REAL MADRID DUODECIMA CHHEHVEL by Mamuana YZgoal

Real Madrid in Cardiff-ah Juventus chu 4-1 in an hneha, European Cup atanga UEFA Champions League an tih hnua he Title humhim thei hmasaber niin, ‘Duodecima’ (European champion vawi 12-na) an tlin ta der mai. Goal tam zawk mahse, 1998 final (RM 1-0 Juv) kha a tluk lo emaw ni (??).

Khami tum han sawi takah chuan, star player duhawm tak takte leh an huhang bakah, tactical indona tih vel ai mahin, goal awmchhun thuntu, Montenegrin striker Pedrag ‘Pedja’ Mijatovic ka hrechhuak thin.

Pedja sawi takah chuan, R.Madrid tana Barcelona a hmachhawn hmasak ber tuma, a fapa Andrija thihna kotlanga a din lai pawha Club tana a inpekna ropuizia kha ka hrechhuak lo thei lova. Khatihlaia Vanglaini-a ‘Soccermania column’ a ka ziak leh, a hnua The Y2GOAL mags.a ka ziah lo chhiar fuhte pawh, tun hnuah hian ka tawng zauh zauh!!

Kum 32 (1966) lai an ban phak tawh loh hnua R.Madrid ho European Champion nih lehna hmasakber, 1998 kha an club history-a an huntawn pawimawhber pawl niin Ka ngai a. Khatihlai khan an crest-ah ‘Kraws’ chuang mahse ‘KrawsHnehna’ ah an puang kher lova, nimahsela ‘Modern day R.Madrid’ indin chhohna lungphum niin ka ngai!! (Kraws tihlan leh lan loh te hi Kristian or Muslim sakhua chungchang nen thuk taka inzawm a neih thu hi khawvel media lamah in lo hmu tawh bik em aw?).

‘Pedja’ MIJATOVIC???
Tribal (Cuce) rawlthar kum 18 Pedja hi 1987 FIFA World Youth Cup-a Yugoslavia an champion tum khan, goal 3 thunin an ramah a larin, club lian hovin an inchuh nasa hle a. Buducnost atangin an ram club lian Partizan in an la zui thuai a, 1993 khan Spain panin, Valencia a zawm. Heng lai hian Interior designer lar tak, Belgrade socialite Elena Karic nen an inkawpa, fapa Luka leh Andreja te neiin, an inthen a ni.

‘MODERN DAY’ REAL MADRID LUNGPHUM
Zoram buai tirh atanga kum 32 chhung khan R.Madrid chu European champion an ni miah lova. 1990s chawhma lamah an hmelma kumhlun Barcelona hnungah, club lian lem lo Dep.la Coruna, Betis etc. tenen an inchai tawk viau mai a, sum lamah pawh an pachhe hle. Kum 10 lai Club President Ramon Mendoza chu a hnuaia Director Lorenzo Sanz chuan Nov.’95 inthlan khan a paih a ni (Lorenzo te hi football chhungkua niin, a fapa Francisco leh Fernando (RM Academy chhuak, 1st team ah season 3) leh a fanu-pasal/makpa pawh Michel Salgado)Sanz chuan R.Madrid tungding leh turin theihtawpin a bei nghal a, a hova Summer transfer period hmasaber(1996-97 dawnah) ah Italian coach ropui Fabio Capello bakah, star player – Seedorf, Roberto Carlos, Panucci, Bodo Illgner etc.te an signa. Sanz hian (khatihlaia) “Ronaldo aia tha zawk” a tih Mijatovic leh WYC ’87 teammate Davor Suker te chu ama pawisa in a lalut bawk!! (an hmelma kumhlun Barca paw’n Ronaldo, Blanc, Couto etc.bakah tuna an coach kalchhuak ta Luis Enrique (R.Madrid atangin) te an la ve nual bawk).

SEASON BULTAN CHHIA
1996-97 season ah sumseng hnember R.Madrid hian bul tan chhe hle. Mahse reiloteah laktharte leh lo awmsa-Raúl, Hierro, Zamorano, Redondo etc. te boruak tha chhovin, hma an sawn hret hret a. Season chanve hma deuhin R.Madrid hian hmahruaitu niin, an lehpelh tak Barca chu Home-ah an mikhual dawn a, chak lo zawk tan Title banphak a har turzia te hriain, chakzawk nih ngei tumin an inpuahchah ngawrh dun hle.

MIJATOVIC CHHUNGKAW HARSATNA
Mijatovic hian Madrid a zawm tirhin (nupui then hnu) a fapa kum 2 mi lek Andreja chu hydrocephalus (thluaka tui awm) natna vei tih hriatchhuah a ni a. ‘El Classico’ a khelh hmasakber tur bakah, La Liga title a lak theihna hun remchang hmasaber tur (Pawisa ni lovin, Title duh vanga club lian zawm a ni) niin, inbuatsaihna hun vawrtawp a thlen laia, a fapa in zaipui a tawk tur chu lainat a hlawh hle!!

Pedja chuan damdawiinah a fapa chu zankhuain a awmpui ngat ngat a. A tuk khua a var a, hahchawlh tum reng reng lovin, Training centre-ah a va thleng hlawl!! Coach lar zingah rau rau pawh, strick em em, discipline ngai pawimawh rumruta lar Capello meuh paw’n “Hetah engatinge i rawn kal??..i fapa thihna kotlangah a awm a, (nupui nei lo/then)chhungkaw uap lum tur ber i ni lawm ni??? Va haw la, i chhungte va thlamuan ta che…” a ti hial a.

Nimahsela, Pedja chuan ngawi rengin a boot a bun a, thahnemngai takin a training zawk ta tauh tauh a. Hei hian supporters te beng thleng thuai a, an rilru a hneh tak zet zet a ni!!

Inkhelh hun a thleng ta… Capello paw’n Pedja chu First XI-ah a telh a, Suker nen goal thunin, 2-0 a chakin a khel tha tak zet zet a. Mins.12 a la awmin Pedja chu lakchhuah (sub) a ni a, khelmual a chhuahsan lai hian, Madridistas mipui nuaikhat chuangin “Andreja, Andreja…” tia au rualin, Santiago Bernabeu chhung leh chhehvel a thangkhawk rum rum a… Touchline-ah Capello chuan lo dawngsawngin, a lo chibai laiin Pedja’n a mittui a hru fap fap kha chu…a hmun leh TV-a hmutute mittui pawh a ti tla nasa ngei mai!!

Inkhel zawhah Dressing room-ah an captain chhuanvawr, vawiin thlenga Madrid a la awm mek Fernando Hierro chuan ama jersey no.4 ngei mai chu hlan pahin, inkhel zawhtak chu Andreja hnenah a dedicate thu bakah, “Andreja chu a lo len deuh hunah, he kawr hi i lo pe ang a, tun game chungchang hi i la hrilh dawn nia…” tiin a chah a, Dressing room boruak pawh a hnim nghulh niin an sawi. He season hian Pts.2 a Barca khumin, Primera div. ah Campiones an ni.

Andreja hian zai a nih hnu hian tha/harh chho mahse naupang hrisel lo tak a ni a. 2009 khan zai a tawh leh hnuin a boral thu Real Madrid website-a tarlan a ni!! Hierro thuchah kha tihlawhtling hman tak maw???

Sanz a lungphum hi 2000 a Prez. thar Florentino Perez chuan tuaihnumin, sum tam tak sengin “Los Galacticos” a din a. He ‘galaxy’ a player chhuanawm tak tak an lakluh theihte khawnkhawmin- Zidane, Ronaldo, Luís Figo, Beckham, Cannavaro te’n Raul, Roberto Carlos, Casillas etc.te an han chawih kha chu, an nep lovee!!

1998 UCL FINAL :
Kum 32 lai an banphak tawh loh European champion nih tumin R.Madrid hian UCL 97-98 chu an khela, an chetha chho hle. Final ah Juventus chu Amsterdam Arena-a entu mi singnga vel leh, TV atanga thlirtu khawvel mipui nuai sangnga vel hmaa sikhatin an hneha. Inkhel hmuhnawm taka goal hi, 2nd half ah Roberto Carlos-a pet chu Mark Iuliano chuan lo dang perin, Goal box kilah Pedja chuan nalh zeta goalie Peruzzi bumin a thun…
Chutah an Technical Box chu kung zungchala kawk-va chungin, 60 yards-a rawn tlan phei…thiante nen an inkuah… an chhungkaw boruak hre tan chuan an hlimawm dan a dangin, lungte pawh a tichhe hial a ni!!

Khatih laia, ‘Ka khawvel’ chu ‘Football’ hi a ni mai a. “Those few seconds after scoring were sheer happiness…I never felt such a feeling in my life, as a sportsman or as a person” titu Pedja aia, khatihlaia (memorable moment) dinhmun sang (it-awm) kha an awm bik kher lovang!!

Nimahsela, ‘Off the Pitch’ ah erawh chhungkaw harsatna lian tak an nei a. Mel sang chuang a hla, Spain ah a fapa kum 3 mi, Andreja chu hydrocephalus (thluaka tui awm) vangin natna khumah nikhaw hre lovin a mu mek a. European football ‘Biggest night’-a Greatest prize chu a pa kutah a awm tih pawh a hre si lo!! “The goal and the Cup are for my son, It is the most important day of my life” tih zui ngai hial khawpa dinhmun khirhkhan an tawk erawh chu, an lainatawm tak zet zet a ni.

HUN HNUHNUNG…
Pedja hian 2004 ah Football chawlhsanin, Player Agent a ni zuia. Personality tha leh sang tak niin, 2006 a RM President thlanthar Ramon Calderon chuan an club-a dinhmun sangber pawl- Sporting Director ah ruatin, kum 3 a chelh hnuah a bang a. Chelsea in Director of Football Frank Arnesen an ban khan, a aiawh turin an la dawn emaw tiin thuthang a awm hman. Football khawvel-a Transfer zinga mite barakhaih ber zinga sawi, striker turu Samuel Eto’o an Inter Milan atangin, khawvela footballer hlawh hnember ni tura FC Anzhi (Rus)-a pan tuma, an indawrnaah khan FC Anzhi aiawhin a tel ve tlat bawk!!

BULTAN THATE@1997
BALLON d’Or FIFA World Player of the Year (Ballon d’Or) thlanah, 1997 kha a danglam khawp maia, Top 3 te kha an Club thar tana an season khatna theuh zuk nia! Pakhatna Ronaldo kha Barcelona in PSV atanga an leithar niin, Valencia atang RM leithar Mijatovic chu pahnihna niin, Bordeaux atanga Juventus in an lak Zinadine Zidane chu pathumna a ni.

Advertisements
Aside | This entry was posted in Hriatzauna, Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s