PASTOR VANGIN US LEH TURKEY AN INHMU THIAMLO CHHO TAN TA : TURKEY-IN US BUNGRUATE A HRENSAK TA HMIAH !

Nimin 4 Aug. ah Turkish President Racep Tayyip Erdogan chuan, US thungrulh nan Turkey rama US Justice Dept thil neih, bungruate chu hrensak (freeze assets) turin thupek a chhuah ta. “Kan thiante nen kan dawhtheihnain a tlin ta lo. Turkey rama US Justice Dept thilte reng reng chu che thei lova hren sak turin kan ti a ni. US hian kan ram rorel phung an hre lo a ni. Inzah pahna awm hauh lova, hetianga thiltih hi kan duh lo a ni” tiin, “Ha aiah ha” (tir-for-tat) tih hmanga US an thungrulh dan chu a sawifiah a ni.

Ziak tawh thin angin, North Carolina state Pastor-Missionary Andrew Brunson (50) chu ni 600 chuang Turkey ramin, “Helhote tanpui a, firfiaka chetna thlawptu” tiin, jail ah a khung reng a, thla kalta khan a chungthu relsakin kum 25 tang turin an ti zui a ( a tirah phei chan kum 35 tang tura tih a ni). Brunson hi kum 22 zet Izmir khawpuia lo khawsa tawh a ni.

Trump Admin chuan Pastor Brunson a thlavang hi na zeta hauhvin, President Donald Trump, Vice President Mike Pence leh Secy of State Mike Pompeo pawhin “Pastor Brunson chhuah zalen thuai rawh u” tiin, an phutin an ngen chamchi a, mahse, Turkey hian ring tikhawng lui ve tlatin, an chhuah duh bik si lo. US-in hremna (sanction) pekah vauvin, a tawpah jail atanga la chhuakin, “House arrest” in an dah zui ta a, chumi hnuah US chuan Turkish Justice Minister Abudullahit Gul leh Interior Minister Uleyman Soylu te chu mawhphurtu, tiin a hrem zui a, chumi chu huain Turkey hian US lakah phuba a rawn la chho tan ve ta a ni.

President Erdogan chuan US hi vauin, “NATO rama inthawh pui tha leh chak ber inchanin, inhloh thei a ni” tiin, NATO chhuahsanah a vau a ni. US hian Cold War laiin Soviet Union ep nan, Turkey ah Nuclear Warheads 50 dahin, US pawhin Military Base a nei a ni.

Turkey hian kum 2006 a St. Petersburg hmuna din BRICS tih, Brazil, Russia, India, China leh South Africa ram ten West ramten World Bank leh IMF an thunun tlat duh lova, a do chhoh nana an din chu zawm ve a tum niin an sawi ta bawk. BRICS hi kum 2010 ah South Africa ramin a zawm veleh a ni.
BRICS ah hian khawvel mihring 42.58% a huap a, khawvel ram (land, sea) chu 26.46% zet an luah bawk. Turkey ramin BRICST a siam chuan US leh EU ramin economy ah a tawrh ring, experts zingah an awm a ni. Turkey hi khawvela GDP thang chak ber zinga 17na ni mekin, World’s Economy thaah Top-10 awm tumin hma an la chho mek bawk.

Turkey hian Russia leh Iran chu Syria ah thawh puiin, Syria ram inrelbawlnaah hmun a chang thuk hle. Tunah Russia siam anti-aircraft missile tha leh tunlai ber S-400 Triumf chu US$ tluklehdingawn 1.7 man vel lei a tum a, hei hi US-NATO ram ten an sawisel a, mahse, inbiak fel tawh a ni.
US Congress chuan Turkey hnena fifth generation jet fighter F-35 hralh an tum pawh a cancel fel ta bawk. NATO chuan Turkey chu a pet chhuak dawn nge, Turkey in a chhuahsan zawk dawn a hriat rih loh. NATO member ram 29 zingah Muslim ram awm chhun a ni.

“Choak arawn chang tawn” ang deuhvn, NATO rama Turkey awm teh tlat hi a inmil lo tipawl awmin, an “value systems, world-view, perspectives” inanglo deuh thin a ni. NATO hi Muslim moderate-secular ni thinin, President Erdogan-an kum 15 dawn a hruai hnuah, Islamic deuhvin an inkaihruai chho zel a, Erdogan hian 21st Century “Ottoman Empire” din chhohva, “Sick-man of Europe” tih thin chu tihdam a duh rilru te pawh a ni mahna!

Author : CT Lalrinawma

About Mizo Archive

I'm the one who collect the best writings of Mizos
Aside | This entry was posted in World News and tagged , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s