VIETNAM IN BRAHMOS A LEI TIH A PUANZAR LAIIN INDIA ERAWH A NGAWI RENG

Doklam chungchang avanga India leh China te inkar thla hnih chuang ‘stand off’ neih a nih mek lain Vawiin khan Vietnam sawrkar chuan India atangin BraHmos anti-ship cruise missile a lei a ni tih a puang a, Defence ministry erawh chuan missile system Vietnam hnena a hralh chungchang hi engmah puang chian na a nei lova, comment engmah a pe lo thung. South China Sea a tuipui ram inchuh avanga buaina tawk mek Vietnam hnena BraHmos hralh chungchang hi China chuan a ni lo zawng a thu a lak a hlauh vang ni a ngaih a ni.

Vietnamese Foreign Ministry thupuangtu Le Thi Thu Hang chuan vawiin khan chanchinthar la khawmtute hmaah Vietnam hian BraHmos hi self defence atan te, ram venhimna atan tih dan pangngai angin, India atangin a lei a, he missile system hi remna leh muanna awm nana policy pakhat a ni tiin a sawi a, Vietnam leh India sipai lama thawhdunna leh inkungkaihna te chu Vietnam hian remna leh muanna tluan tling , thawhdunna tha leh hmasawn nan a hmang dawn a ni tiin a sawi bawk. Vietnamese sawrkar thuchhuah hi a zau thei ang berin media lamah chuan puanzar a ni.

BraHmos deal chu kum tam tak India nena sawidun tawh hlawhtlinna niin Vietnamese Journalist pakhat chuan NDTV a hrilh a, heng missile batch hmasa ber te hian ni reilo teah Vietnam a thleng dawn a ni, tiin a sawi bawk. BraHmos hi Russian manufacturer te leh India rama Defence Research and Development Organization te tangkawpin an siam dun a ni a, Ri let hnih leh a chanve aia tam(2.8 mach) a chakin hmelma lawng Km 300 a hla a awm kah nan a hman theih a, missile thlawh lai a final phase an tih hun ah phei chuan interception ti harsa leh zual turin a thlawk chak phut thei nia sawi a ni. He missile, surface to air missile hi a tum a thelh ngai lo tih theih a ni a, Indian Army te hman ang ‘land variant’ phei hi chu tlangram ah pawh a hman tlak in ‘dive attack’ an ti thei a, pin point accuracy in a target a fuh thei hial nia sawi a ni.

Chinese People’s Liberation Army Daily chuan kumin April thla khan “China leh India te inkara intihsiakna he BraHmos missile hian a siam nasa ta hle a, ram pahnih te inkar boruak himna he missile hian a tiderthawng em em bawk a ni.” tiin a chhuah nghe nghe. Tun dinhmunah phei chuan Doklam plateau ah Sikkim ramri dep maiah ram pahnih sipai te hian indo mai hmabakin an inchhawn khum reng a, China hian Doklam area vel hi a ramri chhung a ni tiin a ngai a, India leh Bhutan ramte chuan he lai hmun hi Himalayan Kingdom a hmun pakhat niin an ngai thung.

Jun 16 khan India sipai te chuan ramri kanin Bhutan sipaite ngen angin Chinese sipai kawng siam te an lo dang a, India sipai te hi an inhnukdawk a ni emaw, he kawngpui hi siam tir an phal emaw a nih chuan China tan India hmar chhak leh Central India zawmtu, kawngpui pawimawh leh lian tak awmna Siliguri (Chicken’s neck) chu China hian a la mai thei tawh nia an hriat avang te, ram chhung himna atan a pawi theih avang te in he lai Doklam plateau ah hian thla hnih chuang an lo in hmachhawn phah ta a ni.

Vietnam hian thliarkar te tak te te a ta anga a lo ngaih thin te China hian military base siam nan, runways leh missile defence system bun nan te a hman luih avangin boruak chhe tak, indo na pawh thleng thut thei dinhmunah an ding mek a, Vietnam bakah hian South East Asian ram tam tak te pawh in China nen hian buaina an nei ta bawk, Japan te pawh in China in a territory chhunga tuipui a thliarkar awm te a hauh luih tlat avang hian buaina an nei mek bawk a, US pawhin China in a tuipui huam chhung nia South China Sea 90% vel a ngaih avang hian China nen hian an inkar a chhe hle bawk, US hian freedom of navigation a tih hmangin heng tuipui South China Sea, East China Sea, Indo-Pacific ah te hian a lawng leh thlawhna te a tir reng a ni. India pawhin China in a lawngte duh duh a kal vel a phal loh avangin harsatna atawk ve mek bawk.

Vietnam leh China te hi 1979 khan an lo indo tawh nghe nghe a, mihring nunna leh hliam tam tak an awm phah nghe nghe a ni. India leh Vietnam te hian sipai lama thawhdunna tha tak an nei mek a, India hian Vietnamese sailor te chu Vishakhapatnam ah training lo neih puiin Russian siam Kilo-class submarine enkawl dan chungchangah te training a lo neih pui tawh thin a, (ram pahnih te hian he submarine ang hi an nei ve ve a ni) India hian Vietnam sipai te hi Mizorama a Vairengte ah School of Counter Insurgency and Jungle Warfare ah training a lo pe tawh țhin bawk.

About Mizo Archive

I'm the one who collect the best writings of Mizos
Aside | This entry was posted in World News and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s