SMS VANGIN LIVERPOOL CHAK

Liverpool 4-0 West Ham
🏆 Premier League
🏟️ Anfield
⚽ Salah (19′)
⚽ Mané (45’+2′, 53′)
⚽ Sturridge (88′)

Kum 2018-19 English Premier League season bulṭanna atan Reds in Hammers an lo mikhual a, mikhual hlahkhem/hlahthlem nachang an hre lem lo!

Liverpool tan #Salah, #Mane leh #Sturridge te goal khung point 3 hmuhna atan a tawk a. Season ṭan hmaa pundit te leh fans te beiseina kha beiseiawm a nihzia an nemnghet.

Inkhelh zawhah ṭawngkam thiam leh sawi tur dik, a hun leh hmun taka lo sawi fo tawh ṭhin Jurgen Klopp chuan Liverpool in West Ham an sawpzi chu “Ka beisei phak baka ṭha a ni..” ti te tein a team te chu season khirh uchuak takin a hmuah thua an phur lutuk tur khap zui nghalin, “West Ham hian season ṭha tak an hmang chho dawn tih a chiang reng a, mahse United an ni lova, City an ni lo… Kartin chona hmachhawn tura kan inrin luha kan inrin chhuah at reng a ngai tih kan hria..” tiin a naute a warning zui nghal..

Klopp hian sawizawm zelin, “Ka naute kha an khel ṭha hlawm vek mai a, Milner leh Wijnaldum te field laia che tla hmuhnawm uchuak zia kha! A ṭha thei ang berin vawiin khan kan khel a, pre-season kan hman ṭhat Premier League ah kan chhawm lut a ni..” tiin a warning na vanga a nauten pressure an neih phah lohna turin a cho phur zui..

Klopp hian a sawi sual lo. An coach thar hnuaia an inrem fuh hunah chuan West Ham hi an khirh ve fat fat khawp ang. Hman ang khan ngaihthah thiang club an awm tawh kher hek lo ang. Sum a tam miau mai a kai thar Fulham leh Wolverhampton te pawh sum hmang Top 10 ah an lang nawlh thei.. Premier League a inham tan hian lukhawng a neihzia an chiang a, tlâk leh nghal an tum lo.

Liverpool hi tun nipuia sum hmang tam ber an ni ve khiah a, mahse West Ham tan chu chu chhuanlam a tling lo. A hmang tam 5na an ni a, khawvel coach lar an ruai thar bawk. Hei erawh a chiang, an hmasawn dan first match ah lang zo lo mahse tun season hian a la hril khawp ang. Liverpool ber kher an bul ṭanna a ni a, anni lamin insiamṭhat an lo la zo fel tawk lova, an vanduai takzet ti pawhin a sawi theih ang. An player te kha a mal malin en la, West Ham hi ngaihnep thiang an nih lohzia i chiang khawp ang.

Kum 1932 hnulama Top Flight football opening match, home-a an khelh ṭuma an chak chianna ber ni turah Mohamed Salah chuan Andy Robertson cross tawk tiu teu tak mai, a hmun dik taka awm a, a hun dik taka rawn tlanin awlsam takin minute 19-na ah khungin Liverpool hma a hruaipui a. West Ham in chance mumal nei thei turin darkar chanve chuang an duh a, mahse Alisson thin tiphu khawpin tlar hma an talna zo lo!

£66.8m man Alisson tan Fabian Balbuena tauh luh tum awlsam taka a save bak kha hna harsa a awm lem lo a, a man a phu leh phu loh fiahna a hmachhawn rih lo.

Goal dang awm lovin first half a tawp dawn nia a lan hnuah Milner taihmak rah zar zovin line bul aṭanga rem leh rem lova Milner in a cross luih chu Mane tan hlah chi a ni lo. Net a puar leh ta pawp e!

Second half ṭan a nih hnu lawkah Lines Refree tlanchak zar zovin Mane in a khungbelh! Firmino in Mane tana ball a pek khan Linesman kha a line dik ni se a phar va va tur hi a ni a, last defender zawn ni lovah, Mane hmalamah a tlan khalh miau mai si a, phar hek lo ta chu Mane in inher pahin a shot nghal zat a, a goal leh ta! West Ham keeper thar Lukasz Fabianski tan a runthlak duh khawp ang, a debut hmel tibal zualtu mai a ni ta si!

£50m man, field laia a che vel kha in lo hmu em!? Palian a ni lova, ball thiam over tia sawi tur a ni lem lo. Mahse a dik fai vel vek a che reng reng kha! RB Leipzig aṭanga Naby Keita la tura Klopp in kum 1 teh meuh a lo nghak thei kha a lo mak lo! Salah goal pawh kha a thawhrah a nih piah lamah, Steven Gerrard in jersy no 8 ha chunga a tih ṭhin Liverpool team khalhtu ah a rawn ṭang nghal! Keita in no 8 a lo ha hi a va fuh leh zel em!

Hun tawp dawn lamah Sturridge a rawn lut a, an puin “Pre-season hman ṭhat Premier League ah kan chhawm lut..” a tih theihna chhan pakhat ni turin Pre-Season a goal khung reng mai Sturridge hian mual chhungah second 24 a awm hman ṭawk tihin a first touch ah goal a khung nghal!

Hun a tawp zui tâkah chuan Liverpool in Premier League ṭan a nih aṭanga an vawi 500 chakna hmel an hmu zui!

West Ham hi si 4 fai ṭhahin chak lo mahse an tan a zahthlak hran loh! Season hmasa a tlar hnung buai ber zinga mi an nih piah lamah Coach thar enkawl an ni a, an la insawhnghet hman lo. Chu mai ni lovin an bitum Liverpool tlar hma 3 Salah, Firmino leh Mane te lah an goal khung theih leh theih loh zawh buai ngai miah lova hriat sa, nikum Liverpool goal 135 zinga 91 zet thawhtute an lo ni ve leh zel bawk nen.. An hun tawngin a zir lo a ni zaw ber..

West Ham tan an captain Mark Noble a langsar fal nalh a, area a cover zauin Hammers player pass ngah ber a ni bawk. Felipe Anderson sawi hmaih a thiang lova Arnautovic kha thlah zalen vak chi a nih lohzia a chiang.

West Ham Chilean manager Manuel Pellegrini in tlarhnung hnawhpui chunga attacking game an khelh tur thu hi a taka a hlen thei a nih chuan Hammers hi tu tan maha tum nuam an ni lo thuai ang.. Lo chik mah rawh.. An manager thar leh player 9 an lakluh thar te hian danglamna an la thlen dawn khawp.. Chuvangin West Ham tlawmna hi Liverpool tan tehfung a hman chi a la ni lo..

Mahse, Liverpool fans tan chuan team danglamna kha hmuhhmaih phal a har khawp ang. Xherdan Shaqiri, Jordan Henderson leh Sturridge te bench aṭangin an lo lut ta a, chuti chung chuan Adam Lallana leh Fabinho te an la awm cheu ta chu a nia! First XI te an inhliam palh hlau zek zeka kan awm ṭhinna kha hman ni mai a la ni. Bench kha a pan thei em mai a, fans tan mai pawh ni lovin player te tan pawh pressure a siam lo thei lo! Bul ṭanna fuh tak zawng a ni chiang..

Chak lohna nena a team thar bul ṭanpuitu Chilean Coach Manuel Pellegrini a huaisen a, thil nihna a pawm ngam. A player lakluh thar 9 zinga 5 – Fabianski, Ryan Fredericks, Balbuena, Felipe Anderson leh Jack Wilshere te start tir mahse 4-0 in an tlawm a, chhuanlam a siam lo.

“Game khelh hma, khelh lai leh khelh hnuah pawh a harsa ngang ngang teh e. Champions League final thleng thei an ni a, player thar an lakbelh nual bawk a, a harsa dawn tih kha chu kan hre sa reng a ni. Chak an phu a, si 4 faia chak lo tan chhuanlam tur a awm lo e..” a ti hmiah!

Wilshere leh Anderson te kha a bikin player tawnhriat ngah tawh leh player chhe lo tak an ni a, mahse Liverpool lakah an team thar tan an nihna pholang khawpin an la tal thei lo ve bawk a, Hammers vanduaina belhchhahtu mai an ni deuh reuh!

MATCH LEH A CHHEHVEL RECORD!
⚽ BBC lam chuan game tluan maia hlauhawm reng mai Sadio Mane kha Man of the match nih phu an ti a, target shot vawi 2 a neih te goal ah a la chantir ve ve zui bawk a, a awm ving veng viau!
⚽ Tottenham lamin Stoke laka a zawna an intum hnuhnun match 4 a goal 4 an thun tlin theih vek tih lovah Liverpool hi chutiang ti thei leh hmasa ber team an ni a, Hammers tan erawh record duhawm lo vawnhimna match a ni! Premier League bul ṭannaah vawi 12 an chak lohna a ni ta a, anni aia chak lo tam an awm lo.
⚽ Manuel Pellegrini tan pawh a lawmawm bik fahran chuang lo. Premier League-a a team ngam loh ber chu Liverpool hi an ni chiang (P7 W2 D0 L5). Liverpool tluka a team enkawl hneh nguntu an awm lo.
⚽ Liverpool a zawm hnuah Mo Salah hian Hammers chu a ngam bawk! Vawi 3 a hmachhawn tawhah goal 5 ah zuk inrawlh pek a! (Goals – 4, Assist – 1)
⚽ Salah hian Anfield a Premier League match 20 a khelh tawh aṭangin goal 20 a thun ta der mai!
⚽ Premier League a vawi 50 inlanah Salah (35) aia goal thun tam thei mi pahnih chiah – Andrew Cole & Alan Shearer – awmin anni hian match 50 ah goal 41 an thun ve ve
⚽ Sadio Mane in goal a khung leh tâk avangin 1989-90 season aṭanga 1991-92 season thleng opening match a Liverpool tana goal khung ziah John Barnes a hnulama season 3 a zawna opening match a goal thun ziah thei leh hmasa ber a ni.

FIAHNA HMASA!
Liverpool hian Dt. 20th August, 2018 (Thawhṭanni) zanlai dar 12:30 (Sana ah chuan Thawhlehni zing a ni hman tawh zawk mah!) ah an hneh loh leh khut ṭhin, an tum apianga Liverpool fans thinphu a ran ziahna Crystal Palace an va luhchhuah dawn a. Hei hi Liverpool tan fiahna hmasaah a chhiar theih ang.

2013-14 season khan Home ah 3-1 a hnehin Away ah 3-3 in an draw a. 2014-15 season ah Home & Away ah Palace hi 3-1 in an chak ve ve a, 2015-16 season ah erawh Liverpool 2-1 in Home & Away ah an chak ve ve leh thung a. 2016-17 season ah Away ah Liverpool 2-4 a chakin Anfield ah Palace hian 1-2 in an rawn hneh ve leh a. 2017-18 season ah erawh Liverpool chak ve vein Home ah 1-0 a chakin Away ah 1-2 in an va chak a. Vawi 12 an intum tawhah Liverpool hi vawi 7 zet chak mahse Palace hi vawi 4 lai an chak ve tawh tlat! An in draw mawh khawp mai a, match 12 aṭangin vawi 1 chiah an la in draw!

Eng pawh ni se, i thlir zel phawt mai teh ang..

#YnWa #Kolasib_Reds

Advertisements

About Mizo Archive

I'm the one who collect the best writings of Mizos
Aside | This entry was posted in Sport News and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s