an ni tawh. Miin an hriatbelh zela nitin tlawhtu an tam telh telh bawk.

Facebook hmangtute pundan Wikipedia in a tarlan dan chuan August 26, 2008 ah maktaduai 100, April 8, 2009 ah maktaduai 200, September 15, 2009 ah maktaduai 300, February 5, 2010 ah maktaduai 400, July 21, 2010 ah maktaduai 500, January 5, 2011 ah maktaduai 600 an ni tawh. Kan sawi hmaih hauh loh tur chu facebook hian PC Magazine award “Top 100 Classic Websites” 2007 khan a dawng a, 2008 khan Webby Award “People’s Voice Award” a dawng bawk. The New York Times in 2010 April-aa tarlan danin facebook hmang nasatu ramte chu:- United States, United Kingdom leh Indonesia te an ni. US hian an hmang nasa ber a, Indonesia hian a dawt. Chutiang khawp chuan miten hmang nasa in lar mah se heng Pakistan, Syria, Republic Of China, Vietnam, Iran, Uzbekistan, Saudi Arabia leh Bangladesh ah te chuan hman an khap ve thung.

A chhan chu he website hmangtute hian an duh duh anmahni page bikah an dahluh theih avangin copy rights leh intellectual properity rights bawhchhiatna a tam vang a ni.

He company hi 2008 kuma an chhut dan chuan dollar maktaduai 300 vela hausaa ngaih a ni. October 1, 2010 khan Mark Zuckerberg-a hringnun behchhan film, The Social Network chu tlangzarh a ni a, Mark Zuckerberg-a lem hi Jesse Eisenberg-a’n a chang a, David Flincher-a’n a direct. Ben Mezrich-a’n kum 2009 a Mark Zuckerberg-a chanchin a ziahna bu “The Accidental Billionaires: The founding Of Facebook, A Tale Of Sex, Money, Genius and Betrayal” tih behchhana thawnthu siam a ni.

Advertisements
Aside | This entry was posted in Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s