MIZORAM KAWNG – P.L.Liandinga

Hmanni lawkah Parliament Secretary i/c PWD hian F.Hrangvela Industry peng (Branch) pakhat hawnnaah, “North-East-ah Mizoramin kawng a nei tha ber,” tih thu a sawi a. He thu hi chu a den a na ngaih ngaih hle mai.

Hetia a ti ta mai hi Mizo mipui tan a na hle. Mipui hmuhsitna nge, engnge tih ngaihtuah tham a awm :

1. Kum 2015 vela Autocad-in India ram State hrang hrang chhunga kalkawng dinhmun (road infrastructure) an zir chiannaah khan Mizoram hi a chhe ber kan ni a. 2015 hnulamah midang khum vek khawpa hmalakna chhuan tlak khawp hmuh tur a awm loh bakah hnathawh dan phung tihdanglam hriat tham engmah a awm lova.

2. Kan Mizoram kawng hi a chhe viau mai a. Kawng tha bik tlemte (Aizawl – Darlawn; Aizawl – Lunglei via Thenzawl; Aizawl – Lengpui) tih loh hi chu a chhiat thin em avangin a kal te hian ngaiah an neih ni berin a lang a. A ping ngawt te a nih loh chuan kawngpui engemaw bik tih loh hi chu sawi tinah pawh kan tin tawh lo ni hialin ka hria a. Beisei tur kan neih chauh em avangin a zawhtu khawtlang leh pawlin tlawmngaia kawng siamthat hna thawh kan ching chhuak ta ngawt mai a. Hetiang hi State dangah a awm ve em ka hre lo. Tunah pawh Bairabi kawng chu a chhiat luat avangin Truck Owners Association-in anmahni sumin siam an tum mek a, hna an tan tawh pawh a ni maithei.

3. State thenawmah kal hlek ila, Tripura te ang te chu “An Chief Minister hian a hmai aiin an kawng a ngai pawimawh,” tih te hi tawngkauchheh a ni a. An kawng thlalak kan hmuh chhun te pawh kan kawng ai chuan a mam a. Tripura-ah chuan miin serthlum huan tha tak a siam thar chuan, “Ka siam peih hun hunah kan Chief Minister hian kawngpui tha takin min rawn thlunzawm mai dawn tih ka chiang a,” an ti mai a, phur takin hna an thawk thei. Ramri dep kawng hmu ten Tripura kawng an han hmuh chuan a daifem mah khutianga an enkawl chuan an Agartala bul vel chu a mam dawn mang e, an ti lo thei lo.

Chuti chu kan dinhmun leh kan khaw hmuh leh kan thawm hriat a nih laia chung thil zawng zawng hre pha ve hauh lo ang mai a, a kawng enkawltu lawk ber pawlin chhun khaw eng a, an Party mi leh sa (eng thu pawh an duh duh an hrilh thin) hlir pun khawmna pawh ni lova hetia a ti ta mai hian thil pahnih a kawkin ka hria. He thu hi eng vanga sawi nge ni ang?

(1) Duh duh sawi thei leh sawi ngamah an inngai a ni ngei ang. An tan thu sawi ngam loh tur engmah a awm lo angah an ngai a ni. A dik leh dik loh lam chu Mizo mipuite hian kan ngaihven leh dawn chuang lova, mi mawl awmkhawm kan nih avangin eng thu mah sawi sual theih a ni lo angah an ngai a niang.

(2) State dang dinhmun hi hre ve pha lovah min ngai a niang. Hetah (Mizoramah mah chuan Aizawlah) hian kan tawm churuk reng a, state dang dinhmun leh hmasawnna engmah hre ve thei lo kan nih avangin an sawi apiang awih tur tawkah min ngai a niang. Khawvel ningkhawng hre pha lo, mahni thenawm state te dinhmun pawh hre lo, Internet pawh hmang thiam lo leh pawnlam chanchin hre ve miah lo angah min ngai a ni ngei ang. Chu chauh ni lovin Mizoram thingtlang kawng chhiatzia hre hauh lo, Mamit pawh thleng pha lo, Champhai pawh thleng ngai lo, Biate tlangdung pawh kal lo, Saiha te pawh thleng bawk lo angah vek khami tuma kal khawm te kha an ngai ni ngei tur a ni. Tripura-ah pawh kal loh chu sawi loh, Tripura chanchin an sawi te pawh hre pha ve lo angah an ngai a niang.
Inkal pawhna motor kawng hi a pawimawh em avangin ngaihtuah loh theih a ni ta lo. Ram changkang, buh thar mang lo an awm. Ram changkang, industry lianpui pui, meikhu chhuak vut vut lem lo an awm. Ram changkang, electronic thil siam chhuak ta neuh neuh lem lo an awm. Mahse inkal pawhna kawng chu a tha vek ang a. Kan Mizoram ang em ema changkang anga lang si, kawng chhiatna hmun hi chu a vang ngawt ang. Inkal pawhna kawng tha awm lovin changkanna hi teh theih a ni lo.

Mizoram chhungah pawh khaw changkan leh changkan loh tehna lian ber pakhat chu inkal pawhna kawng hi a ni. Khawi khua pawh han inti hawiharhin kawng hrang hrangah changkang thawkin thawk han tum sateh mah se an khua leh hmundang inkar kawng, a bikin khawpui atanga an khaw panna kawng ber a chhiat viau miau chuan khaw chengker chan an chang a, khaw changkang angah ngaih theih a ni lo. Chutiang chiah chuan khawpui atanga luhna kawng a chhiat viau chuan a khuaa mi chengte pawh khawpui nuam tak angin an inngai thei lova, an rilru pawh anmahni tawk zelah a chenbeh nge nge thin. Chutianga thil pawimawh thilah chuan kan tha lo chung chung heti hian min han tihkhum a nia, nat chu na tak a ni.

Heng zawng zawng hi thil awmdan a nih lai leh, heti khawpa kan Mizoram kawng a chhiat laia North Eastern States zinga kawng tha ber anga la sawi lauh lauh ngam ram hruaitu kan neih tlat chuan heng hi thil thleng tur leh thleng mek a ni :

1) Mizoram hian hma a sawn dawn awzawng lo. Kan dinhmun chhe chung chung pawh pawm duh lo tlat ram hruaitu, engkim hmu ve vek si kan neih tlat chuan kan tan hmasawn ngaihna a awm lo.

2) Kan kawng hi a tha mai dawn hauh lo. Tuna hetia min tihkhumtute thlazar hnuaiah hi chuan Mizoram kawng hian hma a sawn dawn lo. ‘Ka pu, kan kawng hi min siamthatsak rawh,’ kan tih pawh a, ‘Kan kawng te chu a tha ber alawm,’ ti duh tlat ram hruaitu hruaina hnuaiah chuan kan tan kawng that hun nghah chhuah rual a ni lovang.

Thingtlang kawng chauh a chhia a ni lova, Aizawl khawpui kawng ngei pawh a chhe hle a. Tunah tak pawh hian Bawngkawn vel chu chhe tak a ni leh tawh. Bawngkawn kan sawi lai hian hmundang a tha tihna a ni reng reng lo.

Chuvangin, ‘North-East-ah chuan kawng nei tha ber kan ni,’ tih thu kha thu beidawnthlak tak leh thin tina tak a ni.

Advertisements
Aside | This entry was posted in Fifth Column and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s