BIBLE-AH “HLAU SUH” TIH HI VAWI 365 A INZIAK EM? by Dr John Hlychho

1. THUHMAHRUAI
Hnamdang te hi an ni ve em, ka hre chiah lova. Mizote hi kan thil hriatchian lem loh sawichhâwng chiam țhin leh a sawh-khâwk pawi zia hre lova sawidarh/thehdarh vak vak ching kan niin a lang. Hei hi, Facebook leh Whatsapp vêla kan thu post duhdân ațang hian a chiang tawk hle.

A châng chuan, mahni chan atâna kan duh miah loh tur nisi kha, a chhe zawngin tute emaw chanchin dik lo tak tak, an tâna pawi êm êm tur leh an chhiatna tur thil kan thehdarh chiam țhin.

Khawvêla mi-ropui leh mi-langsâr ten dâwt an sawi a, thil râpthlâk leh thil pawi nasa tak a khawih chungchang-te pawh kan hria-in ka ring (See “The Top 20 Biggest Lies in History,” & “The Top 10 Biggest Lies in History,” etc.).

A pawi ber chu, anmahni tân chauh khân chhiatna leh zahna a thlen lova, pawisawi lo midangte tân thlenga chhiatna a thlen ta kha a pawi ber chu a ni! Chuvangin, i hriat chian loh leh a dik ngei a ni tih i finfiah loh chu sawi mai mai suh la, sawi chhawng mai mai bawk suh. I tân leh midang tân pawi nasa tak a thlen thei a ni.

2. PULPIT AŢANG CHUAN DÂWT SAWI LÛL SUH!
Thuhriltu tam tak chuan, ngaihtuah chiang hauh lovin, “Bible-ah hian ‘hlau suh’ tih hi vawi 365 a inziak a (a țhen chuan Leap year kum chhiar telin ‘vawi 366 a ni’ an ti thung). Hemi awmzia chu, ‘nitinin, Pathianin hlau suh’ min ti a ni. Ringtute hi hlau tur kan ni lo” tiin dâwt hmangin Pathian thu sawi rinawm an tum țhin.

Pulpit ațanga sawi mai kan duh tâwk lo niin a lang. Kohhran Hruaitute pawhin, “’Hlau suh’ tih hi Bible-ah țum 365 awmin sawi a ni” tiin, dik an tih thu an nemnghehna ni ngei tur chu Kohhran Thuzir-ah meuh an ziak lang ngat ngam a ni!!!

Ka rilru-a Zawhna lian tak lo awm ta chu, “Bible-ah hian ‘Hlau suh’ tih hi vawi 365 a inziak ngei a ni tih an hrechiang em?” tih leh, “Hrechiang lovin an lo sawichhawng ve mai mai tihna em ni ang?” tih hi a ni.

3. BIBLE-AH VAWI ENG ZÂT CHIAH NGE INZIAK?
Ka phâk tâwk leh thiam tâwkin, Bible-ah hian ‘Hlau suh’ tih hi vawi 365 a chuang ngei em? tih hriat tumin, kawng hranghrangin ka chhui ve a. Keima mimalin ka chhuina ațanga ka finfiah hi a rintlâk ber ang chu ka ti hauh lo. A chhan chu ka hriatna leh thiamna, leh ka tih theih tâwk hi a beitham êm a ni.

Amaherawhchu, ka hmuh phâk chinah chuan, “Hlau suh” tih țawngkam ngial-ngan mai ni lovin, a țawngkam hnai-vai deuh ang chi, tum thuhmun leh huang khata dah theih tur ang chi țawngkam hrim hrim (Fear, in all of it’s forms), Entirnân, hlauhawm lo, zâm suh, râpthlâk, thlamuang, zâm,hlau, etc. tih țawngkam zawng zawng-te ka belhkhâwm pawhin, 314 vel chauh a ni thei hrâm a ni.

Tichuan, Bible Translation hrang hranga “Hlau suh” tih țawngkam awm zât chu hetiang hi a ni.
NKJV- 103(1982), 129 (1979),
NIV- 66,
NASB- 107/127,
ASV- 148,
DBY- 155,
HNV- 44,
NLT- 38,
ESV- 137,
RSV- 139,
NRSV- 172,
YNG- 115,
WEB- 144.

Tin, Dr. James Strong, “Strong’s Exhaustive Concordance of the Bible” (Hebrew & Greek Dictionary) Lehkhabu țha leh ropui tak ziaktu chuan, Hebrai Bible leh Greek Bible-ah chuan, “Hlau suh” tih țawngkam chiah chiah hi chu, vawi 49 chiah inziak angin a târlang.

4. THE WICKED BIBLE-AH A INZIAK RENG ALAWM LE!!!
Kum 1611-a Bible chhuak King James Version 1611 kha, Kum 1631 khâan, London khawpuia “the Royal Printers” (Robert Barker and Martin Lucas) te chuan, chhut-nawn (reprint) an tum a.Vanduaithlâk takin, Thusawm Pêk (Exodus 20:14)-a “Thou shalt not commit adultery” (I uirê tur a ni lo) tih laiah hian “not” (a ni lo) tih hi an chhut hmaih (omitted) palh ta hlauh mai a. Tichuan, “THOU SHALT COMMIT ADULTERY” (I UIRÊ TUR A NI) tiin an print ta a nih chu!!!

He thil tihsual pawi tak hi hriatchhuah a nih veleh, Charles I leh George Abbot, the Archbishop of Canterbury, te chuan, Bible chu lakhâwm a, hâl turin thupêk an chhuah ta nghal a. Tam tak an hâl a.

Mahse, an hâl loh țhenkhat chu, New York Public Library-ahte, Dunham Bible Museum (Houston, Texas)-ah te, The British Library (London)-ah te, Blood Exhibit (Gadsden, Alabama)-ah te, leh Cambridge University Library-ah te hmuh theihin tun thlengin ala awm a ni.

Tichuan, kha Bible KJV 1631 (1611) kha, The Wicked Bible, Adulterous Bible or Sinners’ Bible (Misuaksual Bible, Uirê Bible, Misualte Bible) tia hriat rêng a ni ta nghe nghe a ni.Tichuan, he KJV 1631 (1611) ah hian, “Hlau suh or Hlau lo or Hlauh nei lo” tih țawngkam hrang hrang te belh-khâwm chu – 365 a awm ve ta tlat mai le!!! A dik lo ber, an duh lohva an hâl tak, vawiinah chuan Ringtu/Kohhran-in a hmanzui tâk loh Bible ngei chu a a teuh ber chu a ni ta a nih chu!!!

Tunlaiah phei chuan, KJV 1611 edition hi chu hmuh tur a awm tawh lova, an hmang tawh lo hrim hrim. He KJV 1611-a “Hlau suh” tih lam hawi vawi 365 a awm theih dân chu hetiang hi a ni. Fear not – 169, Be Not Afraid – 79, Have no fear – 25, Shall not fear – 55, Do Not Fear – 37, Total – 365.

Amaherawhchu, kan sawi tawh ang khân, Pathianin amah ringtute hnêna, “Hlau suh” a zuk tihna țawngkam ngialngan emaw, a chiah chiah emaw, ni lovin, “hlau suh, hlau lo, hlauh nei lo, etc.” tihna, țawngkam hrang hrang-te belhkhawm mai kha a ni tih hre rêng ila.

5. TLÂNGKAWMNA
Bible chuan, “Dâwt in hrilh tawn suh u. Dâwt sawi bânsanin, mahni țhenawm hnênah thudik tak sawi țheuh rawh u,” tiin min hrilh a. Lal Isua pawhin chiang takin min hrilh a, “Dâwthei-ten Pathian ram an luah lovang” a ti tawp mai a ni (Eph.4:25, Col.3:9, Thup.21:8).

Kan Pathian thusawi tihngheh nân dâwt sawi a țul lo, Dâwt kan sawi hian kan tân leh a ngaihthlatute tân thil țha lo tak a thlen thei a, a hlauhawm hle zawk a ni tih i hre-nawn leh ang u.

Chuvangin, Ringtu (Rawngbawltu, a hnârkai chin-te tân phei phei) chuan, Bible min zirtirna hi i ngai pawimawh ang u, “Mi tupawhin thu a sawi chuan, Pathian thute angin sawi rawh se… Chutichuan, Isua Krista avangin Pathian chu thil engkimah chawimawiin a awm thei ang” (1Pet.4:11).

Author : Dr. John Hlychho    

Advertisements
Aside | This entry was posted in Pathian Thu and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s