LAWNG HRANG LAR ZUALTE by Andy K Zarzoliana

1) SS Watertown
Kan chenna khawvel hi khawmual aiin tuifinriat hian a tuam hnem zawk avangin thilmak kan tih pawh hi tuipui a thleng hnem hle dawn tih chu a rin theih mai a. Mahse, mihringte hi khawmuala cheng tura duan kan nih zawk miau avangin tuipuia thilmak inphum chu kan hmu tam lo mai zawk niin a lang.

US Oil tanker lawnglian pakhat, SS Watertown chu New Orleans lam panin tuipuiah a her chhuak bur bur a. Panama Canal a paltlang hnu lawkah vanduaithlak takin an tuialhthei phurh chu a put a, tuialhthei put hakin lawngmi pahnih Courtney-a leh Meehan-a chu kawng lakah an boral ta der mai a ni. An ruang chu Mexico vaukam bulah an phum a. An thawmhnaw țhenkhat erawh lawngah a la chambang thung a.

Anni pahnih an vuiliam hnu chuan lawng Captain țhuihruai chu lawng bathlar velah a teihawi vel a. Lawng hnuai lam a han thlir chuan tuipuiah mihring hmel a hmu ta tlat mai a, mi pahnih hmel a ni nghe nghe a. Chung mi pahnih hmel rawn langte chu nimin maia an vuiliam tak Courtney-a leh Meehan-a te hmel a ni mauh mai.

Chumi ni atang chuan anni pahnih chu an lawng bathlar hnuaiatanga metres 13 vela hla tuipuiah chuan an rawn inlar ta ziah mai a ni. An pahnih hmel inkar hlat lam pawh metres 3-velin an in hlat thin a. A hmutu apiangin mak an ti bang lo a ni. A rei deuh hnu phei chuan lawnga hnathawk zawng zawngin an hmu kim vek ta hial a, engvanga rawn inlar nge an nih erawh a hria reng an awm lo a ni.

A landan atang chuan an damlai hmel pangngai aiin an lang lian viau bawk a. Second 10-vel an inlar hnuah an han pilbo leh ang ren rawn thin a, a hnu reilo teah chutiang bawk chuanan rawn inlar leh thin a ni. Atlantic tuipui chunga an kal lai chuan, chung mi pahnihte chu an inlar ta lo va. New Orleans an thlen rual chuan an Captain Tracy chuan an lawng hmunpui, The Cities Service Company-ah chuan an thil tawn chanchin chu a report nghal zung zung a. Chung mite pahnih thlarau hmel chu a rawn lan ruala an thla lo lak nan tiin camera thar a lei nghal bawk a.

Captain Tracy-a beisei ang ngeiin lawnga an let leh lamah chuan, chung mite pahnih hmel chu tuipuiah an rawn inlar lehta ngei mai a. Captain chuan a camera phawrhin an thla chu an khul duh leh duhloh lam reng ngaihtuah lovin a hmet ta malh malh mai a ni. An hmel lanfiahna bik chiangkuang takin țum ruk ngawt a la ta a. New York an han thleng a, a camera hmeh takte a han print-tir a. Mak tak maiin a camera hmehah chuan eng thla mah a lang hlawm lo va; mahse, vanneihthlak takin pakhatah chuan Courtney-a leh Meehan-a te hmel tih hai rual lohvin chiang mang kheng hian an rawn lang ta a ni.

A hnua an zinchhuah leh pawhin heng mi pahnihte thla hi hmuh a ni thin a. Mahse, hun a lo rei a, an inlar khat tial tial a. An țum li zinchhuahnaah chuan lawngmi mithar an inthlak ta bawk nen, Courtney-a leh Meehan-a te thla chu tuipuiah an rawn inlar ngai ta lo a ni.

Mi țhenkhat rindan chuan lawngah an bungraw țhenkhat la chambang a awm vanga inlar an nih an ring a. Țhenkhat ve thung chuan, Sap-hovin ‘Attachment spirit’an tih ang deuha an hnathawh lai chu bansan mai an tum loh avanga tuipuiah an thla chambang ta niin ang ngai tlat mai bawk.

2) QUEEN MARY
RMS Queen Mary Lawnglian hi John Brown leh Company Clydebank scotland ami te lawnglian leh ropui RMS Queen Mary lawngpui hi lawng hrang (Ghost ship) an sawi tawh zingah chuan a mikhual lo ber pawl a ni hial awm e.The Gray Ghost tiin a hming an phuah belh nghe nghe a. HMS Curacao lawng nen an insut țum khan HMS Curacao lawng chu mi 300 vel nen tuipui mawngah a pil a. Mahse, a pil tawh hnu veng vawngah pawh, he Queen Mary lawnga chuangte hian Curcoa lawnga chuangte mangang au thawm tihbaiawm tak chu vawi tam tak an hre țhin a ni. Tin, Queen Mary lawng hi țhiahdarh a nih hma khan lawng pindan hnuai lamah ramhuai leh lawnga hnathawk thi tate thla an hmu fo thin nia sawi a ni mauh mai. Vawiin thleng hian lawng hrang chanchin an sawi tawh chuan, he Queen Mary lawngpui chanchin pawh hi sawi hmaih chi a ni hauh lo ang le!!!

3) FLYING DUTCHMAN
Lawng hrang an sawi zinga lar leh hmingthang ber pakhat chu “The Flying Dutchmen” an tih hi a ni awm e. He lawng hi khawvel lawng hrang an sawi zinga lawng upa pawl tak niin, kum zabi 16th lai daih ami kha a ni tawh nghe nghe.Kum 1680 khan lawng Captain lung lian zet mai Mr Handrick Vanderdecken-a chuan a hote nen Amsterdam atangin Batavaia panin tuifinriat zau takah chuan an tawlh zur zur mai a. Mahse, vanduaithlak takin an zinkawng zawh mek chuan an tum ram thlenpui zo ta lovin tuipui thim chhah mup chuan an zavai chuan a lempil zo ta a ni.

Lawng Captain Handrick Vanderdecken hi “The Flying Dutchman” an tihna chhan pakhat nia sawi a awm bawk a. Africa Khawmualpui tawp Cape of Good Hope lama zin kawng an zawh laiin thlipuiin a nuai chiam mai a. Lawng bangleh tui inhlap thawm te chu a ring kher mai. Lawng-mi hnathawk te chuan thi vek dawna an inhriat avangin kir leh mai chu thaa an hriat laiin, an Captain Vanderdecken-a chuanhmalam pan zel turin thu a pe tlat mai si a. Hmalam pan chuan thlipui chu an tawn ta zel a. Lawng puanzar-hruiin a awhhlum pawh an awm nual nia sawi a ni. A tawpah chuan lawnga chuang zawng zawng chu a lawng chawpin tuipui thim chhah tak chuan a lempil zo ta a ni, an ti.

He lawng ”Flying Dutchmen” an tih hi tuifinriat zautakah a pil bo va; mahse, a hnuah chhiatna an tawhna hmun velah chuanlawng-miten, he Lawng Flying Dutchmen an tih hi an hmu ta fo mai niin an sawi thin. Kum zabi 20th thleng pawh khan he lai tuipui chheh velah hian an la hmu chhunzawm reng niin ansawi thin a, lawng hrang inlar rei ber pawl a ni hial awm e.

Vawikhat pawh Royal Navy ship H.M.S an tih chu Africa panin a zin chhuak a, Flying Dutchmen lawngin chhiatna a tawhna hmun an va thlen chuan ”Flying Dutchmen” chu an va hmu chiangkuang viau a ni awm e. King Gorge V sawidan chuan, “Buaina lian tak an tawk tih hai rual lohin an lawng chu mu leh mal nei lovin a then lawp lawp a. Mihring mangang authawm leh thlabar au thawm chu thil rapthlak tak a tling, tanpuitu auvin mei an pechhuak thin a; mahse, țanpui tuma kan va kal hnaih chuan, Yards 200 vel awrh chauhah hian kan hmuh lai rengin boruakah a thamral ta mai a ni” a ti.

He lawng hrang hian chanchin a ngah viau mai a, a tak phenah dawt thu leng vel pawh a tam phian ngei ang. Zan thla eng hnuaia lawng hrang inlar lawng miten an hmuh zin ber niin an sawi bawk a ni.

4) The SS Ourang Medan
Dutch bungraw phur lawng lian leh ropui zet mai, SS Ourang Medan an tih chuan kum 1948, Febuary thla khan thil mak lehdanglam tak mai a tawng tlat mai a. He thil thlen lai hian Indonesia ramrihrula an awm lai a ni nghe nghe.

SS Ourang Medan chuan thil danglam tak a tawng tih hai ruallohvin hmunpui lamah thu a thawn a. An thu thawnah chuan, “kan lawnga officer zawng zawng an thi vek tawh, kan zavai hian kan thi dawn e.” a rawn ti a. A hnuah chiang leh fiah takin “ka thi ve dawn ta” tiin a rawn sawi leh a, tichuan SS Ourang Medan thu thawn chu a reh ta hmiah mai a ni.

Rescue vessel Chhanchhuaktute chuan SS Ourang Medan lawnga chuang zawng zawng chu mak tak maiin an lo thi vekmai a; mahse, mit chhinga thi tumah an awm lova, an vaiin chunglam melhin an thi vek ringawt mai a ni. Tin, mak tak maiin an hma lamah an ban an phar chhuak vek bawk!! A landan ah mitthite chuan an thih dawnah hlauh an nei tih hriat reng reng hian hmel pangngai lo tak an pu vek bawk a, chhanchhuaktu pawl chuan mak an ti kher mai. SS Ourang Medan lawng chu lawng dang nen thlunzawma hnuh hawn mai an rilruk a. Mahse hnuh tuma an han beih lai chuan lawngkhuchhuahna atang chuan meikhu a lo chhuak chiam a, an hnu sawn thei ta reng reng lo mai a. Hmanhmawh takin SS Ourang Medan lawng chu an chhuahsan a, chu ve leh lawng hnuai lam chu puakkeh thawm ang maiin a ri dup a, SS Ourang Medan lawng chu a pil ta daih mai a ni.

He lawnga chuangte thihdan mak tak hi mi tam tak chuan ramhuai hnathawh emaw, UFO lam thil tih emaw niin an ngai hlawm a, chiang taka sawi thei erawh tumah an awm lo thung a ni.

SS Ourang Medan lawng pawh hi lawng-miten Ramhuai lawng an hmuh thin ang bawkin a pil bo hnu veng vawngah pawh he a chetsualna hmunah hian vawi tam tak a rawn inlar a, a bikin zan thla eng hnuaiah a rawn inlar thin a. A chhungahmi tam tak au nuaih nuaih thawm te, zai thawm te leh mihring inau rawng rawng thawm an hriat thin chu lawng mite hrilhfak a tling a ni.

5) GRIFFON LAWNG HRANG CHU
Lawng hrang (ghost ship) zingah kum 1678 september thlaa Michigan Green Bay atanga zin chhuak, a chhuah atanga chhui zui tur awm miah lova bo hlen ta Griffon lawng hian sawi zui a hlawh hle a. A bo atanga kum tam tak a vei hnuah tuifinriata khualzin mite leh lawngmite’n chuan zan thla eng hnuaiah an hmu fo va; mahse, hmuh chian tuma an va hnaih ve leh boruakah a tham ral leh ringawt mai thin a ni.Zan khat chu, Lawng hnathawk Jamesons chuan zan lai pelh hret hnuah an lawng chu a han fang kual vel a. A beisei loh lutukin lawng bo Griffon lawng chu an lawng kiangah a lo awm reng mai hi a hmu hlawl mai a, mak a ti kher mai. Chutia lawng pil bo tawh nia an ngaih tuipui chunga a lo inlar tha leh a hmuh chuan a hlau titih ta hial mai a.

Chumi zan chuan thla a eng bawk a, Griffon lawng banga lawng mite thil ziah ran leh an hrui suih hrawl pui pui thleng chuan fiah takin a hmu thei a, mahse mihring thawm reng reng hriat tur a awm lovin thla eng dul ruih hnuaiah chuan a ding reh vung vung ringawt mai a. An sulpel lai chuan lawng pindan chhungril lamah sathau khawvar a inchhi eng raih a, mihring hmel erawh hmuh tur a awm hauh lo thung a ni.

He lai hmunah tho hian kum 1975, November thla chawhma lam khan, khawl bungrua leh thir lam chi phur țhin lawng pakhat, Edmun Fitzgerlangd an tih chu lawngmi 26 nen a lo khuangcher bo ringawt tawh bawk a. Mak tak maiin a hnu kum 10 vel liam hnu veng vawngah lawng mite mit-hmuh laiin a rawn inlar ta fo mai a. A hmutute chuan hahip tak meuhvin an hrilhfak a ni.

Lawng-mite chuan he lai hmun hi tuipui huai awmna niin an ngai mauh mai a, an pal tlang chang pawhin an fimkhur em em a, chetsual palh hlauvin an inralring reng thin a ni.

6) IRON MOUNTAIN BO DAN MAK
Lawngmite hian tuipui huainei nia an sawi leh chetsualna țhinna hmun hi an hlau thei viau mai a. A theih hram chuan an hel loh vek chuan fimkhur theihtawpin an pal tlang hram hram thin.Kum 1872 khan Iron Mountain an tih mai țhin, bungraw phur lawng lian pakhat chuan a chunga thil lo thleng tur hrelawk reng reng lovin a bungraw phurh rip tak nen chuan Vicksburg Mississippi-tuipui thim mup lam pan chuan a herchhuak bur bur a. Chumi tlai chuan boruak a thiang nuamin boruak awmdan pawh a thengthaw nuam vel viau mai a. Nidang zawng aiin chumi țum chuan puanthan la leh Barrel pawh a phur am zawk a, lawng pindan hnuaihnung ber atanga tui chim chin a landanah pawh țum dang ai ngawt chuan an rip zawk hle tih a hriat theih a.

Nimahse, a naktuk maiah chuan Iron Mountain lawng chu hmuh tur awm lovin a bo ta hmiah mai a ni. Mississippi tuipuia zin vei vak ve țhin Iroquois chief lawng chuan Iron Mountain lawng thil phurh tuipui chunga lo lang nuaih chu a va hmu hmasa ber a. Mahse, mak tak maiin Iron Mountain lawnga ber chu hmuh tur awm lovin a bungraw phurh tlawng chu hmuh tur awmchhun a ni mai a. An bungrua erawh a kim angreng viau lawi si a, a phurtu lawr ber chutia a han bo ta ringawt mai chuan a ti hrilhhai kher mai. Chutiang a lo nih takah chuan, khawiah nge Iron Mountain lawng leh a hnathawktu (crew) te chu an awm tak ang ??? tih chu zawhna lian tak a ni ta.

Tuifinriatah hian lawng tam takin chetsualna an lo tawk tawh thin a; amaherawhchu, hemi țuma Iron Mountain lawng leh a hnathawktute bo dan ang chi erawh hi chu hriat tur a tam lo viau a ni. Ngaihdan leh rinhmang erawh a piang lo thei lo va, an rindan chuan lawnga hnathawktute hian an lawng chu tipilin an tlanbo ta a ni ang e, tih te, lawnga thawktute hi chunglam thilmak emaw, UFO lamin emaw an ru bo ta a ni ang e, ti pawl pawh an awm nghal var mai. Mahse, chung chumihring ngaihdan ve mai a ni a, thil thlendan chipchiar taka sawi thei tumah an awm loh avangin official taka puanzar emaw, chawtak khuka han khukpui vak chi lah a ni hek lo.

Thil awmdan chutiang a lo nih takah chuan hotute beng pawh kar lovah a thleng nghal ta mai reng a. Hnu chhuithiam hovin an thiamna sawmkhawmin rei ngial an han zawng a; mahse, hmasawnna a awm thei chuang lo. Mimal tak pawhin hmuh ngei tumin an han bei chiam thin tak a; mahse Iron Mountain chu a hnathawktute chawpin puallenga thlang tla an sawi ang maiin a reh vawng vawng mai a. Lawng lian tak pakhat a keh them pawh hmuh tur awm lo leh hnu chhui tur pawh awm lova a han khuangcher bo hmak mai chu miten mak an ti bang lo va, hun rei tak chhung chu an zawn dan key-te thlakin a han sawr zim vel ngial thin tak nain, hlawhtlin ni reng an nei thei lo. Rei tak an phek zawn hnuah Iron Mountain zawn hna chu kutbengin an chawlhsan ta ringawt mai a ni.

Mi tam tak chuan, he Iron Mountain lawng leh chunga chuang hnathawktute hi tuipui huaiin a lemzo ta niin an ring ta ber a ni.

Collected by: Andy K Zarzoliana (KVLC) Unsolve Mystery

Advertisements

About Mizo Archive

I'm the one who collect the best writings of Mizos
Aside | This entry was posted in Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s