Lunglawn Chhiatna leh Pathian by RCa Jongte.

A chhanna ka nei bik lo, mahse he thu hi sawi a tul hle in ka hria; sei hle mah se i lo chhiar ve hram dawn nia; Lunglawn case lo ah pawh a pawimawh ve awm e.

“Engkim hi Pathian ruat vek a thleng a ni” tih te, “chhan nei lovin engmah a thleng lo” (everything happens for a reason) tih ang chi tawngkam, ringtuten rilru tha tak pu chunga kan hman fo te hi, hman fimkhur an tul hle in ka hria.

Lunglawn mi Pu Peka chuan zankhat thil thu ah a nupui, a pa, leh a fate pahnih chu vanduaina rapthlak vangin a chan buaih mai. Sawi ngaihna awm lo khawp a tuarna nasa a ni ngei ang. Chu thil rapthlak eltiang tuartu hnenah chuan “Pathian ruat a ni,” “a hmangaih vang che a ni,” “Pathianin i chhungte hi a hnena awm atan a duh ve tawh a ni,” “Lalpan zirtir duh che a nei a ni ang” tih hi kan sawi dawn em ni? “I nun in enfiah nan hmang rawh” kan ti ngam dawn em ni. Kan ti a nih chuan Joba thiante ho ang chauh kha kan ni ang. Pathian thlavang hauh kan lo tum ve na lamah leh kan sakhuana humhim kan duhna (rilru tha tak ni lawi si) avang hian kan Pathian chu tuarna tawpkhawk tuartu te tana biak zui tlak mang loh leh huatthlala ngawih ngawih angin kan chhuah hlauh thei a ni. Fimkhur a tha khawp mai.

A nih engtin nge kan hnem ang? Ka hre lo. Tuma’n a chhan kan hre tak tak lo. Hengte erawh hi chu kan hre ve – an tuar hi a rapthlak tih te, Pathianin a hmangaih tih te, he khawvel hi a la famkim lova sualin pawi nasa tak tak a la sawi thei a chuvangin Pathian hmangaihte chungah pawh hetiang thil hi a thleng thei. Hengte hi kan hriat chu a ni mai.

A chhan hriat vek tum bik tur pawh a ni lo (mihring mai kan ni; nakinah a la fiah ang). Nun insiamtha tura infuihna hun tha ber pawh a ni lo ang (chhiatna namen lo hmachhawn kher lova mi tam tak nun siamthata a awm lai a, an ni chu heti khawpa tuarna rapthlak hmanga siamthat kher ngai an nih chuan an va sual bik awm em em ve. Mahse kan fel bik lo tih kan hre kur si. Tin, Pathian pawh chuan hetiang khawpa tuarna rapthlak kaltlang kher lova an nun a siamthat sak thei lo a nih chuan a va ho awm ang reng ve?)

Kan hre lo a ni mai. Fapa pawh ui lova min petu hian min hmangaih tih kan hria a, chu hmangaihna leh hmangaihtu chu thim thuah sarih hnuaiah pawh rinna in kan vuan a, kan ban a, kan pan a ni mai. Chu bak tih theih tam tak kan nei in ka hre lo. Kan lungngaihna a lungngai ve thin Pathian, kan tuarna min tawmpuitu a ni tih kan hre bawk a. Chu Pathian tuarna tawpkhawk amah ngeiin lo paltang tawh tu chuan he hun thim rapthlak takah hian Pu Peka te hi a kalsan lovanga, an tuarna hi a tawmpui tih kan ring a ni.

He “theodicy” zawhna harsa lutuk, mi tam takin Pathian awm an rin loh phah chhan leh Pathian laka an hel phah chhan hi chuti lutuka awlsam a sawifel mai chi a ni lo. A chhan engmah chiang a awm lo chung pawhin rinnaa hmangaihtu Pathian ti a kan sawi thin, Pathian dik ni bawk a kha Joba angin vuan ila, chu chu kan tih theih leh kan infuihna tur pawh a niin ka hria. Midangte chuan kan lo tawngtaipui anga; kan taksa, kan hun, leh kan thil neih te kan theih ang angin an tan kan hlan bawk ang. Rau taka kan zilh hrepna ai hian ngawi renga an tuarna tawmpuia, an kianga awm ve a, an ruala kan mittui tla hian hna a thawk nasa ve fo a nia.

Hetiang hun hi sawi duah hun a ni lo. Sawi tur hre lova, ka hup a rum hun a ni. I vui duh chuan vui rawh (vuina tham a tling ve alom), i tuarna chhan hi i hriatthiam loh zia pawh Pathian hrilh rawh (a awm vek), mahse Pathian i rinna erawh bansan lo la, i hun tawng avangin Lalpan a kalsan che ah ngai hial mah la, a awm, mahse a kalsan lo ang che tih hi ka ring. Kalsan a i awm tawh ngai loh nan, a ni chu kros ah khan kalsan in a lo awm tawh zawk a ni.

About Mizo Archive

I'm the one who collect the best writings of Mizos
Aside | This entry was posted in Pathian Thu and tagged , , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s