Lengpui Airport hi tu sawichhuah nge

Speeches of Brigadier T. Sailo
(AVSM) Retd., Padmashree Awardee 2007

LENGPUI AIRPORT SIAM TURA HMALAKNA

Ka’n sawi leh duh chu, Aizawl, Mizoram hian thlawhtheihna a tumna tur kan mamawh em em hian ka hria a. Tichuan, a bul tan nan khan Lengpui area hi tha ta bera ka hriat avangin, khatah khan kan tin zawn ta a.

Tichuan, Delhi a Aviation Minister kha, Kurshid Alam Khan a ni a. Ka zuk bia a, “Ka rawn kal dawn a, Mizoram in thlawhtheihna tumna, Airport kan neih theihna turin rawn hmuh che ka tum a, hun min pe la” ka ti a. A hun a sawi khan, “Tah hian ka lo kal ang a, Civil Aviation Director leh secretary pawh awm nghal sela” ka ti kher kher a— Aizawl atang hian.

Tichuan, kan zuk kal a, kan sawi kan sawi hnu khan, a hrechiang em em a.

“E eeee! Chutiang dinhmuna ding in nih chuan, airport chu in nei ngei tur alawm. Ram tinin an nei reng alawm,” a ti a. Kha mi, Zoram-ina airport Lengpuia kan neih theihna tur khan sanction mumal tak kha a awm ta a.

Tichuan, khami bawhzui kha a lo ngai leh ta a. Khami bawhzui dan pawh kha kan sawi zel ang a.

Ka rawn haw ve leh khan, Aizawl DC – Lalthlamuana ka hruai a, Lengpuiah ka kal a. VC ho kan ko khawm a, ‘‘hetah hian Airport kan siam dawn a, Lengpuiah hian VC ho hian ram lo inpek belh tawh reng reng suh ang che u; in pek belh leh chuan compensation te a ngai dawn a. A siamna man a ti tam dawn a ni’’ tiiin thu kan pe a. Tichuan, DC pawh chuan order a chhuah ta nghe nghe a ni.

Tichuan, Lengpui Airport rawn en chiang turin Delhi atang khan mi thiam bikte an lo kal a. Chung mite helicopter a zu fanpui tur khan Pu Lalhmingthanga leh Rohmingthanga (kan secretary) kha ka tir a. An zuk entir a, an zuk thlawk kual a. Anni pawh an lungawi tawk a. Tichuan, an haw thla leh kha, order an rawn siamchhuak a. Lengpui Airport– thlawhtheihna tumna siam turin investigation tih a lo tul a. Hemi ti tur hian Survey of India, Deputy Director, Shillong ami an rawn tuk a ni, ani tihtur atan khan.

Tichuan, anni pawh khan hna kha an tan ta a. Shillonga ka kal apiangin anni kha ka tlawh thin a. Ka tur thin a, ka hmanhmawh a. Amaherawh chu, kan sorkar lai khan an zo hman lova. Kan sorkar tawh lohna kum hnih velah khan an zo niin ka hria. Tichuan, khami survey of India a thawk thin Pu Vankhuma khan mi rawn hrilh a, “Hei an zo ta a, i nghahhlelh em em kha a ni a, ka rawn hrilh ve che a ni e,” a ti a.

“E!.. a va lawmawm ve, chuti a nih chuan- tuna kan sorkar kal mek hianin, Lengpui siamna tur chu an tan thuai dawn a nih chu,” ka ti a. Kha kha 1985-86 vel niin ka hria.

Nimahsela’ngin, hun a kal a kal a, Lengpui airport thawhna tur hmunhma kha a hmuh theih ta miahloh a. 1986, 1990– engmah kha hmuh tur a awmlo!! A awm ta mai mai thova! Investigation pawh zawh vek tawh si….khata tih tur kha chu sorkar khan pawisa zuk dil kha a ni mai a. Dil a, hmuh a, thawh tur kha a ni mai a. Mahse khatiang kha engmah a thleng lo. Tichuan, 1994 ah Tenth Finance Committee-a Chairman K.C. Pant— Aizawl ah a lo kal a, a rawn zin a. Khami khan state tina thil lian bik, mamawh bikte pawisa mamawh dan la khawmtu ani a— Finance Commission hi!

Tichuan, Aizawl ah a rawn thlen khan, K.C. Pant-a kha, tunhma a ka hriat tawh a nih avangin, a hrangin kawmna ka nei a. Lengpui airport chungchanga mamawh, pawisa mamawh dan kha ka sawi pui hrep a ni.

A hma khan kan inah breakfast ei turin ka sawm a, “Aw” a ti tawh a, mahse,….” A remchang lo” a rawn tih leh avangin Governor inah, Raj Bhawan ah khan kan pahnihin breakfast kan eidun a. Khang thil te kha ka sawi pui vek a ni.

Khatih lai khan kan party pawl leh Congress kha, sorkar kan siam tlang a. Pu Lalhmingthanga hi, Finance a chang a. Tichuan, chhunah chuan kha meeting kha an han tan a. Kan ram Chief Minister Pu Hawla kha Chairman a ni a. Zoram mamawh turte kha an han sawi dan dan a ni. Tiang khan ro pawh an rel a.

Engemaw hunah chuan, a tawp tan dawn ta a. “A, kan sawi zo tawh e” ti khan an han tin dawn ang khan an han lan khan Pu Lalhmingthanga a han ding chhuak a. Thil pawimawh tak sawitur a la awm alawm. Airport kan mamawh em em a. Engkim thildang peih vek tawh a ni a, pawisa chiah hi a awm lova, he pawisa hi kan mamawh a ni’’ tih a rawn sawi chhuak a.

K.C. Pant-a khan a lo hriat lawk tawh avang khan a ngaihven a. Pu Lalhmingthanga kha a dintir a, ” Lengpui ram chu khawilai nge, min kawhhmuh thei angem?” a tia. Ani chuan, “Thei e” a ti a. An chhuak dun ta mai a – an pahnih kha!

K.C. Pant-a kha hretawh a nih avang khan Pu Lalhmingthanga kha, “min kawhhmuh rawh le” a ti a. Tichuan, Pu Hminga khan Civil Hospital a rawn pan pui a. A chhawng sang berah khian a han kalpui a, “Heta tang hian Lengpui chu a kawhhmuh thei a ni” a ti a. An kawhhmuh ta a. Mit khan a zuk hmu vek a ni – K.C. Pant-a khan.

Tichuan, an haw ta a. Anni ho haw thlak hnu thla khat velah khan pawisa 57 crore an sanction a rawn thleng ta a ni. Chutah chuan, tihtur dang awmchhun chiah chu, kha pawisa hmang khan, PWD chief Engineer khan, a siam kha a ni ta mai a ni. Midangin tihtur dang a awm tawhlo. Chuvangin, PWD chief engineer khan a bei ta char char a. Tichuan a lo puitling ta a, 1998 kha niin ka hria.

Khatiang kha sawi chian hi a tha in ka hria a, tun khaw hnu ah hianin, “Lengpui Airport ka siam” ti mai mai hi an tam ta viau a! He thawnthu diktak hi mipuiin an hriat tha in ka hria. A siamtu dik tak chu in hre tawh ang. Ti rawh u!

Khang kha, kan sawi a. A! Lengpui Airport chu kan tangkai pui ta em em a. Khang kha kan han sawi chhuak leh ta a ni.

Advertisements

About Mizo Archive

I'm the one who collect the best writings of Mizos
Aside | This entry was posted in mizo archive. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s