VANRAM FAN THU by R.Lalhmunsanga

Ka vanram fan dan hi mi tute emaw fan dan chu a ni lo mai thei. Zel angin ka awm lo va, vantirhkohten ka banah min kai hek lo, eng deuh pup pawh ka hmu lo; mahse, ka fang ve miau si a ni.

Ka thleng chho ve deuh tawp mai. Vanram chu rangkachak leh lunghlu-a cheimawi a lo ni lo chu ka lawm; ka thil ngainat em em a ni lo a, lo nise nuam ka ti dawn lo em mai. Tin, an lo zai char char hauh lo kha ka lawm viau bawk. Leiah mah zai nin ruk tawh nak a laiin.

Kan thenawmpain vanramah chuan chawl lovin amah fakin kan zai char char anga. Riltam reng kan hre tawh lo vang, kan zai puar dawn a ni, a lo tihte chu tih mai mai a lo nia. Riltam hnua tui taka thil ei nawmna te kha a lo awm vek zawk. Zai puar ringawt chu a ho dawn riauva ka lo ngaihna chu vawilehkhatah min lak kian sak duak. Riltam takin leia kan ei aia tui tui kha ka han ei a nih kha, ei tam avanga over-weight, BP sang leh pum nuam lo a awm ve der si lo. Vanrama chaw ei chu nuam tak a ni. Tin, zai reng ringawt bik lovin kan awmdan khan Pathian kha a lo chawimawi em em a ni.

Ka vanram fanah chuan khawvela kan awm laia kan suangtuahna leh duhthusam ang deuh hian kan lo awm a. Hmana boral tawh, ka hmelhriat pakhat pawh a thih hmain a lo piangthar a niang, ka hmu tlat. A damlaia thenawmte ram nek reng renga hun hmang thin kha a ni. Vanramah chuan Pathianin ram zau tak, a mit tlin tawk aia zau daih hi a lo pe nia, a enkawl lamah a indaih lo lutuk kha mi pawh a lo be lumlam hman meuh lo. Vanram kai ka han hmuhah chuan ka lawmpui ber awm e.

Phairama seilian, tlangram mawi ti em em te chu an suangtuahna aia nuam zawk tlangram nuam em emah an lo awm a. Chutiang bawkin tlangrama seilian, phaizawl nawm hmel ti em em te pawh phaizawl cham duai, phaitualhnim leh pangpar chi hrang hrangin a bawhna hmunah chuan an lo awm ve thung. Rangkachak ngaina deuhte pawh rangkachak khawpuiah- awrh bawk, beh bawk leh bun chungin an lo awm.

Lirthei leh in leh lo ropui ngaina leh awt em em te pawh khawvela an hisap aia nalh leh nuamah an lo awm a. Kan kawmthlang tleirawl, a damlaia bike lawm leh proton ring ngaina em em pawh Pathianin bike chak leh proton ring zet mai hi a lo pe; mahse, a ri kha ama tan chauh a ring a, a bul vel ami tan erawh rimawi nalh deuh ang hi a ni mai.

Chutia ka hawi kual vel lai chuan tuikukpa hian min rawn bia,”Ka pu vanram chu nuam khawp mai, keima mitthlaa Aizawl awm aiin nuam daih zawk, thosi awm lo, vaihmite pawh awm lo, rawtuai pawh khawrh ngai lo reng reng,” a rawn ti phar phar.

Hmana kan venga vai thirchhe zawng, ILP neih loh avanga an um hrep tawh pawh a lo lang hlawl. A damlai khan Kristianah a lo inpe hman a niang. Hlim taka min rawn en pahin,” ILP ngai lo, khitah pawh, khutah pawh, sawtah pawh keimah duh duhnaah kal thei,” a rawn ti ham ham. A vun rawng pawh a la tak tha; mahse, a han avang chuan lungawi lo hmel a pu lo. Tin, a damlaia a kawr ngainat leh a hak deuh reng- kamis eng pit piar, ban sei zit set leh kekawr mar tang, tlangarh deuh kha a la ha, vanram kai zawng zawng thawmhnaw var veka inthuam tur anga ka lo ngaih chu ka ngai dik lo hle. Kan ngainat zawng apiang kha kan nei thei zawk a lo ni.

Hmundang fang leh tura ka intintuah mek lai chuan, ngai teh aw chuan,”A pa i e kham dawn tawh em? Ka pum a na vek tawh a nia,” a rawn ti. Chu aw chu ka fanu aw ngei a ni. Ka e mek tih ka inhrechhuak, ka ke mu churh churh atang chuan ka e kham tawh tih pawh ka hre nghal mai. Tichuan, suangtuahnaa ka vanram fanna bual pindan chhung atang chuan commode thawhsan tual tual chungin khawvelah behlawi rep hmeh leh turin ka kir leh ta a.

Author : R. Lalhmunsanga    

Advertisements

About Mizo Archive

I'm the one who collect the best writings of Mizos
Aside | This entry was posted in Thu Ngaihnawm and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s