KA PI TAWNGTAINA AW NEM CHU

Ka pain sikulah zirtir hna a thawk a, ka nuin kan lo a enkawl bawk a. Ka tetlai zawng zawnga min awm a, min enkawltu ber chu ka pi kha a ni.

Kan kawmchhakah hian amah ang rual vel nupa rek hi an awm thin a. Zanah min pua a, ka pu nen leng chhovin an titilaih laih thin a. A changin card an deng a, a chang leh radio ngaihthlak pahin tuibur an zu a. An inkawmna sirah, an meizuk khu luih luih karah ka lo tal tlei ve thin tih ka la hre ruai ruai thei.

Ka ril a tamin chaw min fah a. Ni ka vui zawh hma atangin, ka mut a hun chuan kan infiam laklawh lai te hi tap tuar tuar chungin min pua a, nau awih hla sa chungin min awi a,rei lo te ah ka muhil mai thin a ni a ti. Ka suakpak zual chang chuan “Muhil thuai thuai la, i mutthilh ve leh kawmchhakah kan leng dawn nia.” tiin min thlem a, vawikhat pawh min thlem hlawhchham ngai lo niin a sawi.

Unau zinga upa ber ka ni a. Ka nau te an buchip zual lai chuan ka pi leh pute bulah ka mu thin a. Ka pi khan Chhurbura te, Raldawna leh Tumchhingi te, Chemtatrawta te, Rimenhawihi te, Mauruangi thawnthu te a sawi a, ngaihnawm ti takin ka lo ngaithla thin. Thawnthu a sawi zawhah uluk takin min tawngtaisak a, Isua thuawih naupang fel ka nih theih nan te, nu leh pa thu ka awih theih nan te, Aganwadi a mi seh ka hrat tawh loh nan te a dil a, a tawpah kan Amen rual thin.

Ka leikang deuh a, kan inbul lawka sikulah ka kal ve a. Tunlai angin mid-day meal a awm lo a, chhunah mahni in theuhah hawin kan inhnawhpuar mai thin. In thlen ve leh kapi nen inbul huanah kan kal a, kawlthei, sertawk leh theihai te kha a awm awm a hawlh thla a, keiin ka lo chharkhawm a. Chu chu chawtlang nen, chi nen min paitir a, lungawi takin chawhnu tan hmain ka kal a, sikul bulah thiante nen kan ei za thin a ni.

Primary school naupang ka nih lai atangin Bible min chhiarpui nasa a, bible milembu nen tangkawpin, ka hriatthiam phak turin Isua naupan lai chanchin min hrilh thin a. Pathian thuawih Josua leh Abrahama te, mi huaisen lalnu Estheri chanchin te ngaihnawm takin a sawi a. Hriselna tha ka neih theih nan te, lehkha ka zir peih nan te, sikula mi velh ka hrat tawh loh nan te min tawngtaisak a, a tawpah kan Amen rual thin.Middle school ka kal chuan ka nau nen ka pi te khum bul chiahah, khum hrangah kan mu ve tawh a. La naupang viau mah ila chhungkuaa harsatna engemaw a awm chuanhrethiam rual kan ni ve tawh. Mi chhungkua ang bawk in kan chhungkuaah pawh nu leh pa inkar te, nupa inkara thu inhmuh loh chang te a awm thin a, rilru tina ngawih ngawih thei tawngkam chhakchhuah chang te pawh a awm thin. Mahse zan a lo nih chuan muthmuna ka pi tawngtai ri ka hre ziah tho a. A tawngtaina thu te chu hre kim vek thei lo mah ila, kan ina cheng zawng zawngte hming lamin malsawmna min dilsak thin tih ka hre thei. Uluk takin ka lo ngaithla kar a, a tawngtai zawhah rilruin ka lo Amen pui thin.

Zirna avangin Aizawlah, hostel-a ka awm bo hnu pawhin, exam chawlh karlaka ka haw chang te hian hun remchangah ka lu chunga kut nghatin min tawngtaisak thin a. High school naupang ka ni tawh a, kan zirna lam chu sawi thui tur a hre ngai hauh lo. Mahse thildang zawng aiin nun ka hloh mawlh mai kha a hlau thin a, rilru leh taksa thila thlemna chi hrang hrang hneh zel thei tura chakna min dilsak thin a ni.

College ka kal laiin kum 50 chuang teh meuh a kawppui tawh ka pu in a boralsan a, kei chuan a tuar nat dan tur ka hriatthiampui pha ngai lo. Tumkhat chu room-ah amah chauhin a lo awm a, ka pu damlaia an thlalak thenkhat te, ka pu samkhuih te, a lukhum leh thildang dang te chu khumah a lo rem tlar thap mai a. Min hnungchhawn zawngin a thu a, a bula ka va kal pawh chuan min lo hmu lem lo. Ka pu nena an hla duh em em thin “Ni tla ngai lo Zion khawpui” tih chu zawite a sa in thlalak te chu a enkual a, a thunawn pawh a sak zawh hmain dan rual lohin a biangah mittui a rawn luang a. A mittui vanga a khawhmuh fiah lo ruai karah chuan ka pu thlalak chu a kut vuai vek tawh chuan a chul a, ngawi rengin a tap zawih zawih mai a ni. Khati tak maia ka pi lungchhe lai kha ka la hmu ngai lo. Ka hamhaih vek mai a, rei pawh en thei lovin room atangin ka chhuak a, ka tetlai atanga bang lova min tawngtaisak thintu ka pi tan ka tawngtai ve ta thung a.

Zirna avangin inah awm tam lo mah ila, ka haw chang chuan a khawhar hnem turin a bulah hun hman tam hram ka tum thin a, a lungngaihna leh lunglenna te chu keia hnem phak leh thiam rual a ni si lo.

Ka hna vangin hmun hrang hrangah ka awmkual a. Ka kalna apiangah ka pi tawngtaina chuan min zui reng thin. A beng a that vak tawh loh avangin ring taka biak a ngai tawh a, a mit lehlam in khua a hmu tawh lo bawk. Phone a kan inbiak apiangin a tawngtai thin a, hriselna tha ka neih zel theih nan te, nupui tha tak ka hmuh theih nan te a dil a. A taksa bawrhsawmin natna chi hrang hrangin tlakbuak thin mahse a vui ngai reng reng lo. Kum tamtak kaihruai a, hmangaihtu tu leh fa engemawzat a pek avangin Pathian hnenah lawmthu a sawi hlauh zawk thin.

Ka nupui neih niah chuan rei lo te kan inhmu zuai a, “Mambawih, nupui i van nei hmeltha em em ve le” tiin hlim takin duhsakna min hlan a. Mipui hulum a zawh vak tawh loh avangin rei pawh meng peih lovin a mu thuai a, muthmunah kan nupa tan a tawngtai zui ngei ang tih ka ringhlel lo.

Kan inah chuan YMA thalaite’n “Ni tla ngai lo Zion khawpui”tih hla chu mawi em emin an sa a, kan bulah la awm se ka pi pawhin a lo zawm ve ngei ang le.

Ka pi room chu ka’n enkual thin a, kan tan bang lova a tawngtai thinna, mu chunga Pathian a biak melh melh thinna khum chu a ruak tawh a, kan chhungkaw tan a tawngtai tawh ngai dawn si lo.Natna leh harsatna awm tawh lohna hmunah, a hmangaih Isua leh ka pu nen thlamuang takin an leng za ang tih ka ring a. Khum bulah chuan thingthiin ka tawngtai a, ka lu chunga kut nghata min tawngtaisak thin tu ka pi kha la awm se chuan, ka tawngtai zawhah a rualin kan Amen leh ngei awm si a.
_________________
He thu hi
Daddy doesn’t pray anymore – Chris Stapleton.
hla behchhana ka pi chanchin ka ziah a ni.

Author : Lalramenga Hmar    

Advertisements
Aside | This entry was posted in Thu Ngaihnawm and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s