SLASH- G’N’R GUITARIST CHANCHIN

Slash han tih tawh hi chuan sam kir bepbup, dawithiam lukhum khum, a sam kir buk kara, a meizial pet hmel leh a Guitar pherh lai mitthla ah a lo lang nghal ngei awm e. A thiam em em a, kei chauh lo pawh hian a chanchin hi an ziak nasa a, an kur pui a, kei aia a music hre zawk leh a thiam zia keiaia sawifiah thiam tam tak an awm ngei a. Chung karah chuan mahni insit tak chungin ka rawn thai ve leh a nih hi!
.
A chanchin kan sawi tur, khawvel Guitarist ropui Slash tih a, khawvel in a hriat hi, a hming tak chu Saul Hudson niin, July 1965 tahrik ni 23 ah rimawi tum thiam leh hla phuah thiam tak ni turin, Hampstead, London ah a lo piang a. Unau mipa pahnih nei tel in, naupang te a nih laiin a nu leh pa te an inthen a. A pi leh pute bulah khawsa in, nu leh pa kuangkuah loh tih tak ah a nungchang pawh a tha vak lem lo hle.
.
Khawvel hriat a hlawhna ber chu kum 1980 tawp lam leh kum 1990 tir lama, Guns N’ Roses band hlawhtlinna leh ropuina ram a chuan kaipuitu te zinga mi leh band zinga lar ber pahnih zinga pakhat ni pha ve ngat a ni bawk. Hetia Guns N’ Roses ban a tel chung hian Slash’s Snakepit band din in, Matt Sorum leh Mckagan ten a pui bawm bawk.
.
Kum 1996 ah GnR atanga a tih tauh chhuah hnuin Velvet Revolver band din leh in, hetah pawh hian Matt Sorum leh Mackagan te chuan an pui ve leh bawk a. A bikin heng mi pathum te hian in pawhna nasa leh an music duhzawng in anna chuan a then hlawm hlei thei lo a ni ber mai.
.
Slash hian ama pualin, a Guitar solo album Slash (2010), Apocalyptic Love (2012) leh World on Fire (2014) te chu zaithiam hrang hrang Adam levine, Fergie, Dave Grohl, Chris Cornell, M.Shadows te puihna in a lo ti chhuak ve tawh a ni.
.
Slash hian chawimawina ropui tak tak dawng in, Kum 2009 a TIME magazine in ‘Khawvel Electric Guitarist Thazual 10’ a thlanna ah, pahnihna dinhmun a hauh a. Rolling Stones Magazine pawh in an mahni pual a, mi 100 an thlan chhuahna ah 65 na a hauh ve bawk. November Rain a, a Guitar Solo chuan ‘ 100 Greatest Guitar Solo’ thlanna ah parukna dinhmun a luah pha bawk.
.
Hei mai bakah hian chawimawi tarlan seng vek loh a dawng hnem em em a, chung zinga mite ngaihhlut ber leh dawn har tak erawh kum 2012 a, Rock and Roll Hall Of Fame a, an lakluh hi sawi hmaih chi a ni hauh lo ang.
.
Kum 1979 a nih chuan, tleirawl Slash leh a thianpa Steven Adler te chu an hunlaia music genre lar Rock music chuan a chiah hneh ve hle a ni ang.An mitthla ah mipui hma a, Aerosmith an chet ropui theih zia te an ngaihtuah a, chutiang ram chu thlen ve chak in, an thinlung tui a hal a, an titi pui ve leh an muthilh theih lohna ber pawh a ni ta ve ang. Band han din te an tum thin a mahse a tak ram erawh an thleng hlei thei thin lo.
.
“Thinlung a khatliam chu kâ in a sawichhuak thin” tih ziak ang deuhin, band din chakna chuan Slash a thinlung ah reh lam aiin, zual lam a pan zel a, chuti ta ngang chu tiin, a pi thih dawn a, a pi hnen atanga a dawn Guitar hrui khat chauh nei tawh chu la chhuak in, Guitar pherh a zir țan ta a chuta tang chuan, Slash a thawnthu chu a lo in tan ta a ni.
.
A tirah tak chuan, a thianpa Steven Adler chuan Guitarist nih a duh tlat vangin, Slash chuan Bass Guitar an zir ren rawn a, mahse thil ni tur hi chu tuma dan theih a lo ni hauh lo, a rimawi zirtirtupa Robert Wollin chuan The Rolling Stones hla ‘ Brown Sugar’ mawi lutuk tak mai a, a pherh leh a zut vel a hmuh chuan Slash a thinlung a thlak chiang hle a, a rang a rangin Guitar zir a țan leh ta nghal a. Heta țang hian khawvel in Guitarist ropui tak kan lo nei in, kan lo hmel hriat theih phah ta a ni.
.
A HUN HMASA :- A band hmasa ber ni turin kum 1981 ah Tideus Siloan chu a zawm a. Chumi hnuah Motorhead hla ‘The Road Crew’ hming chawi in a thianpa Steven Adler nen an din dun a ni.
.
Chu a band dinthar chuan bassist an mamawh thu tualchhung chanchinbu ah an chhuah a chutah Duff Mckagan lo langin, a thiam ngang a ni ang, khel lovin an band ah an la lut ta nghal a ni. Tichuan vocal tur zawng lehin mi thahnem tak an enchhin a, chung zingah chuan Black Flag Vocal Ron Reyes pawh a tel ve bawk.
.
Chutia an vocal duhthusam an hmuh tak lohah chuan an band din tun pawh chu a thuanawp zui ve leh ta a. Tichuan, a hnu reiloteah amah Slash leh a thianpa Adler chuan tualchhung band pakhat Hollywood Rose vocalist tha lutuk Axl Rose leh Guitarist tha ve tho Izzu Stradlin te chu an thian dun chuan an fin ve leh ta bawk a. He Hollywood Rose a tel chhung hian Black Sheep band ah tel pahin, Poison band Guitarist nih tum viau mahse hnawl a ni ta bawk.
.
Hollywood Rose atanga Guns N’ Roses lo pian dan chu post hmasa lamah kan tarlang tawh a, Guns N’ Roses band anga hlawhtlinna an chan chhoh dan pawh, an album kan thlirbing hunah thai lan tum ta ila.
.
Tunah chuan 1994 ah GnR din a nih hnuah a bandmate Matt Sorum a puihna in, Gilby Clarke leh Eric Dover te an band pakhat Slash’s Snakepit tih chu GnR band a awm chungin an din a. Album pakhat siam hman in, ‘It’s Five O’ Clock Somewhere’ tih chu February 1995 ah an release a, maktaduai chuang hralh a ni.
.
Kum 1996 ah Gn’R tang bangin, Kum 1999 ah Slash chuan Slash’s Snakepit chu tuai thar leh in, Rod Jackson, Ryan Roxie, Johnny Griparie leh Matt Laug te nen band an khai nung thar leh a, an album pahnihna ni turin, kum 2000 October ah, ‘Ain’t Life Grand’ chu Koch Records hnuaiah an ti chhuak ve leh a, a hralh chhuah kawngah an album hmasa an pha lo nasa hle nghe nghe. Kum 2002 ah he band hi an ti tawp zui ve ta.
.
Kum 2002 ah chutia Slash’s Snakepit an darh takah chuan Randy Castillo hriatrengna hun hmanna ah an thian pathum Mckagan, Matt Sorum te chuan play ho leh in, Guns N Roses hunlaia an inpawhna te leh an in unau te thar thawh lehin an thianpa dang Izzy Stradlin sawmin VELVET REVOLVER band chu an din leh ta a.
.
A hma an band din dawn apianga an buaina thin, vocal an duh tui na lutuk chuan buaina a tawh tir leh ta a. Zaithiam tam tak an enchhin a, duhthusam reng an hmu thei lo. A tawp a tawp ah, chawhthubarawh takin, Stone Temple Pilots Vocal hlui Scott Weiland an la lut ta ringawt a ni.
.
Kum 2003 ah, Velvet Revolver anga concert tam tak an neih hnuin, an hla hmasa ber ni turin ‘Set Me Free’ chu an ti chhuak a. Chumi hnu, kum 2004 ah an album hmasa ber ni turin ‘Contraband’ chu mipui ngaihthlak theih turin an ti chhuak ve leh ta a, hralhna kawngah pawh an chhe lutuk lova, maktaduai hnih dawn lai chu an hralh ve bawk.
.
Velvet Revolver anga tour an neih vawihnihna kum 2007 July thla ah an album pahnihna ni turin, ‘LIBERTRAD’ chu an ti chhuak leh bawk. Kum 2008 March thla ah an vocal Scott Weiland chuan band anga an tour hnuhnung ber tur a ni tawh thu a sawi chhuak ve ngawt mai a, a hnuah ban a tawk nghal nghe nghe a ni. Scott Weiland chuan a band hlui a zawm ve leh nghal bawk.
.
Kum 2010 ah Velvet Revolver chu tuai thar tum sa teh mahse vocal duhthusam an hmuh zawh tak loh avangin leh member ten tih tur tam tak an nei ve bawk si avangin Velvet Revolver chu a lo chawl leh ta rih a ni.
.
Kum 2015 December ah Slash a kir leh tur thu chu ri ret ret a awm țan a, chu thu chuan tualchhung chanchinbu phek hma a luah leh ta kulh mai. Guns N’ Roses chuan DJ Ashba an ban leh bawk si avangin Slash a kir leh tur thu chuan mite ngaihven a hlawh zual hle nghe nghe. Tichuan kum 2016 ah Slash leh Duff Mckagan an Guns N’ Roses an zawm leh tih thu chuan khawvel a deng chhuak chiang hle bawk. Intai, inti thiam lo tawh inzawm khawm leh an ni bawk a, rei pawh rial tawh lovin, Tour nei nghal in, an tour hming ah ‘Not in this Lifetime’ vuahin, classic rock band in reform tha leh tour ah chuan mipui ngaihhlut ber a la tling a ni.
.
Mimal Chanchin tlem:- Kum 1992 October tahrik ni 10 ah, model leh film chan thiam Renee Suran nen Marina Del Rey, California ah innei in kum nga chhung hmangaih biahthu an in hlan hnuin, 1997 ah an hmangaihna a lo daih zo ta a, an inthen ta a ni. Chumi hnu, kum 2007 ah, Perla Ferrer nen, Tiam Tlat E ti leh in, fa pahnih London Emilio leh Cash Anthony te an nei a, rei ngial an inthen hnuin, Kum 2010 ah inkawp tha leh in, kum 2014 ah an inthen ve leh ta a ni. Hemi hnu hian, a vanglai ngaihzawng thin Meegan Hodges nen an inkawp ve leh bawk.
.
Kum 2011 ah kum 46 mi Slash chuan natna khirhkhan tak Lung lam natna veiin, he a natna hi zu leh meizial a lo tih nasat tawh thin em avanga nei a ni tih ama daktawr te’n an sawi bawk.
.
Thla tam tak, damdawiinah awm in thih hlauhthawn awm khawp leh a mar chauh en chang te a awm a, chutiang khawp thih sualin awm mahse, chu natna chu hneh in a lo dam chhuak leh ta a ni.
.
Kum 2009 ah a nu chu chuap cancer in a chan a, chumi vang chuan a duh ber leh a fawh ngun tak, a nupui leh fate aia a fawh ngun zawk Meizial a nghei phah bawk a ni.
.
Rockstar leh guitarist ropui, naupang lai atanga nunchang tha nei lo, pa rorum leh chapo tak ni mahse, vantlang tan tha a thawhhnem em em a, vantlang mi tangkai hial tih a sawi pawh a hlawh bawk. Nungcha leh Ramsa te humhalhna kawngah tha leh zung tam tak sengin sum pai tamtak a thawh bawk.
.
A thianpa Axl Rose nen an inkar chhia, mite sawi thin chu a dik vek thu leh an inkarah boruak chhia a awm ngei a ni tih a pawm a. Nimahsela, natna khum a, a awm lai te, a nu vuina ah te a thianpa a lo lan ve zel avang leh a thianpa lak atanga a hmangaihna dawn zo zai te avang chuan an inkar boruak a that tawh thu a sawi bawk. Hei vang pawh hi a ni ang nge,Slash a tel ngei a, Not In This Lifetime Tour pawh an lo neih theih ni.
.
Chhiartute helai chen min chhiar chhuah sak avangin ka lawm em em e. Guns N’ Roses ngaisangtu dik tak i ni ngei a ni tih a ti lang hle bawk a ni.

Author: Lal Awmpuia Andronik

About Mizo Archive

I'm the one who collect the best writings of Mizos
Aside | This entry was posted in Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s