FORENSIC FILES (42): CALCULATED COINCIDENCE by Bruce Kibby

            Stephanie Bennett-i tan Roanoke College atanga han graduate chu a bul tanna chauh niin a lang. Business Degree neiin IBM ah hna a thawk nghal a. A tawpah chuan mahni kutkawih ngeiin pawisa a han hlawh chhuak ve dawn ta chu a ni a, a chak zek zek tawh a ni. A nunphung pangai piah lama a khawvel hmasa ber a ni ngei ang. Nun phung bul a han tan chho ta a. A la valaiin amahah chuan tih theih tam tak a awm a ni tih a hriat. Mahnia a han tal hrang ta chu a phur pawh a phur hle a. Mahse, kum khat vel a thawh hnuin nikhat chu hnathawk turin a hnathawhna hmunah a rawn lang ta tlat lo mai. Nula naupang te, mahni mawhphurhna hlen chhuah duh tlat mi niin a hun taka a hnathawhna hmun thleng chat thin mi a ni a. Tuman an biak pawh theih loh avang chuan an ngaih a tha zan tawh lo a ni. A chhungte chuan a chenna Bridgeport Apartment Homes, Lake Lynn, manager chu biain Stephanie chinchang ngaihven sak turin an ngen ta a.

” Hei hi 911 a ni a, eng emergency nge i neih le?
Tu emaw rang taka Lake Lynn Drive a lo kal thei tur ka mamawh a ni. Ka bulah hian mitthi a awm a ni.

A harh em?
Chu nu chu a thi a ni..”

Kum 23 a upa, Stephenie chu mut pindan chhuatah thi a hmuh a ni a. A zangthal zawngin a lo awm a ni. A nghawng ah chuan khuar duk churh hmuh a ni a, chu chu inrehna vanga awm a ni tih a chiang. Tualthattu chuan a rehhlumna hmanrua chu a hnu thup bo nan a rualin a la bo niin a lang. A kerek leh banrek a hnuhma atang chuan a  ke leh kut chu phuar an niin a lang a. Handcuffs hmangin a ni mai thei bawk.

            A pa, T. Carmon Bennett sawi dan chuan Stephenie chuan khawvelah hmelma a nei lo va. Thah a han ni ngawt mai chu a ngaihna a hre lo tak zet a ni. A fanu chungah chutiang thil chu eng vanga thleng nge ni a eng tin nge Stephanie chungah kher a thlen tih a hre thiam lo tak zet a ni.

            Apartment luah Ground floor ah chuan tharum hmanga luhna hnuhma hmuh tur a awm lo va. Tualthattu chuan Stephanie mut pindan zawna tukverh atangin a lut pawh a ni thei. Tukverh zarhliah (screen) chu laksawn a ni a, chu chuan tu emaw chu tukverh kaltlangin inchhungah a lut ngei a ni tih a kawk a ni. Inchhung atang chuan ruk chhuah engmah a awm lo va, mahse, chu apartment a bungrua thenkhat; phone, tui inna no leh tissue paper bawm te chu pindan pahnihna closet ah hmuh a ni thung. Chu closet chhungah chuan tu emaw chu eng emaw nghakin a tawm a ni ngei ang tih turin hnuhma a awm a ni. Tualthattu chu chiang takin kawtkawr a bun a ni tih a hriat theih a. A chhan chu pawi khawihna hmunah chuan Stephanie finger print bak finger print dang hmuh tur a awm lo a ni.

           Investigator te chuan chu apartment bul, pawnlama hnimbuk awm karah chuan tualthattu nena thlunzawm theihna ni thei tur bungrua an hmu a. Hmeichhe kekawrte kawp 6 lai mai paihin a lo awm a ni. A lan dan chuan he pawi khawihna hi mipat hmeichhiatna lam hawia thleng a ni ngei ang. Mahse, chung kekawrte an hmuh te chu Stephanie kekawrte te erawh an ni lo.

           Medical Examiner chuan Stephanie chu zan lai vela thah niin a chhut a. Investigator te chuan zan dar 8 velah
Stepheniei’n a bialpa Walter Robinson-a phone hmangin a inbia tih an hre chhuak a. Chuvangin Waltea chu rinhlelh zing atangin paih a ni. Achhan chu Stephanie chenna apartment atanga dar kar 4 lai  tlan ngaia hlaah a chen vang leh Inah a awm ngei a ni tih hriatpuitu a neih vang a ni.

           Stephanie hi mi kutpalh tuar lo tur te zinga mi a ni awm e. Dinhmun hlauhawma ding thei tur ang chi khawsak phungin a khawsak hriat tur a awm lo va. Chhungkaw tha tak atanga chawr chhuak nula pangai tak a ni. Police te chuan thah a nih hma kar tam liam ta a Stephanie-in a thawn chhuah e-mail an hai chhuak a. Staphanie chuan a ni hnenah e-mail thawnin zan a mut that lo thu leh hlauh a nei thu a hrilh a. Mahse a pa hnenah erawh chutiang thu chu a hrilh miah loh thung. A sawi dan chuan a chenna apartment building bul velah chuan tukverh atanga mi bihthlak ching hmuh a nih thin avangin a hlau a ni. Tu emaw midangte hriat loh leh phalna lova bihthla thin (Peeping Tom) awm thu sawi a ni a. Chu Peeping Tom chuan a tukverh lam a melh a ni tih a hriat chhuah atangin hlauhna a nei a ni. Chu Peeping Tom-a chu amah tak phei chuan a hmu lem lo va, a thenawm a mi ten lo hmuin an sawi chhuak a ni. Chu Peeping Tom nia an sawi chu an mi rinhlelh ber chu a ni ta.

               Kum 23 a upa, Stephanie Bennett tualthihna chu chhuichhuah a har hle, achhan chu a lan danin Stephanie leh lo beitu te chu inkungkaihna an nei tlat lo va. Amanda Lamb, Reporter chuan, “Ka hna hi kum 13 lai ka lo thawk ve tawh a, tualthah chungchang vawi duai lo ka lo cover ve tawh a. Mahse, Tualchhung mi te zingah he case ina hlauhna a siamsak leh case ngaihven hlawh zawk hi a la awm ka ring lo a ni” tiin khawtlang an ralkhel dan vel a sawi fiah a.

           Stephanie Autopsy an han ti ta a. Medical Examiner chuan pawngsualna hnuhma a hmu a, a taksa atangin DNA sample pawh a lachhuak bawk. Chu DNA sample chu State leh National Data Base (CODIS) a dan lo bawhchhe tawh zawng zawng DNA an kawl te nen an han khaikhin a. Inmil pakhatmah an hmu zo lo . Pawi khawihna hmunah chuan Evidence han hmuh mai tur a awm lo va. Pawi khawihtu in pawi khawihna hmuna a ken luh te chu ama rualin a keng chhuak leh nghal vek emaw tih mai tur hi a ni. Investigator-te chuan Stephanie taksa atanga rinhlelh DNA an lak chu Stephanie nena inkungkaihna nei mipa tawh phawt DNA nen an enmil a; mi 250 aia tam mah an tling a ni. Tu DNA nen mah a la inmil ta chuang lo. Police te chuan Stephanie Bennett-i chenna apartment a cheng ve mi thahnem tak an kawm a. An zinga tam tak chuan mipa, cher sang lam deuh leh sweatshirt ha, chung lai vela teirawlai an hmuh thin thu an sawi a. Stephanie thenawma cheng te zinga pakhat chuan he an mi sawi pain Stephanie tukverh a thlir vo vo lai a lo hmu nghe nghe a ni.

           Police Artist chuan an mirinhlelh pa hmelhmang nia an sawi thlalak ziakin Newspaper leh Local TV Stations te hnenah puan darh sak tura ngenin an thawn ta a. Chutia an han tih chuan Police lam chuan phone call an dawng nghal malh malh a. A chhan chu he pawi khawihna hi mitin hriat hlawh leh ngaihven tling phak a nih vang a ni. Hnu han chhui zui mai tur tam tak an dawng a. Chung hnu za chuang an chhui zui zingah chuan beiseiawm fal bik pakhat an nei ta a. Chu pa chu hmeichhe khuaikhem thubuaia convict tawh, chunglai bul hnaia cheng a ni. Chu pa chu an han bel chiang a. Pawi khawihtu a nih ngei rinna a lian hle. A DNA sample chu an ha la a. Police te beiseina pawh a sang hle a ni. State Bureau of Investigation atangin Police te chuan call an dawng a, DNA an inmil lo tih an hriat chuan an hnual rawih mai a ni.

              Chawi belhna a awm lo bawk a, Police te chuan Stephanie chenna bul hnaia cheng te, tukverh atanga mi bihthlak ching hmu ang a insawite chu thu an zawt fiah nawn leh a. Chutia an han zawh nawn leh takah chuan an zinga pakhat chuan chanchin tharlam sawi chhuah a nei a. A sawi dan chuan chu Peeping Tom-a chu thim zinga ui dum lian deuh kaia a kal lai a hmu a. Bridgeport Apartment atanga Dominion Apartment lam pana a kal a hmu thu a sawi a ni. Stephanie Bennett kha Bridgeport Apartment-a cheng a ni a. Chuvang chuan Bridgeport Apartment atangin Dominion Apartment lamah chuan an ngaihtuahna chu an sawrbing leh ta a. Chu Apartment manager chuan a hmaa chulai apartment a lo khawsa tawh thin ui dum lian deuh neitupa chu a lo la hrethei hlauh mai a. “In mi sawi chu ka hre mai. A hming chu Drew Planten-a ni a. Mi maksak tak a ni” tiin a lo hrilh ta a ni.

            Kum 35 a upa Drew Edward Planten-a hi tunhma lamin pawi khawihnaah a inhnamhnawih hriat a ni lo va, nupui nei lo, North Carolina Department of Agriculture-ah Chemistry Technician hna thawk mek a ni. A awmna chin an hriat hnu chuan Drew Planten-a hrechiangtute leh a thawhpuite chu thu an han zawt ve tan ta a. Chuta tanga an hriat dan chuan Drew Planten-a chu mahni chauh inngaihtuah mi, thian tih tham pawh nei lo leh mal tlat mi a ni tih an hre thei a. Tichuan Plantena chu a hnathawhna hmunah thu an han zawt fiah a. “Stephanie Bennet-i tih hming a hria em?” ti a an han zawh chuan Stephanie Bennet-i tih hming a hriat ngai lo thuin a lo chhang hlawm a ni. He case chungchang hre lo hi mel 50 bial chhungah an awm kher lovang tih theih a ni a. Stephanie Bennett hming hre lo ang a a insawi hi a mak letling zawk hial a ni. Chumai ni lovin Planten-a chuan Police Station ah kal duh lovin a hnial tlat a. Chuvang chuan Police-te chuan a chenna Apartment-ah hmu an tum ta zawk a. Tlai dar 5 ah an hmuh tur thu an han hrilh a. Tah zet chuan vawt tih vanga khur ni awm tak hian thunun zawh rual lova nasain Drew Planten-a chu a khur ta nghal a. A awm dan a dik lo em avangin Detective chuan,”Kha i tha maw?” tiin a zawt hial a. Ani chuan,”Ka tha e” tiin a lo chhang ve mai a ni.

             Tlai lama Police-ten a chenna a Planten-a an va hmuh chuan Planten-a chuan Stephanie tualthihna ah inhnamhnawihna a nei lo tiin a pha a. Chumai bakah DNA Sample a pe duh miah lo bawk. Chutianga DNA Sample a pek duh loh avang chuan Police te chuan Planten-a lakah Evidence an nei ta lo. Lem ziah thlalak nen lah inanna an nei hek lo. Tichuan chuan Court Order hmanga DNA Sample lak phalna an nei thei ta lo a ni. Chuvang  chuan Police-te chuan hnu chhui chhunzawm ngaihna hre lovin an hnu chhui laiah chuan an tawp rawt mai a ni.

            Police-te chuan Drew Planten hnen atangin DNA Sample lah an nei thei mai si lo. Mahse, an Scientific Expert zinga pakhat chuan rawtna a rawn nei ta hlauh mai. Mark Boodee, Forensic DNA Analyst chuan, “DNA sample kan nei ngei a ngai a ni. A thil khawih emaw hman thawh hnu emaw; entirnan: Tooth brush emaw, Zial bung emaw, thawmhnaw ang chi te atangin DNA sample kan lak ngei a ngai a ni” tiin rawtna a siam ta a. Mahse, chu a rawtna chu hna awlai tak chu a ni hauh lovang tih a hriat a. Achhan chu Planten-a chuan zui rukin a awm a ni tih a hria niin a lang a, a che fimkhur em em tawh mai a ni.

            Police-te chuan Drew Plantena chu a hnathawhna hmunah leh a chenna in ah te enthla in kar khat zet an thlithlai tawh a. Mahse, DNA sample chu an la nei thei mai bik lo. A tawpah chuan investigator-te chuan Planten-a chu restaurant pakhatah an zui lut a. Mahse, Planten-a chuan a lo hmakhalh leh hman tlat mai. A che fimkhurin sulhnu hnutchhiah reng a tum lo. A thil ei zo chu Bathrooma a va lutin napkin te chu ekinah thlakin a tleu leh nghal vek a. Straw ni se, no atanga lain a kekawr ipte ah a ak bo daih a. Tichuan, Planten-a chuan desert atan banana pudding lamin fork hmangin a ei a. Vawi hnih vel a ei hnu chuan fork chu lain napkin in minute 5 vel a rei tur a hru fai leh a. Tichuan fork chu thlengah hnutchhiahin a kalsan ta a ni. Undercover Detective chuan DNA test turin Planten-a  hnutchhiah fork chu a va la ta vat a. Mark Boodee, Forensic DNA Analyst chuan fork chu a buaipui ta nghal a. Fork-ah chuan DNA samples inpawlh a awm ta tlat mai. Chumi awm zia chu fork ah chuan DNA sample langsar tak leh langsar vak lo an lo awm dun a. Restaurant a hnathawktuten fork chu fai takin an sil lo ni ngei tur a ni. DNA Profile langsar zawk chu tu nge tih hriat loh hmeichhe DNA a ni a, a langsar lo zawk chu mipa DNA a ni thung. Tichuan DNA profile langsar lo zawk leh Stephanie rape kit a DNA an hmuh chu an han khaikhin ta a. Chung Profile pahnihte chu an inang hle tih an hmu a. Mahse, Profile chu a chak tawk loh em avangin Court ah pawm theih a ni dawn lo a ni. Inanna mual mual awm vangin dan kengkawhtute chuan hnu dik an chhui a ni tih erawh an hria. Drew Planten-a hnen atanga DNA Sample tha tak neih chauh an mamawh ta.

            Sawi tawh angin Drew Planten-a chu State sawrkar hnuai a hna thawk a ni a. Chuvangin Detective-te chuan thuneihtute hnen atangin Planten-a hnathawhna hmun enfiah phalna an nei thei ta. Mark Boodee-a chuan Planten-a hnathawhna hmuna Computer keyboard, radio leh a kuta a khawih thin bungraw dangte chu lapaw thianghlim hmangin a han hru a. Chung skin cells atanga DNA leh Stephanie rape kit a Biological Evidence chu a han khaikhin leh ta a. DNA pahnih te chu an lo inmil ta thlap mai le. Chu DNA Evidence ngei chuan Stephanie thah a nih zan khan Drew Planten-a chu pawi khawihna hnunah a awm ngei a ni tih a finfiah ta a ni. Tichuan kum 3 ai tam hret liam hnu Oct 19. 2005 khan Drew Planten-a chu man a ni ta. Stephanie Bennett thattu a puh a ni.

              Evidence atanga han chhutin Investigator-te rindan chuan tualthattu khan Stephanie chenna apartmenta bathroom tukverh atangin inchhungah a lut a. Room pakhat a Closet-a tawmin Stephanie chu a lo chang ta ran a.  Tichuan Stephanie chu a lo haw ta ngei a, dar 8 leh 9 inkar velah phone hmangin a bialpa a bia a. Tualthattu chuan Stephanie chetla vel chu room lehlam atangin a lo enthla reng a, Stephanie chuan room ah midang an awm ve tih reng a hre lo. Stephanie chuan mut tumin a thawmhnaw a thlak a, light off in khumah chuan a inthawlh ta a. Chutia a mut hnu chuan Stephanie chu a bei ta nghal a. Evidence atanga a lan danin Stephanie chu mipat hmeichhiatna hmanpui a ni a, rehhlum a ni bawk. Mahse, tualthattu chuan DNA Evidence hlu zet mai a hnutchhiah ta thung a ni.

             Police ten Planten-a chenna chu Evidence dang zawngin an han dap ta a. Hurherhna lamhawi lehkhabu tam tham zet mai, lockpicking guides (chabi hawn dan) leh chemte tam zet an hmu a. Chumai bakah Planten-a hian a hma pawhin tual a lo that tawh mai lo maw tih theihin Evidence dang hmuh an nei bawk a ni.

                Planten-a apartment an dapna ah chuan hmeichhe pakhat Rebecca Huismann, Lansing, Michigan-a cheng hnena thawn lehkhathawn tam zet an hmu chhuak a.  Post Mark atangin chung lehkhathawn te chu kum 6 a upa te an ni hlawm. Rebecca Huismann-i changchang an han chhui chian chuan Rebecca Huismann-i chu Lansing, Michigan ah kum 6 hmalam khan thah a ni a, mahse, chhui chhuah a la ni lo tih an hre ta a ni. Thil thleng rual ang takin chung lai hun vel chuan Drew Planten-a chu Michigan State Unversity ah lehkha a zir hun lai a ni a. He University atang hian Biology ah a graduate a ni. University hi Lansing atanga mel tlem te a hla a awm a ni nghe nghe.

               Rebecca Huismann-i hi thah a nih lai hian Topless Dancer a ni a. Dancer nih chu a ruahman lawk a ni bik hauh lo, pawisa a mamawh vang chauh a Dancer a tang ta a ni a. Nula hmeltha tak a ni a, a bialpa nen an inneih theih nan pawisa  hlawh chhuah tum mai chauh a ni. Kum 1999 October zan khat chu a hna a thawh zawh hnuin Bouncer chuan Rebecca Huismann-i chu a car thleng a va thlah a, Rebecca Huismann-i chu amahin a inkhalh haw ta a. Chutia apartment kawt a lo inkhalh thleng chu Strip Club a customer ni ngei tur hian a lo beisei ni ngei tur a ni. Eng thil nge thleng hriat ni chiah lo mahse chu tualthattu chuan .45 caliber pistol chu a hmet puak ta a. Rebecca Huismann chu ama car chhungah kah hlum a ni ta a ni.

              Tualthah chhan chu inrawk tumna a ni lo tih chiang takin a lang a. A chhan chu motor chhunga thil engmah khawih danglam a awm lo va, Rebecca-i purse pawh a lo la awm thlap bawk. Silai mu pakhat chauh hmang a lu/hmai a han inkah chu mimal thil niin a lang. Car bul leiah chuan .45 caliber kartut ruak hmuh a ni a. Chu chauh chu pawi khawihna hmuna Evidence awm chhun chu a ni. Finger print emaw, motor ke hniak emaw pheikhawk hniak emaw hmuh tur a awm hauh lo. Rebecca thawhpui tawh phawt chuan Rebecca-i chuan Club Patron tu nen mah mimal inlaichinna a nei pui lo tih an sawi vek a. Club-a a lam tih piah lamah thil dang tih a nei lo va, a hna a thawh zawh hnuin a club a chhuahsan mai thin a ni. Tumah han tawmfal pui emaw Patrons te nena inkungkaihna siam a nei lo bawk. Mi tam zet kawmin thu an zawt fiah a. Rinhlelh tur fumfe a awm thei tlat lo. A dancer pui te zingah tu nen mah han inhmuhthiam lohna ang chi a awm lo va. A thawhna Club-a customer tu emaw ber a ni thei mai ang em tiin Club pawh chu an thlithlai reng bawk a ni.

          North Carolina a Investigatorten Drew Planten-a chenna apartment a Rebecca-i lehkhathawn an hmuh chhuah chuan Lansing Investigatorte chu bepawpin an thil hmuh chhuah chungchang chu an hrilh ta a. Lansing Investigatorte chuan .45 caliber pistol an hmuh hlauh chuan hrilh hriat turin an lo ngen let ve thung a. Investigatorte chuan .45 caliber pistol pahnih lai an hmuh chhuah thu an hrilh a. An thawh huai mai le.

           Planten-a  .45 caliber pistol pahnih te chu test fire an han nei a. Analyst-te chuan kartut a hnuhma (mark) awm chu an ngaihven bik a. Pistol kah a nih hian Firing Pin a eng emaw fuh lo lai (imperfections) thla chu kartut mawng ah a inchhu kai ta thin a. Heng Firing Pin a imperfection awm te hi a danglam bik vek a ni. Tichuan, tual thahna hmuna kartut ruak leh Test Fire a kartut ruak chu an han khaikhin ta a. An thil hmuhchhuah chu hairual a ni lo. Duh thusamin an lo inmil a ni. Rebecca thihpui tak ngen mu leh Test Fire na a ngen mu a Lands and Grooves (File dangah kan sawifiah tawh e) awm te pawh uluk takin an han enmil bawk a. Lands and Grooves te pawh an lo inmil thlap mai. Chu silai ngei chu Rebecca-i kahhlum nana hman a ni tih a chiang ta.

             Heng lai vel hian Drew Planten-a chu North Carolina Police te thuhnuaiah a awm tawh a. Mahse, boruak inlumlet dan erawh a tha vak lo. Court-a inlan tur an tih ni in kea kal a duh ta tlat lo va. Chuvang chuan nawrlirhah phuarbetin Courta hruai a ni. A vawi khat inlanna niah chuan a mit a meng duh tlat lo bawk. Vawi khat mah thiamthu emaw insawifiahna emaw a chhak chhuak lo. Chechang lovin a awm tawp a. A ka a ang duh hauh lo. Chuvang chuan tuman Tualthahna pahnih te thlen dan kimchang hi an hre lo va. A thubuai ngaihtuah a nih hma hretin Drew Planten-a chuan a tanna lung in ah plastic bag hmangin thaw thei lova insiamin a intihlum ta a ni. A chunga rorelna hmachhawn lovin mahni nunna a la ta a.

            Investigatorte chuan thubuai ngaihtuah pawh ngaihtuah hman lo leh chai hman lo va an awm ta mai chu an hrilhhai letling zawk hle a. Jury in “Stephanie Bennett thah thubuai ah thiam loh chantir i ni e” tiin thuthlukna a siam ngei dawn tih an chiang si a.

            T. Carmon Bennett, Stephanie pa chuan Drew Planan a fanu kher thah a nihna chhan chu a hrethiam lo tak zet a. Eng vangin nge tih a zawt nawn mawlh mawlh mai a ni.

           Investigatorte chuan Forensic Evidence an nei te chuan Planten-a kha thiam loh an chantir ngei ang tih an chiang. Evidence te vang chauha man an ni tih hriat chu an lungdamna ber a ni ta. Tu nge Drew Plantena tih an han chhui chhuak a, a chenna an han dap khan midang tu emaw chu a lo thlithlai leh hman tawh a ni tih pawh an hrechhuak tel bawk a. He tualthahna an chhui chhuah mai bakah tu emaw nunna an chhanhim tel nghal tih an hria a ni. Chumai ni lovin kum eng emaw zah chhui chhuah thei lo va awm tawh Case pawh chhui chhuahin a awm tel bawk a. He case bikah hian Forensic Science hian a thawh hlawk hle a. Forensic Science awm lovin, khang silai mu te kha awm lo se, leh he case thlen dan hi ngun taka chhui ni lo se chuan Rebecca Huismann-i Case kha hlui hlawn leh chhui chhuah lovin a awm hlen ngei ang le.

About Mizo Archive

I'm the one who collect the best writings of Mizos
Aside | This entry was posted in Thu Ngaihnawm, True Story and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s