FORENSIC FILES : SOILED PLAN by Bruce Kibby

Fa naupang te te pahnih nei, nu pakhat chu khawpui pawna an chenna In atangin chin hriat lovin a bo ta tlat mai. A hnu ni tlem a liam ang tihin a thian hnai tak leh a hnathawhpui ni bawk chu pakhat chu mak taka motor accident-naah a thi ve leh a. Mi thenkhat chuan chung thihna pahnih te chuan inkungkaihna an nei mai lo maw tih an ngaihtuah a. Kum 20 a ral hnuin ruang chu phawrh a ni a; Forensic Science chuan thu dik chu a rawn hailang ta.

Ohio ah chuan thlasik a ni mek a, Charles Mill Lake pawh a muanawm tan ta bawk. Nipuiah thung chuan engkim mai hi an phusa mur mur emaw tih tur a ni. A karthlaka Lawng khawl rum ri vut vut leh naupang tualchai hlim țe chel chul thawm hriattur a awm reng thin a ni.

LeRoy leh Melody Bruce te chuan chung huna an hlim lai ni te chu ngaiin an hre reng thin. Chung hun lai chuan lawngah chuangin lawng hmalam ah te chuan bathlar bawhin an hawi kual a, tui chunga thing hnah leh rannung te manin tu nge man tam ber tiin an in el thin a ni. Melody pahrawn Larry Bruce-a chu RoadWay Trucking te hnuaiah driver hnathawk a ni a. A nu Judy thung chuan in lam hna thawkin in lamah a awm thung a ni. Thian a kawm tam lova, achhan chu tawng lamah harsatna a neih vang a ni. Hun harsa tak a paltlang a, midangte’n a thusawi an hriat thiam theih nan theih tawp a chhuah a ngai a. Tawng a harsat chhan tak hi a dang a kak vang a ni a, chuvang chuan a inkiltawih em em a ni. Mahse, a dangkak zai that a nih hnuin a nunphung pawh a rawn danglam ve ta a. Diver License neiin ama pualin car pawh a nei ve ta a. General Hospitalah House Keeping hna a hmu a, chutah chuan thian thar a siam ve ta nual bawk.

Judy chuan Hospitala a hna chu nuam a ti zawng tak a ni a. Mahse, kum 1978, November ni 2 tuk chuan a hnathawhna a kal thei lo khawpin a dam lo a. A nuamsam lo tak zet a ni. A fanu Melodyi’n a school kai tur insiam tura a pindan atanga a lo chhuah chuan a nu leh pa te pindan kawngkhar inches 6 vela zaua inkau chu a hmu a. Chuta tang chuan Room chhung chu a hmu thei a, a nu Judyi khuma mu reng chu a hmu thei a ni.

Melody te unau chu school kai turin pawnah chhuakin bus stop lam an pan a. An rual chuan pa ber pawh a hnathawhna lam pan ve turin carin a rawn inkhalh chhuak ve bawk. School bana in an rawn haw chuan an nu chu inah a lo awm hauh lo mai. Melody nutapa chu in thleng hmasa zawk a ni a. Kawngka a Melody a lo luh rual chuan an nu awm lo thu sawiin pindan hran hranah chuan an han zawng a, mahse an hmu zo lo. A hnathawk bang rawn hawin an nu awm lo thu a hriat chuan Larrya pawh chuan ngaihthat lohna a nei ve nghal a. A nupui bo thu hrilhin Police te chu a call ta a ni.

Detective ten Larry-a te inchhung chu an han enkual a, a lan dan chuan chu inchhung atanga thil bo awm chhun chu Pi. Judy Bruce-i leh a thawmhnaw inbel te chaih chu a ni. A car a awm a, a purse pawh a awm bawk. A damdawi ei lai te pawh a awm thlap a ni. Tharum hmanga inchhunga luhna hnuhma emaw inchaina hnuhma ang chi engmah hmuh tur a awm lo va. Damdawi Inah admit a ni thei a, hnathawk turin a kal te a ni lo maw tiin hospital lam an han call a. Mahse, tuma’n an lo hmu tlat lo. A thian emaw chhungkhat laina tuman Judy lo hmu an awm lo a ni.

Zankhuaa Judyi an zawn hnuin Police te chuan thil lawmawm lo zet hmuh chhuah an nei ta. Police te chuan Pu. Larry te inah chuan kalin an nu, Judyi an hmuh thu an va hrilh a. Mahse, Judyi chu thiin an hmu a ni. Scout ten camp an neihna, hmun finrial tak mai, tuipui peng te tak te dungzuiah Judyi ruang chu an hmu a, a ruang awmna hi kawngpui sial thar atanga hla lo teah a lo awm a ni. Pyjamas a ha a, blanketin a lo intuam a ni. Pheikhawk a bun lova, a ke thiah te chu a fai han bawk. A ke fai dan atang chuan a ruang an hmuhna hmuna thah a ni lo tih a rin theih a ni.

Police ten Larry Bruce chu thu an han zawtfiah a. Larrya sawi danin a nawmsam vak loh avangin Judy chuan nilenga khuma mut a rilruk a; khawiah nge a kal tih rin dan a nei lo thu a sawi bawk a ni. An fa te chuan an nu bo tuk khan Larrya chuan an rualin In a chhuahsan ngei thu an sawi a. Larrya hnathawh hunbi inziahna (time sheet) atangin a hnathawhna hmunah a kal ding nghal ngei a ni tih a chiang a. Hemi ni a a hnathawh hunbi pakhat mah a hmaih lo va, dan pangai piahlam thil thleng engmah a awm lo bawk. A hnathawh hunbi atang chuan tual thah hmanna tur khawp hunawl a nei lo tih chiang takin a lang a ni.

Inchhung an han enfiah a. Police te chuan Larry pheikhawk hnuaia lei țhil kai chu an hmu a. Chu lei țhil chu Judy ruang an hmuhna lai vel a mi lei țhil a ni thei mai ang em tih an ngaihtuah a. Chuvang chuan Larrya pheikhawk leh ruang an hmuhna bul vela mi, lei țhil chu lain enfiah a tan FBI hnenah an thawn ta a ni. FBI te enfiahna result atang chuan chiang fakin thu tawp a siam thei tlat lo. Mahse, Judy autopsy chuan hnu thar tam tak a rawn hailang a, zawhna tam tak a rawn hring chhuak ta bawk a ni.

Judy Bruce ruang chu Cuyahoga County Coroner hnenah autopsy ti turin an thawn a. Medical Exminer chuan Judy thihna chu “Inthahna ngei a ni” tiin thu a titlu ta a. A thih chhan chu boruak tlachhama thi (asphyxiation) a ni a, thaw thei lova siamin thah a ni. A thih hun dik tak erawh science hmanga dik taka chhut chhuah thei a ni lo va. Mahse, Larry leh a fa ten in an chhuahsan hma emaw hnu lawka thleng niin an chhut a ni. Autopsy atangin Judy phing chu a ruak a ni tih a lang bawk. Mi tu emaw thawchhama a thih hian duh reng vang ni lovin phing chu a intiruak ta thin a ni. Investigatorte chuan Judyi ruang an hmuhna bul velah chuan zun tih tham an hmu lo va, chu chuan Judyi chu hmun danga thah ngei a ni tih entirna dang leh chu a ni.

Naupang te chuan Judy bo hnu lawkin an khum khuhna a bawlhhlawh kai avanga an pa phun nawi thu Police te an hrilh a. LeRoy sawi dan chuan a pa chuan bed sheet chu bawlhhlawh bawmah paihin a hal a, “Eng vanga hal nge a nih?” tia a zawh chuan a pa chuan “uiin a zunkhum a” tiin a lo chhang a ni. Chu thuthar an hriat ve leh Police te chuan Larry te nupa mutna pindana awngphah leh puanthuah la awm te chu an la ta nghal a ni.

Police te chuan awngphah leh puanthuah an lak te chu ngun takin an han enfiah a. Lukham pakhat zawkah chuan thisen a kai a, puanthuah ah chuan eng e ni chiah tih la hriat loh bawlhhlawh kai a awm bawk a ni. Mahse, vanduai thlak takin he thil thlen lai hi chuan Forensic Test hmangin tu thisen nge ni a tu zun nge tih finfiah thei a la ni lo va. Heng hun lai hi chuan ran thisen nge mihring thisen zawk tih finfiah thei turin thiamna a la awm lo a ni. Thiamna awm chhun chu eng ang blood type nge tih finfiah chauh a ni a. Dik tak chuan lukham atanga thisen sample an lak chu a tlem tham em avangin blood type hmanga finfiah pawh an ti thei lo a ni.

Larrya car chu an han belchiang leh ta a. Car hnung savawm bawmah chuan investigator te chuan sasua thing hnah tam vak lo an hmu a. Joel Moroney, Reporter, Mansfield Journal News sawi dan chuan Investigatorte chuan Evidence tih tham an nei lo va, an evidence neih chhun tlem te te lah Forensic Science thiamna a la san loh avangin an chhawr tangkai thei lo a ni.

Judyi ruang chhar a nih atanga ni tlem a liam leh hnuin Mansfield ah chuan thihna dang a thleng leh ta. Judy thawpui te zinga pakhat James Isaaca chu traffic accident na ah a thi a. Larry Brucea chuan thu ngialngan deuh puanchhuah a nei ta bawk. Policete a hrilh dan chuan Isaac leh a nupui Judy chu a rukin an inkawp a; Isaac-a chuan a nupui thatin amah pawh a intihlum ve ta a ni ang tiin a sawi a ni. Judy thihnaah chuan Isaaca chuan eng emaw kawng zawngin mawhphurhna a nei niin Larry chuan a sawi a, mahni inthiam lohna vangin a intihlum ta ah a ngai a ni. Mahse, Larrya thusawi chu a dik ngei a ni tih tuman an finfiah thei bik si lo a ni. An mi ngaihven bul ber chu Larry Brucea chu a la ni ta tho a. Tichuan Police te chuan Larry a lakah chuan dan pangai taka hekna siam lo turin thuthlukna an siam a, achhan chu a hun laia finfiahna an neih te chu thil thleng nena hmehbel thil vek a ni. Hun a liam zela Judy Bruce tualthihna chu unsolved case file mawngphah lamah a awm ta a ni.

Detective chuan,” Kha case kha ka theihnghilh ngai reng reng lo. An chenna in bul velah ka inkhalh chang a awm thin a. Roadway Trucking bul hnaia ka inkhal chang te hian chu laia hnathawk te chu ka zawt thin a,”Larry khan khami case chungchangah khan eng e sawi a neih?”tiin. Achhan chu Larrya khan a nupui thih hnu pawhin Roadway ah chuan hun rei tak a la thawk a ni. An hnen atang ahriat awmchhun chu Larrya chuan intihtheih nan a hmang zawk zamah emaw tih tur hi a ni.

Judy thah a ni atang kum khat leh a chanve ah chuan Larry Bruce chuan nupui a nei leh ta a. Tichuan an nupa chuan Mansfield-a an Inah chuan an khawsa chhunzawm ta zel a. Cold Case Unit ten Judy Bruce tualthihna chu chik lehzuala an enfiah hma zawng, kum 20 chhung chu Judy tual thihna Case chu chhuichhuah lovin a awm ta reng a ni.

Kum 2000 ah chuan Ohio a Mansfield Police te chuan an File zingah tual thahna case chhui chhuah theih loh 17 lai an nei a; tualchhung Official te chuan chutiang zat ngawt mai tual thahna chhui chhuah lova awm ta chu an pawmzam thei lo tan ta a ni. Khawtlang dangin an chin tan angin Prosecutor te chuan an han ti chho ve ta a. Prosecutor-te chuan County Commissioner hmuin Case la chhui chhuah loh te enfiah turin Homicide Unit din nan $.25000/- an dil ta a ni. Case an ennawn hmasak ber chu kum 20 aia rei chhui chhuah thei lova lo awm tawh Judy Bruce tualthihna Case a ni. Dan kengkawhtu thenkhat chuan pawi khawihtu chu Larrya ngei chu niin an ring a. Mahse, an finfiah thei mai si lo a ni. Tichuan, Cold Case Unit thar te chuan an hnuchhui hna chu a hma kum 20 liamta a Larry Bruce a motor savawm bawma an hmuh Sasua hnah atangin an tan ta a ni. Larry-an savawm bawm hawng a ruang a lak chhuah lai khan sasua hnah thenkhat chu savawm bawmah chuan a tla lut ta a ni tiin ngaihdan an nei a ni.

Forensic Files pakhatah chuan chutiang hnah them Test dan thar awm thu tarlan a ni a. Scott Reinbolt, Cold Case Detective chuan,”Zan khat chu Forensic Files episode ka en a, mithiam ten Plant DNA case chungchang an sawi a.” tiin Forensic Files atanga ngaihtuahna thar a neih dan a sawi a. Chu hnuchhuina a a pawimawh lai ber chu an mi rinhlelh ipte a seedpod (behlawi ang tak thingrah) awm chu a ni a. Chu Seedpod chu tualthi ta ruang awmna bula thingkung ding Palo Verde Plant DNA nen an inang tih an hmu chhuak a ni.

Scott Reinbolt, Cold Case Detective chuan Plant DNA Analysis lama sulsutu Scientist te chu be pawpin Larrya car savawm bawma an hmuh Sasua hnah te chu Judyi ruang bula Sasua thing a mi a ni em tih finfiah a Test ti turin a ngen ta a ni. Scientist te chuan Judy Bruce-i ruang an hmuhna bul hnaiah Sasua thing dum chi emaw a sen chi emaw a țo em tih hre turin Scout Camp ah chuan an kal ta a. Ruang an hmuhna bul velah chuan Sasua thing eng emaw zah a lo ding ngei a. Mahse, vanduai thlak takin kum tam a vei tawh a Scientist te chuan Sasua hnah atang chuan eng DNA mah an lachhuak thei lo a ni. Mahse, Police te chu an la beidawng duh mai lo, an va ngaihsanawm tak zet!.

Investigatorte chuan Judy Bruce-i te mut pindan a mut puana bawlhhlawh kai te chu Test tinawn turin thuthlukna an siam leh ta a. Chung bawlhhlawh kai te chu mipa chi ngei a ni e tih finfiah turin Kum 1978 kha chuan DNA Analysis hi a la awm lo a. Mahse, tunah chuan a finfiah thei tawh a. Tichuan, uluk takin an han enfiah a. Mut puana mipa chi kai hmun khat a mi chuan Judy pasal Larry Bruce-a DNA a mil a; hmun khat dang a mi chuan a mil lo thung. Judy-i thah a nih lai khan Larry Bruce-a chuan a nupui leh Judy thih tuk lawka rinhlelhawm taka Traffic accidenta thi ta, a hnathawh pui James Isaac te chu an inngaizawng niin a sawi a. Mut puana mipa chi awm chu Isaac a DNA a ni em tih hre turin Investigatorte chuan James Isaac-a ruang phawrh phalna Court atangin an la ta a ni. Tichuan, Isaac-a ruang chu an phawrh ta a. Isaac-a DNA leh puanthuaha DNA te an han khai khin chuan an inmil lo tih hmuh chhuah a ni. Puanthuah a mipa chi a DNA chu hriat chhuah lovin a awm hlen ta a. Investigatorte chuan Judy Bruce leh James Isaac te chu thian satliah an ni tih bak evidence dang an hmu zo ta lo a ni.

Tichuan, Dick Bisbing, Senior Research Microscopist chuan Evidence an la kawl that a mi, Bruce Larry-a pheikhawk chhuat hnuaia lei țhil kai chu enfiah turin an han ngen leh ta a. Chumi enfiah nan Bisbinga chuan Polarised Light Microscope a hmang a. Chumi hmanga enfiahna chu Polarised sun glasses hmanga en ang mai hi a ni a. Mahni duh ang zawng a Eng zung an han thunun chuan lei țhil a zia hrang hrang awm te chu an hmuh thei a, lei țhil a mineral awm te hmelhmang bik te te te chu a hriat hran theih vek a ni. An lan dan te, an rawng te leh an pian zia te atangin eng mineral nge an nih tih chiang takin a hriat theih a ni.

Larry Bruce-a pheikhawk hnuaia lei țhil kai te leh Judy Bruce-i ruang an hmuhna bul vela lei țhil te a han khai khin chuan an lo inmil ta hauh lo mai. Mahse, Polarised Light chuan a tira an lo hmuh hmaih tawh, hriat loh thil chhui chhuah theihna hmanrua pawimawh tak a rawn hai lang ta a. Chu chu lei țhil zinga mineral tle set set lo awm te chu a ni. Pheikhawk hnuai a lei țhil ah chuan Calcite a tel a, chu chu Calcium Carbbonate tihna a ni. Chinai lunga mi a ni ngei ang. Chutiang leilung chu kawng siam nan emaw kawng chhuat phah nana hman thin a ni. Judy-i ruang bul lawkah chuan Judy-i ruang paih a nih hma lawka chinai lung te hmanga kawng phah thar hi a awm a. Hei hi Larry Bruce leh Judy ruang an hmuhna hmun thlunzawmna ni thei tur thil hmuh chhuah an neih hmasak ber chu a ni ta a ni.

Tichuan, Investigatorte chuan Larry Bruce-a Cadillac (car model pakhat) hnung lam bawm tuamtu puan leh Judy ruang tuamna blanket te chu Forensic Analysis ti turin Cuyahoga County Coroner Office lamah an thawn leh ta a. Larry Bruce-a car chhungah khan Judy Bruce-i ruang emaw a ruang tuamna blanket emaw a inkhung ngei a ni tih finfiahna awm thei ang ang hmuh tumin uluk takin evidence an zawng ta a ni. Forensic Scientist, Curtiss Jones-a chuan Tape hmangin Judy ruang tuamna blanket a lazai tla hlang awm te chu a han lakhawm a. Tichuan Comparison Microscope hmangin Jones chuan Car hnunglam bawm tuamna lazai nen thuhmun an ni nge ni lo hriat tumin uluk takin a han enmil ta a. Car hnunglam bawm tuam nana hman la zai inang lo vek chi thum ang chu blanket ah chuan a bet ngei a ni tih a finfiah ta a ni. Mahse, Larry Car bawma lazai te leh Judy ruang tuam nana hman blanketa lazai an hmuh te chu thuhmun ngei an ni em?. Chumi hre thei tur chuan Jones-a chuan kum 1978 a Technology la awm lo Fourier Transform Infrared Spectroscopy (kan sawifiah tawh kha maw) chu a hmang a. FTIR hian Infrared Energy a hmang a, chu infrared chuan lazai emaw hmanrua enfiah lai mek chu a chhun tlang a, hmanrua enfiah a chemical awm chuan infrared energy chu a lo hip lut emaw hip lut lo in a awm ta thin a. Chu chuan eng zung dangdai bik tak (spectrum) a rawn ti chhuak ta a. Chumi hmang chuan lazai ah chuan eng chemical nge awm tih a finfiah theih a ni. Chutianga a han enfiah chuan blanket a lazai pathum awm te chu Synthetic Rayon an lo ni a, car bawm chhunga lazai pathum an hmuh te pawh Synthetic Rayon ngei an lo ni ve bawk tih a hmu chhuak ta a ni. A sawi dan chuan Evidence te hian dawt an sawi lo va; thawnthu inang lo pahnih awm ta se thawnthu dik dawt sawi lo zawk chu Evidence chauh hi a ni.

Judy thihna atanga țhang khat lian zet liam hnuin Larry Bruce-a chu man a ni a, Judy that a puh a ni ta. Prosecutor-te chuan an hnuchhuina atangin Judyi khan thuruk tui hnai lo zet mai zep ruk a nei tih an hre chhuak a; chu thil chu Larryan midang te hriat ve a tana a duh lo thil a ni.

Judy thih atanga kum 23 ral hnuin a pasal Larry Brucea tualthah thubuai chu ngaihtuah a ni a. Prosecutor lam witness hmasa ber chu an fapa LeRoy Bruce a ni. LeRoya sawi dan chuan a nu thih tuk khan school a mi tur Permission Slip sign tir turin a nu leh pa te mutna pindanah chuan a va lut a. A pa’n permission slip a sign lai chuan ani chu a bulah chuan a ding a, a nu Judy chuan eng thil nge thleng tiin a lo ngaihven ngei a ring a, mahse chechang hauh lovin anu chu khumah chuan a mu a ni. Prosecutor-te chuan LeRoyan Permission Slip a va sign tir lai khan Judy Bruce-i chu a thi daih tawh a nih an ring a. An rin dan chuan Larryan naupang te school kai tura a chhuah tir hnuin Judy ruang chu blanketa tuamin a car hnung kam bawmah chuah a khung ta a.

Hnathawhna hmun lam pana a kal kawnga Bus Stop a bus lo nghak mek a fate lam hawiin a ban a vai a, a fate te chuan a awmna chin an la sawi ngei dawn tih a beisei a ni. Tichuan, a hnathawh pangai chhunzawm turin a hnathawhna hmun chu a pan ding ta nghal a. Tlailam hnathawh ban chuan hmun fianrial tak, Scout te Camp-na ah chuan va inkhalhin a nupui ruang chu a theh thang ta a ni. Larry car bawma tuamna a mi synthetic rayon lazai chu Judy ruang tuamtu blanket ah chuan a kai a, Larry phei khawkah chuan kawng phah thar nana hman chinai lung țhil te chu a bei ta bawk, chung chinai lung te chu Forensic Scientist fimkhur tak te chuan kum 20 liam hnuin a hmuchhuak ta a ni.

Prosecutor Mayer-a chuan a witness zinga Jury te hmin thei ber tura a rin chu a hnuhnung berah a han ko ta a. Chu a witness chu tu dang ni lovin Melody a ni. Melody hi Larry-a fahrawn a ni a. Melody sawi dan chuan kum 5 a nih atanga kum 14 a tlin thlengin Larrya chuan Melodyi chu a lo khuaikhem thin a. A sawi zelnaah chuan a nu Judy chuan an chhungkuaa thil thleng chu a hria a, chuvang chuan a nu chu tawng chhuak lo tura thah duhna chhan tur Larryan a nei tiin a sawi bawk ni. A nu thah a nih hma, hmeichhe naupang te a nih laiin pindanah a pahrawnin a lo khuaikhem laiin a nu chuan tihpalh thil thuin pindan ah chuan a va lut a. Inkhuaikhemna chu a mit ngeiin a hmu a, a pasal Larry Brucea chungah chuan a thin a ur nasa hle a. Nasa takin an inhau zui nghal a, tawng bawlhhlawh hmangin ring tak takin an inankhum a. Chumi tum chuan Larry Bruce chuan Judy i hnek tumin a kut vai a, a kut vai thelh chuan bang a hnek a, a kut a tiulh nghe nghe a ni.

Larrya te lam ve thung chuan witness koh chhuah an nei lo va, mahse Prosecutor lamin case chu ‘rinhlelh tur awm hauh lovin an finfiah lo ve’ tiin an hnial a. Finfiah tur tak awm lovin thil thleng nen an hmehbel mai chauh zawk a ni tiin tan an khawh a ni.
Jury te chuan thubuai chu dar kar 2 aia tlem hret an ngaihtuah a. Larry Bruce chu a nupui Judy Bruce thah thubuaiah thiam loh chantir a ni ta. Kum 15 atanga damchhung lung bang zut tura hremna pek a ni.

Melody chuan, “Thiam loh an chantir avangin Ka lawm tak zet a ni. Mahse, chuti rualin hremna an pek laia lo awm ve erawh ka duh lo. Achhan chu heng thil te hi a thleng ngei a ni tih thudik tak hmachhawn kha ka duh lo a ni.” tiin Larry thiam loh chantir a nih tak avanga a lawm thu a sawi a ni.

Kum 20 aia tam a liam hnuin Old Fashioned Police te hnathawh leh Modern Forensic Science te hmangin a tawpah chuan Judy Bruce chhungte tan rorelna dik chu an hlenchhuah sak a ni ta. He case bikah hian Forensic Evidence te kha an pawimawh hle a. A chhan chu Forensic Evidence te kha awm lo se chuan Jury te khan Larry Bruce kha a thiam lohna hmu zo lovin a chhuah zalen thei tlat a ni. Hun liamta ah khan let leh theih nise, kum 1978 a Police te kha tunlai thiamna hmanga thil tih theih chin hrilh ni ta se, an ngaihtuah phak bak thil chu a ni ve ngei ang le.
************

Advertisements

About Mizo Archive

I'm the one who collect the best writings of Mizos
Aside | This entry was posted in Thu Ngaihnawm and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s