HEI CHAUH HI KAN HNAM ṬAWNG by Chhantea Pautu

Kan Hnam ṭawng humhalh duh zawng chuan lo ngaihven hram teh u. Ka ngen a che u! Kan Hnam ṭawng Mizo ṭawng hi ka ui dawn lutuk!

Zan khat chu ka naute pahnih an rawn leng hlauh mai a. Kan titi nasain Thu leh Hla lam pawh kan sawi kai nasa ngang mai. Ka lo hriat ve lem loh thil an rawn sawichhuak a, tak tak a ni em chu ka hre lo! Chu chu, “Tun ang zela Social Media-a kan Hnam ṭawng kan suasam a nih chuan, Zoṭawng hi kum 10 chhungin a boral hman ang’ an ti,” tih thu a ni! ‘Khawvel ṭawng boral mai tur sawm an thlanchhuah zingah a tel te chu an la ti ta deuh deuh! Tak tak a ni maw?

‘Social Media’ huanga kan Hnam tawng kan ziah duh dan: ‘i’ aiah ‘y’; ‘ng’ aiah ‘g’ ringawt; ‘mai’ aiah ‘mei’; ‘daih’ aiah ‘deih’; ‘paih’ aiah ‘peih’; ‘peih’ aiah ‘paih’ leh ’em em’ tih ang chi, thumal inang awm zawn aia ’em2′ hman te; ‘z’ aiah ‘x’; ‘ch’ tia ziah tur aiah ‘c’ ringawt ziah te leh a dang tam tak; a va han khawlh tak em! Heti anga ziah hi changkanna a ni lo na sa!

Kan Sawrkarin pawl ruk chin Sap ṭawng ngata lehkha zirtir a tum emaw ni? A va lungchhiatthlak em! Sap ṭawng hi kan Hnam pumpui hian ṭawng tuallengah hmangin, thiam vek mah ila, kan Hnam ṭawng a ni thei ngai dawn lo. ‘English ho hnam ṭawng’ a ni daih.

Kan ṭawng a boral rualin kan hnam a boral ve ang; chu chu kan duh em le!? Keimahni kan la damin, kan fate, Sap ṭawngin an ṭawng zat zat pawh a ni mahna; mahse, kan fimkhur loh chuan kan damlai reng hian kan Hnam a boral dawn!

Mizo thawnthu leh Mizo nau awih hlaa fate awih mut aia, Television-a Nursery Rhym chhuah saka awih mut thlang zawk nu leh pate rualawhna hi Hnam hmakhua ngaihthah rualawhna a ni! An lo lian ang a, Sap ho ngaihsan uchuakna an ṭhanlenpui zel ang! Naupan laia inhrual nan Mizo Zirna Sikul chawi lar leh ta zawk i la, English Medium chu an la dai tho tho dawn alawm. Mizo Hnam hian Mizo thawnthua fate awih mut nachang hria nu leh pa leh, Pathian thua fate chàwm puitling thei nu leh pa a mamawh leh ta e! He chona hi i chhang ngam dawn em!?

“A lo mak m i bialpa hi chu, ring toh miahsuh, keimah ah chauh i rilru i pe toh don nia…”

Kan Hnam tawng, ‘Mizo Ṭawng’ hi ka ngaisang bur mai a. ‘Inglis uart’ kan hmanlar thenkhatte pawh kan hawrawp ngata ziak hram thin ka ni! Entirna’n: ‘Welcome’ chu ‘Ualkham’ tiin. Facebook-a ka thu ‘paws'(tarchhuah) pakhatah, min ‘kawmen'(sawifiah) saktute zinga ṭhian pakhat chuan, “Ualkham awl’ hi eng tihna nge?” a rawn ti a. Inglis-a, “Welcome all” tihna mai mai a ni!

Kan Hnam ṭawng kalphung: ziak dan, hla rûa, ṭawng upa, thu zawmna mawi tak tak kan neihte hi ka ngaihlu! Humhalh zel ka duh; ṭawng awm sa tikhawbawlo zawngin ṭawng pawh ṭhangin, thumal neih belh ni rawh se!

“Hety tka kn tog kn pogsual xel cun, kn hnam kan gahtuahom duh wm e mei; dik taka xiah a tha deih xwk!”

“Heti taka kan ṭawng kan ‘pawngsual’ zel chuan, kan Hnam kan ngaihtuahawm duh awm e mai; dik taka ziah a ṭha daih zawk!”

Khawi ziak dan khi nge i Hnam tawng ziak dan atana i thlan!? Hnam dang ṭawng, kan ṭawnga a awmzia phawk zo chiaha kan ngaih loh, kan ṭawng ang maia kan chulnel ṭhenkhatte hi, kan hawrawpa ziakin kan ṭawng thumal pakhatah(riten language) la lût ve hlauh teh ang u!

Patling, hmel phanchang pui tawh te, tlangval hmel pangngai ve fû si-te, an ‘propic’ han en a, hna pangngai tak thawk ve niawm taka lang, kum lama chhiara puitlinga chhiar ve theih mai tawh si te’n, khiti anga Mizo ṭawng an han suasam hi chu, inkawmhlimna(social media) pawh nise pawmzam a harsa tlat thin! Hmeichhia chu…sawi lo zawk teh ang!

‘y’ hi english alphabet-ah chauh a awm a, hman dawn chuan english hlanga ziah mai chi! Mizo hawrawpah a tel lo!

‘O’ hi english alphabet-ah leh Mizo hawrawpa awm kawp a ni a, a hman dan erawh a inang lo hulhual. ‘O’ hi ‘aw’ anga hman dawn chuan english hlanga thu chu ziah law law chi. Mizo ṭawng ziah dan dikah, ‘tawh’ hi ‘toh’ a ni lo…ldt

Mizo hawrawpah, ‘g’ ‘c’ ‘w’ te hi kawppui(n, h, a) neia hman thin a ni! Mizo ṭawng ziah dan dikah, ‘chuan’ hi ‘cuan’ a ni lo va, ‘ngai’ hi ‘gai’ a ni lo va, ‘awm’ pawh hi, ‘wm’ a ni thei lo!

An hmel ena puitlin hmel fû fû, ka mipatpui te’n; heti ang, naupang, ṭawng dik hre mumallo awm duhdah thu ziah ang leka dik lo va kan ṭawng(Mizo ṭawng) an han ziak ṭhin hi chu- ka lo zak zawk ṭhin! Inkawmhlimna(social media) hi, ‘A mai mai,’ kan tih rual chiahin, kan hnam ṭawng tidazattu a ni mêk!

Dik tak zelin aw ni ang; kan hnam tân.

About Mizo Archive

I'm the one who collect the best writings of Mizos
Aside | This entry was posted in Fifth Column and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s