PHUBA LAKNA RUNTHLÀK by Kc-i Pa Khawlhring

Fehrehsan hun vèl chuan tu te emaw chul ramah a chuang chhuak hlawl mai a. Thil tisual, tih takah a phawk hra mai a. Thlawh laia lungpuiah chuan chuangin a hawi kual vèl ruai a, thilnung che eih pawh a hmuh tàk loh avángin mual leh lama chul thlám lam chu a pan phei ta ta nghál a.  Ral atanga a va hmuh dán ang chiahian thlàm kawngka chu rawnal ai lam tawh chuan a lo indo a. Hawi kual vél ruai chung chuan a lut ta a.

Nì lì liam taa chaw kham khawp a ei kha a la chhunzawm miah lo a. A taksa a chauin, chaw a mamawh takzet tawh a ni. A pumpui hnawhpuarna túr bàk ngaihtuah a nei lo. A vánneih asiamin ba-ne tlèm te lo chu a chhum sawk sawk a, a tum dán chuan a ei zawh veleha chu chul thlám ram mék chu tlanchhiatsan leh chu a ni mai.

Mahse, a chauh tawh èm avángin a tum ang chuan a awm thei lo. Ba-ne a ei zo chu tlung ban vèla sazunghawnghlap lo zàm chho vèl te chu delhin a muhil ta bawrh bawrh a, Loneitunu a lo thlen hma chuan.

A lo harh leh chiah chuan hmeichhe perfume rim nam chak mai chu a hre nghàl a. A thil hmuh hmasak ber chu mak ti hmèl taka loneitunu’n a lo en reng chu a ni.

” Tunge i nih? “
” Ka pi, i rimtùi hle mai!” a ti thung a.

” Eng rim mah ka nam lo, buarpui rim a nih nghàl loh chuan! ”

” Kha thil kha ti túr ka ni lo asin mawle!” a ti leh daih a.
” Eng maw, i tih a?”
” A, engmah. Engmah ka ti lo rèng rèng.”

A inthing harh a. Chu chul thlàm chhe tawh tak chu chhuahsan pahin, ” Ka pi, i bal chhetè ka lo ei a, min hrethiam a ni ang chu,” a’n ti zui a.

Túnah chuan a bialnu a thah atang khàn thla thum zet mai a liam tawh a. Chu pawh, a duh réng vàng ni lovin, tih palh thil thu liau liau a ni! Mahse, an thenawmte’n an inhnial buai leh thinrim taka an inhau thawm an hriat ve vek avàngin inpuang ta lovin kha mi zán la la la khàn tukverhah zuang chhuakin a tlanbo zui ta a ni.

A bialnu a thah atanga hapta hnih àwm vèl atang chuan thil mak ang reng tak mai a tawng tan ta a. Chu chu, a mutthilh a, a thanharh tikah a bialnu perfume rim a hre thin chu a ni.

Khuaah pawh lut ngam lovin ramhnuaiah a hmuh hmuh eiin a inhnawhpuar mai a. A vànneih cháng chuan mi thangawk a tawn fuh chàng a awm a, mi thlàm véla nawalh a ruk hmang chuan fimkhur taka meichhemin a hem hmin mai thin a ni.

Chutianga thla sarih zet mai a tal kual vèl hnu chuan zàn khat chu a riahna pùka a mu chu rawn nghengtu awm tlata hriatna a nei a. Mahse, chutiang àwm thilnung engmah a hmu bawk si lo. Reilotèah chuan hlauhnain a rawn tham zui a, a hmulthi te chu a ding ta sung sung mai a. Tlanchhiat ngaihna awm bawk si lo, a tho a, mei chu tinungin a thu tlaivar ta thak a.

Khua a lo èn chuan a hlauhna te chu a reh a. Pùk tolawta lungah chuan a thu vang vang a. Chutia, ngawi renga a thut lai chuan a thlang ruama lungrun taka hmeichhe zai ri chu a hre leh ta thut a. A hla sak erawh chiang fakin a hre thei lo.

Zai ri chu a ring telh telha hriatna a neih rualin a lo hnai tual tualin a hre bawk. A aw lah chu a hriat tawh hnu ni tlatin a hre leh nghàl. Hlauhna nèna a ngaihthlàk lai chuan zai ri chu a tàwp leh ta daih a. A thaw ta huai a. Mahse, chu chu bul tanna tùr chauh a ni si!

Chhunah chuan ei túr zawngin a chhuak thin a. A kaw puarna tùr táwk chu a hmu mai zèl bawk a.

Zàn khat chu thawm a hre leh ta tlat mai le. Pùk pàwn lamah chuan hmeichhe mangang khek ri a awm tlat mai. Kal tùr nge, ngaihthlàk liam mai túr?

A tàwpah chuan a huaisenna zawng zawng sawmkhàwmin meichher a dep kai a, pùk pàwnah chuan a va chhuak a. Inlàk huaisena’n an khek vél chiam a, mahse, thawm ri engmah hre zui lovin a lut leh ta a. Thawm chu thehmeh an sawi ang maiin a reh zui tlawk tlawk a. Mahse, mak tak maiin a bialnu perfume rim bawk chu a hre leh ta a, a ngaihna a hre lo hle mai.

Chumi atanga thla chanve chhúng chu tibuaitu awm lovin chu lai ram palailèng zimtèah chuan a la khawsa a.

Nì khat chu Mizo sairawkherh a siam chawp chu lek chhuakin sa a pel a.  Vánneihthlàk takin Zawbuang muhil lai tawng fuhin a perh let tawp mai a. Tha tho takin a pùk tè lam pan chuan a paw haw ta a. Mahse, ral atanga a pùk a’n hmuh meuh chuan a mengphar ta awn awn mai le! Pùk ko tlànga lungpui to lawta hmeichhe pakhat thu a’n hmuh meuh chuan!

A mit vai mai a ni lo, tih a hrefiah nghàl a. Chutia, a en reng lai chuan perfume rim bawk chu a hre leh ta a.  Túnah chuan chu hmeichhia chu a bialnu thlarau a ni, tih a hai thei tawh lo. Mahse, a hma ang khàn hlauhna rèng a nei tawh lo. Hmanhmawh takin a pan chùk chùk ta zawk a!!

Lungpui chungah chuan a dam laia chawlhnì thuam néna a inthuam ang chiahin a lo thu a. Hmèl runthlàk tak pu chungin, ” Lura, haw vang vang la, Pathian hnèna ngaidam dìl chungin ka chunga i thil tih sual kha va inpuang rawh. Kei paw’n ka ngaidam che a, Pathian pawhin a ngaidam a che! Túnah haw nghàl rawh. Ka hmangaihna che hi chatuan daih a ni, ka tih kha…!” a ti a, meikhu angin a zam ral ta a. Chumi atang chuan a bialnu thlarau pawh chu a reh hlen ta a ni!

About Mizo Archive

I'm the one who collect the best writings of Mizos
Aside | This entry was posted in Fiction, Thu Ngaihnawm and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s