Pwd dept tihdikloh chungchang chhunzawmna by Michael Lalmanzuala

Rinmawia Ralte, Davida Pa Ralte leh an thian thenkhatte’n PWD chungchang an sawi ka chhanna hi a sei deuh a, hetah hian ka’n post leh mai a ni e.

PWD a pawng a puia kan sawiselna chhan tur a awm lo va. Amaherawhchu, kan naupan lai ațang tawha pawisa tamna a ni, chumi awmzia chu eiruk nasatna a ni tih hi khawtlang titi ațanga kan hriat dan a ni a. 1960-a D.C. PWD-a LDC hna ka thawh lai pawh khan kan Overseer leh Mourrir țhenkhatte chêt dan ațang chauh pawhin corruption a nasa tih chu kan hre thei a ni.

Keima tân chu sawi loh ka chhungkhat țhian țhate tan pawh PWD contract hna hi ka sawisak ngai lo va. “CE/SE/EE te hi hrilh ila chuan an lo pe ve mai ang che u. Mahse, bill lak hunah thamna tel lo chuan a tih theih dawn si lo va, min han ruai anga, ka inrawlh duh dawn si lo va, tibuai ve duh lo mai rawh u,” tiin hetiang thila min betute chu ka chhang mai thin a ni.

Kan kawngpuite hian a țha ti-a fak an hlawh hi kan hre zen zen lo va. Tun kum 5 chhung vel phei hi chu kawng țha lai alawi a awm lo tih hi kan hriat tlan dan a ni a. Tun kum 3 chhung vel hi chu Zemabawk dâi kawng chhiat lutuk avangin Tuirial kawnga kan huan neih ve pawh ka tlawh ngai tawh lo va. Champhai kawng chhiatzia chu Social Media-ah te hial pawh nuihza siam nan an hmang a, ‘doctor inentir hmasak tê tê loh chuan Champhai kawnga kal loh tur’ tih hial a ni a. Mamit kawng chhiat lutukzia a sumo hnung lama lantirtu chuan hrem a hlawh tih te pawh kan hria.

Kawng chhiat lutuk vanga khawtlangina siamțhat hnatlang an thawh mup mup țhin te, khua-a miten ROAD BLOCK an siam țhin te, motor teh reng pawh an kal duh loh țhin te hian kawng chhiatzia chu a tilang chiang a ni.

Muallungthu – Khumtung kawng saw kan kal ve fona a ni a. Kawng hawn ațanga tun kum 4 chhung vel hian vawi khat mah ‘maintain’ hna thawh a ni lo va, a chhe ve leh tawh khawp mai. Aizawl – Lunglei World Bank Road an zawh ațanga thla 6 velah khan Muallungthu ațanga km 1 vela hmun 5-ah kawng chhia repair ngai a awm hman bawk.

Vanghmun kawnga ‘CULVERT THLAWK THEI’ te kha a mak tehlul nen, a dik a ni tih zu finfiahtu Chief Engineer Sachdev-an transfer a hlawh phah te kha a mak lehzual a ni.

Hetiang thil hi sawisen pawh a ni lo zawk a ni.

Heti khawpa kan kawng a chhe chunga PWD Minister PAHNIH-ten, ‘North East-ah kan kawng a țha ber,’ ‘Tunge kawng a chhia ti? An la ti cheu te hi dawt muhlum an sawi a ni kan tih te chhanna awm lem lo țhin te hian kan sawi hi dik zawk ni-ah min ngaihtir.

Schedule of Rate aia hniama chhan awih loh tih thupek te hi, SOR zulzuia chhang tam tak zinga duhsak zawng thur theih nana tih ni ngeiin a lang a, a bawlhhlawh khawp mai. 25% below-a chhang ngam a awm hian PWD rate aia hrechiang zawk nih a hlawh a, PWD tan mualphona a ni. Nuaih 30 zeta an han thlêm lungawi te hi a zahthlak a. GFR kalh a nih avangin a huatthlala lehzual.

Engineer zawng zawngina SITE-a awm in duh vek a, Office-a awm chu hremna anga in ngai hi hnathawh nuam in tih hrim hrim vang nge Site hi a mawm a, Office hi a ro vang?

In Engineer-in-Chief Office, Mizoram chu sawi loh, India rama office changkang leh ropui ber pawl a ni khi, CHAWMHLAWM STATE-a awm atan chuan a zahthlak in tive zawk lo’m ni?

PWD Minister, CM ni bawk leh a thawhpuiten tun kum 5 chhung vel maia Contractor pakhat Non-Works Dept-a Cheng Vaibelchhe 120 vel contract an thawhtir ngawt mai te hi, PWD aia contractor ‘satliah’ rin zawkna a ni ber mai em? Technical mi tu mahina an enpui loha heti zat bill an pass thei mai te hi Engineer/Technical mi tel lovin hna a thawh theih a, a awlsam zawk a, a hlawk zawk bawk tihna a ni thei em? Nge, an hlawk tlan em avangin khua an hmu thei tawh lo zawk?

Contractor ni lo, contract in thawhtir zo zai te, Dept dang reng rengin PWD hian an ti țha a, kan buildingte hi i saktir vek ang, ti lova, anmahni-ina thawh an tum vek zawk te, tunah phei chuan kan sawi tâk anga NECS-ina contract hna PWD hriatpui lova a pumhmawm deuh vek mai te hi PWD tana chhuanawm nge zahthlâk zawk?

Pawisa tam tih te hi zawng kan sawi fo tawh țhin a ni a, a tam ringawt ai chuan a hmanna tur taka hman a pawimawh zawk. Pawisa tam a hmanna tura hman loh hi kan chhiat phah ber chu a ni.

Tun hma pawhin PWD hna hi a țha tawk lo kan ti a. Tun kum 30 chhung zeta CM-te berina an keipui sa hauh țun chunga a hma aia a chhe ta zawk si hian eng nge a entir? Hna thawh țhat duhna aiin PWD hi a mawm vang mai a ni zawk em?

Kan Sawrkarina Pu Robula hlawh sâng an pêk, a phû lo va, Dept dang hotute hlawh kalphung a tibuai vek dawn bawk ti-a ka dodâl kha, CM Sahib-in, ‘Kan party/sawrkar hian a lakah bat kan ngah em a, pe lo thei kan ni lo, ama tan bîk liau liau(personal to him) ti-a min over-rule te kha ka la theihnghilh lo va. An sangawizawnpui, Contractor rualte nawrnaa chak em vang a ni tih hrethiam thei tawk ka nih thu te hi ka’n hrilh hre ve leh hnuhnawh ang che u. An bat kha ‘contract’ hna a ni tih chu in hrethiam zawkin ka ring.

Pi leh pute hun ațanga aia upa zah ngai pawimawh hnam kan nih hria-a, YMA meuh pawhin ‘aia upa zah’ thupuia an neih laia, TAR tih țawngkam in rawn hmang țhin te hi huat thu-a la lovin in la naupan em vangah ka ngai mai a. Pu A. Thanglura țawngkam erawh ka’n hawh hram ang a, ‘Țah tichhuaka te’ in ni e.

Political Party ruihchilhte leh Kohhran ruihchilhte hi awmze nei lova kan Sawrkar leh kan Kohhrante kaltirtu an ni a. Nangni ațang hian PWD ruihchilh in lo awm ve tih kan hre ta a. PWD a hmingchhiat viau chhan chu in ni êm lovang chu? Lo harh chuak ve ula, PWD leh kan ram pawhin a țhat phah zawk a beiseiawm e.

Advertisements

About Mizo Archive

I'm the one who collect the best writings of Mizos
Aside | This entry was posted in Fifth Column and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s