Prime minister hnena lehkhathawn

He thu hi Punjab Cadre, IAS officer ( RR 1971) Amitabha Pande leh a ‘Civil Servant’ pui 49-tena April ni 15-a Prime Minister hnena open letter an thawn a ni a. An thusawite hi a pawimawh em avangin kan thiam ang anga Mizo ţawnga lehlin kan han chhuah a ni e.

Michael Lalmanzualaᅠ

Prime Minister zahawm tak,
ᅠᅠ Mitinina zalen taka kan ngaihdan leh kan ngaihhlut zawng kan sawi theihna te, mipui duhzawnga rorelna (democracry) te, chi leh chi, sakhua leh sakhua thlei bik nei loa inrelbawl dan kan Constitution ina fel taka a lo ruahmante chu an lo tlakchhiat nasat tawh em avanga chutiang thil thinlung taka vei mi ‘Civil Servant’ pension tawh 50 rual insuihkhawm kan ni a. Tuna kan sawrkar ding laiin heng thil pawimawh tak takte tichhe zawnga boruak a siam avanga inhuatna te, hlauhna te leh phuba lak duhna thinlung te lo lian ta em em duh lo a, a dodal zawnga ring taka rawn au chhuak mipuite rawn zawm kan ni. India khua leh tui, Political Party-a inhnamhnawihna nei miah lo leh Political Party-te thurin ţawmpui miah lo, kan Constitution-ina ngaihhlut tur leh ngaihpawimawh tur a tihte chauh vuantu kan nih thu kan han sawi nawn leh a ni e.

Constitution humhalh tura chhechham i nih anga, i sawrkar leh i party chuan hetiang thil thleng duhawm lo takte hi hria-a,a ţha lo zawnga kal zel tur dangtu ni-a, India ram khua leh tui, a tu ate pawh, a bikin hnam tenau leh chak lo zawkte chuan an nunna atan leh an zalenna lamah hlauh tur engmah an nei lo tih thu i rawn au chhuahpui kan lo ring a. Hetianga beiseina kan lo neih chu engmah loah a chang ta a. A lehlingin Kathua leh Annao-a thil thleng rapthlak em em mai te chuan mipuiinamawhphurhna an pek bulthum berah i sawrkar chu a hlawhchham chiang hle a ni tih a lantir a. Keini mipui mimir, kan hnam rohlu te, kan thlarau thil te, kan nun kaihhruaina kawnga dik leh fel kan lo ngaihsan ţhinna te leh kan hnam changkanna-ina a lo ngaihsan em em ţhin, dawhtheihna te, retheite phurrit phurhpui duhna te leh inunautawn dial dialna te chu kan tlakchham tlan tak a lo ni zo ta a ni.Hindu hnam hminga mihring leh mihring innghaisakna tih danphung neih chu a chawmnungtu kan nih avangin mihring kan nihnaah kan hlawhchham tlâng a ni.

Naupang kum 8 mi lek pawngsuala, thah a ni zui te hian ramsa ang lek fanga kan nunrawnzia leh kan changkan lohzia a tilang a, chhia leh ţha hriatna hmanna kawnga kan tlukchhiatna thûk tawhzia a tilang a ni.

India ram Independent hnu-a kan hun tawng duhawm lo ber, hetiang thil pawi lutuk dawnsawn kawngah hian kan sawrkar leh kan Political Party hruaitute hian an tih tur an ti tawk loin, an chak tawk lo a ni. Tun dinhmunah hi chuan hmalam thlira, beiseina min petu êng hmuh tur a awm lo a, zahnain kan khata ni. Kan thachhang dal District-a hnathawk mekte, dan ina mirethei leh chak lo zawkte humhim tura a tihte chu an tih turti ngam lo leh ti thei lo anga an lanna hian zahthlak kan tihna hi a ti zualkai a ni.

Pu Prime Minister, hetiang kan rawn tih hian kan tun dinhmun zahthlakzia a huhoin kan rawn sawi mai a ni lo a, kan hnam changkanna ina ngaihhlut zawng a lo neih ţhinte an lo ral zawh tak avanga kan rawn ţahpui thu rawn sawi satliah pawh kan ni lo a, kan thinur tak meuh thu kan rawn sawi a ni zawk e.

In party leh in notê tam tak tak, a ţhente phei chu hmuh hleih theih loh te hian kan politics-ah te, kan khawtlang nunah te, kan hnam nunah te, kan nitin titi hona-ah te thlengin, inţhendarhna leh inhuatna chi in rawn tuh nghet ta a. Hei hi a huatthlala kan tiin min ti thinur tak meuh meuh a ni.

Kathua leh Unnao a thil thleng rapthlak lutukte hi heng avang hian mipui vantlangin an remtih pui leh dan kalha chêtna awm lo ni mai awm hian a lang thei a ni. Jammu-a Kathua-a thil thleng hi tam zawk nih phawt chuan chak zawk nih leh huangtau zawk nih duhna ‘Culture’ Sang Parivar-in a a rawn chawh chhuahin mahni chi bik ruih chilh mite an thil tum bawh zuina kawnga a tihtlangnêl sawtna rah a ni. Hindu leh Muslim inhuatna boruak siama politics-a hlawhtlin nana rawnhmang a, thuneihna sang ber ber chelhtute chuan hetianga an thil tih hi an rawn thlawp thlap dawn a ni tih an hre chiang a. UP-a Unnao-ah chuan hmeichhia aiin mipate hi kan chungnung a ni tih ngaihdan zim tak leh ţha lo tak neituten chutiang ngaihdan kalpuia politics-a thuneihna an lo chan avanga pawngsual te, tualthah te, tihţhaihna hmanga pawisa lak te an tih ngam phah a ni.

Heti taka thuneihna hmang sualte hi a huatthlalak tehlul nen hetiang thil sual rapthlak taktitu te man aia pawngsual tuartu leh an chhungte State sawrkar-in an man khawm ta tlat te hian sawrkar kalphung a chhe zawnga a lehlin nasat tawhzia a tilang a. Chutiang ti tur leh zel pawha UP sawrkar hi High Court-ina a tihluih ngai a nihte hian lemchang chung leh rûn dâl lek fanga thil tih a nih atilang chiang bawk.

Hetiang thil thlenna hmun pahnih hi Pu Prime Minister, i Partysawrkarna hmun an ni a. Party-ah tuma chuhpui theih rual loha thuneihna tawpkhawk nei i nih avang leh thuneihna zawng zawng chu nang leh Party President ina in kenkawh ţhin a nih avangin hetiang thil thleng rapthlak takahte pawh hian a mawhphurtu dik tak i ni tih hi hnial theih a ni lo. Thil tih dik loha mawhphurtu i nih pawm a, siamţhat hna thawh nghal aiin nimin thleng khan ngawih i chuh a, India ram chhung leh khawvel ram hrang hrang tam taka sawiselna ri a rin tak em em hnu chauhah thawm i rawn nei ve ta a nih kha. Chuti chung chuan heng thil thlengte hi i demin, zahthlak i tih thu i sawi nain, hetiang rawn awmtirtu bul ber, chi leh chi inhuatna boruak chu i sawichhe chuang lo a. Khawtlang Politics leh sawrkar kalphunga hetiang chi leh chi inhuatna awm reng mai tihreh dan kawng i zawng chuang bawk hek lo. A chang changa hetiang demna thu tlaikhawhnua i rawn sawi ţhin leh dikna laltir tur thu i tiam ve ţhinte hi Sang Parivar-in chi leh chiinhuatna meipui chu an chhem alh vut vut reng si hi chuan engmah an ni lo a, ninawm mai an ni zawk e.

Pu Prime Minister, heng thil thleng pahnihte hi thil sual tih hun reiina a thawi dam leh mai theiha ngaih, a hnu lawka tihdan pangngai tê-a kal leh mai ţhinna anga ngaih tur a ni lo a. Kan mihring nunphung hrim hrim inbihchianna hun a ni. Hnam kan nihnaah te, Republic kan nihnaah te, kan Constitution ngaih pawimawhnaah te, kan inrelbawl dan hrimhrimah te leh chhia leh ţha hriatna hmanga kan inkaihhruaina ten hun khirhkhan tak a tawng hi kan sawrkarin a dawnsawn dan leh a kalpui dan azirin kan tunhnu nun chu a hril dawn a ni. A dik zawng leh a ţha zawnga kan kal theih nan hetiang ti tur hian kan phût che a ni.

  1. Unnao leh Kathua-a tuarna rapthlak tak tuar chhungte hnenah va kal la, kan zavaia tân an ngaihdamna va dil ang che.
  2. Kathua-a thil thlenga mawhphurtute hi a rang thei ang berahrem an nih nan hma la a. Unnao thil thlengah hian Court enpui nain SIT din nghal ang che.

  3. Hetiang naupang sualna nei lo leh chi leh chi inhuatna avanga tuartu dangte hriatreng nan Muslim te, Dalit te leh hnam tenau zawk te, hmeichhia leh naupangten an nunna lehan zalenna atan hlauh tur an nei lo a, chutiang thila tihţhaihtu an awm phawt chuan ram thiltihtheihnain a timit nghal hmakdawn a, anmahni venhimna chak zawk kan siam dawn a ni tihthutiam siam thar ang che.

  4. Chi leh chi inhuatna lama thil sual titute leh fuihpawrhna thu sawitu apiangte chu i sawrkar aţanga an nihna paih nghalan nih dan tur siam ang che.

  5. All Party Meeting ko la. He chi leh chi inhuatna boruak tihtâwp nan khawtlangah te, Politics-ah te, sawrkar inrelbawlnaah te pawh sawihona nei ang che u.

Hetiang tih nan hian a tlai lutuk tawh pawh a ni mai thei e. Amaherawhchu, hetiang i tih theih chuan kalphung mumal neih theihna leh chhiat rupna thleng tur khapna a nih a la beiseiawm a ni.

Beiseina kan la nei zel e.

Advertisements

About Mizo Archive

I'm the one who collect the best writings of Mizos
Aside | This entry was posted in mizo archive. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s