Liver Eating Johnson(Johnson Mihring Thin-eia)

American Wild West chanchinah hian mihring rorum leh pawisak neilo leh hmingthang tam tak an awm a, mahse he mihring tluka huaisar leh rapthlak hi chu an tam lo khop ang le.

Liver Eating Johnsona hi John Jeremiah Garrison Johnson tih hmingpuin kum 1824,January 21 khan a lo piang a. Amah hi America ram daidar hmasatu, Mountain Men an tih mai thin ho, sapel leh thangkama ramsa vun lipa hralh chhawng leh thinho zinga mi a ni. A tir tak chuan Mexican-American War lai khan naupangtein lawng sipaiah a tang a, mahse officer pakhat nen an intihbuai na ah na takin kut a thlak a, hremna pumpelh turin a tlanbo ta a ni.

Amah hi palianpui mai, feet 6 leh inches 2 a sang, pound 260(kg 120) a rit, thau chhia awm miahloa fiat leh fuat hlira khat, sek phiar tlat mai a ni. Khatih hunlai khan mingo tlemte bak America ramah khan an la awmlo a, ramngaw pik tak tak, ramsa hlauhawm pui pui leh Red Indian hnam kawlhsen tak takho tualchaina hmun a la ni a, mi huaisen leh hlauh neilo tak mi tan lo chuan han khawsak na chi a ni lo.

Mountain Men ho kha khatih hunlaia America rama lo awm hmasa Indianho nen khan inngeih fahranlo mah se an dam khawchhuah nan an inmamawh tawn em avangin an inchenpawlh nasa ve viau thin a, nupui pasalah pawh an inneih pawlh nual reng a ni.

Johnsona poh hian nupui atan Flathead Indianho hnam ami nupuiah a nei a, mahse thla 7 chauh an la innei hman tihin Crow Indian hoin a nupui railai lehnghal chu an thahsak ta hlauh mai a, mimal phuba lakna rapthlakber mai, America ramin a la hmuh ngai reng reng loh phuba lakna chu a lo intan ta a ni.

Hemi ni atang hian Crow Indianho lakah chuan indo apuanga a philta nghauh nghauh mai a.A nupui railai an thahsak chu a thinrim bok a niang; heng Crow pasaltha ho a thahte luvun laksak mai chu duhtawk loin an thin a eisak ta thin a! Crow hnamhote ngaihdanah chuan an thin tello chuan mitthi khuaah thlamuangin an chawl thei ngai dawnloin an ngai a. Chuvang renga eisak thin pawh chu a ni.

Amah hi silai kah thiam tak leh chemte, hreite leh hriamhrei tinreng hmang thiam lutuk mai leh awihawmloh khawpa chak a ni bawk a, hunreilote chhungin Crow Indian hnamho ṭihkhai leh hlauh a lo ni ta thuai mai a ni.

Johnsona damchhung chuan tumah reng an him dawnlo a ni tih hriain Crow Indian lalpa chuan pasaltha huaisenbik 20 rual chu that turin a tira mahse an hlawhchham mai niloin tumah damin an rawn kirlo a, Johnsona chuan an thin a lo eisak vek mai a ni.

Kum engemawzat Crow Indian ho laka a mimal indona chu a chhunzawm zel a, mi 300 vel zet a thah hnu chuan thlasik vawikhat chu a vanduai ve ta hlauh mai a, a nupuia hnampui Flat Indianho hnena a kaltur chu Blackfoot Indian hoin an lo lambun ta thut mai a. Mahse a vanneih asiamin heng Blackfoot ho hian that mailoin Crow Indianho hnenah man tam taka hralh an tum ta zawk a. Tichuan Johnsona chu puaninah an phuarhlawm ta ran mai a ni.

John “Liver-Eating” Johnston (Jeremiah Johnson) cabin in Red Lodge.

Thil engemaw a tih thuai loh chuan Crow Indian ho hnena an hralh hunah chuan nghaisakna rapthlak tak tuara thih mai a hmabak a ni tih hriain engtin tin emaw an phuarna atang chuan a talchhuak a, amah vengtu chu a inrinloh laiin a hnekthlu tawp a. Chutah rangzetin chu Indianpa hrei pailai chu chhuhsakin a ke chu a malpuiah tak mai a chehbunsak ta hmiah mai a, an ri ta teng tung mai a ni.

Johnsona hi palian leh chak zet mai a ni bok a, amah vengtupa hrei a chhuhsak leh malpui bung chu hmangin(talhtum ang deuhin malpui bung chu a hmang a ni awm e) Blackfootho lak atang chuan a tlanchhuak thei ta hlauh mai a ni. A mithahpa malpui bung chu paih ta mai lo chuan ramhnuaia a tlanbona ah chuan keng ve zelin mel 320 zeta hla Del Gue cabin a panna kawngah chuan chawah a ring zui ta a (rum dangdai ve tak chu a ni).

A phuba lakna chu thahnemngai takin a chhunzawm leh nghal a, kum 20 dawn chu Crow Indian ho tan chuan mangchhia a nih chhunzawm ta zel a.

An that thei si lo a. ‘Johnson Thin-eia’ kutah chuan an thi hnem ta lutuk mangang chuan palai tirin remna siampui an va dil ta ringawt mai a ni.

Thilpek tha tak tak an tawktarh bakah Crow hnamho chuan an hnam hotu pakhata a awm tur thu thlengin a ngen tak meuhin, dawl zawra zawrin Johnsona chu an va ngen ta a. Ani pawh chuan a tawpah chuan remna siampui chu a lo remti ve ta a.

Tichuan kum 20 chuang zet a ral hnu chuan mimal phuba lakna rapthlak ber mai pakhat chu a lo tawp ta a ni.

Author : Hriata Tlau

Advertisements

About Mizo Archive

I'm the one who collect the best writings of Mizos
Aside | This entry was posted in Thu Ngaihnawm, True Story and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s