US LEH NORTH KOREA INDO HUNAH AUSTRALIA-IN US A PUI DAWN : PRESIDENT TRUMP-AN NORTH KOREA KAN VAU NA TAWK LO A TI

US President Donald Trump-an tawngkam hriam hreih hrawih, rum el awla North Korean a vauna tawngkam (sabre-rattling) chu sawiseltu an awm laih laih laiin, he a tawngkam “fire and fury” a tih, “Khawvelin a la hmuh ngai loh beihna a tawk ang” a tih chu rawn tuihnihin, “He ram (North Korea) tan hian a la tawk zo lovang. Kan ram tan hun rei tawh tak atangin hetiang hian a sawi fo mai a, kum tam tak a ni ta…engkim sawifiahna hi a khauhin a rum (tough enough) tawklo a ni” a ti.

I bei thut (pre-emptive strike) mai ang em? tih zawhna chu,”Chutiang ka sawi lo. Ka ti ngai lo” tiin a chhang.

President Trump chuan, “North Korea hian US beih a tum ni a a ngaih chuan, a chhan letna chu tur chu a la thutak (very serious) hle tur a ni. A chhan chu an ngaihtuah aia nasain thil a thleng dawn a ni. oK? A ni lom ni? Hun rei tawh tak atangin khawvelin a nawr tawh thin a ni lom ni?” tiin, North Korea nena indona a chhuah chuan an vai buai pherh vek dawn niin a sawi.

Hetih lai hian North Korea’s Strategic Force hotu Gen. Kim Rok-gyom chuan, “Guam chu inter-mediate range missiles 4 in kan kap ang a, Japan ram thlawh kanin second 16,056 chhung lekin 3,356.7km an thlawk anga; Guam bul 30-40km ah an tla ang. Tun thla laihawlah kan bun fel vek anga, Commander-in-Chief Kim Jong-un thupek veleh kap kap mai dawn a ni” tiin, niminah a puang a ni.

South Korea’s Joint Chiefs of Staf thupuangtu Roh Jae-cheon chuan, “North Korea thiltih dan hian Seoul chu a cho hle a, US-South Korea thawhdunna thuthlung chu a chona thil a ni. South Korea chuan chona chhanglet turin a inbuatsaih a ni” a ti. Japanese Cabinet Chief Yoshiside Suga pawhin, “North Korea awm hle hle thei lo, buaina siamchak hi khawvel ram dangte pawh an dem tur a ni a, pal zama ngaihthiam chi a ni lo” a ti.

Australian PM Malcolm Turnbull chuan nizanah US Vice President Mike Pence telephone a an inbiak hnuah, “North Korea leh US an indo vaih chuan US lamah kan tang dawn a, Anzus Treaty chu thal fang char tlat leh lungpui nghet tak anga dingin, kan din pui ang a; US chu kan thawh pui dawn a ni” a ti. Anzus thuthlung hi US-Pacific inremna niin, kum 1951 a thuthlung siam kha a ni. US-Australia hi Vietnam, Iraq leh Afghanistan War ah te khan phir unau tangrual ang maiin, indona mualah an lo thawk dun tawh thin a ni.

Lindsey Graham, Republican hawkish Senator chuan,”President Trump nen chuan kan inbe pawp reng a, a dawhtheihnain a tlin loh (strategic patience) hunah chuan a bei hmiah mai ang, chu chu min hrilh dan a ni. 100% in President Trump chuan military chaknain North Korea chu a bei ang” a ti mai. White House Adviser Sebastian Gorka chuan, “White House emaw, Donald J.Trump chu rawn testduh suh u” tiin, North Korea hi a vau a ni.~

North Korea hian engah nge US hi a huat bik?
Kum 1950’s chhova Korean War lai khan US hian North Korea ramah hian bomb 635,000 tons teh meuh a lo thlak ani. North Korea chuan South Korea ram nena ram pakhata awm a duh a, American thuhnuaia dah a duhlo a ni.

He “Hermit Kingdom” North Korea hi kum 1637 khan khawvel hmun dang atangin a bibo (cut off) daih niin, Manchu hoten an run lai atangin hnam kawlh leh luh lul tak an ni. Kum 1254 ah chuan Mongols hoten runin, Korean 200,000 zet mipa leh hmeichhia-naupang sawi lovin an that a ni. Kum zabi 16 ah Japanese thuhnuaiah awm lehin, maktaduai 2 dawn an that bawk. Korean hote chuan Japanese hote chu Qing Dynasty (China) puihnain an beilet a, Qing Lalram sipai chakna a kumkhuaa an thuhnuaia dah turin leh venhim turin inremna an siam pui a ni.Korean lalte chu “Serving the Great” tiin, Korean Peninsula-ah remna leh muanna awm theih nan awp beh an lo ni tawh thin a, kum zabi 19 tir lamah Confuciasm zirtirna lo lutin, chung atang chuan Japaese leh Russian hmelma an lo ni leh ta. Chutih laiin “Great Power” an tihte chu tihlawm a ngai a, chung Great Power an tih, China, Japan leh Russiate zingah indona lo chhuah phahin Sino-Japanese War, Russo-Japanese War a lo chhuak a, a tawpah “final solution” atan Japanese hoten Korean an awp ta a ni. Mahse, US President Theodore Roosevelt ruahman angin thuneihna insem zai a lo ni a, tuna Korea tih chu “Great Power” tih hrin chhuah a tih theih ang.

Korean Peninsula-ah Indopui 2na tawp lamah US leh Soviet Union inremna angin “38th Parallel” tiin Korean Peninsula chu ţhen hran a lo ni ta a, mahse, chutiang chu a hlawhtlingmai lo. Kum 1953 ah Korean War lo chhuakin, US leh Soviet chuan a then hrang hlen ta a ni. Chumi tuma indona chu mumal takin ala reh lova, chuvangin North Korea leh South Korea chu indo mai thei khawpin boruak a awm zel a ni.

Kum 1976 ah Jimmy Carter chu US President a nih khan Korean Peninsula atangin US military te chu lak chhuah vek a tum a, mahse, indona a chhuah leh chiam hlauhna vangin China leh Soviet Union pawhin US inlakchhuah hi tha a tilo niin an sawi thin. China chuan Soviet Union-in Korean Peninsula chu a run thut a ring a! Soviet Union pawh chuan South Korea atanga US a inthiar fihlim chuan North Korean hotupa-Hermit Kingdom Lal, Kim Il-sung chuan indona a tihchhuah a hlauthawng bawk a ni, an ti. 1950’s ah Kim Il-sung chuan US leh South Korea beiin, indona a tichhuak a.

Kum 1970 ah Kim Il-sung chuan, “North leh South chu ram pakhata an awm chuan inremna ngel nghet, muanna a awm ang” a ti a ni. Kum 1940 atangin Kim Il-sung hian”One Korea” awm duhin a lo sawi mawi tawh thin a, mahse, South Korea khian North Korea nena inzawm (re-unification) tak tak chu an tuipui hauh lo, an ti.

Guam-ah chuan tute nge cheng?
North Korea-in ram khat, missile-a kah a tum a sawi nalh hmasak ber Guam chu khawvelin an ngaihven hle a, khawiahnge a awm? Tute nge cheng? Enge a pawimawhna?

Guam chu Pacific Ocean tuipuia thliarkar pakhat, US Air Force-Andersen Air Force Base, Submarine Squadron, US Coast-Guard awmna niin, he Guam ah hian nuclear bomb phur chu US bomber lian tha zet B-1B Lancer 11 chhawp an ni. US military hi 13,000 vel an awm. Mihring 163,000 zinga 1/3 chu US military an ni.

Kum 1898 atangin Guam thliarkar chu US territory niin, Spanish-American War zawh atangin America ram leilung a ni a, ram tereuhte a ni. Guam chu North Korea khawpui Pyongyang atanga 2100 mel chauhva hla, Honolulu atanga 3800 mela hla a ni thung.

Kum sang dawn chu a ram mi (indigenous group) Chamarro an cheng a, thliarkar mi anga ngaih an ni. A khawpui chu Agaro tih niin, Hagatna ti pawhin an sawi bawk thin. Catholic an tam hle. North Korea-in nuclear warhead missile a kahah an vau chuan a tithlaber deuh a niang, “Pathian auvin kan tawngtai” an ti. Guam Governor Eddie Baza Calvo chuan mipui thlaberte thlamuanin, “A hlauhawm lo ve. Guam chu America ram leilung dik tak a nia, tha takin venhim a ni ang” a ti. Rex Tillerson, Secy of State pawhin, “American te chu thlamuang takin zan mu an chhing ang” tiin, a hlauhawmloh, a ti.

Guam hi missile hmanga beih a nih loh nan 2013 khan Terminal High Attitude Area Defense (THAAD) hmangin ven a lo ni tawh a ni. Guam Congressional Madeleine Z. Bordello chuan, “President Trump chuan buaina chhuak lo zawnga harsatna ching fel turin ka ngen a ni” a ti.

US Ralthuam chhawp chhuah te

July 28 a North Korea-in missile a test khan Expert te chuan Denver leh Chicago khawpui kap pha turah an ngai a, The Washington Post chuan, “North Korea chuan Nuclear warhead-missilea vuah theih chu Defense Intelligence Agency te pawhin a neih an ring a ni” a ti. Pentagon phei chuan he thu hi an sawina a rei tawh a ni. North Korea missiles te chu US chuan lo Sepui ruah tuar mai an tum ang em? A chhanna chu “Teuh lo mai” tih a ni!

Tunah US khawmual pui chu missile chi hrang hrang-ICBM, short-range, intermediate range, etc laka venghim turin Missile Interceptors 36 in ven mek a ni a, chungte chu Fort Greely (Alaska) ah leh Vandenberg Air Force Base (California) ah bun an ni. Inter-Continental Ballistic Missile hi kumin 2017 kum tirah vawi 5 enchhin niin, vawi 3 a hlawhchham tih a ni! Expert te chuan Interceptors 36 te chuan North Korea missiles hi a lo kapthla (intercept) thei chiah ang em tih an zawt a ni.

Pacific, South Korea, Guam ah te chuan THAAD battery te chuan short-range, medium-range leh intermediate-range missile chu a lo kap thla thei a nih pawhin, Inter-Continental Ballistic Missile (ICBM) hi a lo kapthla theih chiah ang em?

US Navy te hian Aeges Ballistic Missile System chu Warships ah chhawpin, short-intermediate missile chu a titawp thei ang, mahse, ICBM a titawp zo ang em, a chiang lo. Navy lam hian Nuclear-capable Submarines 14 zet a nei bawk a, an vaiin. Trident II missile 24 an phur a ni. Tin, Landbase lamah Minuteman-III an tih, ICBM chu 414 zet a nei bawk.

US Air Force chuan tunlaia bomber smart ber, tha bera ngaih B-2 Spirit bombers 20, B-52 Bombers 54 leh B-1 Lancer bomber, nuclear bomb phur thei a nei nual a, an ţha ţhe ţhaw viau. Air Force hian new long-range strike bomber an tih B-21 chu Northrop Grumman ten an siam sak mek.

Navy lam hi Columbia-class submarine an siam mek a, hei hian tuna Navy fleet thlakna tur a ni. Tin, lei lama bun chi an nei nual a, heng US military te thuam tharna tur hi kum 30 chhungin US$ tluklehdingawn 1000 (trillion) zet a tlingchho turah Defense Analyst te chuan an ngai.

The Atlantic chanchinbu chuan, US-in North Korea hi Conventional military chakna hmangin a bei thei a; tuipui atangin Warship leh Submarine hmangin Tomahawk missile-in emaw, airstrike hmangin a bei thei bawk, a ti. North Korea chu sipai (military) chakna hmanga beih a nih chuan, Seoul mipuiin an tuar hle ang, an ti.

Tute nge Nuclear Bomb lo nei ţin ţen le?
Bulletin of the Atomic Scientists-Nuclear Notebooks, Federation of American Scientist leh Defense Intelligence Agency te chuan hetiang hi an sawi dan a ni: US-6800, Russia-7000, France-300, China-260, Britain-215, Pakistan-140, India-130, Israel-80-120, North Korea- 30-60.

Daryl G. Kimball, Executive Director of the Arms Control Association chuan, “US hian strategic nuclear warheads chu ICBM 1750 zetah vuah a ni a, thenkhat chu submarines, strategic bombers, submarine-Launched Ballistic Missile (SLBMS), Strategic bombers & Tactical nuclear base, Europe-ah 180 a dah a ni” a ti.

Author : C.T.Lalrinawma

Advertisements
Aside | This entry was posted in World News and tagged , , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s