CAG AUDIT REPORT TIH ARTICLE KHA~ Zoa Tlau

Vanglaini ni 23 June 2017 chhuak a article “CAG Audit Report” tih Dr Vanlaltanpuia, Pachhunga University College ziak kha ka lo hmu a. Mithiam leh puitling taka ngaihin party inchirhthehna lam tawngkam a hmang kha a mak ka ti deuh a. Thalaite a hruai sual ang tih a hlauhawm hle a ni. Zirna in zinga kan chhuanvawr PUC-a thawkte tan phei chuan fimkhur a ngai hle awm mang e ka ti deuh a, party politics-ah pawh tawngkam uluk tual tual a nih tawh lai hian. Kha a thu ziak ah khan thudik hlel deuh tak mipui pawh hruai kawi thei tur a awm nual avangin chhanna nilovin sawifiah ngai nia ka hriatte ka rawn ziak ve a ni e.

CAG report hi PAC-in a pawm nghal vek lo:
Comptroller and Auditor-General-in report a tichhuah reng reng ‘Public Account Committee leh Committee on Public Undertakingsten i he lovin an pawm thin’ ti hial in a ziaktu khan ropui tak main a rawn tarlang a ni. He a thuziak phei hi chu a uar mah mah zia chu chiang takin a lang nghal a, 2G spectrum allovation case-ah ngei pawh Public Account Committee nen nasa takin an ngaihdan a inang lo va. Public Account Committee Chairman MP K.V.Thomas meuh pawhin “the Comptroller and Auditor General should restrain from reporting notional losses and rather restrict itself to revealing financial impropriety” a ti hial a ni (link http://timesofindia.indiatimes.com/india/CAG-should-not-report-notional-losses-Public-Accounts-Committee-chairman-Thomas/articleshow/44954595.cms). Agusta Westland chopper deal te, Commonwealth Games scam te, leh NPA-te a CAG report hi Public Accounts Committee hian a sawisel a nih kha.

Article ziaktu khan CAG report te sawrkar laipui pawm thlap angin a ziak a, sawrkar laipuiin ‘scam’ lian a hmachhawn LPG subsidy leh thil dangte a hmachhawn mek a ni a. A pawm lo aniang an buai ve em mai.

CAG hian an huang lo nawra report an lo siam ve vak vak thin avangin inhnialna a hringchhuak thin niin a ngaih theih a, hei vang pawh hi a ni ang PAC Chairman khian CAG chu “national loss/hloh nia ngaih” tarlan vak vakte an tih tur a nih loh thu a sawi a. CAG Duties leh Power India Constitution Article 149 in a tarlan danah chuan Parliamentin a ruahman sak ang anga awm tur an ni a. Dawhkan atanga an chhut ve dan audit report a ziak vak lovin ‘financial impropriety / sawrkar sum diklo taka hman’ a awm leh awm loh en mai zawk chauh tur an nih hmel hle a ni.

NLUP PM Special Package a ni lo a tih kha:
Article ziaktu khian NLUP chu Prime Minister Special Package “a lo ni reng reng lo chu niin” a ti a. PIB Press Release 15 July 2010 kha kan enlet chuan, tun thlengin internet-ah en theih a ni. (link ah hian en rawh http://pib.nic.in/newsite/erelcontent.aspx?relid=63271). Hetah hian Cabinet Committee on Economics Affairs in NLUP a bik takin a pawm sak tih a lang chiang hle a, NLUP Management 3 tierstructure pawh an pawm tel nghal thu tarlan vek a ni bawk.

CCEA hi Prime Minister Dr Manmohan Singh a chair-na hnuai a neih a ni nghe nghe. Special Package nilo sela chuan Ministry emaw, Department emaw, Planning Commission level-a chinfel mai tur a nih hmel a, Prime Minister mai nilo Cabinet Committee meuh in a ‘approved’ a nih avangin ‘special package’ tih loh rual a nilo.Ziaktu khan NLUP chu ‘micro development’ anih avangin ‘growth’ tak tak petu a nilo tiin ‘Mico versus Macro Development’ tih chungchang a sawi naah a sawi bawk. Economic lam zir ve miah lo keini pawhin kan hriat vek chu macro development chu macro atanga tan lovin micro atanga tan tur niawm tak a ni a. Micro development infinkhawm khan macro development a siam mai tur a ni awm e. Micro ngaipawimawh hmasa lova macro development a direct nghal a nih chuan mirethei zuankhum policy a nih ngei a tul ang. Chutiang chu MNF policy thar SEDP-in a tum dante a nih hlauh chuan mirethei tahna thlentu policy a ni ngei mai dawn tihna a ni ang. Pu Tanpuia hi SEDP lam campaigner a nih bawk avangin SEDP hi miretheite tan a hlauhawm hle mai dawn a, mipuite a bik takin thingtlang lam mi te kan fimkhur a tha hle ang.

Per Capita Income pawimawhna leh Growth Driver Mizoram:
A mak lehzual ta ber erawh chu ram thanna chungchang a sawinaah kan Minister hming tha ber zinga mi Pu Zodintluanga’n Per Capita Income a san chhoh chungchang Varsity Platform 2017 a asawi a hnialna hi a ni. Pu Tanpuia hian Per Capita income tehfung rintlak loh leh technical lo mipui rilru dik lo zawnga kaihhruaina ang hialin a rawn sawi nghe nghe a ni! Chumi a sawi fiahna ah chuan Mizoram chu India ram State 29 zingah GSDP hniam ber a nih thu leh chu chuan kan economy than leh than loh a kawk mai e, tiin a sawi nghe nghe a ni! GSDP (actual size/amount) hi ram thanna tehfung atan an hmang ngai reng reng lova GSDP Growth Rate (kum hmasa khumna) zawk hi ram thanna tehfung atan an hmang thin a ni. Hei hi chu mimawl ber pawhin an hriat vek tur a ngaih a ni.

Entirnan, India hi ‘emerging economy / global growth drivers’ tih a ni a, ram dang (USA etc.) GDP chu a tam zawk si, GDP tam apiang ‘growth driver’ an ni tihna a ni silo! A chhan chu GDP growth rate (kum hmasa khumna) a san zawk avangin global growth chhutna ah kum hmasa khumna tisangtu chu kumin a growth rate sang ram te kha an ni ta tihna a ni. GDP sang ur mahse growth rate a hniam si chuan ram thanna tehna ah chuan USA chu growth rate a hniam avangin growth driver a ni ve ta lo a ni! Growth ratesang zawk India kha growth driver a ni thung. Chutiang chiah chuan Mizoram chu State dang aia growth rate a sanzawk fo avangin mimal tin thawhchuah chawhrual (per capita income) a lo sang chho ta a. India ram pum average a khum ta hial a (kum 2015-16 atang khan) chuvangin India Economy ah Mizoram chu Growth Driver dik tak a ni. Hetiang hi mi tupawhin kan hriatthiam vek a ni a. PUC Professor meuhin a hrethiam lo tlat mai hi a fel hlel hle a ni.

Ram changkan dan leh ram thanna tehfung technical lo a tih Per Capita Income hi ram hmasawnna tehna ber a ni zawk a, hei pawh hi a hre fuh chiah lo a ni. Entirnan, chhungkaw pahnih tehkhin nan hmang ta ila. Chhungkaw pakhat chu mi sawm (10) awmna a ni a. An chhungkua ah chuan hnathawk panga (5) zet awmin kum khata an sum lakluh pawh Rs 100000 theuh ni ta sela. Chumi chhungkua income pumpui (Gross Income) chu Rs 500000 lai tihna a nia. A tam khawp mai. An chhungkaw member sawm hnen a sem rual (Per Capita Income) erawh chu Rs 50000 tihna a ni ang. Chhungkaw dang leh ah thung chuan mi pahnih chiah an awm a. Hna an thawk ve ve a. An kumkhat lakluh pawh Rs 100000 ve ve tho a ni a. Chumi chhungkua income pumpui (Gross Income) chu Rs 200000 chauh tihna a ni a. A tam lo khawp mai. An chhungkaw member pahnih hnen a sem rual (Per Capita Income) erawh chu Rs 100000 lai a ni thung. Tu chhungkua nge changkang zawk anga awm nuamsa zawk ang le? Per Capita Income sang zawk apiang khi an awm nuamsa zawk dawn tihna a ni. A chhan chu chungkaw pahnihna khi chuan mimal tin tana sum hman theih (per capital purchasing power) chu Rs 100000 anih avangin Gross Income tam tlurh chungkaw member 10 awmna ai khian sum hman tur mimal tinah a let zet an nei bik dawn tihna a ni. Hei vang hian GDP (Gross Income) nilovin Per Capital Income hi ram changkanna tehfung pawimawh leh technical ber zawk chu a ni. Pu Tanpuia tehfung chu hmang ila a rethei zawk khi hausa zawk leh changkang zawk ah kan chhuah hlauh a ngai dawn tihna a ni. Kan Minister zahawm takin Per Capita Income pawimawh zia a rawn hre chat mai leh University zirlaite zingah hetiang fact leh figure rintlak thur chhuahna chang a hria hi alawmawm tak meuh meuh a, Per Capita Income en chat chat Minister te hi nei tam ila kan changkang chak fu ngei ang le.

He article hi inhnialna emaw Pu Tanpuia article chhanna emaw a nilova, mithiam zawka kan ngaih ten mipui diklo taka hruai kawi thei tur an rawn ziak tlat mai hi hriatthiam har ka ti a. Mimal in kheina lam nilovin, tun hnu zela mipui kan fimkhurna a nih hlauh takin tiin ka rawn tarlang ve a ni e.

Advertisements
Aside | This entry was posted in Hriatzauna and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s