FRENCH PRESIDENT MACRON A LAR CHHO ZEL :”MAKE OUR PLANET GREAT AGAIN”-Macron

US President Donald Trump-an “Paris Climate Accord” an chhuahsan tih a puan hnu lawkah French President Emmanuel Macron (39) chuan Twitter-ah “Make Our Planet Great Again” tih ziakin, hei hian France ram chu nasa zawkin global leadership la turin a tho chhuak mek tih entirnaah an ngai.

President Macron hian American Environmental Scientist leh Researcher te chu,”Paris-ah lo kal ula, i thawkho zel ang u” tiin a sawm bawk.

June-1 a US-in Paris Climate Accord-inremna an chhuahsan tih an puan chu sawiseltu an tam nuai nuai hle. He climate change-global warming danna tura inremna ziak hi khawvel ram 200 dawnin an rem ti a, Syria chuan tualchhung indona chhuan lamin a tel ve lova, Nicaragua pawhin an ram chu thli leh leitawlh etc vanga chhiatna avangin an tel lo bawk. Tihian he Paris Climate Accord ah hian US, Syria leh Nicaragua ram te chauh an tel ta lo a ni.

President Macron hi naupang mahse, a aia upa daih President Trump, President Putin leh President Erdogan of Turkey te nena an inhmuh tumin tlang hrek hrawkin a ngaihdan tum tlang tak chu a hrilh vek a; an kuta chibai an inbuk dan pawh France ram chanchinbu leh TV te chuan an tarlang nasa thei hle. Liberation Daily chanchin chuan Macron chu fakin, “A hun taka thusawi, tlang hrek hrawk, zam hauh lo, huaisen bawk si” tiin a ziak hial.

President Trump a thutlukna siam, Paris Climate Accord chhuahsan chungchang chu demtu ram tam hle mah se, a Cabinet zinga pakhat Scott Pruitt, Chief of Environmental Protect Agency chuan, “US hian Paris Climate Accord kan chhuahsan vangin ngaihdam dil emaw, thupha kan chawina tur a awm lo. Co2 reduction turin kan thawk nasa tawh a ni. After all, We’re United States…” a ti mai.
Scott Pruitt chuan, “Tihian kan ram dinhmun tur sawi turin, inbiakna dawhkan kil turin kan awm a ni” a ti.

He Paris Climate Accord ang chuan US khuan ram rethei zawk te chu climate change-global warming ven nan UN kal tlangin US$ tluklehdingawn 3 lawih a pek turin, President Obama khan a lo rem ti tawh a, US $ tluklehdingawn 1 chu sem ral a lo ni tawh a ni. Hetia an chhuahsan takah chuan US$ tluklehdingawn 2 chu a hum zui tihna.

Environmentalist hote chuan khawvel sik leh sa danglam nasa lutuk vangin, kum 2020 chhovah chuan Southeast Asia leh Sub-Saharan Africa ramah mi 250,000 zetin thih phah turin an chhut a ni.

Paris Climate Accord hi tunah US-in chhuahsan mahse, an inremna thutlung lo ziak Article 28-ah chuan kum 3 hma lamin an inhnuk dawk (pulling out) thei ang tih chauh a ni a, Nov 3, 2020 ah chauh a nihna takah chuan an chhuak fel thei dawn tihna a ni a; chu chu US Presidential election hun a lo ni leh tawh ang. He Paris Climate Accord hi Nov 4, 2016 atanga hman tan chauh kha niin, 2015 kumah inremna hi ziak fel a ni.

President Trump chuan he inremna anga hmalakna hi fair tawklo tiin, “US chuan kum 2025-ah job maktaduai 2.7 zet a hloh phah dawn a, US economy in a chhiat phah dawn a ni,” tiin, “Paris mipuite tan ni lovin, Pittsbugh mipuite tana thlan ka ni” a ti a nih kha. Tunah US Solar Energy company ah mi 373,000 hnathawk an awm mek.

French President Macron hian June 11-18 ah khian National Assembly/ Parliament inthlan a hmachhawn dawn a, hetah hian a lamtang emaw, ama party din, tun hnaia mai a mi “La Republique En Marche” din chu an chak ngei a ngai a ni. A boruak hi a tha chho rih hle a, Ipsos poll ah chuan, parliament seats 577 ah 395-425 a la thei mai awm mange a ti hial. 577-ah 289 a lak pawhin chak takin sorkar a khalh thei dawn a ni. France ah khuan President-in a mi duhzawng Prime Minister/Cabinet a ruat thin a ni.

Author : Ct Lalrinawma    

Advertisements
Aside | This entry was posted in World News and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s