ZORAM THAR CHUNGCHANGAH A THLING BAW HAWKA THUTAK PUAN CHHUAH A HUN TA!

Zoram thar chungchanga kan hriat reng tûr chu- Pathianin leilung siam thar hi a tum ber a ni lo va, a ti boral zawk dáwn a ni. Lei thar leh vân thar (Jerusalem thar) erawh chu Bible sawi angin a lo thleng ang. He kan Zoram hi Pathian khawngaihna avângin a lo changkang ve zêl a, a lo la changkang zêl bawk ang a, hmasawnna ropui tak lo thlengin ram nuam tak pawh a la ni zêl dáwn. Lalpan siam tharin la siam țha tûrah kan ngaih a, chu Zoram thar chungchang chu thupui berah kan neih a, kan tlángaupui a nih chuan, Tirkkoh Paula’n, “ânchhe dawngin awm rawh se,” a tih Chanchin Țha dang kan hril a ni ang (Gal 1:8-10). Pathian thiltum Chanchin Țha buaipui lo va, Zoram thar thupui bera nei tute hian, Chanchin Țha ni lo, Chanchin Țha dang an buaipui a ni.

Zoram hian nasa takin hma a sawn zêl ang a, a la changkang êm êm ang a, a la nuam hle dáwn a ni tih hi thu dik a ni a, thutak erawh chu a ni lo. Pathian khawngaihna avángin Zoram hi hmasawn zêl rawh se. Zoram tâna thawktu mi thiam leh fel tak tak pawh an la awm zêl dâwn a lawm. Lo sawi lo sawi ve lo mah ila, a la changkang zêl tho dâwn a, tin, ngaih dân sawhngeh nâna zawlnei tu tute emaw thusawi mahni ngaih dân sawhngheh nâna lo hman vak zêl pawh hi hlauhawm tak a ni. Zoram thar duhawm tak Chanchin Țha ni lovin, Krista Lalram Chanchin Țha hi i hril ang u (Mat 24:14). Pathian thuin ram Chanchin Țha a sawi hi, he Zoram zimte hi a ni lova, engkim huap Krista Lalram Chanchin Țha a ni zawk a ni.

Mimal tinte hnêna Krista lalna ram din hi Pathian thiltum a ni a. Vánram chu in zing-ah (chhûng-ah) a awm tih a ni a (Luk 17:21). Pathian ram chi chu lo țhanglian a, tam taka lo rah chhuak tûrin Pathianin a duh a. Chu ram thar , Pathian ram Chanchin Țha, felna te, thianghlimna te, dikna te, rinawmna-te leh hmangaihna chauh awmna thinlung thar zawk chu a ni puang tûrin a mite min tirh ni. Ram puanzar lo hal lam a ni lo.

Bible tluana Pathian mite zawng zawng zawng hi ring lo mite mit hmuhah â tak leh máwl takin an che ngai lo va, a thang mawi apiangte zawngin duhawm tak leh nungchang mawi taka awmin pangpar angin an chetzia an lantír țhin a. Pathian dang be tûra phut luih an nih erawh chuan Lalpa avângin thih an ngam thung a. Flag hal tih vêl hi zawng, mi tam leh zual ka lak luh theih nán “mi zawng zawng bawihah ka insiam ta. Juda te ka luh theih nân Juta-te hnênah Juda mi angin ka awm țhin a, Dan hnuaia awmte ka lâk luh theih nân Dân hnuaia awm angin , Dân nei lote ka lâk luh theih nân dân nei lote hnênah dân nei lo angin ka awm țhin” titu Paula rilru nên chuan a va inpersan teh lûl êm!! Hnehtu Daniela leh a țhiante nunchang nên pawh a inpersan hle.

Pathian thiltum ber chu Chanchin Țha hril a ni zawk a, Lal Isuan a zirtîrte hnênah, ” he ram Chanchin Țha hi mi zawng zawng hnênah puang tûrin thu a pe a nih kha (Mat 24:14; 28:19-20).” Chanchin Țha dang hriltu emaw buaipuitu/ lo tuipuitu ka ni em, tih hi ngun taka inngaihtuah tûrin , Zoram mipuite ka sawm a che u. (Rom 10:18-a ‘Chia sawi tham loh’ tih pawh hi Mizo-te ah bel loh a him ang)Pathian thiltum chu keimahniah Krista’n lalna pumhlum a chan hi a ni a, Kristan lalna pumhlum nangmah a la chang lo anih chuan , tuipui sen kán tawh mah la, Kanan ram țha la lut lovin thlalerah i la vak kual mai mai tihna a ni a. Kanan ram țhaa i luh chuan Kristan nangmahah lalna a chang tihna a ni ang.

Mizo zawng zawng thinlungah hian Krista’n lalna chang ni ta sela, Zofate hian Zoram thar kan thleng tihna a ni ang. Leilung changkanna Zoram thar nge, Krista lalna Zoram thar inghahhlelh zawk? Kanan ram chu, a leilung hrut zawnga leilung changkanna Zoram thar ni lovin , Krista lalna Zoram thar zawk a ni e. Chu hmun chu i thleng thei reng a nia, i duhthlanna-ah a in nghat e.

Author : Challianthanga Challianthanga

About Mizo Archive

I'm the one who collect the best writings of Mizos
Aside | This entry was posted in Pathian Thu and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s