Forensic files: Waste Mis-Management

Nu pakhat chu mak tak maiin a khuangcherbo ta tlat mai. A thiante chuan ningani ah an phone a, zirtawpni paw’n an phone leh bawk. Mahse a hnen atangin chhanna reng an dawng lo. Chin hriat lovin a bo pil hmak mai a ni. Detective te chuan a chenna apartment chu an va enfiah a. Mahse, detective te thlen ve hmain chu apartment ah chuan tu emaw chu a lo lut tawh tih erawh a chiang. Chu In-a lo lut hmasatu chuan CSI (Crime Scene Investigation, TV Serial ) a en hrat hle a ni ngei ang. Apartment-ah chuan Police te an kal dawn tih a hre sa a. A thil tih chu eng e a ni tih pawh a hrechiang. Policete chuan rinhlelh chu an nei ngei mai a. Mahse chu pa lah chuan a ka a ang duh der bawk si lo. Chu tualthattu chu mahni intunnun nan a biru a ni ngei ang. Police te’n mibo chu an hmu loh chuan tualthahna a thleng a ni tih finfiah turin an beih ve fe chu a ngai nei ang le.

Golden Gate Biak In, Forthworth, Texas a sunday inkhawm chu Glenda Forch-i nuna thil pawimawh tak a ni thin. He biak In-ah hian a nu pawh a tet te atanga biak in a lawi leh inkhawm thin a ni a. A pi, a pi pi leh pawh chutiang tho va biak in a lo inkhawm thin chu an ni. Chuvang chuan a tan chuan chu biak in chu pawimawh tak a ni reng a. Chtiang karah chuan Sunday tuk khat inkhawm tura Glenda-i a lo lan loh avang chuan a chhungkhat te leh kohhran member then khat te chuan “Glenda i chungah thil tha lo eng emaw a thleng a ni ngei ang” tiin an ngaih a tha lo hle a. An pastorin a sawi dan chuan Glenda chuan sunday inkhawm tura biak in a a kal loh tumin a inkhawm thei loh avanga pawi a tih thu sawiin phone a a lo biak thin thu a sawi a ni.

A chhungte chuan biak pawh tumin phone in vawi tam an call a. Mahse chhanna reng an hmu lo. Chuvang chuan Glenda-i fanu te zing a pakhat chu chinchang ngaihvenin Glenda-i chenna apartment ah chuan a va kal ta nghe nghe a. Apartment a va thleng a a thil hmuh/hriat hmasak ber chu Glenda-i car lo awm lo chu a ni. Kawngkapui chu a lo inkalh a. Glenda-i chu a lo awm hauh lo bawk.

Apartment chhung chu thawk ti harsa khawpin a lo lum a. AC chu herh thi sain a lo awm a. Duhthusamin a lum hi a ni ber. Chutiang boruak chu Pi Glenda-i khawsak thin dan nen thil inperhsan tak a ni bawk.

Glendai fanu chuan a nu chu a han au lauh lauh a. Chhangtu reng an awm lo. Chuvang chuan a nu chu khawiah emaw hun eng emaw ti chhung a tan a zinchhuak nihin a ngai a. Tichuan kawngka chu kalhin a hawsan ve ta mai a ni.

A tukah pawh chuan hnathawhna hmun a hnathawk tura Glenda-i a lan tak loh avang chuan a chhung te chuan Policete hnenah an nu bo thu chu an thlen ta a. Police ten Glenda-i apartment an va thlen chuan AC chu herh nun sain a lo awm a ni tih an va hmu a. Hai rual lovin tualthahna a thleng ngei a ni tih hriat theihna tur hnuhma an hmu bawk. Police te chuan a mutna pindan Carpet a thawmhnaw tih varna (Bleach) in a sehna hnuhma zau tak lo awm chu an hmu a. Glenda-i fanu in Police te a hrilh dan chuan a nu apartment a a va luh ni khan bleach rim a hriat loh thu a sawi a. Sarah Waters, Detective in a sawi dan chuan apartment chhungah chuan ngunthluk taka inchhung tifaina hnuhma an hmu a. Apartment atang chuam bungrua thenkhat Vacuum Cleaner, bawlhhlawh bawm etc te chu a bo bawk a. Carpet ah Forensic Testing an han neih chuan bleach a ni tih bak engmah hriatchhuah theih an nei lo. Thisen hnuhma awm ang reng hmuh an nei lo va. Tu emaw chuan ketze thla (fingerprint) tireh nan kawngkhar hawnna te, eng thununna hmehkhep te leh zem atanga tui siak chhuahna dawt (faucet) te chu a lo hrufai dim diam hi a lo ni a. Mahse, Glenda Furch-i chu khawiah nge a awm tak?

A chhungte chuan Glenda-i hmuh leh turin beiseina sang tak an neih a. An la beidawng mai bik lo. General Motors Assembly Plant a Glenda-i ruaitute chuan nilaithawhtan zanah hna a thawh ngei thu an sawi a. Zan lai velah Factory a chhuahsan thu an sawi tel bawk. Chhinchhiahna atanga a lan dan chuan chu mi hnu rei vak lo zinglam dar 12:24 ah Glenda-i chuan tuialhthei lei nan a credit card a hmang ngei a ni tih an finfiah a. Policete chuan tuialhthei a lei ngei a ni tih an hria achhan chu a credit card hmanga sum a khawihchetna hnuhnung ber a ni tlat a ni. Chumi hnu chuan tuman Glenda-i chu an hmu in a chanchin hre zui ta lo. Tuman Policete hnenah Glend-i mimal nun dan hrilh theih an awm lo va. A chhan chu a mimal nun chu mahni pual bikin a vawng tlat a. Tlangval lo lenvahpui (date) pawh ni se a chhungte zing atangin tuman tu nge a lenvahpui hming han sawi theih lah an awm hek lo. Police record an han hai chuan a bo hma kar lawkin Glenda-i’n 911 a call a ni tih an hmuchhuak a. Chumi tum chuan a hlauthawn thu a sawi a ni.

Kum 51 a upa Glenda Furch-i chu chin hriat lovin a khuangcherbo a. Forthworth hnuchhuitute chuan tualthahna a a tuartu zawk a ni an hlau hle bawk. Nu pakhat hnathawhna atanga in lama haw a ni a. Thil sual a tih ngai hriat a ni lo va. Nunphung rinhlelhawm a a khawsak lah hriat a ni hek lo. Chin hriat lovin a bo ringawt mai a ni.

Glenda-i hringnun chu a hnathawhna General Motors, a fanu te pahnih leh atute zingah a virvel hi a ni mai a. Atute a hmangaih a, biak In a inkhawm leh nu tam zawk chin dan angin bazar a ngaina a, chhungte bula awm a thlahlel hle bawk. Chungte chu a tana thil pawimawh te chu an ni mai.
Rinhlelh thei tur an zawnna lamah Investigator te chuan Glenda-i khan a bo hma kar eng emaw zah liam ta khan pawikhawihna tenau chungchangah Policete a phone a ni tih an hmuchhuak a. “Kar hmasa khan he pa hian ka kawngka a lo kik a ni tih ka report duh a. “Tu nge i ni?” tia ka zawh chuan thil min hmuhtir tur a nei tiin mumal lo takin min chhang a. Kei chuan, “Ni lo ve” tiin ka bengkhawn loh thu ka hrilh a. Ani chuan, Min lo ensak hram teh” tiin min ngen lawm lawm a. Pawnah dingin kawngka hawnsak turin min dil ngawih ngawih a ni.” tiin a thil tawn chu Police te a lo hrilh a.

Heng hunlai vel hian Fortworth khawpuiah mi In han inthawn ang chi hi a hluar hle a. Chungah chuan rukruin mi kawngka a kik a nih loh pawhin an tlawhchhe lui mai thin a ni. Mahse chung In zinga pakhat mah chu rawk an nih hnu a tihfai nghal an ni lem lo. Chuvang chuan Investigatorte chuan inrawkna leh Glenda-i khuangcherbona te chuan inzawmna an nei lo tiin thutlukna an siam a ni.

Chung hun lai vel chuan Glenda-i thenawm a khawsa te chuan Policete chu thu pawimawh deuh mai hrilh an nei a. Hnuchhuitu Sarah Waters-i chuan, ” Glenda-i apartment ep chiah a apartment a mipa la valai tak pahnih insuanlut lai kan hmu a. Anni chuan a hma Thawhtan zing dar hnih velah mihang mipa pakhatin Glenda-i apartment a ep chiah a motor pakhat lo inhung lam pan a kal leh a let leh lam an hmu thu min lo hrilh a” tiin rinhlelh tur an neih thu a sawi a. Chu car pianhmang chuan Glenda-i rangkachak rawng Mustang car pianhmang a mil chiah a ni.

Chutiang deuh chiah chuan thenawm pakhat zawk thung chuan an mi sawipa bawkin sunday zan a motor park-na hmun atanga rangkachak rawng mustang khalhchhuak a a khalh lut leh chhen a hmu bawk a. Thenawm dang pakhat pawhin thawhtan zing hma taka an mi sawi pa pianhmang nena in ang tak mipa pakhatin Glenda-i apartment a chhuahsan lai a hmu thu a sawi ve bawk a ni. Mit a hmutu in Investigatorte a hrilh dan chuan chu a mi hmuh lut a chhuak leh chhen chuan bawlhhlawh bawm lamah bawlhhlawh paihin a kal ni ngeia a rin thu Investigatorte chu a hrilh a. Chutianga ni eng emaw zah chhung lut a chhuak chhen ta leh hun rei tawk fang hmang ta chuan chunglai hmunhma vel chu a bel hle a ni loh pawhin chu In ah chuan hun eng emaw lai khan a cheng tawh ngei ang tih a rin theih a ni.

Evidence Technician te chuan bawlhhlawh bawm chu an han bun ruak a. Tichuan bawlhhlawh bawm a thil awm te chu an han chinglet ta a. Achhung a ip tam tham zet lo awm te chu hai darhin an han enfiah a. Chung ip zinga panga ah chuan Glenda-i apartment atanga lak bungrua te an lo awm a. Glenda-i chhungte khan thawhtan ah ni lovin thawhlehni khan policete kha lo call ni ta se chuan bawlhhlawh bawm kha thawhlehni zing ah kha chuan a ruak vek ngei tawh ang le. Chutiang chu lo ni ta se Finfiahna (evidence) pawimawh tak tak te pawh a bo vek dawn tihna a ni. Mahse a hun takah an lo hrilh hlauh a. Evidence te pawh chu a lo la awm thlap mai a ni.

Chung ip zing a pakhatah chuan Glendai’n nilaithawhtan ni a hna a thawh zawh hnua tuialhthei a thunna man pekna receipt a lo awm a. Chu receipt chuan Glenda-i khan nilaithawhtan zanah hun eng emaw chen chu in ah a awm ngei a ni tih a tichiang ta a ni.

Policete’n chutia bawlhhlawh bawm an han hai darh chuan finfiahna tha tak an hmu ta ah an inngai a. Chung ip ah chuan thei-tui inna um ruak leh bungbel i lo hrukfaina sahbawn tui bur ruak an hmu bawk a. Chuan Bleach bur ruak an hmu tel bawk. Ip dang leh ah chuan Glenda-i kawrthuah dul deuh hniang hnuang (blouse) a neih zinga pakhat an hmu a. Chu kawrthuah hnung lam chu thui taka zai thler chhoh a ni. Chumi atang chuan han ngaihruatin “Inkhuaikhemna a thleng a mi aw?” tiin Policeten chuan ngaihdan an neih a. Investigator zinga pakhat phei chuan a thian te bulah,”Hemi awmzia hi ka hrethiam chiah lo. Mahse a duhawm lo dawn tawp mai.” a ti hial a ni.

Investigatorte chuan chung ip chhung atang chuan hriat loh thil chhui chhuah theihna hmanrua (clue) dang an hmuh belh leh ta a. Thil eng emaw charna Duck Tape hman hnu leh la hman loh an hmu a. Electric hrui a valh/suih bilhbawlawkna awm leh infun thlap mai pawikhawih nana hman ni ngeia ngaih an hmu tel bawk a ni. A landan chuan tu emaw chuan chu duck tape leh electric hrui te hmangin Glenda-i chu chesawn thei lovin a siam a ni ngei ang.

Glenda-i apartment a kutze thla (fingerprint) an hmuh chhun te chu Glenda-i kutze thla vek a ni a. Glendai’n silai kawl phalna a dil tumin a kutze thla te chu chu a dilna lehkhaah a nemkai a. Chu kutzethla chu Policeten an kawl that avangin khaikhin harsa a ni lo. Glenda-i silai chu a apartment atangin a bo bawk. Hnuchhuitu tawnhriat ngah tak tak te chuan Glenda-i apartment thenfai a nih dan atangin tha eng tiang fakauh va tam sen ngai ang maw tih an ngaihtuah a. Engkim mai chu hruk fai han vek a ni. Bual In leh darthlalang te hi fingerprint awm duhna riau a ni thin. Mahse, bawlhhlawh them kai tak ngial pawh a awm lo. Chu misual chet danah chuan CSI (Crime Scene Investigation, AXN a serial an pek hi a ni mahna ) a en fo thin a ni ngei ang.

Pindan chhung chu ngunthluk leh fimkhur takin vacuum hmangin an han tihfai a. Policete chuan sam emaw lazai emaw finfiah tur a awm mahna tihin lak an tum a ni. Mahse tu pawh chu lo ni se vacuum cleaner hmang a In chhung bawlhhlawh lo thianfai hmasatu chuan bawlhhlawh them zawng zawng chu a la fai diak a. Policete tan han hmuh belh tur chuang a awm tlat lo mai.

Glenda-i chhungte chuan mipuite hnenah ngenna siamin Glenda-i chanchin eng ti zawng pawh a an hriat chuan hrilhhriat turin an ngen a. “Vawiina Glenda-i chunga thil thleng hi naktuk ah chuan kei emaw nang emaw chungah a thleng ve thei a ni. Min puih hram teh u” tiin an ngen a ni.

Glenda-i bo atanga ni ngana ni ah chuan tu emaw hian policete chu phone a lo bia in Glenda-i apartment atanga mel 30 a hla a motor silna hmun a kangmei chhuah thu a lo hrilh a. Fire Officialte’n kangmei chhuahna hmun an va thlen chuan rangkachak rawng Mustang car meialhin a lo tuam hlup mai hi an va hmu a. Mei-alh an thelh mih theih hnu chuan Investigatorte chuan car chu an han enfiah ta a. Car chhungah chuan tumah hmuh an nei lo. License plate pawh lak bovin a awm bawk. Mahse Vehicle Identification number erawh hmelhem hauh lovin a lo la awm a. Chuta tanga an han chhui chuan Glenda Furch-i car ngei a ni tih finfiah a ni. Policeten investigation an kalpui mek laiin Glenda-i chhungte pawhin an thiam leh an phak ang angin Glenda-i chu an lo zawng ve mek bawk a.

Media lamte biain Mibo thlalak leh biakpawhna tur number tarlangin hmun remchangah an tar a. Chutiang a ni mek lai chuan khawchhung mi pakhat hian Arlington khawpui huamchhung rel kawng sira hmeichhe ruang rawng pawl pangpar chuang khum khuhna puan a intuam leh electric hrui a inphuar a hmu thu Policete hnenah a report a. Policete chuan Glenda-i ruang a ni loh reng an ringhlel lo. Glenda-i ruang hmuchhuak ta ah riak an in ngai a ni. Mahse, an rin ang erawh a lo ni hauh lo mai.

Forensic Odontologist chuan Glenda-i dental record leh ruang hriat loh ha te chu a han khaikhin a. Chu a khaikhinna atangin ruang chu Glenda-i ruang a ni lo tih a finfiah a. Chu thuthar chuan Policete a barakhaih chiang hle. Chutianga mihang hmeichhia, electric hruia phuar, khumkhuhna pangpar chuang rawngpawl nena tuam chu eng zat tak la awm ang maw tiin an ngaihtuahna pawh a vak thui hle a. Chu chhanna chu “pakhat aiin a tam ang” tih hi a ni. Tichuan Glenda-i bo zawnna chu chhunzawm zel a ni a.
Glenda Furch-i bo atanga thla khat hnu chuan Dallas Police ten mipa pakhat car rukbo nia an report chhung atanga bungrua a lo thiarchhuak lai hi an nangching a. Policeten an va kal hnaih chuan chu pa chu car ah lutin chak mangkhengin a tlan chhuak ta nghal a. Policete pawh chuan an umzui ve ta nghal a ni. Chu pa chuan stop light ah din eih tum lovin a tlan tlang zel a. A chang leh kawng zim takah tlanin kawng remchang a piang a zawh emaw ni tih mai tur hi a ni.

Officer ten an sawi chhawn leh dan chuan an mi um a chu a tlan chak bawk a niang car tlan chak theih chin piah lamah a tlan ni hian an hria a ni.
Chutia Policeten car an umzui zel lai chuan an um lai car chu a chhe ta hlauh mai le. Ding lo thei lovin a awm ta. Policete chuan car khalhtu mipa la valai tak chu police lak atanga a tlanchhiat avang leh motor a ruk avangin an khuahkhirhna hnuaiah an han dah ta nghal a. Chu motor rukhmang chu kum 40 a upa Rodhney Owens, hnathawh mumal nei lo leh sual rawngbawla a eizawng mi hi a ni a. Investigator ten Rhodneya nunhlui an han chhui chian chuan an Commanding Officer kut a thlak avangin mualpho taka sipai atanga an ban tawh a ni tih an hre thei a. Mahni pu te kut thlak avanga Sipai atanga ban han nih ngawt mai chu thil duhawm em em chu a ni hran lo reng a ni.

Owens a nunhlui an chhuina atanga an hmuhchhuah zingah chuan a bialnu hlui chunga a khawsak dan chhiar telin tharum hmanga midangte chunga kutthlak a chin avangin a lakah manna thupek (arrest warrant) tam tak chhuah a lo ni tawh a. Owens-a bialnu hluiin policete hnena a hrilh dan chuan Owens an thah a tum tawh thin a. A sawi zel dan chuan Owens-a chuan bialnu hnenah chuan a hnung lam atanga beihin a lu chu plastic hmanga tuam thutin a thi lai a thlir thei tiin a lo vau tawh thin a ni.

A bialnu hluiin a sawi leh zel dan chuan tun hnai mai atang khan Owens a chuan a zuiru deuh ngar ngar a. Amah leh a thawhpui nen Glenda-i bo lai vel khan Owens-a’n Glenda-i car ang chiah rangkachak rawng Mustang a khalh lai an hmuh thu a sawi a ni. Investigatorte pawh chuan thawk khat lai khan Owens-a chu Glenda Furch-i apartment complex ah a nu nen an cheng tawh thin tih an hrechhuak bawk a. Owens-a kawngkapui chu Glendai kawngkapui hmachhawn siah a awm a ni nghe nghe a ni.

Investigatorte chuan thil eng emaw hmuhbelh dang an neih leh ta tlat mai. Kawngpui inumna a Owens-a car khalh an han dap chuan bag chhunga “Tape It” brand thil eng i lo vel charna Duck tape an hmu a. Tape It brand hi brand naran lo tak a ni a. Forthworth huamchhungah chuan dawr tlemte ah bak zawrh a ni lo. Chu Duck Tape chu Glenda Furch-i phuar nana hman nen khan an inang chiah a ni. Bag chhungah chuan silaite leh ramvah chemte a awm bawk a. Electric hrui a valhna/suihna nei a awm tel bawk. Investigatorte chuan chu bag chhung atanga hmaraw dang an hmuh te chuan Glenda-i chenna apartment pawna bawlhhlawh bawm a an hmuh bungrua eng emaw tal nen chuan inmil hlauh se an ti hle a. Chuvang chuan evidence zawng zawng chu Forensic Lab lamah enfiah a tan an thawn ta a ni.

Scientist ten Police te hnen atanga an dawn bungrua te chu Lab a an han enfiah chuan Owens-a car chhunga electric hrui leh Glenda Furch-i apartment pawna bawlhhlawh bawm a electric hrui an hmuh ah chuan thil thuhmun an hmu a. Electric hrui thuhmun leh valh/suih bilhbawlawk dan pawh thuhmun an ni tih an hmuchhuak a ni. Sarah Plopper, DNA Analyst chuan ,” Bungrua chi hrang hrang an lo thawn a. Chung zingah chuan lapua hmanga bur (can) tlang an hrukna te (swab), hrukpuan leh thawmhnaw them chehthlak te pawh a tel a ni” tiin an thil enfiah te chu a sawichhawng a. Chung thil te an han enfiah chuan lapaw hmanga bur tlang an hrukna ah chuan chil (saliva) an hmu a. Bur zinga pakhat ah chuan kutze thla (fingerprint) langkim chiah lo an hmu tel bawk. Superglue Fuming leh Ninhydrin (hmun dangah kan sawifiah tawh kha) hmangin bawlhhlawhbawm a an hmuh tak duck tape hman tawhsa chhung a lehkhakhawng awmah kutzethla kimlo an hmu leh bawk.

Chutia superglue leh ninhydrin hmanga kutzethla an han lailang (develop) hnu chuan kutzethla te chu a thla an la thei ta a. Duck tape a kutzethla thlalak chu an han tilian a . Owens-a kutzethla thlalak tihlen sa nen chuan an han khaikhin leh ta a. Tichuan Duck Tape a kutzethla chu Owens-a Kutethla ngei a ni tih an hre ta. Glenda-i apartment a hrukpuan ni ngei a rin atang chuan mihring tisa sulhnu (biological evidence) an hmu tel bawk a. Chu biological evidence chu mipa chi/baw (semen) a ni tih an finfiah ta bawk. Hrukpuan a mipa chi leh lapua a chil a DNA Profile leh Rodney Owens-a DNA Profile chu an han khaikhin ta a. An thil hmuhchhuah chuan Scientist te chu a barakhaih em em hran lo. Soda bur a DNA Profile leh Rodney Owens hnen atanga an lak DNA Profile chu an lo inang chiah a. Hrukpuan a mipa chi atanga DNA Profile an hmuh leh Rodney Owens-a DNA Profile pawh an inang chiah bawk a ni.

Rodney Owens-a chu man a ni ta. Glenda Furch-i thah thubuai awrhtir a nita bawk. Mahse, Rodhney Owens-a chuan Glenda-i ruang kha eng tin nge a tih tak? A sawichhuak duh ang em le?.

Glenda Furch-i thah thubuai ngaihtuah a nih hun nghak a Lung ina a awm lai chhan Rodney Owens-a chu nun khawharnain a khat a. Chu chuan a tanpuipa nen titipui loh theih lovin a siam ta a. A tanpuipa nen an inbiakna ah Owens-a chuan Glenda i chu mahni chauh a khawsa a ni tih a hriat thu a sawi a. Chuan hna a thawh thu leh tlai lama thawk a nih thu a sawi tel a. Chumai bakah car a kawl thu leh pawisa pawh a kawl ngei a a rin thu thlengin a hrilh a ni.

Prosecutorte chuan Rodhney Owens-a kha Glenda-i apartment ep chiah apartment ah a cheng a ni tih an hre chiang a. Chuvang chuan Glenda-i hnathawh hunbi leh khawsak dan a hre chipchiar ang tih an ring a ni. Prosecutorte rindan chuan kha pawikhawihna thlen zan khan Glenda-i kha a motor dahna ah a car-a a lo inkhalh thlen rualin Owens-a chuan hriamhrei hmangin Glenda-i kha a chenna apartment ah tihluihnain a nawr lut a. Finfiahna (evidence) atanga a landan chuan duck tape leh electric hrui hmangin Glenda-i kha a phuar hlawm a. Chuan mipat hmeichhiatna a hmanpuiin a that zui ta ah an ngai a ni. Tichuan pawisa leh thilthlu a hmu theih ang ang te chu a la a. Glenda-i ruang chu khumkhuhna a tuamim a car hnung bawmah a khung ta a. Mahse, khawiah nge Glenda-i ruang kha a thehthang tak tih erawh tu khaw hriat a ni ta lo.

Glenda-i fanu khan sunday ah a nu Glenda-i chungchang ngaihvenin a kal kha a ni a. Owens-a kha sunday zanah Glenda-i apartment ah a kir leh a. Chutah chuan apartment tifaiin dar kar tam tak hun a hmang ral a. Kutzethla hnutchhiah theihna hmun zawng zawng hrufaiin vacuum cleaner hmangin lazai leh samzai a thianfai bawk. Tichuan a hnuin vacuum cleaner chu amah rualin a keng tel ta nghal a. Owens-a chuan pawikhawihna a a hman hmanraw tam zawk chu bawlhhlawh bawmah a paih a. Mahse a kutzethla thenkhat te erawh duck tape leh soda bur ah te a hnutchhiah ta thung a ni. Chumai bakah Soda burah a DNA hnutchhiahin hrukpuan ah biological evidence a hnutchhiah tel bawk a. Chungte chu a hnua Investigatorten an hmuchhuah leh tak te kha an ni.
Chu tualthahna thlen tuk tuk leh lawkah chuan Owens-a bialhnu hluiin Owensa’n Glenda-i car ang chiah a khalh thu leh a hnathawhnaah Owens-a kal ngei thu a sawi a. Owensa’n Glenda-i car a hal meuh kha chuan pawikhawihnaah a inhnamhnawih ngei a ni tih finfiahna tam tham zet chu Glenda-i apartment pawna bawlhhlawh bawmah khan a hnuchhiah hman der tawh a ni. Hetih lai hian Policete chuan Glend Furch-i kha eng tiang chiahin nge a thih tih erawh an la hre thei ta chuang lo va. Mahse, kutzethla, biological evidence then khat leh mipa chi an hmu te atanga an han khaikhawmin Glenda-i chungah chuan thil tha lo tak a thleng ngei a ni tih an ring tlat a ni. Mipat hmeichhiatna lam hawi thil eng emaw chu a thleng ngei a. Mahse, pawngsualna a thleng ngei a ni tih erawh an finfiah mai theih lo thung.

Defence lam chuan Glenda-i ruang hmu tur awm ta lo chu tanchhan berah an hmang a. Achhan chu Prosecutor lam chuan Glenda Furch-i chu a thi ngei a ni tih an finfiah theih bik lo a ni. Mahse, witness tam zet chuan Glenda Furchi’n a chhungte, kohhran leh a hna te holam takin a kalsan ringawt lovang tihin tan an khawh ve thung a. Bakah Owensa’n tualthah duh chhan tur (motive) holam tak a nei a. Chu chu pawisa a ni. A hun hmasa lamah tharum hmang ni chiah si lovin dan bawhchhiatna a nei nual tawh a. Chenna fumfe a neih loh chinah leh chhawmdawltu a neih loh chinah chuan a dan bawhchhiatna chu tharum hman phahna hial a lo ni ta a ni.

Glenda Furch-i khuangcherbo na atanga kum khat a liamhnu chuan Rodney Owens-a chu Glenda Furch-i thah thubuai ah thiamloh chantir a ni ta. Damchhung tang tura hremna pek a ni. Roreltute chuan Glenda-i ruang a dahna a sawi phawt chuan hremna an pek chu tihnep sak an tiam a. Mahse ani chuan chu indawrna chu a hnial fithla hmak thung a ni.

Darla Miles, Television Reporter chuan, “Maimawm ril zam ang mai hi a ni. Khang bawlhhlawh bawma hmanrua an hmu te, Glenda Furch-i bungrua a Owens-a DNA lo kai ngawt mai te kha thil in pha-man tak mai an ni a. Forensic awm lo se chuan khang thil te kha hrilhfiah mai thei an ni kher lovang” tiin Forensic Science tangkaina a sawi a. Glenda fanu Shimon McDonald-i chuan, “Kan tana harsa lai ber chu hriatlohna hi a ni. Vawiin ni thleng hian kan nu chunga thil thleng hi kan la hre lo va. Chu chu kan tan chuan thil hriatthiam harsa lai ber chu a ni. Forensic Science hi ka la hmelhriat em em lo va. TV ka en atangin eng eng emaw chu ka hre ve te pawh a ni mahna. Ka bel lo khawp mai. Mahse he case bik atang hian Forensic Science hi thil dangdai tak a ni tih ka zirchhuak a ni” tiin Forensic Science pawimawhna a sawi ve thung a ni.

Author : Bruce Kibby    

Advertisements
Aside | This entry was posted in Thu Ngaihnawm and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s