NULA SENIOR HRI by David Sailo

Naupang emaw an intih der der laiin kar lovah an inrin hma in ‘Senior Hri’ in a rawn man thut a, inhriat mai a harsa hle. Khawhar inah chuan naupang tete an ni hlawm tiin inchhung nawmna pawh tawh nen an in kiltawih telh telh a, inneihnaa kala han in chei te chu a ho riau țan a, țhiante fate an lawm durh durh thin. Thil an ngai thutak peih teh chiam tawh lova inchhungkhur hi an rilru luahtu ber a ni.

Urlawk zan tihte, kumhlui thlah zan te hi an thenga thawngah a lut tawh lova, an mut hma zan a ni zawk hlauh thin. Birthday tihte hi an lawm teh chiam lova mi hian hriatpui teh chiam lo mahse pawi an ti lem lo. A inthlahdah tawh laileng chu vawih te hi insumkar leh zahpah an nei lem lo a, an ti kurh kurh mai thin. Ka ek a chhuak te hi an ti phawng phawng zel. Zuk leh hmuam lam tite chu an insumkar lo lehzual a, sahdah tui an hre duh phian.

Pasal an lo nei hma lo kha a then an in chhir a, achangin an lawm zawk bawk a, chutiang ringawt chuan an rilru a inbuan fo thin. An thiante chhungkuaa an inkai diah diah an hmuh chang hian hrehawm an ti ve thin a, intodelh tak maia peih chang chauha unaute fa an ngaihsak hi a chang chuan nuam tawk an ti viau.

Inchhungkhur leh Committee nikhua ah dik inti takin thil an sawi fak fak thin. Chhungkuaah an inti thu duh hle a, naupang ngaitheilo chi chu an tawrhhlelhawm duh hle. An Room a felfai thlap a, thuamhnaw pawh an remtha thei hle bawk. Pangpar ngainat lama țuan chi an awm a, Kohhran țhalaiah an Over tawh avangin Naupang lam pawlah an țangkai duh viau a, mi fate chanchin an hre duh viau bawk.

Mipa mamawh lo tak anga țawng an ching hle a, anmahni hnimhnaitu deuh an iai deuh chu an nep thiamin an bawlzan thiam hle. Mo te tan an mitmei ven a na duh hle a, an fel poh leh mothar hlauh an hlawh. Chawhmeh leh eitur țha lam an thupui tawh hle thin a, eitur Vitamin tam chi leh changkang deuh an hrethei hle bawk.

Damlo kan nikhua in damdawi chawh mai an ching hle a, “Chupawh chuan a thatpui lutuk keipawhin..” tih angreng sawi tur an hre thei hle. Zing thawh hma an harsat tlangpui a, a hming maia Exer lak peih tak tak pawh an awm. Christmas nikhuain Fatu ah ruat an ni duh hle a, Kohhran Special Programme ah Refreshment ngaihtuah pawlah thú takin an awm duh viau bawk.

Mi chanchin an hrethei hle a, an rualpuite nen an inkawmkhawm hi chu tualchhung chanchinbu chhiar ai pawhin a bengvarthlak zawk. Insawiselna an neih deuh chuan Doctor an pan zung zung thin. Thuamhnaw satliah lei mai mai an ti vak lova, an lei ve țum chuan Sial tak an duh thin. Fiam leh kah an hlawh zin avangin a chhan dan turah harsatna an nei tawh lova, kum lama naupang zawk phei chu an chhaih lai let hlauh thin zawk.

An bialpa hlui ve deuh nupui ten an tluk bik lohna hi an in hrechiang hle a, an thian hnaitakte bula an sawi zin pawl a ni. An aia naupang fe zawk mipa in an hnimhnaih deuh hian lawm viau e ti lovin mi bulah chuan fiamthu kahpah tak takin an chhawnchhaih a, an khawhar hnemtu ber an ni tih hi a hrechiangtu ber an ni lawisi.

Pasal nei tura an indah chhinin an peih tawh lo hle a, neilo tura an indahin an ngaingam leh bawk si lo. Naute fa duat bik leh enkawl bik an nei duh a, chu chuan an thinlung chhung khawharna a sukiang chuang lo. Engpawh nise Senior raw sek sek, zawnglai nih hi a zalen a, a nuam bawk, thinlung chhungril ber erawh thup tum fo mah ila a famkim mawlh lo a ni.

Duhtawk phawt ang…

About Mizo Archive

I'm the one who collect the best writings of Mizos
Aside | This entry was posted in mizo archive, Thu leh Hla and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s