ALEXANDRIA KHAWPUI TICHHETU LIRNGHING CHU by Shawn Chhangte

Kum 365 A.D. July 21 zing khawvar ṭantirh lai vêl khan lirnghîng na tâwk tak mai hian Rom lalram zau tak mai chu a sâwi harh a ni ber mai a. Tuipui hnuai thûk tak aṭanga lirnghing lo irh chhuakten an thawh ṭhin dan ang bawkin lirnghing mai ni lo, lirnghing avânga tuifâwn nasa tak lo awm ta chu mihring nunna te leh in leh lo chungah chhiatna rapthlâk tak a thlen ta a. Hetih hun laia mithiam leh kohhran inrêlbawlna lama mi hmingthang Saint Jerome-a chuan lirnghîng lo thlen hnua tuifâwn nasatzia chu “pathianin tui lo lêttir lehin engkim mai hi an nih dàn phung hmasa ang khan an awm leh hi ni ta berin a hriat a ni” a ti hial a. He tuifâwnin a khawih nasat lai ber hmun chu Sicily tuipui vaukam te, Greece (Grik) ram te leh Egypt (Aigupta) ram te an ni a. Sawi dàn pakhatah chuan Grik ram tuipui kama khawpui pakhat Epidaurus an tih chu tuifâwn lo ko phei búr búr hlauhna avângin mi thianghlim (saint) Hilarion-a hnênah ṭanpuina zawngin an tlân a, ani hi hetih hun laia puithiam leh thlarauva pathian pawl mi a ni a. Khawpuia chêng mipuiho chuan Hilarion-a chu tuipui kamah an hruai a, ani chuan ṭiauvut chungah Cross chhinchhiahna vawi thum siamin tuipui lamah a bán a phar chhuak a. Mak tak maiin tuifawn chu a zuai ta a, ani chuan a lu a bûk nghauh hnuin a kal kiansan ta a ni.

Mediterranean tuipui râl lehlama Aigupta (Egyptian) khawpui Alexandria lawngchawlhna hmun pawhin hê vanduaina hi a pumpelh bîk lo. Nile luipui phaizáwl thlang lam kila khawpui êng sút mai chuan tuifâwn avânga chhiatna rapthlâk tak lo thleng chu a lo tuar ta.

Lawngchawlhna (Harbour) zaupui mai te, khawvêla Library (lehkhabu dahkhawmna) hmingthang tak te leh In êng (light house) lâr êm êm avângte chuan Alexandria khawpui chu Greek leh Rom ram chheh vêl zawng zawngah sumdâwnna hmunpui leh hnamzia chherna hmunpui a ni hial a. Hê khawpui hi Alexander Ropuia khan B.C. 332 khan dinin hetih hun laia mithiam deuh deuh te chuan fuankhawm nân an hmang ṭhin a ni. Alexandria khawpuiah hian Euclid-an Geometry (Thil nih dàn phung tehna) lama a hmuh chhuahte chu B.C. 300 lai vêl khan a lo ziak chhuak tawh nghe nghe a, tin, Eratosthenes-a chuan lei pum pui len zawng a lo hisap chhuak tawh bawk a ni. Hê khawpui hi Cleopatra-in hurna lama mite a hruai sualna (Seduction) hmun leh phiarrûkna (intrigue) hmun a ni bawk a, chu thil avang chuan a tawpah mahni intihlumin Rom-ho chuan B.C. 30 khan an hneh ta a ni. Rom-ho awpbehna hnuaiah Alexandria khawpui hian politic lam thila a pawimawhna te chu lo chán tawh mah se mithiam filawr deuh deuhte chêttlatna hmun a nih miau si avângin Kristian hun hmasa lam kum zabi khatna lai vêlah pawh khan a pawimawhna chu a bo thei tak tak lo va. Kum zabi lina laihawl A.D. vêlah chuan Alexandria khawpui chu Kristiante ngaihtuahna rilru sawrkhâwmna hmunpui leh thurin vuan nghet tlattute leh zirtirna kal pensantute indona hmun a ni ta reng a ni (Heresy and Orthodox).

July thlâa vanduaina ni tûk tak mai a lo thlen chuan chutih hun laia chanchin ziaktu hmingthang Ammianus Marcellinus-a sawi dan takin, “Alexandria khawpui mite chu thil mak rapthlâk tak hian a rawn nghawr dawt dawt mai a, chu thil chu thawnthu mai leh thu dik tak kan lo ziah ṭhin te nên chuan inlaichînna an lo la nei ngai lo rêng rêng a, chhun nisat vânglai a her liam ṭan tihah chuan káwlphe leh khawpui rî nasa tak chuan hma hruaiin lei pum pui chu a nghingin a khûr ta dur dur mai a, lirnghing chu a lo ziaawm ṭan ta tihah chuan Mediterranean tuipuia tui tling cham put mai chu a chim chin vaukam aṭang chuan a inhnûk kiang duai duai ta mai a, chutih lai karah chuan tui thûk taka siamtuin tuipuia rannung chi hrang hrang khawmuala chêngte tana hmuh phâk ngai loh tura a lo thuhrûkte chuan chhiatna rapthlâk tak lo thleng tur hrilhlâwk ni awm tak hian tuipui tui ina a lo siam chirhdiakah te, tuipui chhunga tlang lo ding poh lurh mai pangahte leh phaizáwlah te chuan thi tur chalchang ni awm tak hian an tâl lawp lawp mai hlawm a. Chung rannungten ni êng an han hmu nghal ta thut chu leilâwta tlâk pil hlau ni awm tak hian an tâl buai phili ta hlê mai a ni.” Mi tam tak chuan chhiatna vawrtawp chu a kiang ta nia ngaiin chirhdiaka sangha tángte chu kut lawnga man tumin an zuk pan thla ta a.

Mahse, chhiatna vawrtawp chu a lo la kin awzawng lo mai le. Chutia tuipui tui han inhnuk tawm, tlang tiat tiata rawn invawrh lêt leh chuan a chakna leh thinurna hrikthlâk tum ni âwm tak hian khawpui chu a rawn hnâwl phei ta hum hum mai le. Ammianus-a sawi dàn takin, “Tuipui tui chu phuba lâk tum ni awm tak hian a rawn thawk ri hum hum mai a, chutah tuifâwn sosang han inhnûk lêt leh chuan khawmual leh tlángte chu phùl zinga thingluang lum thla ang mai hian a hrút mam hun mai a, in sak ropui leh lian tak takte chu arpui mei ang mai hian a hrút mám rual ta pút mai a ni. Tuipui tui hlâwm lian pui mai chuan a inhnuhkîr pahin mi sang tam tak nunna chu a chhat ta a. Sangha mantu, thil awmzia chhût thiamna nei lo deuh deuhte chu tuia tlahlum zingah hian an tel a ni. Khatia tuipui fâwn han inhnûkkîr leh kha a chak khawp a, Lawng lian (ship) te pawh chawikâng dawr dawrin In (building) la ding chhun chungah te a nghat a, ṭhenkhat phei chu khawmual mel 2 laia hla ah te a dah phei bawk a ni. Chumi hnua tuifâwn han inhnûkkîr leh chu a lo kian tawh hnu chuan lawnglian tam tak chu tihchhiatin an awm a, a chhunga hnathawktute pawh thi sain tuipuiah chuan a zangthal zawngte leh a bawkkhup zawngtein an lâng nuai nuai ta mai a ni. Lirnghing leh tuifâwn nasat avânga Alexandria khawpuia chêng thihna leh chhiatna tâwk zawng zawng chu mi 50,000 zet an ni.

Hun inher liam chho zela pathian remruatna lo thlen chhoh zêl dan mumal taka han chhûtin he chhiatna rapthlâk lo thleng pawh hi mihringte sualna nasat luat avânga hremna angah ngaih a ni a. Lirnghing hian mihringte mak tih khawp a rawn thlenin Rom lalram lo chuai chho mêk zelah chuan hlauhna a rawn thlen ta a ni. Mite chuan a hmaa chhiatna lo thleng chu an hrethiam tawh hlê a, tuna chhiatna lo thleng hi nakin hnu chhiatna rapthlâk tak lo thleng tur thlirlâwkna angin an ngai a ni. Alexandria khawpui leh In êng (light house) nghet taka sak chu an la ding reng tho va, a hnua a chhunga chêng ṭhangthar lo awm zelte chuan 365 A.D.-a lirnghing leh tuilianin a tihchhiatna hriat rengna Kûtpui chu kum tin an la hmang a ni. He chhiatna champhaphâk an hman ni apiang hian kum zabi 5-naa dàn hremi leh chanchin ziaktu Sozomen-a chuan, “Alexandria mite chuan khawpui pum pui hi an la cheimawi leh ang a, pathiam hnenah lawmthu sawina ṭawngṭaina an la hlàn leh ngei ang, tin, an khawpui dinthar lehna chu urhsùn tak leh ropui takin an lawm bawk ang,” a ti a ni.

Advertisements
Aside | This entry was posted in Thu Ngaihnawm and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s