Tawngtaina Thiltihtheihna

🏵🥗🏵

GEORGE MULLERA TAWNGTAINA
.
Pathian rawngbawlna kawnga mi hrah khawkheng George Muller-a khan engkim mai hi tawngtaina hmangin Pathian a hrilh a, lawmthu hrilhin a manganna apiang Pathian hnenah thlenin a chhanna hmuh ngei a beisei tlat thin.

Nitin Bible chhiarin a tawngtai thin a, kum khatah Bible vawi 4 a chhiarchhuak ziah. A tawngtai chhannate chu a diary-ah a chhinchhiah thlap zel a, a diary-a a chhinchhiah danin a tawngtaina hmuh theihin Pathianin vawi 50,000 chuang a chhang a, heng zinga vawi 30,000 zet chu darkar 24 chhunga Pathian chhanna a hmuh te an ni.

Tum khat chu a fahrah chawmna ina tui tih lumna (Boiler) chu a chhe hlauh mai, khua lah chu a vawt nasa mai si a, tui lum tel lova han khawsakna chi zia zang a ni lo. Muller-a chuan Pathian hnenah thil pahnih a dil ta- 1) Boiler siamtu tur ten zankhuaa chawl lova hna an thawh duh nan 2) Khua a that theih nan. A tuk zingah chuan khua a rawn tha ta uar a, thli lum a rawn thaw zui ta bawk a!! Chumi tlai chuan a siamtu turte an lo kal a, hna hmanhmawh thlak a ni tih hriain an hotupa chuan a mechanic te chu chawl lova siam char char turin thu a pe a, zankhua chuan an thawk a, darkar 30 chhung chawl miah lova an siam hnuah an siam that a a ni!

Tuk khat chu Muller-a leh a fahrah chawmte chuan chaw eitur an nei lo va, a leina an nei hek lo. Naupang ho chuan riltam takin an tukthuan eitur an nghak thap thung a, an lainatawm hle. Mahse, Muller a mangang lo, a biak Pathian a hrechiang. Naupangho hnenah chuan, “Naute u, hei in sikul kal a hun dawn tawh a nia,” ti a chunglama ban pharin, “Ka pa, tukin zingah hian eitur chaw min pek dawn avangin kan lawm e,” tiin a tawngtai ta a.

A tawngtai zo chiah tih chuan kawngka rawn kik an awm; Chhangurtu!!

Chu pa chuan, “Pu Muller, eitur in nei lo ni a ka hriat avangin nizan ka mu thei reng reng lo mai a, zing dar 2-ah thovin in chhang ei tur ka lo ur sak che u a sin,” a ti ta mai! Muller-a’n chhangurtu lawmthu a hrilh zo chauh tihah chuan kawngka kik thawm a awm leh; Bawnghnute semtu!

Muller-a fahrah enkawlna in kawtah chuan bawnghnute phur tawlailir hi a lo chhia a, a tawlailir siam tha tur chuan a bawnghnute bur a tihruah a ngai! Muller-a naupangte chu a bawnghnute phurh chu a pe ta vek. Ei tur an neih loh tukah an tlaiin an puar.
.
Vawikhat chu Atlantic Ocean-ah SS Sardinian lawngin an zin a. Tuifinriat laili a an thang lai chuan chhum chhah tak hi a zing mup mai a, lawng pawh a kal chak thei lo. Muller-a chuan chu lawng captain Joseph E Dutton-a hnenah chuan Australia-a Quebec khawpuiah rawngbawlna tur pawimawh tak a neih avanga a hmanhmawh thu a hrilh a, mahse, ‘fimkhur a ngaih vangin tlan chak chi a ni lo’ tih chu a chhanna dawn a ni.

Chutah Muller-a chuan lawng captain hnenah lawng pindan Chartroom chu Pathian hnena chhum kiang tir tura dil nana hman a dil. Captain chuan ‘hun khawhralna mai mai’ ti nuah nuah chungin Muller-a chu room chhungah chuan a zui lut ve a. Muller-a tawngtai zawhah captain pawh chu a tawngtai ve a, mahse Muller-a chuan chu Captain chu ring tak tak lo chunga a tawngtai avang chuan tawngtai ve lo turin a khap a! Chartroom atanga an chhuah leh hnu chuan chhum chu a lo kiang ta a ni.

Tawngtaina hian thil a va ti thei em!

(Pathian hian kan tih theihloh ti turin min phut lo; a harsa chin chu ama’n a ti thin. Tawngtai chu mihringin a tih mai theih a ni a, a harsa lai, a hlawhtlinna chu Pathian kutah a awm thin.

Advertisements
Aside | This entry was posted in Pathian Thu and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s