US-IN SYRIA INDO THLAWHNA SU-22 A KAPTHLA TAWP :MIDDLE EAST BORUAK A LUM ZUAL TAN TA

June 18, 2017 tlai lam khan US indo thlawhnaUS F/A-18 E Super Hornet chuan Syria indo thlawhna, Russian siam SU-22 jet fighter chu Raqqa chhim lam Rasafah hmunah a kapthla tawp a, pilot chin hriat lohvin a bo va; SU-22 jet hi a chhe hneh hle. US Central Command chuan he thil thleng hi Russia hrilh nghalin, “US leh a thawh puiten Syria sorkar chu kan bei lova, mahse, US thlawp helhote erawh venghim turin hma a la a, a la zel dawn bawk a. He Operation Inherent Resolve atana hmalaknaah ‘de-confliction zone’ velah fimkhur tur a ni” tih a hrilh.

Syria chuan US thiltih dan chu na taka demin a sawisel nghal a, “Keinin ISIS kan bei a, US leh a lam tangten min bei thung si a ni” a ti. Washington chuan, “Keini pawhin ISIS hneha ngam zel tur chauhvin kan ralthuamte kan hmang a ni. He thil thleng hi mahni invenna thil chauh a ni” a ti thung.

Tunlai Middle East bial chu boruak a tangin, a lum up up a ni ber e.

Raqqa chhim lam Rasafah leh Tabqa hmunah hian Raqqa lak tumna vanga hliam tuar, Syrian Democratic Front sipai (Kurdish) hnam an tam hle a, chungho chu him zawka sawn chhuak tura tiha motora an phur chu Syrian military jet hian a rawn bomb niin an tarlang.

US military chuan Syria chhim lam, Jordan ramri hrulhah High Mobility Atillery Rocket zsystem (HIMARS) a bun rup tawh a, hei hi Russian Foreign Minister Sergey Lavrov chuan thil tullo tak a ni, a tihsak nghe nghe. He lai hi Iran indo thlawhna lo thlawh kual zuai zuaina niin, insai palh awm thei hle tura ngaih a ni. I arpui no nei lai tlat dial dial laia a chung lama mupui lo thlawk duai duai fo chu, engah nge sairukherh hum a, saihlum nena i perh loh bik lem ang le?

US Air Force indo thlawhna te hian boruakah chiang fek fawkin, hmelma indo thlawhna dang hi an kapthla mai mai bik lova, lei lam atanga thupek hmuh vanga boruaka han kah thlak ang chu a awm nual tawh thin a, hetianga boruaka mupui ang maia leng duai duai leh Vamur anga leuzek zek inkahthlak tawnna hi a tam lem lo. Kum 1999 khan Yugoslavia ram keh chhia, Kosovo leh Serbia inbeih chiam tum khan Kosovo hmunah US jet fighter F-16 Fighting Falcon chuan Serbian indo thlawhna, Russia siam MiG-29 chu a lo kapthla tawh bawk. Air-to-air killing hi a thleng zen zen lo a ni.

Tin, Gulf War lai khan US Air Force thlawhna pahnih F/A-18’s ten Iraqi-Saddam Hussein a indo thlawhna MiG-21chu boruakah reilote dogfight an neih hnu lawkah, a lo kap darh chhak tawh bawk. Nimina Syria rama thil thleng hi khami hnu lama Middle East biala air-to-air killing awm lehna hmasa ber a ni. Eng boruak tak thleng zel ang maw? russia lahin a thlawhna kahthlakna chhuanvawr SAM-400 te pawh Syria ah rawn chhawp lut hreh dawnin a lang lo.

Kum 1982 khan Lebanon War ah Syrian SU-22 leh SU-17 leh SU-20 jets te hi an hmang lar hle thin. Sukhoi jet hi Russia chuan ram dangah a hralh chhuak nasa hle a ni.

Heng SU-22 jet fighters te hi Syria chuan a hmang nasa hle a, kumin April thlaa Khan Seikhoun leh Idbib hmuna nerve gas-agent hmanga anti-Assad regime forces te beihna pawh kha SU-22 jets hi hman a ni. A tukah President Donald Trump chuan heng laia SU-22 fighters dah thatna lai hi vau deuh nan tiin, Tomahawk bomb/missile 59 zetin a vawm tir a nih kha.

Pentagon chuan Operation Inherent Resolve ah heng F/A-18E Super Hornet indo thlawhna te hian ral beih hna (combat mission) an thawk ber a ni, a ti. Military Analyst te chuan Trump Admin chuan ISIS an beihna an hneha an tawp hunah Iran hi a khuai nuai dawn niin an ring

Author :    

Advertisements
Aside | This entry was posted in World News and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s