Saiha night bus accident a rapthlak

Aizawl leh Siaha inkara tlan thin Night Bus (Colney) chu june 4, zanlai khan Pangzawl leh Rawpui inkarah chesualin a chhunga chuang mi 11 an thi a, hliam tuar mi 11 te chu Hnathial Damdawi In ah enkawl niin hliam na zual mi 4 te chu Serchhip Damdawiin enkawl an ni a, mi 3 te erawh chuan vanneihthlak takin hliam an tuar lo a ni.

He Motor neitu hi New Siaha-a Pu R.Zasanga niin Driver pahnih nen mi 29 an chuang a, Aizawl atanga Siaha pan a ni a, Pangzawl thlen dawn tep Km 2 vel, Bawlhhlawh paihna bulah vanduaina hi tawkin kawngthlangah metre 500 vel zet an lum a, a hmunah hian Driver TBC. Lalringzela kum 34 telin mi 9 an thi a, hliam na zual mi 6 te chu Serchhip damdawi In panpui niin heng zinga 2 chu Serchhip Damdawi In ah hian an hliam tuar lovin an thi leh a ni. Heng baka hliam tuar mi 11 te chu Hnahthial Damdawi In ah enkawl an ni a, an nunna a tana hliam hlauhthawnawm erawh an neilo hlawm niin Doctor-te chuan an sawi.

He chetsualna atang hian hliam na vaklo te chu vak chhuakin Pangzawl-ah zualko in an kal a, Pangzawl khawtlang mipuite chu inpun khawm nghalin chhanchhuah hna hi ruahsur avanga chet har tak hnuaiah theihtawp chhuahin tlaivar thakin an thawk a, mi tlawmngai ten an lirtheite thawhin hliamte chu damdawiin panpui an ni a, ruang lak chhuahte pawh Pangzawl khawtlang chuan kuang an siam sak nghal a ni.

Thi te hi –
Tharihnemi kum 15, New Saiha.
Thankimi kum 49 New Saiha.
TBC.Lalringzela kum 34 New Saiha.
Pu Lalropuia, Buhchangphai.
Hmeichhe pakhat a hming leh Address hriatloh.
Khushi MPRO Siaha.
Anita MPRO Siaha.
Lalrinpuii, Saiha Tlangkawn.
Micky-a Saiha PS.
H.Lalrokunga IR Bn. Constable, Bungkawn vengthar, Aizawl.
Norothanga kum 52 Zemabawk te an ni.

He chhiattawhna thleng hi Hnahthial Police ten an hriat vel leh SI K.Vanlalsanga leh a thiante chuan a hmunah kalchilhin an tih tur tul ang ang te tiin Hnahthial Group YMA leh Joint YMA hruaitu ten Hnahthial damdawiina hliam tuar dah te chukhawvar hma atanga buaipuiin a tulna apianga pui turin an thut chhilh a, Hnahthial Town VC Association pawhin mitthitehi puanin an tuam hlawm bawk a ni.

Disaster Management & Rehabilitation Minister Pu C. Ngunlianchunga chuan Colney Travels Night Bus chetsualnaa hliam tuarte leh thi te a tlawh a, DM & R Jt Director Pu Dolianbuaian a tawiawm a ni.

Pu C. Ngunlianchunga hian chhiat tawh thu an hriat rualin tukin khan Aizawl atangin Serchhip a pan a, Serchhip ah Pangzawl daia Saiha to Aizawl Night Bus, Colney Travels chetsualna avanga hliam tuar mi 6, Serchhip District Hospitala dahte a tlawh a.

Minister hian Serchhip Hospital a tlawh hnu hian Pangzawl lam a pan leh a, Pangzawl daia chhiatna tawhna hmun a tlawh hnuin Khuanghlum Community Hall a Pangzawl khawtlangin chetsualnaa thite ruang an dahna hmun a tlawh leh a. He hmunah hian thusawiin Minister chuan Nimin tlai lamah Lunglei Lunglawna leimin vanga chhiatna thleng te, nizan zanlaia Pangzawl daia lirthei chetsualna thlengte chu Zoram tan chanchin lungchhiat thlak tak nia a hriat thu a sawi a. DM&R changtu Minister a nihna angin nitin Pathian hnenah Mizorama chhiatna rapthlak a thlen lohna tura a dil thin thu sawiin, Mizoram sawrkar chuan heng chhiatna avanga nunna chante, hliam tuarte a tawrhpui tak zet tih a sawi bawk.

Pu C. Ngunlianchunga hian Mizoram a lirthei khalhtu zawng zawngte chu midang nunna vawngtu an nih thin zia hre nawn fo turin a chah a, chetsualna tam tak hi muang deuh zawk lehfimkhur deuh zawka lirthei khalhin a pumpelh theih a ni, a ti. Pangzawl khaw mipuiten tlaivar thaka hliam leh ruangte an buaipui hnua fel tak leh mawi taka an lo tuamhlawm vek chu fakawm a tih thu sawiin, khaw entawn tlak tak nia a hriat thu a sawi a.

Pangzawl daia Saiha Night Bus chetsual hun hi Bus a chuang te sawi danin zanlai dar 12:15 vel a ni a. Pangzawl khaw thlen hma km 2 velah kawng kual chhuak fel chiahin Bus hian Black Top chin bak feet khat vel lei pangai a rapa, he a lei rahna lai hi Telephone hrui phumna, chhilh that leh mumal loh feet khat vel dawna thuka rah luh theih; lei nem a ni a. Lei khuar an rah lai chuan Bus hi kawng thlang lamah a tlu ta nia sawi a ni.

About Mizo Archive

I'm the one who collect the best writings of Mizos
Aside | This entry was posted in Zoram Crimes and Accidents and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s