ZÂWLAIDI KAN TIH KHA A LO DIK LO TIHNA EM NI? by Dr. John Hlychho

• Bible in zawlaidi a tih hi engnge ni?
• Zawlaidi nge Ramhmul damdawi.

1. THUHMAHRUAI
Vawiina kan zir tur hi mi țhenkhat chuan, an lo helh leh mai thei. Hmanniah pawh Bible Lehlin fuh tâwk lo deuh siam țhat a ngaih thu ka sawi kha.

Mi pakhat chuan, “Mizo Bible sawichhia, Kohhran do, Kohhran khei leh kher, Kohhran chhiatna lai zawng char char” angah min lo puh a. “Kohhran ațanga chhuak a, Pâwl dang din turin min ti hial” nia mawle!!!

Bible Lehlin țha ber pâwla ngaih, KING JAMES VERSION 1631 (KJV 1611 Reprint)-ah khân, “UIRÊ RAWH” (Ex.20:14)tiin an ziak kuau mai!!! An tihsual hrechhuakin, Bible chu anla-khâwm a, an hâl deuh vek a! Mahse, pawi a khawih nasa hman hle.Tun thlengin hmuh tur ala awm bâkah, mi tam takin, kha Bible (KJV 1631) kha “UIRÊ BIBLE,” “MISUAL BIBLE,” “MISUAKSUAL BIBLE” (Adulterous Bible, Sinner’s Bible, Wicked Bible), tiin, diriam takin an ko nawmnah phah a ni.

Bible diriamtute leh ko nawmnahtute hi pawng huat ngawt chi an ni lo. A bulpui leh a chhan ber zâwk chu, KJV 1631 Chhuahtu (Publisher)-te thiam loh a ni tlat alawm. Engah nge, “Uirê rawh” tia an lehlin (dah) teh rêng ni? Lehlin sual leh lehlin dik loh hi a pawi a ni!

2. HANG THEM NOT LET THEM GO!?
Thawnthu-a an sawi țhin kha kan la hre âwm e. Governor chuan, Rûkrûk leh Tualthah thu-a an man, an khaihlum tur zinga, a Unaupa chhanchhuah tumin, Thirhrui, “HANG THEM NOT, LET THEM GO” (Khaihlum lovin, chhuah zalen rawh u) tih chu ziakin, a thawn tir a.

Thirhrui Thawntu chuan, “comma” (,) inziakna lai chu a lo copy sual a, “HANG THEM, NOT LET THEM GO” (khaihlum rawh, chhuah zalen suh) tiin a thawn ta a. Roreltu-in Governor thirhrui a lo hmuh chuan, thupêk angin misualte chu a khaihlum ta a ni. Comma (,) awmna lai tur a dik loh avângin thil pawi tak, thihna hial a thleng ta a ni!

Kan ramah hian, Kristian inti-te zinga rin-hranna hrang hrang leh Liberal theology (Bible dal taka pawmna) a awm tam viau-na chhan hi, kan Bible Lehlin chiang tâwk lo, ngaih-sual theih tur, ngaihbelh sual leh kalsual-pui theih tur awm nual hi a chhan bulpui ber a ni thei ang em? tih hi Zawhna pawimawh tak a ni.

3. “ZÂWLAIDI” TIA INZIAK HI A DIK ANG EM?
Mizo Bible-ah, Gen.30:15-ah leh Hla.7:13-ah “Zâwlaidi” chungchâng hi kan hmu a. A inziahna lai dinhmun (context) en hian, Mizovin “Zâwlaidi” kan tih nên chuan thil hrang daih niin a lang ta tlat mai!! Hei hi Mizo Bible Letlingtu leh kan Kohhran-a Pathian thu lama mithiam-te (Theologian) hian an hre lo nge, an hmuh-hmaih hlauh nge aw???

Hla Thlankhâwm-te 7:13, “Zâwlaidi hlovin rimtui a chhuah” tia inziak pawh hi, a sawi tum chu, “Zâwlaidi hi a rim tui thu leh, a rimtuina a chhuah thu” lam hawi a sawina niin alang.Tin, helaia “Zâwlaidi” anga inziak hi Mizovin “Zâwlaidi” kan tih leh kan sawifiahna nên chuan chuan thil inang lo tak a ni leh bawk a ni.

He Bible chang 2-a “Zâwlaidi” tia kan Lehlin (translate), he țawngkam (Zâwlaidi) hi chu a ngaihsual theih viau dâwn a ni tih kan hriat a țha hle awm e. Kan Bible ngei pawh miin an hmu khawlo theih phah dâwnin alang. Engtin nge kan tih ang, engnge i ngaihdân le?

Zâwlaidi hnathawh kan hriat dân ber pawh, Tlangvâlin amah duh hauh lotu Nula a ngaizâwng a. Nula chu a induh-tir theihna tur hmanraw awmchhun chu, Zâwlaidi a ni. Zâwlaidi hi a hnawih (tâh) tûr chi leh in tûra telh chi a awm ni-âwm tak a ni.

Chutianga miin Zâwlaidi a hman chuan, âtchilh leh thihpui khawpin hmangaihna leh duhna kha a thawk ta țhin a ni awm e.A chunga kan sawi tâk ang khian, Mizovin, “Zâwlaidi” tia kan hriat hi chu, ramhuai hnathawh nêna inzawm (demonic control/connection, etc.) emaw, dawi lam thil nêna inkungkaih leh mitdawihvaih lam tel (witch craft, evil/black magic, etc.), chutiang lam nêna inzawm leh inzûlang chi hi Zâwlaidi leh a hnathawh kan ngaihdan tlângpui niin alang.

Gen.30:15 & Hla.7:13-a Mizo Bible-a “Zâwlaidi” tia kan dah hi, Hebrai țawng chuan, “DŪḎĀ’ÎM” a ni a. Rakili’n a laizawnnu Leaii hnên ațanga a dil chhan, a context en hian, “fa neih theihna tûr kawnga țanpuitu Ramhmûl damdawi (Fertility plant or Medicinal plant. Plant used as medicine that people believed helped a barren woman become pregnant) a ni” zâwkin a lang.

Hmânlai chuan, fa neih theihna atân a rah emaw, a bâl emaw, an ei țhin a (used by the ancients as a means of promoting child-bearing).Tun thlengin Arab ho khuan an la hmang zui zêl niin an sawi. A rim hi a nâ viau na a, a rimtui a, rimtui siam nân te pawh an hmang bawk.

MIZOVIN “ZÂWLAIDI” KAN TIH HI CHU DAWI LAM THIL NÊN-A INZAWM A NI A, FA NEIH THEIHNA TUR ATÂN KAN HMANG NGAI LO. CHUVANGIN, HEB. “DŪḎĀ’ÎM” HI MIZOVIN “ZÂWLAIDI” KAN TIH NÊN CHUAN, THIL INANG LO TAWP, THIL HRANG DAIH A NI.

English Bible-ah “MANDRAKE” tiin an dah deuh vek a. English-in “Mandrake” or “Devil’s apple” (Mandragora autumnalis) an tih hi Dawi thiamna lam leh Dawi thil (witch craft, evil/black magic, etc.) nên-a inzawm a ni.Mythology lam ațanga a hming hi an chhawm a ni a, “chhiatna thlentu, mei tikangtu ramhuai tê reuh tê, Mandragora” angin an sawi țhin.

Tichuan, Ramhuai hnathawh leh Dawi lam thil nên-a inzawm anga an ngaih ve vâng nge, DŪḎĀ’ÎM chu English Bible-ah hian “Mandragora” (Eng. Mandrake, Gen.30:15 & Song.7:13) tiin an lo dah (translate) ve a. Hemi chungchânghi Secular Film, “Mandrake the Magician” & “Harry Potter” Thawnthu ah te pawh kan hmu.

He English Bible tihsual hi kan Mizo Bible Letlingtute thu lâkna hnâr (Lehlin sual chhan) a ni thei ang em? Hebrai/Aramaic Bible ațangin Letling ta sela chuan, DŪḎĀ’ÎM awmze dik tak (root-meaning) hi an hrechiang hle awm si a.English Bible ațanga an Lehlin avangin Mizo Bible-ah pawh hian an tisual ta a ni mai lo maw? tiin a ngaih-ruat theih a ni.

Mizo Bible-ah hian, “Zâwlaidi” tia kan hmang zui zêl dâwn a nih chuan, miin an ngaihdân tur leh an rilru-a a thawh dân tur hre rêng chungin, Bible zirtirna nên pawh a inrêm chiah ang em? tih thlengin kan ngaihtuah tel a ngai bawk ang.

Thlarau Thianghlim hming zinga pakhat Greek “ALLON PARAKLETOS,” Johana 14:16, 26, 16:7-a kan hmuh pawh, English Bible Lehlin zuiin, “THLAMUANTU” (Comforter) tiin kan dah ringawt a. Greek “ALLON PARAKLETOS” hi, a mala dah dawn chuan “SAWIPUITU” (Advocate) tih hian a hnaih ber a.

Hei hi a huam kim lo deuh nia kan hriat chuan, Greek țawng“PARAKLETOS” (advocate, mediator, counsellor, etc. another of the same kind) hi hman mai a him berin a lang.

Kan Mizo Bible Letlingtute khân, Hebrai Bible/Aramaic Bibleațang chuan Letling ta sela, “Zâwlaidi” tih lam hawi zâwng kher hi chuan an dah dâwn em ni? Thil intu lo lutuk leh min hruai-sual thei țawngkam a ni si a??? tih te hial ka rilru ah a awm a.Hei hi Hriat châkawm tak leh Zawhna lian tak a ni ta a ni. Thu hlui hre pha chin leh Ngaihtuahna zau pu pha chin ten lo sawi teh u.

4. RAMHMÛL DAMDAWI (MEDICINAL PLANT) A LO NI ZAWK ELO?!
Gen.30 & Hla.7:13-a “Zâwlaidi” tia inziak hi chu, Medicial Plant (Fertility plant) a ni a. Mizoramah pawh chi hrang hrang kan neih ang hi ni maiin alang. Thlai zingah hian, Mit tâna țha bîk, Kawțha lo tâna țha bîk, Pumpui tâna țha bîk, Cancer tâna damdawi țha bîk, etc. kan neih ang hi a ni.

Rakili’n a laizawnnu Leaii hnên ațanga a dil pawh hi, “Fa neih theihna tûra țanpuitu thlai chi khat (Fertility plant or Medicinal plant) a ni” a. Rakili leh Leaii-te chungchâng ațang ringawt pawh hian, Isrel fate khân an lo ngaisâng hle a, an hmang viau niin a hriat theih.

5. THU TLÂNGKAWMNA
Inkhâwm bâng, inchei tâwk tak pakhat chu, mi tamna laiah chirh-diakah tlu palh ta hlauh sela. Thawh tum lovin, chirh-diakah chuan mu ta rêng mai sela! Miin engang in nge an ngaih ang?

Pathian thu nung, kan thlarau lam nunna, Chatuan nunna (Lal Isua) kan neihna bul ber si, chiang lo leh fiah lova a awm a, kalsual-pui leh tlûk sual-pui an lo awm hian, Tunge mawhphur? Engnge kan tih tur? Dik thei ang bera Lehlin leh felhlelh deuh lai siam țhat zung zung hi kan tih tur pawimawh tak a ni dâwn lawm ni?

Tunlai ka rilru-a riak tlat chu, Tirhkoh Paulan, “Mi tam takin Pathian thu hi mite buma sumdawn nân an hmang…” (2Kor.2:17; cf. Lk.19:23, John 2:16) a tih angin, Rawngbâwlna (Lal Isua, Kohhran leh Bible) hi Eizawn nân, Sum hmuh nân chiah kan lo hmang rêng em? tih hi in-zawh ngai tak a ni ta!!??

Lal Isua leh Kohhran țanin kan bei nasa hle emaw kan ti ang a. Kan dinhmun leh kan thiltih (status, ministry & achievement)-techhuang takin, “Lalpa, I hmingin THU TE KAN SAWIIN, I hmingin RAMHUAITE KAN HNAWT CHHUAKIN, I hmingin THILMAK TAM TAK kan ti thin lovemni?…” kan ti de de ang a.

Mahse, Lal Isuan, “NANGNI THIL SUAL TITE U, KA HRE NGAI LO VA CHE U, KA HNÊN ATÂ HI KAL BO RAWH U” min rawn ti țhuai mai ang tih a hlauhawm hle a ni!!! (Matt.7:21-23).


Advertisements
Aside | This entry was posted in Pathian Thu and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s